2 यहुन्ना 1 - पहाड़ी महासुईढाल 1 हाऊं स्याणौ यहुन्ना इऐं चिट्ठी परमेश्वरा रै चुनी ऐन्दी छ़ेउड़ी ज़ुण आमारी विश्वासी बौइण आ और तिंआरै लोल़डेऊ लै लिखाऊ। (कैलैकि आमै सारै परमेश्वरा री सौच़्च़ाई ज़ाणी ई) ज़ासकु हाऊं सौच़्च़ी प्यार कौराऊ, सिरफ हाऊं नाईं बल्कि सारै भी प्यार कौरा ई, ज़ुण सौच़्च़ाई ज़ाणाई। 2 सै सौच़्च़ाई ज़ो आमुदी बौणी रौआ आ, और सौदा आमु आइलै रौआ आ। 3 बाबा परमेश्वरा रै छ़ोहरु यीशु मसीह री तौरफा कु बौड़ी दया और कृपा, शान्ति, और सौच़्च़ाई और प्यार आमु आइलै रौआ ई। सौच़्च़ाई और प्यार 4 हाऊं भौरी खुश हुऔ कि मुंइऐ तैरै कुछ़ लोल़डै तेस हुकमा कौरी, ज़ो आमुकै बाबा री तौरफा कु मिलै थै, सौच़्च़ाई माथै च़ालदै देखै थै। 5 आबै ओ बौइण, हाऊं ताउंलै कोई नौंवौ हुकम नाईं, पर सेई ज़ो पैहला ओउलै आमुकै आ, तेस लिखाऊ। और ताऊं कु औरज़ कौराऊ कि आमै एकी दुजै कु प्यार कौरा। 6 प्यार एऊ आ कि आमै तेसरै हुकमा माथै हाण्डा। इयौ सेज़ौ हुकम आ ज़ो तुमुऐ पैहला कु शुणौ आ, और तुमुऐ एथ माथै हाण्डणौ भी च़ांई। मसीह रै बिरोधिऊ रै धोखै कु खौबरदार 7 कैलैकि भौरी इणै बहकाउणै वाल़ै धौतरी दी आशी गौऐ, ज़ुण इणौ नाईं मानदै कि यीशु मसीह शरीरा रै रुपा दी आशौ। बहकाउणै वाल़ै और मसीह रै विरोधी इऐ ई। 8 आपणै बारै दी च़ोकस रौऔ, कि ज़ो मैहनत आमुऐ की ई आ तिऐं तुमै गवांएऊ नाईं, पर तेथरौ पुरौ इनाम पाएऊ। 9 ज़ुण मसीह री शिक्षा पोरु छ़ाड़ा आ और तेथदी बौणी ना रौउंदौ, तेसकै परमेश्वर नाईं आ। पर ज़ुण तेसरी शिक्षा दी बौणी रौआ आ, तेसकै बाब भी और छ़ोहरु भी आ। 10 अगर कुण तुमु काऐ आशा लौ और मसीही री सौच़्च़ी शिक्षा नाईं दिया लौ, तेस ना ता घौरा कै आशणै दैऔ और ना तेसकै ढाल कौरौ। 11 कैलैकि ज़ुण-कुण इणै लोगु अपणावा आ, सेऊ तेसरै बुरै कामा दी शामिल औआ आ। आखरी ढाल 12 मुंइऐ भौरी बुशै तुमुलै लिखणी आ, पर कागज़ और स्याई कौरी लिखणौ नाईं च़ांहादौ। पर मुकै आश आ कि हाऊं तुमु काऐ आशाऊ और आमनै-सामनै बुशै लाआ ऊ, ज़ेथ कौरी तुमारी खुशी पुरी औआ। 13 परमेश्वरा रै छ़ांटी ऐन्दी इदै तेरी बौइणी रै लोल़डै ताऊं लै ढाल बोलाई। |
This work is licensed under Creative Commons Attribution-ShareAlike 4.0 License.