FILEMOÑ 1 - Kalate Zambe Nnomo a Mfefe Mfefé Nkôñelan

Môt a tili kalate a mebatan

¹ Paul, mone mimbôk, amu ajô Yésus Krist, bia Timôté bi too, mojañ, ma tili Filémon, ébe mbo ésaé ma dañe nye'e, Afia, kale jangan,

² Arkipe, ébe mone bezimbi a keké é wô'ô sulane *nda jôé.

³ Mvam é bo'o be mia a *mvo'é, bi so'o be Zambe Esaa wongan, a e be Nti Yésus Krist.

⁴ Ma ve Zambe wom akéva, éyoñe ma tote wo biyoñe bise meye'elane mam été,

⁵ amu ma wô'ôtane nye'an a mbunan ô bili be Nti Yésus, asu mimfufube mise.

⁶ Nyoñane ngabe wôé ajô mbunan, ô bo'o beta mvolan. Liti'i mvaé ése bi ne ngule ya bo amu Krist.

⁷ Beta avak a mvolane *nlem bi kuiya be ma. Amu nye'ane wôé, a mojañ, ô veya minlem mimfufube ngu.

Paul a ye'elan ajô Ônesime

⁸ Nalé fe na, akôsa bo me ne fili ya jô wo jam wo yiane bo amu Krist,

⁹ ma viane yene mvaé, e nye'an été été, na me lôme wo de ane nsili. Yaa Paul, nyô a ne nnôme môt, ma, nyô a ne mbôk amu Yésus Krist éyoñe ji,

¹⁰ ma ye'elane wo ajô mone wom, nyô me nga biaé mimbôk été, Onézime.

¹¹ Nye a nga too wo teke mvolane melu mvus, a éyoñe ji a ne bia beta mvolan. Wo, aval ane ma.

¹² Ma beta wô nye lôm, nyô a ne nleme wom ôbien.

¹³ Me mbe nguleya ba'ale nye bebé be ma, ane a ne volô ma señe jôé, vôme me ne mimbô'ô va amu ajô Mbamba Foé.

¹⁴ Ve me nji kômbô bo jam éziñ teke nkañesane wôé.

¹⁵ Ndô'ôtô Onézime a nga kandane wo nté éziñ, nde a ye su'ulane bulane be wo nnôm éto.

¹⁶ Ve saa fe aval ane *ôlo, ve a dañ *ôlo, monyañe ya nye'an. A ne fe ma avale te. Abim avé a ye dañe bo nalé mfa'a wôé, éyoñ e ne na, a ne môt a buni.

¹⁷ Ve nge e ne nalé na, wo nyoñe ma ane monyañe ya mbunan, nyoñe fe nye ane mamien.

¹⁸ A nge a nga bo wo *abé éziñ, nge na a bili wo mvôla, lañe je mfa'a wom.

¹⁹ Mamien, Paul ma tili a wo wom ôbien, ma ye ya'an. Me nji kômbô bo wo ô simesane na, womiene fe ô bili ma mvôla. A ne ajô dôé womien.

²⁰ Jé, a mojañ, volô'ô ma amu Nti. Va'a nleme wom ngule be Krist!

²¹ Amu me too ndi a mewô'ô môé, nde ma jibi tili. Ma buni na wo ye bo a dañ abime ma jô.

Mebendé a mebatan ma su'ulan

²² Nalé fe na, kôme me vôme ya tabe. Ma buni fe na amu meye'elane menan, nde ma ye yene *mvam asu denan.

²³ Epafra, ébe nyoñe ngabe ya mbô'ô wom be Yésus Krist a batane wo,

²⁴ nalé fe Mark, Aristark, Démas a Luk, beébe bebo bisaé bam.

²⁵ Mvam Nti Yésus Krist é tabe'e be mia.