Luka 1 - Ɓwaatiye New Testament

Mgbaalə dor malɨmtɨnə

¹ Makpane Tiyofilus, ɓwaare hananang ɓərə gə təna dorshe a nə shee Həmɨnpwa a ɗa a wakasəm.

² Mi kwaməte naa shingɨn ka diingrən vədə nəngrən gəkɨlə təna bwe ləngɨn, tənə pɨri boyenə ləməgingɨn.

³ Hɨn mgban na nza a nidə shingɨn kpəkəkə dɨ tiyatə. Gə-angɨn makpane Tiyofilus, na niyə ɓə wula na doru shee kat ɗa, a sherəku də ləməgingɨn tərəng-tərəng,

⁴ gəkɨlə hye leyə mbak-mbak atɨ, ləməgyee mya boyo kat diyalə.

Malyene a hiwa ka mwasaa Yohana

⁵ A nzata Hiridus, hama Yawudiya, a kɨsahəmə da Həmɨnpwata Yawudeti nə də, mya dɨ wa atɨ Zakariya, a saare da kɨsehəmye, a mgba kɨsahəmaa mya wa atɨ Abija. Mesən Alisabatu nə dɨ kwirə kɨsehəmye a saare da Haruna.

⁶ Tən dɨ kpeyə mi pepeyi a humwaa Həmɨnpwa, təna dɨ koddə gɨrahaa Həmɨnpwa a və Musa pepe.

⁷ Ɓə tən, taa ji kaarən, gə Alisabatu jinti, tən kat tən iiragə mwasatə.

⁸ Lyentə ɓe taka shi saare da yə Zakariya, mya nggɨltən kɨsahəmə gə lyentə a Shafe.

⁹ Ite ta koɗə kwalə nggɨl kɨsehəmye da Yawude, mya nggɨltən gə hamatə ka sɨ ɨhɨng-ɨhɨngye a Shafe.

¹⁰ Ite sɨne a Shafəngɨn dɨ hama ka sɨ ɨhɨng-ɨhɨngye, ɓwaare kat a kanggə haa bwange ta ɗa hiwtə, ta kularən.

¹¹ Də a hangɨn a vor Shafe malyene da Həmɨnpwa a dɨma ka Zakariya, a kangə gyenge, a basa zɨməngə kɨritə.

¹² Ite Zakariya a nan, haa a gən vut, ka kala.

¹³ Malyene a san, “Zakariya, ɓe kala aa gu, Həmɨnpwa kɨl hiwte hye dɨ ɗa. Mesa Alisabatu ɓa mwasəw nze, kwaka hye ɓa ɗɨkən nə Yohana.

¹⁴ Haa ɓa nɨngu hye ndarangə ka mwasasən, sə mgban haa ɓa nɨngə imi hananang gə ləngɨn.

¹⁵ Nzanga ɓa gəə ma tikɨsə kɨr-kɨr da Həmɨnpwa. Ndaa dɨ ga sop vwe, ka sa kat dɨ ɗɨkdə ɓwaara nda kpasə, gə ka wapsən Pitɨ Ɗəmɗəmtə ɓa janga a nəngɨn, a nza ɓwaa kan.

¹⁶ Mi Israila hananang, a myee ɗeyi, ndi ɓa viriwadərən a haka Həmɨnpwatɨ darən.

¹⁷ Sɨnə nzə-fwa humwatə a ɓa luwo Həmɨmiye kwamətə, sɨnə ɓa koɗə mbwayi kpale da Həmɨnpwa a mya wa atɨ Iliya kat ka gətɨ dan. Ndi ɓa gwadə sɨnggə je ta ɗyanga ka jingrən a nidərən təna mɨna a peyə a gə hiɗə. Myee mgbɨləha ɗaka Həmɨnpwa mgban, yedingrən ɓa mɨna a banga a tɨfe, təna mɨna a haka Həmɨnpwa gə lyenta Yohana.”

¹⁸ Zakariya a ɗiyə malyene atɨ, “Na ɗa ya na ɓə leyə atɨ la hye boyo ɓa nzasə? Gə hɨn iira, meshi mgban iira.”

¹⁹ Malyene a luwa a san, “Hɨnə Jibɨrailu, na duwa kangə haka Həmɨnpwa gə lyentə. Ndi lyanari a hakəw ka lə fema nə.”

²⁰ Gə tee mwadiyale ka lanə na boyu, gə-angɨn mgban tee ɗiyə mba byele baa fəra mya mwasa nzəngɨn kan, də kormi ɓa naa a fəra mya kənə.

²¹ Myee kanyi dɨ kula Zakariya a ndələ ka sa ɗa nda ɓə ɓwanga a vor Shafe.

²² Ite nda dɨma, ndaa mba byele ka ɓwaare, ndi ta ɗyefi ka tɨfəngɨn. Də təna leyə atɨ ɓə naa haa a vor Shafe.

²³ Ite bətɨ lyentɨ dan a Shafe ɓe naa, nda mɨnə hwoɗye.

²⁴ Aa ɓongə, mesən Alisabatu a ɗɨm waptə, ngga gbə nəngrə a hwoɗye lyekətye tuf.

²⁵ Ngga sa, “Səfema Həmɨnpwa a ɗe a porigə sopye a wulakenə ɓa ɗa ɓwaare aa diyə ushiri.”

Malyene a hiwa ka mwasa Yesu

^26-27 Həmɨnpwa a lyana malyene dan Jibɨrailu a haka rikite mya wa atɨ Maryamu a vɨrate mya wa atɨ Nazarat a njiya Galili. Itɨngɨn lyekəti wapta Alisabatu nee tukoltaka. Maryamu tɨngɨn nə mura mya wa atɨ Yusufu a tiyagərə ɓa ɗɨmə. Yusufu nə dɨ kwirə Dawuda.

²⁸ Malyene a pɨra a wunakarə, nda sarə atɨ, “Həmɨnpwa nee kəw, luu fukatə hye mate Həmɨnpwa a vu humwa-shengtə a wulakəw, na Həmɨmiye a gə ɓwaa kəw.”

²⁹ Le a ɓwa Maryamu, kala a gərə ka ləməgyee malyene a boyo, ngga ndələ ka naarə ləngɨn.

³⁰ Malyene a sarə atɨ, “Maryamu, ɓe kala aa gu, hye ɗɨm humwa-shengtə a haka Həmɨnpwa!

³¹ Hye nee ɓa ɗɨm waptə, a mwasa nze, kwakɨngɨn nə Yesu.

³² Ndi ɓa gə ka fukatə kɨr-kɨr taa mbati kaarə, mya warən atɨ Nze da Həmɨnpwa ndi Həmɨ gətə kat. Həmɨnpwa ɓa fukadə həmne dan a koɗə kwirə Baagən Dawuda.

³³ Ndi ɓa ɗa həmne a nə hwoda Yakubu kat, həmne dan ɓa nza kaaru-kaaru.”

³⁴ Maryamu a ɗiyə malyenəngɨn atɨ, “Na ɗa ya na mwasa nze, a taa ndaga lee mure?”

³⁵ Malyene a luwarə atɨ, “Pitɨ Ɗəmɗəmtə ɓa janga a nanga, gətɨ da Həmɨnpwa ɓa takada. Gə-angɨn nza hye ɓa mwasa nzə-ɗəmɗəmə, mya warən atɨ Nze da Həmɨnpwa.

³⁶ Zə niyi, kat ka iirata nji-nuwogu Alisabatu, a ite jinti ka ɓongtə, kote ɓəgəng ka waptə lyekətye tukoltaka.

³⁷ Taa asə də gbaagə Həmɨnpwa ka ɗatə.”

³⁸ Maryamu a sa malyene atɨ, “Hɨn kɨsata Həmɨnpwa nə, sa nda kana ke kat na a nzasə.” Də malyene a ɗakarə a muɗə.

Maryamu a zə haka Alisabatu

³⁹ Mya bə aa ɓongə, Maryamu a maɗə tan-tan a muɗə itɨ vɨrati a wake mogi Yawudiya.

⁴⁰ Ngga zə a pɨrə hwoda Zakariya a wunaka Alisabatu.

⁴¹ Naya Alisabatu ɓe kɨla wunakaha da Maryamu, nza a yedingrə a rɨfə, Pitɨ Ɗəmɗəmtə a janga a nə Alisabatu.

⁴² Alisabatu a maddə kormɨngrə a sa, “Həmɨnpwa bɨlu pepetə pɨrgə mbiɗiti mandye kat, nzaa hye ɓa mwasa mgban Həmɨnpwa ɓa bɨlən pepetə.

⁴³ Mɨnə na gəwnə! Də nuwogə Həmɨnpwatɨ de a shike ka pepetə.

⁴⁴ Ite na kɨla kormi wunakaha dəw, nzanə a yedi a rɨfə ka hanɨngtə.

⁴⁵ Pepeta Həmɨnpwa nee kəw, gə hye mwadiyale ka ite atɨ Həmɨnpwa ɓa naadə la nda boyu!”

Dimsə ɓondiha da Maryamu

⁴⁶ Maryamu a sa, “Hɨnə dɨ ndukodə Həmɨnpwa ka huboshi hiɗə.

⁴⁷ Hɨnə dɨ ɓondi Həmɨnpwa Nzə-mbəshi,

⁴⁸ gəkɨlə ndi ɗyanga ke hɨn kɨsatɨ dan ite aa tɨl asə, gəngnə vɨratə kat ɓa leyə atɨ Həmɨnpwa fukadi.

⁴⁹ Gə Həmɨ gətə ɗe sə kpane, ndi Ma ɗəmɗəme.

⁵⁰ Nda dɨ ɗa purutɨ myee dɨ kalan-gbəətə a nzatɨrə kaaɗəng dɨma a nzatɨnə ɓəgəng.

⁵¹ Ɓə ɗa sə kɨr-kɨre, myee ka ndukodə ne, nda dɨ gbatarən kat ka ɗyengle darən, təna woyo hyeɗə-hyeɗə.

⁵² Nda dɨ hyata həmye a jangadərən gə ruutə, myee hyata nəngrən mgban nda nggɨrdərən a pwa ɓətɨ həmi.

⁵³ Myee ka myatə, Həmɨnpwa a dɨ vərən sɨzɨmtə, nda om ji-gɨnətə təna pwal tyefingrən a muɗə dɨ payya.

⁵⁴ Həmɨnpwa a dɨ ɗyanga ka kɨse dan tən mi Israila a gwadərən, nda dɨ ɗa purusərən,

⁵⁵ ɓətɨ nda boyə yə sɨnggəm lanə a nzadən kaaru-kaaru, a tən yə jigəm Ibɨraim ka myee dan.”

⁵⁶ Maryamu a ɗa lyekətye mwaakɨn a haka Alisabatu ngga ɓə mɨnə hwoɗye.

Mwasa Yohana nzə-ɗa batisɨmatə

⁵⁷ Ite lyekəti mwasata Alisabatu ɓe kənə, ngga mwasa nzə-mure.

⁵⁸ Ite ji-vɨnəgərə kat ka myee darə ɓe kɨl lə ɗate Həmɨnpwa a ɗa purusə, təna ɗa hanɨngtə.

⁵⁹ Beetɨ bətə fwa-fwat, təna shi ka nze gə lakəwne. Tən mwo atɨ təna ɗɨkə nze kwake ka kwakɨ baagən atɨ Zakariya.

⁶⁰ Də nuwogə nze a sa atɨ, “Ə'ə, a mya warən atɨ Yohana.”

⁶¹ Təna sarə atɨ, “Taa ndəng ma a vor myee dəwnə ka wule kwaka atɨ Yohana.”

⁶² Təna ɗiyə baagə nze le ka tefingrən, ɓətɨ byelə gbenyi, gə təna lee kwaka nda dɨ mwo atɨ ɓwaare a wa nze kan.

⁶³ Zakariya a ɗilə sa ndi ɓa dorshe a nəngɨn, ite mya vən nda doro atɨ, “Kwakɨngɨn nə Yohana.” Ɓwaare a ndələ ka ləngɨn.

⁶⁴ Də a hangɨn jiimə Zakariya a para, kwaamɨngɨn a wunə, nda tiya byele ta ɓondi Həmɨnpwa.

⁶⁵ Kala a gə ji-vɨnəte a bətɨ hangɨn kat, ka sa ɗa. Ləngɨn a ngguro a mbəgə mogi Yawudiya.

⁶⁶ Myee kɨl ləngɨn kat a Yawudiya a ndələ, təna ɗiyəsə atɨ, “Ɓə ndawulasə nza ɓa pasaa?” Gə Həmɨnpwa nee ɓwaa kan!

Zakariya a ɓondi Həmɨnpwa ka kpaltə

⁶⁷ Pitɨ Ɗəmɗəmtə a janga a nə Zakariya nda tiya kpaltə.

⁶⁸ Ndi ta sa atɨ, “Ɓondiyəm Həmɨmiye, Həmɨnpwata mi Israila, nda shi gələ nda luwa myee dan.

⁶⁹ Həmɨnpwatɨ dam və miye Nzə-mbəha ndi ma ka gətə dɨ kwirə kɨsa dan Dawuda,

⁷⁰ ɓətɨya nda boyo dɨ kwaamɨ kpali ɗəmɗəmye dan kaaɗəng,

⁷¹ atɨ ndi ɓa mbədəm gə tɨfə ji-nyaagəm ka ji-kwo nəngəm.

⁷² Gəkɨlə angɨn ndi ɓa ɗa purutɨ yə sɨnggəm ka səfeme gə nda ɗyanga ka kɨləsətɨ ɗəmɗəmte nda ɗa kaarən kɨnɨnɨng.

⁷³ Sə nda boyə yə jigəm Ibɨraim a nzadən,

⁷⁴ atɨ ndi ɓa mbədəm gə tɨfə ji-nyaagəm. Də mye ɓa kalan-gbəətə aa ka kala,

⁷⁵ ka hubosəm ɗəmɗəm ka pepete taa mbati kaarə.

⁷⁶ Hye nze de mgban, mya wara atɨ kpale da Həmɨnpwa. Hyenə ɓa luwo Həmɨmiye kwamətə gə hye ɗadə tɨfe dan.

⁷⁷ Hyenə ɓa boyo myee da Həmɨnpwa atɨ tən ɓa ɗɨm mbətə tən kana por-njiya, Həmɨnpwa ɓa nggurərəngə səhase darən.

⁷⁸ Gəkɨlə mwoha da Həmɨnpwa ka fyemtɨ dan ɓa ɓɨrə nəngəm ɓətɨ fərə fɨlati,

⁷⁹ ka myee nza vor fyemi we, a vor kulitə, ɓɨrtə ɓa takaa dərən a zə kaarən a daatɨfə myentə ka ɗoltə.”

⁸⁰ Yohana a nduko a tɨl ɓwaara, a pɨrə humwa ka lele. Nda nza vor kaake a dɨmə fəra Həmɨnpwa a lyentən a haka mi Israila.