Eyobo 1 - Bibilia Buk na Ŋun nagon koti luŋu a

Eyobo a tema i yupet nanyit

¹ Koju ’beron lele ŋuto kata i jur lo Osa, karin kanyit a Eyobo, ŋilu ŋuto a loke ko a lo rigwo. Lepeŋ kukujono Ŋun ko maman kulya narok.

² A lepeŋ gwe ko ŋwajik lulyan buryo se ko nawate musala.

³ A nye gwe ko köbilu alipan buryo, ko kamilojin alipan musala, ko öwönin aliŋ geleŋ logon a toraki gwolor kase i muruto anyen kuŋu murek murek, ko kaineki nawate miajin mukanat, se ko koliponok jore parik. Nyena a ŋilu ŋuto gwe a kwörinit parik Iwolwoŋ ŋutu liŋ ti swot lo ’yure.

⁴ A ŋwajik kanyit worojine i nyesu na rorwe kase i midijik geleŋ geleŋ temba i kiyukan kase, a se soŋdi luyökie i luŋgu na kiasirik kase musala i nyesu ko i möju ko se i pirit na geleŋ.

⁵ A nagon perok kase ti rorwe aje lwöggu nu, a Eyobo luŋgi lepeŋat a tiŋdi se i toke ’ya na ’borik a nye ŋine ŋien i kwökö a wukiŋdye rubaŋgajin lo ’yu ’yura ’buluŋ gwoso i kenet nase liŋ; kogwon Eyobo a kulya adi kode ŋona ŋwajik kanyit aje toroŋdya ko a renya ŋun kase i toilyet. Nyena a nye yeŋe koŋdya sona.

⁶ Lor lele ŋwajik ti ŋun a momoraddu ko MATAT i komor, a Satani köti lo ’duröki kase kiden.

⁷ A MATAT pipije Satani adi, Do po ya? A Satani nyobbi adi, Nan wörö abur i swötön liŋ ti kak.

⁸ A MATAT pipije Satani adi, Do ŋona a timun köliponit lio Eyobo? Lele ŋuto ’bayin i kak ni gwoso lepeŋ, logon a ŋuto loke ko a lo rigwo, ko kukujonö nan ko maman kulya narok.

⁹ A Satani waddi pija MATAT adi, Eyobo ŋona kujono do ŋun ko kana le?

¹⁰ Do ŋona a ko rikija mariŋ nagon lopakiŋdya lepeŋ kiden ko ’baŋ nanyit se ko ŋo liŋ nagon a kanyit le? Do aje ’boroja kita na könisi kanyit, a toro ’bo kanyit iŋge ŋdi i jur.

¹¹ Ama soŋinana Riörö könin ilot i konakiŋdya na ŋo kanyit liŋ nene ŋo, a nye de lömbi do a lokomor.

¹² A MATAT kulyani ko Satani adi, Mete, ŋo kanyit liŋ gwon konut i könisi; ama tuŋ an do ko konakin lepeŋ nene ŋo. Nyena a Satani iti kaŋo ko MATAT i komor.

¹³ A gwe sona i lele lor, i diŋit nagon ŋwajik ti Eyobo lulyan se ko nawate nyenyesu ko möju yawa ko kayu lose kadi nu,

¹⁴ a lele kölipönit lonyit lo ’duröki ko Eyobo yu, a kulyani adi, Dwönin kulu dika gwon i kuŋu se ko kaineki nyenyesu kase nyona;

¹⁵ a ŋutu ti Sabea ’dorone i ryaggu na se, a iŋge rereme kayukuk ti toro ’bo; a nan geleŋ lo rwösuŋdye i takiŋdya na do.

¹⁶ A nagon nye nyuŋ jajambu nu, a lele lo ’dure, a kulyani adi, Kipya lo ki a peja, a iŋge ’yur köbilu se ko kayukuk, a totumbe se; a nan geleŋ lo rwösuŋdye i takiŋdya na do.

¹⁷ A nagon nye nyuŋ jajambu nu, a lele lo ’dure, a kulyani adi, Teŋon musala ti ŋutu ti Kaledea a ryakaddu kamilojin, a lepeŋat iŋge rereme kayukuk ti toro ’bo; a nan geleŋ lo rwosuŋdye i takiŋdya na do.

¹⁸ A nagon nye nyuŋ jajambu nu, a lele lo ’dure, a kulyani adi, ŋwajik kulok lulyan se ko nawate dika gwon i nyesu ko i möju na yawa ko kayu lose kadi;

¹⁹ mete, a köbuŋöt duma wukuŋdye wukuŋdyo mu ’diŋ, a do doŋgi goŋesi inwan ti kadi ko riŋit, a nu kadi iŋge ’doro ko teton se ko kö ’disi loki, a se iŋge twatwa; a nan gelen lo rwosuŋdye i takiŋdya na do.

²⁰ A kirut Eyobo nine ŋien, a kereŋdi boŋgo nanyit muit, a ’bariŋdi kwe nanyit, a ’dorone kak, a kwakwaddi kwakwaddu,

²¹ a kulyani adi, Nan a yuŋwe a limu kana koyaŋgo i pele, a nan mo yitöni a limu kana. MATAT lo tiŋdu ko nye lo ’dumaddu; ti karin ti MATAT purani pura.

²² I kine ŋo liŋ Eyobo a ko toroŋdya kode pokiŋdyo Ŋun toron.