Amosa 1 - Bibilia Buk na Ŋun nagon koti luŋu a

¹ Kilo a kulyaesi ti Amosa lele lo kayukuk ti Tekowa. Kilo kulyaesi po ko lepeŋ i po nagon a kweki lepeŋ kanyit i toili i kulya ti Yisaraele i kiŋajin murek i ŋerot na rigirigi. I ŋinu diŋit Ujiya a mor lo Yuda, a Yerobama ŋuro lo Yöasa gwe a mor lo Yisaraele.

² A lepeŋ kulyani adi; MATAT maraŋgu Siona, a gworo lonyit kuörö kaŋo Yeru-salema. A piriton na yuggi kayukuk yidin kase kune nopara nopara, a Karmela teteyone teteyon i loki nanyit.

³ MATAT lo kulya adi, Nan mo tine lopuk riŋet, kogwon Damaseke a koŋdya aka toronjin jore; kogwon ŋutu kanyit aje jojogga ŋutu ti Gilada ko witiot jojokesi lo jijiko.

⁴ Nyena a nan mo gubakiŋdye kadi na Kajaele kimaŋ, a mo ’yuŋe kadijik ti Benadada ti tumatyan.

⁵ A nan mo ’be ’beleŋgi rigilesi ti kotumiton ti Damaseke, a mo tukaŋi ŋutu lo si ’da i pirit na ’dir na Awen kulo, se ko nye lo morga ture lo tumatyan i Bet-eden. A ŋutu ti Suria mo joŋani Kir a ’dupi. Kilo a kulyaesi kwe ti MATAT.

⁶ Nan MATAT lo kulya adi, Nan mo ti lopuk riŋet, kogwon Gaja a koŋdya aka toronjin jore; kogwon ŋutu kanyit a joŋga ŋutu lio ti jur a ’dupi, a wukiŋdye se ko ŋutu ti Edom i konisi.

⁷ Nyenaa nan mo gubakiŋdye kimaŋ i gorom nagon a mariŋ na Gaja, a mo ’yuŋe kadijik kanyit ti tumatyan.

⁸ A nan mo tukaŋi ŋutu lo si ’da Asedoda, se ko nye lo morga ture lo tumatyan Asekelon yu. A nan mo konakiŋdye Ekron arabat, a ŋutu ti Pelesete mo tine pituŋdyö kwoŋ. Kilo a kulyaesi kwe ti MATAT.

⁹ Nan MATAT lo kulya adi, Nan mo tine lopuk riŋet, kogwon Turo a koŋdya aka toron-jin jore; kogwon ŋutu kanyit a wukiŋdya ŋutu liŋ ti jur ko ŋutu ti Edom i konisi, a se tine yeye tomoret nagon se a torukökin anyen gwon a luŋa-sirik na.

¹⁰ Nyena a nan mo gubakiŋdye kimaŋ i gorom nagon a mariŋ na Turo, a mo ’yuŋe kadijik kanyit ti tumatyan.

¹¹ Nan MATAT lo kulya adi, Nan mo ti lopuk riŋet, kogwon Edom a koŋdya aka toronjin jore; kogwon ŋutu kanyit a rikoddu luŋasirik kase ko baŋdujin, a kölökiŋdye won na konyen lio, a woran nase purioro ki a tine ko ’yu, a se ’de ’yi ŋoma nase ŋupi.

¹² Nyena a nan mo gubakiŋdye Teman kimaŋ, a mo ’yuŋe kadijik ti Bosera ti tumatyan.

¹³ Nan MATAT lo kulya adi, Nan mo ti lopuk riŋet, kogwon ŋutu ti Amon a koŋdya aka toronjin jore; kogwon se aje kikilija ŋutu wate na gwon ko pelela Gilada yu, anyen se tugalaŋgu lokökorit lo jur lose.

¹⁴ Nyena a nan mo mokakiŋdye kimaŋ i gorom nagon a mariŋ na Raba, a mo ’yuŋe kadijik kanyit ti tumatyan. A i ŋilu lor a ŋutu mo sirani sira i pirit moriet, a kobuŋot wome ko libibiu wukun-dye wukuŋdyo.

¹⁵ A mor lose se ko ŋutu kanyit temejik mo joŋani a ’dupi. Kilo a kulyaesi kwe ti MATAT.