Марк 2 - Аллагьасул Калима

2 бетӀер ГӀисаца сахлъизавула палижалъ ккурав чи

¹ Чанго къоялдасан ГӀиса нахъеги Капернаумалде вачӀана. ГьебсагӀат гӀадамазда лъана гьев рокъове тӀадвуссун вукӀин.

² Гьесухъе бачӀараб халкъалъул гӀемерлъиялъ нуцӀикӀалтӀацин хутӀун букӀинчӀо гӀадамазе чӀезе бакӀ. Гьезие Рохалил хабар бицунев вукӀана ГӀиса.

³ Гьебмехалъ ункъояс восун гьениве вачӀана палижалъ ккурав цо чи.

⁴ КӀалтӀе ракӀарун рукӀарал гӀадамазул гӀемерлъиялъ ГӀисада аскӀове восизе санагӀат ккечӀелъул, гьев вугеб рукъалъул тӀохги бичун, гьениса гъоркье биччазе ккана унтарав тӀад лъураб турут.

⁵ Гьел гӀадамазул божи бихьун, ГӀисаца унтарасда абуна: – Мунагьаздаса вацӀцӀалъана, дир вас, мун!

⁶ Гьенир гӀодор чӀун рукӀарал цо-цо диниял гӀалимзабаз пикру гьабуна:

⁷ «Аллагьасде гӀасилъунцин гурищ гьав вугев? ГӀицӀго Аллагьасда гурони, лъида кӀолеб инсанасул мунагь чуризе?»

⁸ ГӀисада гьебсагӀат лъана жиндир хӀакъалъулъ гьезул гьединал пикраби рукӀин. Гьездехун вуссун, ГӀисаца абуна: – Щай нужеца нужерго рекӀелъе гьединал пикраби риччалел?

⁹ Кинаб бигьаяб: унтарасда «Мун мунагьаздаса вацӀцӀалъанилан» абизейищ, яги «ТӀаде вахъун, дурго турутги босун, вилълъанхъейилан» абизейищ?

¹⁰ Амма нужеда лъан букӀа: ГӀадамил Лъимадул ихтияр буго гьаб ракьалда гӀадамазул мунагьал тӀасалъугьун тезе, – янги абун, ГӀиса унтарасдехун вуссана: –

¹¹ Дица дуда абулеб буго: тӀаде вахъа, дурго турутги босун, рокъове а!

¹² Ралагьун гӀадамалгун гьев чи гьебсагӀат тӀаде вахъуна, жиндирго турутги босун, къватӀиве уна. Киназго хӀикмалъун Аллагьасе рецц гьабуна. Гьез абулеб букӀана гьадинаб иш киданиги бихьичӀилан.

ГӀисаца Левий муридлъун восула

¹³ Гьениса къватӀиве вахъун, ГӀиса нахъеги Галилеялъул ралъдахъе ана. Гьенибеги тӀолабго халкъ бачӀана гьесда хадуб. ГӀисаца гьезиеги гьабуна вагӀза-насихӀат.

¹⁴ Нухлул хӀакъ бакӀарулеб бакӀалда гӀодов чӀун вихьарав Алфейил Левий абулев гьеб ишалъе тӀамурав чиясда цевесан унаго, ГӀисаца гьесда абула: – Дида цадахъ вилълъа, – ян. Вахъун ГӀисада цадахъ уна гьевги.

¹⁵ Гьале Левийил бакӀалда кваналев вукӀана ГӀиса. Гьесда ва гьесул муридазда цадахъ гӀодор чӀун кваналел рукӀана гӀемерал магъало бакӀарулел чагӀи ва цогидабги мунагь-хӀакъалъул агьлу. ГӀисада цадахъ ругезда гъорлъ гӀемер рукӀана гьеб тайпаялъул гӀадамал.

¹⁶ ГӀисада аскӀор гӀодор чӀун кваналел гьел рихьидал, фарисеязул диниял гӀалимзабаз гьесул муридазда абулаан: – Магъало бакӀарулел чагӀаздаги цогидаб мунагь-хӀакъалъул агьлуялдаги цадахъ квана-гьекъон вукӀине бегьилищ гьав?

¹⁷ Гьеб рагӀун, ГӀисаца гьезда абуна: – Сахазе гурев тохтир хӀажалъулев, унтаразейин. Аллагьасде руссине муъминзаби ахӀизе гуро дунги вачӀун вугев, мунапикъзаби ахӀизейин.

КӀал кквеялъул хӀакъалъулъ

¹⁸ ЯхӀял муридазги фарисеязги кӀал ккураб заман букӀана гьеб. АскӀоре рачӀун гӀадамаз ГӀисада гьикъана: – ЯхӀял муридалги фарисеязулалги кӀал ккун ругеб мехалъ, гьал дур муридаз щай кӀал кколареб? – абун.

¹⁹ ГӀисаца гьезда абуна: – БахӀарав аскӀов вугебгӀан мехалъ, гьес берталъе ахӀарал гьудулзаби квана-гьекъечӀого кӀал ккундайха рукӀинел? БахӀарав аскӀов вугебгӀан мехалъ гьез кӀал кквезе бегьуларо.

²⁰ РачӀина бахӀарав гьезухъа вахъун арал къоялги, гьеле гьел къояз кквела гьез кӀалги.

²¹ Лъицаниги баларо басрияб ратӀлида цӀияб рукъи: цӀияб букъулаго басрияб бихъун ина, каратӀги дагьабги кӀодолъила.

²² Лъицаниги тӀоларо басрияб рахълъеналъубе цӀияб чагъирги. Гьелъ рахълъен багьизабула, гьебмехалъ чагъирги рахълъенги хола. ЦӀияб чагъир тӀезе ккола цӀияб рахълъеналъубе.

Шамат къоялъул хӀакъалъулъ

²³ Пуланаб шамат къоялъ ГӀиса унев вукӀана цо хурзабахъан. Гьенисан унаго, ролъул тӀорал ретӀизе лъугьана гьесул муридал.

²⁴ Гьебмехалъ фарисеяз ГӀисада абуна: – Балагье шамат къоялъ гъоз гьабулеб бугеб жо: Мусал къануналъ гьабизе гьукъараб иш гьабулеб буго.

²⁵ ГӀисаца гьезда абуна: – Унго, киданиги цӀаличӀебищ нужеца, живгоги цадахъ рукӀаралги рес къотӀун, ракъун хутӀидал, Давудица щиб гьабурабали?

²⁶ Бищунго кӀудияв кашишлъун Абиатар вугеб заманаялда, Аллагьасул рокъове жанивеги лъугьун, гьениса босун Давудица жинцагоги кванан буго, цадахъ рукӀаразеги кьун буго гӀицӀго кашишзабаз гурони кваназе гьукъараб чед.

²⁷ Цинги ГӀисаца гьезда абуна: – ГӀадамал шамат къоялъе гӀоло гуро рижун ругел, шамат къо гӀадамазе гӀоло бижун буго.

²⁸ Гьединлъидалин шамат къоялъулги ихтияр ГӀадамил Лъимадухъ бугеб.