Марк 1 - Јаҥы Кереес

Крестеечи Иоанныҥ јарлыктаганы

¹ Кудайдыҥ Уулы Иисус Христостыҥ Сӱӱнчилӱ Јарыныҥ башталганы.

² Јарлыкчылардыҥ тӱрбегинде бичилгениле: «Бат, Сенеҥ озо ангелимди ийип јадым, ол Сениҥ јолыҥды белетеп койор.

³ Куба чӧлдӧ кыйгырган кижиниҥ ӱни бу: Кайраканга јол белетегер, Оныҥ јолдорын тӱс эдигер!»

⁴ Иоанн келген, куба чӧлдӧ улусты крестеп, јарлап јӱрген: «Эткен кинчектеригерди таштазын деп, Кудайга баштанып, креске тӱжӱгер».

⁵ Ого ончо Иудей орооны, Иерусалимниҥ ончо улузы келип, кинчектерин ачып турган. Иоанн олорды ончозын Иордан-сууда креске тӱжӱрген.

⁶ Иоанн тӧӧ тӱги кийимдӱ, тере курлу болгон, јиген ажы – аспан ла јер адаруныҥ балы.

⁷ Ол јарлап, айдып јӱрген: «Кийнимнеҥ менеҥ чик-јок кӱчтӱзи келедири. Мен эҥчейип, Оныҥ ӧдӱгиниҥ буузын да чечерине турбазым.

⁸ Мен слерди суула крестегем, Ол дезе слерди Агару Тынла крестеер».

Иисусты креске тӱжӱргени ле ченегени

⁹ Ол кӱндерде Галилей јериндеги Назареттеҥ Иисус келди. Оны Иоанн Иордан-сууда крестеди.

¹⁰ Бу тарый, Ол суудаҥ чыгып келеделе, теҥери ачылып, Агару Тын Оныҥ ӱсти орто кӱӱле чилеп тӱжӱп јатканын кӧрди.

¹¹ Теҥеридеҥ ӱн чыкты: «Сен Мениҥ сӱӱген Уулым, Сенде Мениҥ јакшылыкту табым».

¹² Бу тарый Агару Тын Иисусты куба чӧлгӧ апарды.

¹³ Ол куба чӧлдӧ тӧртӧн кӱн јӱрӱп, сатанага ченеткен, аҥдардыҥ ортозында болгон. Ангелдер Ого болужып тургандар.

¹⁴ Иоанн тӱрмелеткен кийнинде Иисус Галилейге келип, Кудайдыҥ Каандыгыныҥ Сӱӱнчилӱ Јарын јарлап,

¹⁵ айдып јӱрген: «Ӧй једип, Кудайдыҥ Каандыгы јууктап келди! Кудайга баштанып, Сӱӱнчилӱ Јарга бӱдигер».

Баштапкы ӱренчиктер

¹⁶ Галилей талайын јакалай барадып, Иисус Симонды ла оныҥ Андрей карындажын кӧрди. Олор, балыкчы болгон бойлоры, талайда шӱӱндеп тургандар.

¹⁷ Олорго: «Мениҥ кийнимнеҥ барыгар, – деди, – слерди улус тудаачы эдип салайын».

¹⁸ Олор бу ла тарый шӱӱнин артырып койоло, Оны ээчий бастылар.

¹⁹ Анаҥ ары база эмеш базала, Ол Зеведей уулы Иаковты, оныҥ Иоанн карындажын кемеде шӱӱн јамап отургандарын кӧрди.

²⁰ Бу тарый олорды кычырды. Олор Зеведей адазын ишчилерле кожо кемеде артырып койоло, Оны ээчий бастылар.

Јоболдуларды јасканы

²¹ Капернаумга келдилер. Удабай суббот кӱнде Иисус синагогага кирип, улус ӱретти.

²² Оныҥ ӱредӱзин кайкап турдылар, нениҥ учун дезе олорды бичикчилер чилеп эмес, бойында јаҥ бар кижи чилеп ӱреткен.

²³ Синагогада кара јелбиске туттурган кижи болгон. Ол тыҥ кыйгыра берди:

²⁴ – Сеге бистеҥ не керек болды, Назареттиҥ кижизи Иисус? Сен бисти ӧлтӱрерге келдиҥ бе? Кем болгоныҥды билер турум! Сен – Кудайдыҥ Агарузы.

²⁵ Је Иисус: – Унчукпа, бу кижидеҥ чык! – деп, кара јелбиске јакарды.

²⁶ Кара јелбис кижини курултып, улу ӱнденип кыйгырала, оныҥ ӧзӧк-буурынаҥ чыга конды.

²⁷ Ончозыныҥ куды чыгып, бой-бойынаҥ суражып турдылар: – Бу не атасы? Бу кандый-андый јаҥы ӱредӱ болды? Ол јелбистердиҥ де бажын билип, јакарганда, олор Ого уккур болуп турганын!

²⁸ Иисус керегинде табыш Галилей ичине ылтам јайыла берди.

²⁹ Синагогадаҥ чыгала, Иаковло, Иоаннла кожо Симон ло Андрей-эшке келдилер.

³⁰ Симонныҥ кайын энезиниҥ эди-каны изип-кӱйӱп, оорып јаткан. Бу тарый мыны Иисуска айттылар.

³¹ Иисус базып келеле, оны колынаҥ тудуп, тургусты. Ол јазылып, олорды кӱндӱледи.

³² Эҥир кирип, кӱн отура берерде, Ого кандый ла оорулу улусты, ӧзӧк-буурында шилемирлӱ улусты экелип турдылар.

³³ Ончо кала айылдыҥ јанына јуулып келди.

³⁴ Ол јӱзӱн-јӱӱр оорудаҥ шыралап јӱрген кӧп улусты јасты, кӧп шилемирлерди чыгара сӱрди. Је Ол Христос деп билер болгонын шилемирлерге айттырбай турды.

Иисус Галилейде јарлыктайт

³⁵ Эртенгизинде дезе, ачу таҥла туруп, аалга јерге барып, анда мӱргиди.

³⁶ Симон кожо јӱргендериле Оныҥ кийнинеҥ бардылар.

³⁷ Оны табала, «Ончозы Сени бедиреп туру» – дедилер.

³⁸ Иисус олорго айтты: – Бу јуугындагы јурттарга баралы, анда да јарлыктаар аргалу болойын. Мен бого болуп келген инем.

³⁹ Анайып, Ол Галилей ичиле синагогаларда јарлыктап, шилемирлерди чыгарып јӱрди.

⁴⁰ Ого капкаш балулу кижи келди, Оныҥ алдына тизеленип, јалынып айтты: – Мени арутайын дезеҥ, арутап ийериҥ.

⁴¹ Иисус ого буурзап, колын тийгисти. «Арутайын, ару бол» – деди.

⁴² Бу сӧстӧрдиҥ кийнинде балу ол тарыйын кодорылып, ол ару боло берди.

⁴³ Иисус ого кату јакарып, оны бу ла тарый божодып,

⁴⁴ айтты: – Кӧр, кижиге неме айтпа. Је барып, абыска кӧрӱн, Моисейдиҥ јакарганыла аруталганыҥ учун тайылга эт, улуска кере болзын.

⁴⁵ Онызы дезе чыгала, не болгонын јарлап, айдып баштады. Оноҥ улам Иисус калага иле кирип болбой, тыштындагы аалга јерлерде јӱрди. Је улус Ого кайдаҥ ла бери келип турды.