Ifyacitilwe 1 - Amashiwi Aba Lesa

¹ Teofilo, nalilembele akale amalembo afyefyo fyonse ifi ŵataticile ŵa Yesu ukulukucita nekusambisya,

² ukuficila akasuŵa ako ako ŵapokelwe-mo kwiulu, ili ŵasilaile kuMupasi Uswetelele intanjisi syaŵo isyo isyasalulwilwe kuli ŵo.

³ Kuli syesyo kaŵili ŵalilibwenesye aŵalaŵi netwisiŵilo utwinji, ili kwasilile ukusomenwa kwaŵo, nekulukuŵoneka kuli syo insiku amakumi ane, nekulukulaŵila ifintu ifyakuŴufumu bwaŵaLesa.

⁴ Popele ili ŵaŵuŋgene nasyo, ŵalisifundile ati: Tekufuma-mo muJelusalemi, sombi mukapembelele ukulaya kwaŵaTata, uko kopele uku mwaumfwile kuli neŵo.

⁵ Pakuti Yoane icine alukuŵatisya mumenda; sombi mweŵo mukaŵatisiwa muMupasi Uswetelele, ili tasiŋgapita insiku isinji.

⁶ Pakuti pali fyefyo, pakuŵuŋgana, syaliŵepwisye ati: MweŵaSikulu, kani mulukuŵabwesesya uŵufumu aŵaIsilaeli ino-mpindi?

⁷ Naŵo ŵalilaŵile kuli syo ati: Tauli mulandu wenu ukwisiŵa impindi neli myensi, iyo iyi ŵekalicile aŵene ŵaTata:

⁸ sombi mukapoka amako sa, pakumuselucileni Umupasi Uswetelele; peŋka mukaŵa nimboni syanji muJelusalemi, namucalo monse icaŵena-Juda necaSamalya, nekuficilo'kupelele icalo capansi.

⁹ Popele, pakusilo'kulaŵile'fyo-fintu, ili syalukutontomeka, ŵalitwitwe kwi ulu; nekumbi lyaliŵapokele ukuŵafumya pamenso asisyo.

¹⁰ Popele pakulukutontomekesya kwiulu, ili ŵalukuya, lomba neŵantu ŵaŵili aŵafwite ifituŵile ŵaliimakene pali syo;

¹¹ nekulaŵila ati: Mweŵantu ŵakuGalili, mbanindo mwimakanine ukulukutontomeka kwiulu? Aŵa-ŵaYesu aŵapokwa kwi ulu ukufuma kuli mweŵo ŵakabwela koti nifyopele'fyo ifi mwaŵaŵona ukuya kwiulu.

¹² Popele apo syalifumine kulupili lwaMaolife, ululi apepi kuJelusalemi, ulwendo lwakasuŵa kasabata, nekubwelela kuJelusalemi.

¹³ Peŋka, pakwinjila, syalininine kucipinda icapeulu, copele'co ici syalukwikala-mo: Petilo naYoane naJakobo naAndaleya naFilipo na Tomasi naBatolomayo naMatayo na Iakobo umwana wakwe Alifayo na Simoni Selote, naJuda umwana wakwe Jakobo.

¹⁴ Ŵonse aŵo ŵalukwikala nemutima umo, nekulukutembela nemuŋkonsya, pamo neŵanakasi, naMaliya ŵanyinaŵo ŵaYesu, neŵakwaŵo ŵaYesu.

¹⁵ Popele, pansiku isyo, Petilo aliimakene pakati pawana-ŵaŋkasi: (e-po lyali iŵumba lyaŵantu aŵakukumana koti mwanda umo nemakumi aŵili peu lu) lomba alilaŵile ati:

¹⁶ Mweŵakwasu, fyalielelwe ati ilembo likonsiwe, ilyo ili walaŵile akale Umupasi Uswetelele pakanwa kakwe Dafidi, ifyakwe Juda, uwaŵatanjilile aŵo aŵaŵekete ŵaYesu.

¹⁷ Pakuti alipendelwe pamo nafweŵo, nekulukupoka icakulekanya cakwe icamumilimo iyi.

¹⁸ (Lomba umuntu uyo aliulile iŵala nekulambulwa kwakuŵifya kwakwe; peŋka aliponene akamfulamukoŋko, nekupanduka pakati, nemala akwe onse nekusefuka.

¹⁹ Popele apo ifyo fyaliumfwanicile kuŵantu ŵonse aŵalukwikala mujelusalemi, fyopele'fyo iŵala ilyo lyaliilicilwe mumulaka waŵo ati niAkelidama-liŵala lyamilopa.)

²⁰ Pakuti fililembelwe mwibuku lyaMasamo ati: Umwakwikala mwakwe mukaŵe koti nimumasala; Aŵantu ŵonse neli umo tekwikalamo mulya! nakaŵili ati: Ŵucilolo bwakwe akapyane umbi!

²¹ Lomba pali ŵaŵo aŵalukwambala nafweŵo impindi yonse iyakupitana pali fweŵo ŵaYesu Klistu,

²² ukutatika pakuŵatisya kwakwe Yoane, ukuficila pakasuŵa ako ŵapokelwe-mo ŵo kwiulu ukufuma kuli fweŵo; pali ŵaŵo ukwelelwa ati umbi aŵe nimboni pamo nafweŵo iyakukuŵuka kwaŵo.

²³ Popele ŵalisalulwile ŵaŵili: Josefi uwailicilwe ati niBasaba, icikoto cakwe niJusito, naMatia.

²⁴ Naŵo ŵalitombele, nekulaŵila ati: Mweŵo, mweŵaSikulu, mwemwisiŵa imitima yaŵantu ŵonse, mubwenesye aŵa ŵaŵili ati mba ninani mwasalulula,

²⁵ ati apyane umupunda wamilimo naŵuntanjisi uŵu, uŵu apasucile-mo Juda mukuya kwakwe umwine.

²⁶ Popele apo ŵaliŵateyele ifipa; lomba Matia nekwikatwa; naye alipendelwe pamo nentanjisi isyo ikumi naimo.