2Ifyeŵo 1 - Amashiwi Aba Lesa

¹ Popele Solomoni umwana wakwe Dafidi walikosesiwe muŵufumu bwakwe; lomba ŵaYawe Lesa wakwe ŵali nakwe, nekumukusyo'kwakuti.

² Popele Solomoni walilaŵile kuŵaIsilaeli ŵonse, nakufilolo fyamasausande nefyamyanda, nakuŵasololwesi, nakufileme fyonse monse muIsilaeli, impemba isyakumaŋanda aŵawisiŵo.

³ Fyopele'fyo Solomoni, neŵumba lyonse pamo nakwe, ŵaliile kuntu ukusuntucile ukwakuGibyoni; pakuti kopelo'ko ekwali icitente ceŵuŋgano icaŵaLesa, ico Mose umupyunjisi waŵaYawe wacitile pampanta.

⁴ Sombi ibokosi lyaŵaLesa Dafidi walililetelo'ko, uku Dafidi waliansicile-ko, ukulifumya kuCilyati-jalimi; pakuti walilikomene icitente kuJ elusalemi.

⁵ Kaŵili iconto caluŵemba, icacitile Besaleli umwana wakwe Uli umwana wakwe Ulu, epo cali pamenso esema lyaŵaYawe; lomba Solomoni neŵumba lyaŵantu ŵalukufwaila-ko.

⁶ Popele Solomoni walininine-ko'ko kuconto caluŵemba pamenso aŵaYawe, icali kucitente ceŵuŋgano, nekuposelapo imilambu yakoca isausande.

⁷ Uŵusiku uŵo ŵaLesa ŵalibwenekele kuli Solomoni, nekulaŵila kuli ye, ati: Ulombe ici niŋgakupela.

⁸ Popele Solomoni walilaŵile kuli ŵaLesa ati: Mwaŵalanjisya ŵaDafidi ŵatata iŋkumbu isikulu, nekunjikalika neŵo ati nimfumu pamupunda waŵo.

⁹ Lomba ŵukumo, mweŵaYawe Lesa, ukulayana kwenu ukwakuli ŵaDafidi ŵatata ŋgakwikalikwe; pakuti mwandeŋgesyo'ŵufumu paŵantu aŵali koti lifukutu lyapacalo ubwinji.

¹⁰ Pano mumpele amano nemilaŋgwe, ati njisiŵe ukufuma nekwinjila pamenso aŵantu aŵa; pakuti mbaninani uwisi ukusololola neŵantu ŵenu aŵa, aŵakulu aŵakuŵe'fi?

¹¹ Peŋka ŵaLesa ŵalilaŵile kuli Solomoni ati: Pakuti ici cali mumutima woŵe, napakuti tolombele amaŵoni neli ŵuŵile neli ŵuleme, neli myeo yaŵaŵo aŵakukufitilwa, neli kulomba umweo utali; sombi pakuti walilombela amano nemilaŋgwe, ati uŋgasololola neŵantu ŵanji aŵo nakwikalika nimfumu yapali ŵo;

¹² lomba amano nemilaŋgwe kulipelwe kuli weŵo; kaŵili ŋkakupela amaŵoni neŵuŵile neŵuleme, ifyo imfumu syonse isyakutanjilile tasyali nafyo, nesyakukulonda tasikalukuli nefyakuŵe'fyo.

¹³ Popele Solomoni walibwelele kuntu ukusuntucile ukwakuGibyoni, ukufuma pamenso pacitente ceŵuŋgano, nekwisa kuJelusalemi; naye nekulukwikalika aŵaIsilaeli.

¹⁴ Kaŵili Solomoni waliŵuŋgenye iŋgolofwana neŵapali ŵakafwalo; lomba wali neŋgolofwana imyanda ikumi naine, neŵapali ŵakafwalo amasausande ikumi naaŵili, aŵo aikalicile mumisi yaŋgolofwana napamo nemfumu kuJelusalemi.

¹⁵ Lomba imfumu nekwalula isilifa negolide ati ekale mu Jelusalemi koti mabwe, naŵayelesi nekuŵaalula koti mikuyu yamumikolo pakuti pabwinji.

¹⁶ Lomba ŵakafwalo, aŵo ali naŵo Solomoni, ŵalifumisiwe mucalo caIjipiti; naŵo aŵolisi ŵamfumu nekuŵapoka pamataŋga, amataŋga onse limo limo koti muulo waliko.

¹⁷ Popele ŵaliletele nekufumya muIjipiti iŋgolofwana yamuulo wamasyekeli esilifa imyanda isanu naumo, nakafwalo naye uwamuulo wamasyekeli umwanda umo nemakumi asanu. Fyopele'fyo nefyamfumu syonse syaŵaYeti, nemfumu syakuSilya, kaŵafifumya kumuulo wafiko.