Tito 3:7 - Xochapa Mixteco

⁷ Saa nda̱sa vaꞌa ra yoo, ndu̱u yo tá íin naꞌa, na köo ka kuachi kúu mií nuu ra, xaꞌa ya vaꞌa ni ra xiꞌin yo kua i̱kan ra saa xiꞌin yo. Ta saa kúsini ni yo chi kúndaa teꞌe ini yo ya niꞌi yo nuu taxi Ndioxi ndaꞌa yo koo yo xiꞌin ra ndiꞌi saa kivi ya vaxi.

Tito 3:7 Mawu Ofanana

San Mateo 25:34

Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó.

San Marcos 10:17

Xa kee tuku Jesús kuꞌun va ra kua, ta saa ndi̱xaa iin ra taa, xínu ra ndi̱xaa ra, si̱kusiti ra nuu ra, saa ndi̱ndakan tuꞌun ñaꞌa ra, káchi ra saa: ―Tata Maestro, vaꞌa ni taa kúu mií un, ta kaꞌan loꞌo un xiꞌin i unkua xíniñuꞌu i ikan i, ya kuchiñu kutaku i xiꞌin Ndioxi ndiꞌi saa kivi ―káchi ra.

ROMANOS 11:6

Xaꞌa ya vaꞌa ni Ndioxi kua i̱kan ra saa xiꞌin yo, süvi xaꞌa nda iin ya vaꞌa íkan yo kua ndi̱kaxin ra yoo, xaꞌa ya kúꞌvi ni ini ra xíni ra yoo kua i̱kan ra saa xiꞌin yo. Saa chi tá tu xaꞌa ya vaꞌa íkan yo kua, ta köo ndáa yaꞌvi ya ndi̱niꞌi uun yo nuu Ndioxi, ya kúꞌvi ni ini ra xíni ra yoo, ndikuu.

ROMANOS 3:24

Sundi mií Ndioxi ku ra i̱kan ya vaꞌa xiꞌin yo, nda̱sa vaꞌa ra yoo, ndu̱u yo tá íin naꞌa, na köo ka kuachi ku mií nuu ra. Xaꞌa ya vaꞌa ni Ndioxi, yakan si̱niꞌi uun ra ya vaꞌa, ya chee ni yóꞌó nuu yo. Ta nda iin ñaꞌa köo ndíkan yo xaꞌa ya nda̱sa vaꞌa Ndioxi yoo. Iindaa Jesucristo ku ra cha̱ꞌvi xaꞌa yo chi ndi̱xiꞌi ra ndaꞌa cruzin.

ROMANOS 3:28

Xaꞌa ya yóꞌó kua káꞌan yo, iindaa mituꞌun ya ikan yo kandixa yo Jesucristo, ya yóꞌó kua táxi ndúu yo naꞌa na vaꞌa, na köo ka kuachi kúu mií nuu Ndioxi. Süvi xaꞌa ya xáa súvi yo ley ra kua ndúu yo naꞌa, na köo ka kuachi kúu mií nuu ra.

ROMANOS 4:16

Xaꞌa ya kándixa yo Ndioxi kua taxi ra ya vaꞌa ndaꞌa yo. Ta saa ndiꞌi na seꞌe ñani sikua ra Abraham niꞌi na ya vaꞌa, ya ki̱ndoo Ndioxi taxi ra ndaꞌa na. Vaꞌa ni Ndioxi ta xaꞌa ya ikán kua si̱niꞌi ra ñaꞌa ya ndi̱kaꞌan ra siniꞌi ra na ivi, na kándixa ñaꞌa, tá kuꞌva ka̱ndixa ra Abraham Ndioxi, án na xíni ley ya ta̱a ra Moisés ku na, án süvi na xíni ley ku na. Sundi ndiꞌi naꞌa na ndinuꞌu ni kándixa Ndioxi, na ikán ku na ndu̱u tá íyo seꞌe ra Abraham. Saa chi ra Abraham ku iva ndiꞌi naꞌa, na kándixa ni Ndioxi.

ROMANOS 4:4

Ta xa xíni mií yo, tá kúu iin naꞌa na xáa chiñu, ta cháꞌvi ñaꞌa ra xáa chiñu na nuu xaꞌa chiñu íkan na. Ta xuꞌun ya kíꞌin na, ta süvi ya síniꞌi uun ra nuu na ku ya, chi ya cháꞌvi ñaꞌa ra xaꞌa chiñu íkan na nuu ra ku ya.

ROMANOS 8:17

Ta xaꞌa ya kúu yo seꞌe Ndioxi, yakan niꞌi yo ñaꞌa ya taxi ra ndaꞌa yo, tá kuꞌva íkan iin taa, ndítaꞌvi ra ñaꞌa ra xiꞌin seꞌe ra. Saa chi̱tuni Iva yo Ndioxi ikan ra xiꞌin ndiꞌi yo kúu seꞌe ra. Ta ndiꞌi ya vaꞌa ta̱xi ra ndaꞌa seꞌe ra Jesucristo, iin káchi saa niꞌi yo ya xiꞌin ra nuu ndivi nu̱nù. Tá tu xáꞌa ndee ini yo ndoꞌo yo xaꞌa ra, ta saa niꞌi tu yoo va ya vaꞌa xiꞌin ra nuu ndivi.

1 Corintios 6:11

Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

Gálatas 2:16

Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

Gálatas 3:29

Ta xaꞌa ya xa i̱in ndu̱u yo xiꞌin Cristo yakan kua vaꞌa kúu yo seꞌe ñani sikua ra Abraham, ta kúu mií yo ichí ndikiꞌin yo ñaꞌa, ya ki̱ndoo Ndioxi taxi ra ndaꞌa ra Abraham.

Gálatas 4:7

Yakan vitin ra köo xáꞌnda chiñu ka ya ndínaꞌa na ñuu ivi yóꞌó, nuu yo. Chi vitin ra seꞌe Ndioxi ndu̱u yo tixin Jesucristo, ta xaꞌa ya ndu̱u yo seꞌe Ndioxi ta kúu mií yo ichí ndikiꞌin yo ndiꞌi ya kuika kúu mií Ndioxi.

2 Tesalonicenses 2:16

Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

Tito 1:2

Chi yoo ta xa kúndaa teꞌe vaꞌa ini yo, ya ki̱ndoo ra xiꞌin yo taxi ra koo yo xiꞌin ra ndiꞌi saa ichí, ta köo ndi̱sindaꞌvi ra yoo chi nda tá täꞌan ka vi xikoo xaꞌa ñuu ivi kua ndi̱kaꞌan ra ikan ra saa xiꞌin yo.

Tito 2:11

Saa chi Ndioxi ta si̱naꞌa ra yoo ya ndee ni kúꞌvi ini ra xíni ra yoo, yakan ta̱xi ra ichí ndaꞌa yo ya ná kuchiñu kaku ndiꞌi ni kúu yo ñuu ivi yóꞌó.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

HEBREOS 1:14

Ta na tatun Ndioxi ta xa síin va ku na, chi na ikán ta tachi va ku na xíka na chiñu nuu ra, tíꞌvi ra na kuaꞌan na chindee na naꞌa, na sikaku ra.

HEBREOS 11:7

Xaꞌa ya xi̱ndaa ni ini ra Noé xi̱ni ra Ndioxi kua si̱kuaꞌa ra itun barco tá ndi̱kaꞌan Ndioxi xiꞌin ra kixi tindoꞌo sata na ñuu ivi yóꞌó, ta nda iin ichí täꞌan kuun kini ni saví tá kuꞌva ku̱un rá kivi ikán. Xaꞌa ya xi̱ndaa ni ini ra xi̱ni ra Ndioxi yakan kua xa̱a súvi ra ya ndi̱kaꞌan Ndioxi xiꞌin ra, ya kuchiñu kaku na veꞌe ra. Ta xaꞌa ya i̱kan ra saa kua ta̱xi ra kuachi xaꞌa na ñuu ivi yóꞌó. Ta saa ndi̱niꞌi ra ya vaꞌa nuu Ndioxi, ndu̱u ra tá káa iin naꞌa, na köo ka kuachi kúu mií nuu Ndioxi, xaꞌa ya xi̱ndaa ni ini ra xi̱ni ra Ndioxi.

HEBREOS 11:9

Xaꞌa ya xi̱ndaa ni ini ra ya sixinu Ndioxi ya ndi̱kaꞌan ra xiꞌin ra, xaꞌa ya ikán kua ndi̱xiyo tóo ra nuu ñuꞌú inka naꞌa, ya ki̱ndoo Ndioxi xiꞌin ra kuu ñuꞌú mií ra. Ta xiꞌin ñií kiti kua ndi̱kuaꞌa veꞌe nuu ndi̱xiyo ra, saa tu ra Isaac, seꞌe va ra xiꞌin ra Jacob, chi iin káchi ndi̱kaꞌan tu Ndioxi xiꞌin uvi saa nda ikán va ya taxi ra ya vaꞌa ndaꞌa nda.

HEBREOS 6:17

Ta Ndioxi köo ndi̱xiniñuꞌu ra kivi inka naꞌa ya xaa súvi ra ya xa ki̱ndoo ra ikan ra, tixin kivi mií ra chi̱naꞌa ra nuu na ya sixinu ra ya ndi̱kaꞌan ra xiꞌin na ndíkun ra. Saa chi kúni ra ná kundaa ini na ya xaa súvi ra ya xa ki̱ndoo ra xiꞌin na, ta ndïko koo ini ra xaꞌa ya ki̱ndoo ra xiꞌin na.

Santiago 2:5

Ñani mani xiꞌin kuꞌva yo, ndóꞌo̱ ku ndo kúꞌvi ni ini i xíni i, ta kuni soꞌo ndo ya kaꞌan i xiꞌin ndo: Ndioxi ku ra ndi̱kaxin na ndaꞌvi ndóo ñuu ivi ya ná nduu na naꞌa, na ndinuꞌu ni ini ndáa ini xíni ra xiꞌin ndiꞌi nima na, ta saa ndikiꞌin na ya ndi̱kaꞌan ra taxi ndaꞌa na kúꞌvi ini xíni ra, saa koo na kaꞌnda chiñu na xiꞌin ra.

1 Pedro 3:7

Ta saa tu ndóꞌo̱ va ñani yo, ndo íyo ná síꞌi, ndíchi ni va ndikani ini ndo ndá kuꞌva xíniñuꞌu koo vií ndo xiꞌin ná síꞌi ndo. Ta xaa toꞌo ndo ná, saa vívií ndikani vaꞌa ini ndo koo ndo xiꞌin ná tá kuꞌva i̱í ni íyo kisi ya ndasun ni, kuꞌva saa xíniñuꞌu ndo ikan ndo xiꞌin ná. Chi iin káchi ndi̱niꞌi taꞌvi tu ná ñaa va xiꞌin ndo ya niꞌi ná ya vaꞌa nuu Ndioxi kutaku ná xiꞌin ra. Tá íkan ndo saa xiꞌin ná síꞌi ndo, ta köo ñaꞌa kasi nuu tuꞌun ya káꞌan ndo xiꞌin Ndioxi, tá káꞌan ndo xiꞌin ra, ta kuni soꞌo ra ya káꞌan ndo.