San Mateo 9:13 - Xochapa Mixteco

¹³ Xíniñuꞌu ndo kundaa vaꞌa ini ndo unkua kúni kachi Ndioxi nuu tuꞌun ra, ya káchi saa: “Kúni i ná kundaꞌvi ni ini ndo kuni ndo inka naꞌa, chi ya ñaa ka kua ndee ni ndee nuu ñaꞌa ya sóko ndo nuu i”, káchi tuꞌun Ndioxi. Saa chi yeꞌe, ta växi i xaꞌa na vaꞌa, xaꞌa na väꞌa vaxi i, kaꞌan i xiꞌin na ya ná ndiko koo ini na kundikun na ichí Ndioxi ―káchi Jesús xiꞌin nda fariseo.

San Mateo 9:13 Mawu Ofanana

San Mateo 12:3

Saa ndi̱kuiin Jesús, káchi ra saa: ―¿Án täꞌan kaꞌvi ndo nuu tuꞌun Ndioxi, nuu káꞌan ya xaꞌa xii yo ra rey David unkua i̱kan ra tá kivi ndi̱kaꞌun ini ra xiꞌin nda taꞌan ra?

San Mateo 12:5

¿Án ni täꞌan kaꞌvi tu ndóꞌo̱ va unkua káꞌan ley Ndioxi ya ta̱a ra Moisés? ¿Án su káꞌan ya, nda iin naꞌa küvi xaa chiñu kivi i̱í? Ta ndachu vaꞌa xáa chiñu sutu kivi i̱í veꞌe ñuꞌu, ta nda iin naꞌa köo táxi kuachi xaꞌa nda ya xáa chiñu nda.

San Mateo 12:7

Tá tu ndóꞌo̱ kúndaa ini ku ndo unkua kúni i ikan ndo, ta käꞌan ndo saa. Chi soꞌva káꞌan tuꞌun Ndioxi: “Ya xíniñuꞌu ni ndo ikan ndo kua yóꞌó: kundaꞌvi ini ndo kuni ndo inka naꞌa, chi ya ñaa ka kua ndee ni ka ndee xíniñuꞌu ndo ikan ndo nuu ñaꞌa ya sóko ndo nuu i”. Tá tu ndóꞌo̱ kúndaa ini ku ndo tuꞌun yóꞌó, ta täxi ndo kuachi xaꞌa na köo kuachi, ndikuu.

San Mateo 19:4

Saa ndi̱kuiin Jesús káchi ra saa: ―¿Án täꞌan kaꞌvi ndo unkua káꞌan tuꞌun Ndioxi tá kivi si̱kuaꞌa ra ñuu ivi yóꞌó? Chi kivi tá “si̱kuaꞌa Ndioxi ñuu ivi yóꞌó, ta si̱kuaꞌa ra iin taa xiꞌin iin ñaꞌa”.

San Mateo 21:42

Saa ndi̱kaꞌan Jesús xiꞌin na, káchi ra saa: ―¿Án täꞌan kaꞌvi ndo tuꞌun Ndioxi? ya káchi saa: “Yu̱ú ya ku̱ndasi nda síkuaꞌa veꞌe, ya yóꞌó ku ya xíniñuꞌu ni ka ndikaa xaꞌa veꞌe. Soꞌva i̱kan Ndioxi. Ndioxi ku ra i̱kan ya yóꞌó, ta ndi̱kanda ni ini yo xiꞌin ya yóꞌó”, káchi ya ta̱a na xinaꞌa, káchi Ndioxi.

San Mateo 3:2

Káchi ra saa: ―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.

San Mateo 3:8

Xiꞌna xíniñuꞌu ndo ndiko koo ini ndo xaꞌa kuachi ndo, ta saa sinaꞌa ndo mií ndo ya ndixa kua ndi̱nama ini ndo xaꞌa ya väꞌa íkan ndo.

San Mateo 4:17

Saa xa̱á Jesús káꞌan ndoso ra tuꞌun Ndioxi xiꞌin naꞌa, káchi ra saa: ―Ndiko koo ini ndo xaꞌa ya väꞌa íkan ndo, chi xa yati ni íyo ichí ya xáꞌnda chiñu Ndioxi nuu kutaku ndo ―káchi Jesús xiꞌin na.

San Marcos 12:26

Ta saa tu ya káꞌan ndo ya ndïtaku na ndíi va, ¿án täꞌan kundaa ini ndo xiꞌin ya ta̱a ra Moisés xinaꞌa tá ndi̱kaꞌan Ndioxi xiꞌin ra nuu xíxi itun iñu? káchi ra saa: “Yeꞌe ku Ndioxi ra káñuꞌu ra Abraham xiꞌin ra Isaac tin ra Jacob” káchi Ndioxi.

San Marcos 12:33

Ya kuꞌvi ini yo kuni yo Ndioxi xiꞌin ndiꞌi nima yo, xiꞌin ndiꞌi ya vaꞌa yo tin ndiꞌi ndee yo, xiꞌin ndiꞌi ya xínituni yo, ta kuꞌvi ini yo kuni yo na taꞌan yo, tá kuꞌva kúꞌvi ini yo xíni xiꞌin mií yo, ya yóꞌó kua ndixa ni ka ndaa yaꞌvi nuu ya sóko yo nuu Ndioxi xiꞌin ya kaꞌmi yo ñaꞌa nuu Ndioxi ―káchi ra maestro ikán xiꞌin Jesús.

San Marcos 2:17

Saa xi̱ni soꞌo Jesús ya ndi̱kaꞌan nda, ta ndi̱kuiin ra káꞌan ra xiꞌin nda, káchi ra saa: ―Na íyo vaꞌa ini, ta köo xíniñuꞌu na kuꞌun na nuu ndotor. Na kúꞌvi ku na xíniñuꞌu kuꞌun kutatan. Ta yeꞌe, vaxi i kana i ivi na väꞌa, süvi na vaꞌa vaxi i kana i ―káchi Jesús xiꞌin nda.

San Lucas 10:26

Ñaa ndi̱kuiin Jesús ndi̱kaꞌan ra xiꞌin ra, káchi ra saa: ―¿Unkua káꞌan ley Ndioxi ya ta̱a ra Moisés xinaꞌa tá káꞌvi ndo ya? ―káchi ra xiꞌin ra.

San Lucas 19:10

Ta yeꞌe ku Taa ra xa̱a ñuu ivi yóꞌó ta vaxi i nduku i na nda̱ñuꞌu ya sikaku i na ―káchi Jesús.

San Lucas 24:47

Ta naꞌa na ndíkun sata ra tixin kivi ra taxi ra ndee ndaꞌa na kuꞌun na ndituꞌun na xiꞌin ndiꞌi kúu na ñuu ivi. Xiꞌna ñuu Jerusalén xáa na kaꞌan na xiꞌin naꞌa, ya ná ndiko koo ini na xaꞌa kuachi na, saa xaa kaꞌnu ini Ndioxi xaꞌa kuachi na”, káchi ya ta̱a na.

San Lucas 5:31

Saa ku̱ndaa ini Jesús ta ndi̱kuiin ra káꞌan ra xiꞌin nda fariseo, káchi ra saa: ―Naꞌa, na íyo vaꞌa ini, ta köo xíniñuꞌu na kuꞌun na kutatan na, na kúꞌvi ku na xíniñuꞌu kuꞌun kutatan.

San Lucas 5:32

Ta yeꞌe växi i chindee i na vaꞌa, na köo kuachi. Na íyo kuachi ku na vaxi i chindee i, ya ná ndiko koo ini na kuꞌun na ichí Ndioxi ―káchi ra xiꞌin nda.

San Juan 10:34

Saa ndi̱kuiin Jesús káꞌan ra: ―Iin ñaꞌñu nuu ley ya íyo ndaꞌa ndo káchi ya: “Yeꞌe káꞌan ndioxi vali ku ndo”, káchi Ndioxi xiꞌin xii yo xinaꞌa.

Los Hechos 11:18

Tá xi̱ni soꞌo na ya ndi̱kaꞌan ra Pedro, ta ku̱taxin yuꞌu na. Ñaa xa̱á káꞌan na ya vaꞌa xaꞌa Ndioxi, káchi na saa: ―Tá tu saa ku̱u, ta kúni kachi ya, nda na köo kúu judío va ta̱xi Iva yo Ndioxi ichí ndaꞌa ya ndiko koo ini na xaꞌa kuachi na, ta saa kutaku na xiꞌin ra ―káchi na.

Los Hechos 2:38

Saa ndi̱kuiin ra Pedro káꞌan ra xiꞌin nda káchi ra saa: ―Ndiko koo ini ndo xaꞌa ndiꞌi kuachi ndo. Ta saa kuchi ndo tixin kivi Jesucristo ya ná xaa kaꞌnu ini Ndioxi xaꞌa kuachi ndo. Saa kua ndikiꞌin ndo Tachi Ií ra koo ya xiꞌin ndo.

Los Hechos 20:21

Ndi̱kaꞌan ndoso i tuꞌun ra xiꞌin na kúu judío tin na köo kúu judío, ya xíniñuꞌu na ndiko koo ini na xaꞌa kuachi na nuu Ndioxi, saa xáa na kundaa ni ini na kuni na Tata yo Jesucristo.

Los Hechos 3:19

Saa ndi̱kaꞌan ka ra xiꞌin na káchi ra saa: ―Na taꞌan yo, ndiko koo ndo nuu Ndioxi, ta ndiko koo ini ndo xaꞌa kuachi ndo, ta saa xaa kaꞌnu ini ra xaꞌa kuachi ndo. Ikan ndo saa, ta chindee Ndioxi ndóꞌo̱ ndikiꞌin ndo ini ndo koo vaꞌa ini ndo.

Los Hechos 5:31

Ta Ndioxi ta̱xi ra chiñu ndee ni ndaꞌa Jesús, ta̱xi ra ichí ndaꞌa ra ndu̱u ra iin ra chee ni ndi̱kunduꞌu ra ñaꞌñu kuáꞌá Ndioxi. Ta̱xi tu ra ichí ndaꞌa ra ya sikaku ra naꞌa ya ná kuchiñu na ndinama ini na, ta saa xaa kaꞌnu ini Ndioxi xaꞌa kuachi na.

2 Pedro 3:9

Köo kuáchi vi Iva yo Ndioxi ya sixinu ra ya ki̱ndoo ra xaa súvi ra xiꞌin yo. Süvi tá kuꞌva ndíkani ini naꞌa, kuekuee ni kúu íkan ra, káchi na. Chi xaꞌa ya kaꞌnu ni ini ra xiꞌin yo kua íkan ra saa xiꞌin yo, saa chi köo kúni ra ndiꞌi xaꞌa nda iin naꞌa. Kúni ra ná ndiko koo ini na xaꞌa ya väꞌa íkan na, ta ná ndinama na kuꞌva íyo na.