San Mateo 7:21 - Xochapa Mixteco

²¹ Saa káꞌan tuku Jesús, káchi ra saa: ―Íyo naꞌa káꞌan xiꞌin i: “Yóꞌo̱ ku ra chee, ra xáꞌnda chiñu nuu nde”, káchi na xiꞌin i. Sundi süvi ndiꞌi na ikán ku na kiꞌvi koo nuu xáꞌnda chiñu Ndioxi. Ndisaa na xáa súvi ya káꞌan Iva i Ndioxi ra íyo nuu ndivi ku na kiꞌvi koo xiꞌin ra.

San Mateo 7:21 Mawu Ofanana

San Mateo 12:50

Saa chi ndiꞌi na íkan ya kúni Iva i Ndioxi, ra íyo nuu ndivi, ta na ikán ku ñani i xiꞌin kuꞌva i tin siꞌí i ―káchi Jesús.

San Mateo 16:17

Saa ndi̱kaꞌan Jesús xiꞌin ra: ―Ná kusini ni un Simón, seꞌe ra Jonás, saa chi süvi naꞌa, na ñuu ivi yóꞌó ku na ndítaxi ya xínituni un. Iva i Ndioxi, ra íyo nuu ndivi ni̱nù ku ra i̱kan saa xiꞌin un ―káchi Jesús xiꞌin ra.

San Mateo 18:10

Saa ndi̱tuꞌun tuku ra iin tuꞌun ndíchi xiꞌin na sínaꞌa ra na, káchi ra saa: ―Koto ndo ndïkani ini ndo ya köo ndáa yaꞌvi na vali yóꞌó. Saa chi na tatun ndáa na vali yóꞌó, ta ndiꞌi saa kivi íyo na xiꞌin Iva i Ndioxi nuu ndivi.

San Mateo 18:19

’Yakan káꞌan i xiꞌin ndo, tá iin yuꞌu íyo uvi ndo ñuu ivi yóꞌó, ta ndúku ndo ndá ka ñaꞌa nuu Ndioxi, ra íyo nuu ndivi, ta xaa súvi ra ya ndúku ndo nuu ra, taxi ra ya ndaꞌa ndo.

San Mateo 18:3

saa ndi̱kaꞌan ra xiꞌin nda, káchi ra saa: ―Ya ndixa káꞌan i xiꞌin ndo, tá tu köo ndíko ini ndo nduu ndo tá íyo ini na vali, ta küchiñu ndo kiꞌvi ndo koo ndo nuu xáꞌnda chiñu Ndioxi.

San Mateo 18:35

Saa ndi̱kaꞌan ka ra xiꞌin na, káchi ra saa: ―Tá i̱kan ra rey ikán saa ikan Iva i Ndioxi ra íyo nuu ndivi xiꞌin ndo, tá tu köo ndinuꞌu ini ndo xáa kaꞌnu ini ndo xaꞌa ya íkan na taꞌan ndo xiꞌin ndo ―káchi Jesús xiꞌin na.

San Mateo 19:24

Ta ná kaꞌan ka i xiꞌin ndo: Tá ya kúvi kua ta án sana vaꞌa ka kiꞌvi iin kiti camello chee ni ta yaꞌa ri yavi loꞌo kaꞌa iin tiku, ta saa na kuika uꞌvi ni ka saa kiꞌvi na ikán ichí nuu xáꞌnda chiñu Ndioxi ―káchi Jesús xiꞌin na.

San Mateo 25:10

Saa ka̱na koo uꞌun saa ná ikán kuaꞌan ná sata ná ceite ná. Tá ka̱na koo ná kuaꞌan ná, ta xa̱a va mií ra tíndaꞌa ikán. Saa ndi̱kiꞌvi uꞌun saa ná xa íyo ndúvi ikán xiꞌin ra ini veꞌe nuu íyo viko tíndaꞌa. Ñaa ndikun nda̱si tuun mií yeꞌe ikán.

San Mateo 25:21

Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra.

San Mateo 26:39

Saa ke̱e ra kuaꞌan xika loꞌo ka ra, ñaa ndi̱xaa ra si̱kusiti ra ta nda nuu ñuꞌú ndi̱xinu taan ra, ta xa̱á ra káꞌan ra xiꞌin Ndioxi, káchi ra saa: ―Tata Iva mií i, tá tu kúni un ta täxi un kundoꞌo i tindoꞌo yóꞌó, sundi ïkan un ya kúni yeꞌe, vaꞌa ikan un ya kúni mií va un ―káchi Jesús xiꞌin Ndioxi.

San Mateo 26:42

Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa: ―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

San Marcos 3:35

Saa chi ndiꞌi na íkan ya kúni Iva i Ndioxi, ta na yóꞌó ku siꞌí i xiꞌin ñani i ―káchi Jesús.

San Marcos 9:47

Tá tu nduchi nuu va tu ndo kua xáa kíꞌvi xiꞌin ndo ya íkan ndo ya väꞌa, ta vaꞌa ka tava ndo ri nuu ndo, chi vaꞌa ka koo ndo kutaku ndo xiꞌin Ndioxi nuu xáꞌnda chiñu ra. Süvi ka vi ya íyo uvi saa nduchi nuu ndo, ta kuꞌun ndo ndaya nuu köo ndáꞌva ñu̱ꞌu̱.

San Lucas 11:28

Ta saa ndi̱kuiin ra káchi ra saa: ―Süvi saa íyo ya. Vaꞌa ni ka kée na xíni soꞌo tuꞌun Ndioxi ta xáa súvi na ya káꞌan ya ―káchi ra xiꞌin yá.

San Lucas 13:25

Kiꞌvi ndo tá núna yéꞌé ra vitin, saa chi vaxi kivi ta ndikundichi mií ra xíin veꞌe ikán ndikasi ra ya. Ta saa ndinuni kuaku ndaꞌvi ndo kundita ndo yéꞌé ra kaꞌan ndo xiꞌin ra: “Tata, kuna yéꞌé nuu nde”, kachi ndo xiꞌin ra. Ñaa kaꞌan ra xiꞌin ndo, kachi ra saa: “Köo xíni i mií chí ke̱e ndo”, kachi ra xiꞌin ndo.

San Lucas 18:25

’¿Án vaꞌa yaꞌa iin kiti camello ini yavi loꞌo kaꞌa iin tiku, túvi ndóꞌo̱? Yáꞌa ni ka uꞌvi saa kiꞌvi na kuika nuu xáꞌnda chiñu Ndioxi ―káchi Jesús xiꞌin na.

San Lucas 6:46

Ta saa ndi̱kaꞌan ka ra xiꞌin na, káchi ra saa: ―Ta ndóꞌo̱, ¿ndachu kua káꞌan ndo ku i ra chee, ra ndee nuu ndo, ta köo íkan ndo ya káꞌan i xiꞌin ndo?

San Juan 14:7

Tá tu xíni vaꞌa ndo yeꞌe, ta xa xíni vaꞌa tu ndo Iva va i. Ta nda kivi vitin ta xa xíni ndo ra, chi xíto xiꞌin nuu ndo ra ―káchi Jesús xiꞌin nda.

San Juan 15:23

Ndiꞌi na kúndasi nuu xíni yeꞌe, ta kúndasi nuu tu na xíni na Iva va i.

San Juan 3:5

Saa ndi̱kuiin Jesús káꞌan ra, káchi ra saa: ―Ya ndaa ni káꞌan i xiꞌin un, ndiꞌi na täꞌan kaku xiꞌin tikuii ni xiꞌin Tachi I̱í Ndioxi ta küchiñu na kiꞌvi na koo na nuu xáꞌnda chiñu Ndioxi.

San Juan 5:17

Ta ndi̱kaꞌan Jesús xiꞌin nda, káchi ra saa: ―Iva i ta ndiꞌi saa kivi xáa chiñu ra, ta saa tu yeꞌe va, ndiꞌi saa kivi xáa chiñu i ―káchi ra xiꞌin nda.

San Juan 6:40

Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

San Juan 7:17

Tá ndá ndo chíkaa ini xaa súvi ya kúni Ndioxi, ta vaꞌa kundaa ini ndo xaꞌa ya sínaꞌa i, án ya vaxi nuu Ndioxi kua án ya xáa xiní mií i kua káꞌan i xiꞌin ndo.

Los Hechos 14:22

Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa: ―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

ROMANOS 12:2

Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

ROMANOS 2:13

Naꞌa na xáa súvi ley Ndioxi ku naꞌa na köo kuachi ku mií nuu ra. Ta na ndisaa xíni soꞌo ya ta köo xáa súvi na ya, na ikán ku na íyo kuachi nuu ra.

Efesios 6:6

Tá xáa súvi ndo chiñu nuu na, ta vaꞌa ikan ndo ya xiꞌin ndinuꞌu nima ndo, ta ïkan ndo ya ndisaa tá xíto na nuu ndo xáa chiñu ndo. Chi ndóꞌo̱ ta tá íyo ndo xáa chiñu xiꞌin ya nduxa nuu Cristo, saa íin ndo. Tá xáa súvi ndo chiñu nuu na xiꞌin ndinuꞌu nima ndo, ta saa kua xáa súvi ndo ya kúni mií Ndioxi.

Colosenses 4:12

Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

1 Tesalonicenses 4:3

Chi Ndioxi ta kúni ra ya ná nduu ndo naꞌa, na i̱í nuu ra iin iin kivi, ta ná kuxika ndo nuu ndiꞌi kuachi kini íyo ñuu ivi yóꞌó.

1 Tesalonicenses 5:18

Ndiꞌi saa ichí taxi ndo tixaꞌvi ndaꞌa ra xaꞌa ndiꞌi ñaꞌa, saa chi saa kúni Ndioxi ikan ndo xaꞌa ya ndíkun ndo Jesucristo.

Tito 1:16

Káꞌan na xíni na Ndioxi sundi ndiꞌi ñaꞌa väꞌa íkan na ta ndínaꞌa na mií na ya köo xíni na ra, ta ndíkuaa va na ra, saa kúndasi nuu na xíni na naꞌa, ta köo xíin na xaa súvi na ya kúni Ndioxi, ta nda iin ñaꞌa vaꞌa küchiñu na ikan na.

HEBREOS 13:21

Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

HEBREOS 4:6

Ta kúmani ka sava naꞌa kiꞌvi koo nuu ndikundee na xiꞌin ra. Chi naꞌa, na xiꞌna xi̱ni soꞌo tuꞌun vaꞌa xaꞌa nuu koo na ndikundee na xiꞌin ra, ta köo ndi̱kuchiñu na kiꞌvi na koo na xiꞌin ra, xaꞌa ya köo ndi̱xaa súvi na ya ndi̱kaꞌan ra xiꞌin na.

Santiago 1:22

Ta süvi ndisaa xíniñuꞌu ndo kuni soꞌo ndo tuꞌun Ndioxi. Ndóꞌo̱ ta xíniñuꞌu ndo xaa súvi ndo ya káꞌan ya. Chi tá ndisaa xíni soꞌo ndo ya, ta köo xáa súvi ndo ya káꞌan ya, ta síndaꞌvi ndo mií va ndo.

1 Pedro 2:15

Saa chi Ndioxi ta kúni ra ya ná ikan ndo ya vaꞌa, saa kua küchiñu na kíꞌvi, na köo xíin kundaa ini xaꞌa ya ndaa, küchiñu na taxi na kuachi síki xaꞌa ndo.

1 Pedro 4:2

xaꞌa ya íyo ndúvi na ya xaa súvi na ya kúni mií Ndioxi tiempo ya táxi ra táku ka na ñuu ivi yóꞌó, ta köo íyo ka na tá kuꞌva kúni mií ikin kuñu na.

El Apocalipsis 2:27

Saa kaꞌnda chiñu na xiꞌin iin kàà ya káa tá káa iin itun kâni ni, ta ndee ni kaꞌnda chiñu na nuu ndiꞌi ñuu ivi yóꞌó xiꞌin ya. Chi kúu mií ya ndee ya sikuachi vali ya na, tá kuꞌva cháchi vali kisi ñuꞌú, saa ikan ya. Chi kàà ikán kua ta̱xi Iva i ndaꞌa i ya kaꞌnda chiñu i, ta saa koo ya taxi i ndaꞌa na.

El Apocalipsis 22:14

Vaꞌa ni kée na ndíkata toto na ya ndúyaa ni ya, chi na ikán ta kuu mií na ichí kaxi na kuiꞌi ndaꞌa itun táxi kutaku na xiꞌin Ndioxi ndiꞌi saa ichí. Saa kuchiñu na kiꞌvi na yeꞌe ñuu i̱í ikán.

El Apocalipsis 3:5

Ndiꞌi naꞌa, na kúndee nuu ya väꞌa, ta ndinuꞌu ni ini na ndíkun na yeꞌe, ta taxi i toto yaa kundixi na, ta ndïkata i kivi na nuu tutu i, nuu xa ndi̱kaꞌi kivi na ya koo na xiꞌin Ndioxi ndiꞌi saa kivi. Ta kaꞌan ndoso i nuu Ndioxi tin nuu na tatun ra xaꞌa na yóꞌó, kachi i saa: “Na yóꞌó ku na kutaku xiꞌin i”, kachi i xaꞌa na.