San Mateo 6:33 - Xochapa Mixteco

³³ Ndinuꞌu ni ini ndo kundikun ndo ichí nuu xáꞌnda chiñu Ndioxi, saa íkan ndo ya vaꞌa nuu ra. Ta ndiꞌi ka ñaꞌa ya xíniñuꞌu ndo ta mií ra taxi ndiꞌi ya ndaꞌa ndo.

San Mateo 6:33 Mawu Ofanana

San Mateo 19:28

Saa ndi̱kaꞌan Jesús xiꞌin nda, káchi ra: ―Ya ndaa káꞌan i xiꞌin ndo, tá ná tindaa kivi ya nduxaa ñuu ivi yóꞌó, ta yeꞌe, Taa ra xa̱a ñuu ivi yóꞌó, ta koo i nuu tai toꞌo, itun luvi ni, ikán koo i kaꞌnda chiñu i. Ta ndóꞌo̱ ndíkun yeꞌe, uxi uvi saa ndo koo nuu iin iin tai toꞌo xaa nani ndo kuachi xiꞌin uxi uvi saa tiꞌvi na Israel.

San Mateo 19:29

Ta ndiꞌi na síndikoo veꞌe na, án ñani na, án kuꞌva na, án iva siꞌí na, án yá síꞌi na, án seꞌe na, án ñuꞌú na, xaꞌa ya ndíkun na yeꞌe. Ta na yóꞌó ta kuaꞌa ni ya vaꞌa niꞌi na nuu Ndioxi. Nda iin ciento ka ya vaꞌa niꞌi na sata iin iin ñaꞌa ya si̱ndoo na. Ta saa niꞌi na koo na xiꞌin Ndioxi ndiꞌi saa kivi ya vaxi.

San Mateo 3:2

Káchi ra saa: ―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.

San Mateo 4:17

Saa xa̱á Jesús káꞌan ndoso ra tuꞌun Ndioxi xiꞌin naꞌa, káchi ra saa: ―Ndiko koo ini ndo xaꞌa ya väꞌa íkan ndo, chi xa yati ni íyo ichí ya xáꞌnda chiñu Ndioxi nuu kutaku ndo ―káchi Jesús xiꞌin na.

San Mateo 5:6

’Vaꞌa ni kée ndóꞌo̱ íin tá íin naꞌa, na káꞌun ini án ndóꞌo̱ íin tá íin naꞌa, na íchi tikuii. Xaꞌa ya kúni ndo ikan ndo ya vaꞌa nuu Ndioxi, chi vaxi kivi ta taxi Ndioxi ya koo vaꞌa ni ini ndo xiꞌin ra.

San Lucas 1:6

Ta vaꞌa ni ndi̱xiyo ra Zacarías xiꞌin yá síꞌi ra ka̱ñuꞌu ni na Ndioxi, tá íyo ya ndi̱kaꞌan ra, saa íyo ya i̱kan na. Xaꞌa ya ikán kua köo ndi̱niꞌi ndá ka naꞌa taxi na kuachi xaꞌa ra Zacarías xiꞌin yá síꞌi ra.

San Lucas 12:31

Ta vaꞌa ndikundee ni ndo nduku ndo ichí nuu xáꞌnda chiñu Ndioxi, saa kua taxi ndiꞌi ra ñaꞌa ya kúmani nuu ndo ndaꞌa ndo ―káchi Jesús xiꞌin nda ítaꞌan xiꞌin ra.

San Juan 5:4

Saa chi sava kivi núu iin tatun Ndioxi síkanda ya tikuii, ta na xiꞌna kúnumi kéta ini rá ta ndikun ndúvaꞌa na xiꞌin ndiꞌi ndá ka mií nuu kueꞌe ya kúu mií na.

San Juan 6:27

Xäa chiñu ndo xaꞌa ndisaa ya kuxi ndo, chi ya ñaa ta ya ndíꞌi xaꞌa va kua, sundi xaa chiñu ndo xaꞌa ya köo ndíꞌi xaꞌa, ya chindee ndóꞌo̱ koo ndo xiꞌin Ndioxi ndiꞌi saa kivi ya vaxi. Chi yeꞌe Taa ra xa̱a ñuu ivi yóꞌó ku ra kúu mií ichí ya taxi i ya ndaꞌa ndo, chi Iva i Ndioxi ku ra ta̱xi ichí ndaꞌa i ya ikan i saa ―káchi Jesús xiꞌin na.

Los Hechos 20:25

’Ta vitin káꞌan i xiꞌin ndo chi xiꞌin ndóꞌo̱ kua ndi̱xiyo i saa ndi̱xika i ndi̱kaꞌan ndoso i xiꞌin ndo xaꞌa kuꞌva xáꞌnda chiñu Ndioxi, chi vitin ta küni ka ndo nuu i.

Los Hechos 28:31

Nda iin naꞌa köo ndi̱keꞌe ra ya ndi̱kaꞌan ndoso ra xiꞌin na xaꞌa ichí nuu xáꞌnda chiñu Ndioxi. Saa sínaꞌa ra na xaꞌa Tata yo Jesucristo ta köo ya ndi̱kan na xiꞌin ra.

ROMANOS 1:17

Ta tuꞌun vaꞌa xaꞌa Jesucristo kua sínaꞌa yoo ndá kuꞌva kua ndíkuiso vaꞌa Ndioxi naꞌa nuu ra. Saa ndása ra na ivi na vaꞌa, na köo ka kuachi kúu mií nuu ra. Tá kuꞌva káꞌan mií tuꞌun Ndioxi ya ta̱a na xinaꞌa, káchi ya saa: “Naꞌa na ndíkuiso vaꞌa Ndioxi, na ndúu tá íin naꞌa, na köo ka kuachi ku mií nuu ra, na kándixa ni ñaꞌa, na ikán ku na kuchiñu kutaku xiꞌin Ndioxi”, káchi tuꞌun ra.

ROMANOS 10:3

Täꞌan kundaa ini na ndá kuꞌva kua nduu na, naꞌa na vaꞌa, na köo ka kuachi ku mií nuu Ndioxi. Ta ku̱ni na ikan na ya kúni mií na, süvi tá kuꞌva kúni mií Ndioxi kua.

ROMANOS 14:17

Xíniñuꞌu yo kundaa ini yo chi süvi xaꞌa ya xíxi yo, ta ni süvi xaꞌa nduta xíꞌi yo kua ndáa yaꞌvi ni chindee yoo koo yo nuu xáꞌnda chiñu Ndioxi. Ya ndee ni ndee ku ya ikan yo ya vaꞌa, ya ndaa xiꞌin taꞌan yo, ta vívií ná koo yo xiꞌin taꞌan yo, ná kusini ni yo xaꞌa ya ta̱xi Tachi I̱í Ndioxi ndaꞌa yo ya koo vaꞌa ni ini yo.

ROMANOS 8:31

Xaꞌa ya vaꞌa ni íkan Ndioxi xiꞌin yo, íyo ra xiꞌin yo ta nda iin naꞌa küchiñu xaa nduvaꞌa xiꞌin yo.

1 Corintios 1:30

Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

1 Corintios 3:22

Tá kúu yeꞌe Pablo xiꞌin ra Apolos, xiꞌin ra Pedro tin ñuu ivi yóꞌó, saa tu ya táku yo, xiꞌin ya xáꞌni yoo, saa tu tiempo ya ndóo yo vitin, xiꞌin ya kuu tiempo ya vaxi. Ndiꞌi ya yóꞌó ta xaꞌa mií ndo íyo ndiꞌi ya.

2 Corintios 5:21

Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.

Filipenses 3:9

Chi ndi̱kiꞌin vaꞌa Ndioxi yeꞌe, ta süvi xaꞌa ya xáa súvi i ley ra ya si̱ndoo ra Moisés kua ndi̱kiꞌin vaꞌa ra yeꞌe, xaꞌa ya ndáa ni ini i xíni i Jesucristo kua ndi̱kiꞌin vaꞌa ra yeꞌe, saa nda̱sa ra yeꞌe tá káa iin naꞌa, na köo ka kuachi kúu mií nuu Ndioxi.

2 Tesalonicenses 1:5

Ta xaꞌa tindoꞌo ya ndóꞌo ndo kua sínaꞌa yoo ya ndee ni ndaa ini Ndioxi, chi ndása vaꞌa ra ndóꞌo̱ ya kuchiñu ndo koo ndo xiꞌin ra nuu xáꞌnda chiñu ra, ta xaꞌa ya ñaa kua ndóꞌo ni ndo vitin.

1 Timoteo 4:8

Ta ya vaꞌa ni kua ikan loꞌo yo ejercicio nuu ndúndee ikin kuñu yo, sundi ya ndee ni ka xíniñuꞌu yo ikan yo kua koo vií ni yo nuu Ndioxi, chi tá íkan yo saa kua niꞌi ni yo ya vaꞌa nuu ra tiempo táku yo vitin xiꞌin tiempo ya vaxi.

2 Pedro 1:1

Yeꞌe, Simón Pedro ra xáa chiñu nuu Tata yo Jesucristo ku i táa tutu ya tíꞌvi i xaa ndaꞌa ndóꞌo̱ ñani yo, na xa iin káchi luvi ni kándixa ra tá kuꞌva kándixa mií nde ra. Saa chi mií Tata yo Jesucristo ra síkaku yoo, ra kúu Iva yo Ndioxi ku iin taa ra ndee ni ndaa ini.

2 Pedro 1:11

Ta saa kusini ni Ndioxi xiꞌin ndo saa kuna koꞌo ra yeꞌe nuu ndo kiꞌvi ndo koo ndo xiꞌin ra ndiꞌi saa tiempo nuu ndivi nuu koo Tata yo Jesucristo ra síkaku yoo kaꞌnda chiñu ra.