San Mateo 6:10 - Xochapa Mixteco

¹⁰ Ta ná kixiun kaꞌnda chiñu un ñuu ivi yóꞌó. Tá kuꞌva xáꞌnda chiñu un nuu ndivi saa ná koo ya ikan na ñuu ivi yóꞌó.

San Mateo 6:10 Mawu Ofanana

San Mateo 12:50

Saa chi ndiꞌi na íkan ya kúni Iva i Ndioxi, ra íyo nuu ndivi, ta na ikán ku ñani i xiꞌin kuꞌva i tin siꞌí i ―káchi Jesús.

San Mateo 16:28

Ya ndaa káꞌan i xiꞌin ndo, sava ndo ndóo yóꞌó vitin, ta kutaku ka ndo nda kivi tá ná ndiko koo yeꞌe, Taa ra xa̱a ñuu ivi yóꞌó, ndiko koo i ya kaꞌnda chiñu i ―káchi Jesús.

San Mateo 26:42

Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa: ―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

San Mateo 3:2

Káchi ra saa: ―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.

San Mateo 4:17

Saa xa̱á Jesús káꞌan ndoso ra tuꞌun Ndioxi xiꞌin naꞌa, káchi ra saa: ―Ndiko koo ini ndo xaꞌa ya väꞌa íkan ndo, chi xa yati ni íyo ichí ya xáꞌnda chiñu Ndioxi nuu kutaku ndo ―káchi Jesús xiꞌin na.

San Mateo 7:21

Saa káꞌan tuku Jesús, káchi ra saa: ―Íyo naꞌa káꞌan xiꞌin i: “Yóꞌo̱ ku ra chee, ra xáꞌnda chiñu nuu nde”, káchi na xiꞌin i. Sundi süvi ndiꞌi na ikán ku na kiꞌvi koo nuu xáꞌnda chiñu Ndioxi. Ndisaa na xáa súvi ya káꞌan Iva i Ndioxi ra íyo nuu ndivi ku na kiꞌvi koo xiꞌin ra.

San Marcos 11:10

¡Kaꞌnu ni ra yóꞌó, chi ra yóꞌó ku rey ra kaꞌnda chiñu nuu yo, ra yóꞌó ku ra ndi̱kiꞌin nuu xii sikua yo ra Rey David! ¡Chee ni ná koo nuu kaꞌnda chiñu ra! ¡Ta ná kunuu sukun ni ya toꞌo Ndioxi! ―káchi ndiꞌi na xaꞌa Jesús.

San Marcos 3:35

Saa chi ndiꞌi na íkan ya kúni Iva i Ndioxi, ta na yóꞌó ku siꞌí i xiꞌin ñani i ―káchi Jesús.

San Lucas 19:11

Tá xíni soꞌo na káꞌan Jesús, ta saa ndi̱kaꞌan ra iin tuꞌun ndíchi xiꞌin na, saa chi xa kúyati ra xaa ra ñuu Jerusalén, ta xíka ini na: “Xa ti̱ndaa kivi kaꞌnda chiñu Ndioxi ñuu ivi yóꞌó”, káꞌán na.

San Lucas 19:38

Saa káꞌan na: ―Ná ikan Ndioxi ya vaꞌa xiꞌin ra yóꞌó, chi Rey ra kaꞌnu nuu yo ku ra, ra ke̱e nuu Ndioxi ku ra. Vitin taxi Ndioxi koo vaꞌa naꞌa xiꞌin ra nuu ndivi, ta ná kunuu sukun ni ya toꞌo ra ―káchi na.

San Lucas 22:42

káchi ra saa: ―Tata Iva yo Ndioxi, tá tu kúni un ta täxi un tixuꞌvi i, sundi ïkan un ya káꞌan i xiꞌin un, ikan un ya kúni mií un xiꞌin i ―káchi ra xiꞌin Ndioxi.

San Juan 4:34

Ta saa ndi̱kuiin Jesús káꞌan ra xiꞌin nda, káchi ra saa: ―Tá káa ñaꞌa ya xíxi i saa káa ya xáa súvi ndiꞌi i ya kúni Ndioxi ta ndakua sixinu ndiꞌi i chiñu ya ta̱xi ra ndaꞌa i.

San Juan 6:40

Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

San Juan 7:17

Tá ndá ndo chíkaa ini xaa súvi ya kúni Ndioxi, ta vaꞌa kundaa ini ndo xaꞌa ya sínaꞌa i, án ya vaxi nuu Ndioxi kua án ya xáa xiní mií i kua káꞌan i xiꞌin ndo.

Los Hechos 13:22

Sindiꞌi ikán ta ki̱ndaa Ndioxi chiñu ndaꞌa ra Saúl. Saa ta̱xi ra ya ndaꞌa ra David ndi̱xiyo ra rey xa̱ꞌnda chiñu ra nuu xii yo na Israel. Ta ndi̱kaꞌan Ndioxi xaꞌa ra David, káchi ra saa: “Ndi̱taꞌan i iin taa ra ndítaꞌan ni ini mií i, seꞌe ra Isaí ku ra, ta ra ikán ku ra ikan ndiꞌi ya kúni i”, káchi Ndioxi xaꞌa ra David.

Los Hechos 21:14

Saa köo ndi̱kuchiñu nde sixînu nde ini ra. Ñaa vaꞌa ka ndi̱kaꞌan nde xiꞌin ra, káchi nde saa: ―Siín ka mií Ndioxi ná ikan ya kúni mií ra ―káchi nde xiꞌin ra.

Los Hechos 22:14

Saa ndi̱kaꞌan ra xiꞌin i, káchi ra saa: “Ndioxi ra ka̱ñuꞌu xii sikua yo ku ra ndi̱kaxin yóꞌo̱ ya ku̱ndaa ini un unkua chi̱tuni ra ikan ra xiꞌin na ñuu ivi. Ndi̱kaxin ra yóꞌo̱ xi̱ni un Jesús ra nda̱a, ta xi̱ni soꞌo un tuꞌun ya ndi̱kaꞌan ra xiꞌin un tá vaxi un ichí.

ROMANOS 12:2

Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

Efesios 6:6

Tá xáa súvi ndo chiñu nuu na, ta vaꞌa ikan ndo ya xiꞌin ndinuꞌu nima ndo, ta ïkan ndo ya ndisaa tá xíto na nuu ndo xáa chiñu ndo. Chi ndóꞌo̱ ta tá íyo ndo xáa chiñu xiꞌin ya nduxa nuu Cristo, saa íin ndo. Tá xáa súvi ndo chiñu nuu na xiꞌin ndinuꞌu nima ndo, ta saa kua xáa súvi ndo ya kúni mií Ndioxi.

Colosenses 1:13

Ndioxi ku ra sa̱ña ndika yoo nuu ndee ya xáꞌnda chiñu nuu naá. Ta si̱yaꞌa ra yoo ndi̱kiꞌvi yo ndikundoo yo xiꞌin ra nuu xáꞌnda chiñu Seꞌe ra, ra kúꞌvi ni ini ra xíni ra.

Colosenses 1:9

Nda tá ku̱ndaa ini nde xaꞌa ndo, ta nda saa kua xa̱á nde káꞌan ni nde xaꞌa ndo xiꞌin Ndioxi. Ndúku nde ya mani nuu ra ya ná taxi ra kundaa vaꞌa ini ndo xaꞌa ya xa chi̱tuni mií ra, ya ná taxi ra ya ndíchi ni ndaꞌa ndo kundaa ini ndo xiꞌin ya xínituni vaxi nuu mií ra.

1 Tesalonicenses 4:3

Chi Ndioxi ta kúni ra ya ná nduu ndo naꞌa, na i̱í nuu ra iin iin kivi, ta ná kuxika ndo nuu ndiꞌi kuachi kini íyo ñuu ivi yóꞌó.

1 Tesalonicenses 5:18

Ndiꞌi saa ichí taxi ndo tixaꞌvi ndaꞌa ra xaꞌa ndiꞌi ñaꞌa, saa chi saa kúni Ndioxi ikan ndo xaꞌa ya ndíkun ndo Jesucristo.

HEBREOS 1:14

Ta na tatun Ndioxi ta xa síin va ku na, chi na ikán ta tachi va ku na xíka na chiñu nuu ra, tíꞌvi ra na kuaꞌan na chindee na naꞌa, na sikaku ra.

HEBREOS 10:36

Ta xaꞌa ndee ni ini ndo tá ñúꞌu ndo nuu tindoꞌo, saa chi saa kua xáa súvi ndo ya kúni Ndioxi, ta saa niꞌi ndo ya ki̱ndoo ra taxi ra ndaꞌa ndo.

HEBREOS 10:7

Xaꞌa ya ñaa kua ndi̱kaꞌan i, káchi i saa: “Tata Iva i Ndioxi yóꞌó íin i. Vaxi i xaa súvi i ya kúni mií un, tá káchi ya íyo nuu ley un xaꞌa i”, káchi Jesucristo xiꞌin Ndioxi.

HEBREOS 13:21

Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

1 Pedro 2:15

Saa chi Ndioxi ta kúni ra ya ná ikan ndo ya vaꞌa, saa kua küchiñu na kíꞌvi, na köo xíin kundaa ini xaꞌa ya ndaa, küchiñu na taxi na kuachi síki xaꞌa ndo.

1 Pedro 4:2

xaꞌa ya íyo ndúvi na ya xaa súvi na ya kúni mií Ndioxi tiempo ya táxi ra táku ka na ñuu ivi yóꞌó, ta köo íyo ka na tá kuꞌva kúni mií ikin kuñu na.

El Apocalipsis 11:15

Saa ti̱vi tatun Ndioxi, ya uxa itun trompeta ya, ta xi̱ni soꞌo i tachi kuaꞌa ni na káꞌan nuu ndivi, ndee ka vi ndi̱kaꞌan na, káchi na saa: ―Iva yo Ndioxi ku ra xáꞌnda chiñu xiꞌin Tata yo Jesucristo. Ra yóꞌó ku ra ti̱ꞌvi Ndioxi vaxi sikaku na ñuu ivi yóꞌó. Ta ndiꞌi saa tiempo kaꞌnda chiñu ra ―káchi tachi na káꞌan ni na.

El Apocalipsis 12:10

Saa xi̱ni soꞌo i tachi na nuu ndivi, ndee ka vi ndi̱kaꞌan ya káchi ya saa: Vitin ti̱ndaa kivi ya sikaku Ndioxi naꞌa, na ndíkun sata ra. Saa ti̱ndaa tu kivi ya sinaꞌa ra, ya iin mituꞌun mií ra kúu mií ndee ya chee ni. Ta vitin xáa ra kaꞌnda chiñu ra nuu ndiꞌi ni kúu na ñuu ivi. Saa tu Jesucristo, ra ti̱ꞌvi Ndioxi sikaku naꞌa, ndi̱kiꞌin ra ichí, íyo ya ndaꞌa ra, ya kaꞌnda chiñu ra nuu ndiꞌi ni kúu na ñuu ivi. Saa chi kiti nǎꞌa, ta xa ta̱va na ri nuu ndivi. Chi ri ikán ku ri táxi ni kuachi xaꞌa nda ñani yo xiꞌin kuꞌva yo, na ndíkun Tata yo Jesucristo. Nduvi niuun táxi ri kuachi xaꞌa na nuu Ndioxi.

El Apocalipsis 19:6

Saa xi̱ni soꞌo i síso ni káꞌan kuaꞌa ni naꞌa, tá kuꞌva kái kóyo kuaꞌa ni tikuii nami saa kúu, ta saa kúu tu tá ndee ni ndáꞌi savi, saa kúu xi̱ni soꞌo i, ta káꞌan na, káchi na saa: ¡Ná xaa kaꞌnu ndiꞌi yo Ndioxi ra ndee ni ndee kúu mií nuu yo! Chi vitin xa̱á ra xáꞌnda chiñu ra.

El Apocalipsis 20:4

Saa xi̱ni i kuaꞌa ni tai toꞌo, ta nuu nu ikán ndóo ndiꞌi na kúu mií ichí ya xaa nani na kuachi. Ta xi̱ni tu i ya vaꞌa na ndee ni tuun xi̱ndikun Jesús, saa ndi̱xiꞌi na ndi̱taꞌnda sukun na chi ndi̱xika na ndi̱kaꞌan ndoso na tuꞌun vaꞌa xaꞌa Jesús yakan ndo̱ꞌo na saa. Ta köo ndi̱kañuꞌu na ikán kiti ìyo ni káa, ni naꞌna ri köo ndi̱kañuꞌu na, ta köo ndi̱taxi na ndikunuu sello ri taan na án ndaꞌa na. Saa ndi̱taku na ta xa̱á na xáꞌnda chiñu na xiꞌin Tata yo Jesucristo iin mil kuiya.