San Mateo 4:23 - Xochapa Mixteco

²³ Saa xíka Jesús ndiꞌi ni kúu ñuu ya ñúꞌu estado Galilea, ta sínaꞌa ra ini veꞌe ñuꞌu sinagoga, saa káꞌan ndoso ra tuꞌun vaꞌa xaꞌa ichí ya xáꞌnda chiñu Ndioxi, ta si̱ndaꞌa ra naꞌa, na ndee ndóꞌo̱ xiꞌin ndiꞌi saa nuu kueꞌe.

San Mateo 4:23 Mawu Ofanana

San Mateo 11:5

Tá kúu na kuáa̱ ta ndíkuna nuu na, na küvi kaka ta ndíkaka na, na ndóꞌo kueꞌe táꞌi náni lepra ta ndúvaꞌa ndiꞌi na, na sóꞌo ta xúna soꞌo na, na ndíi ta ndítaku na. Saa ndítuꞌun i xiꞌin ndiꞌi na ndaꞌvi tuꞌun vaꞌa xaꞌa Ndioxi.

San Mateo 12:9

Saa ndi̱kiꞌin Jesús kuaꞌan ra, ndi̱xaa ra veꞌe ñuꞌu sinagoga.

San Mateo 13:19

Ndikin ya ndi̱xita yuꞌu ichí ku ya káꞌan xaꞌa na xíni soꞌo tuꞌun xaꞌa nuu xáꞌnda chiñu Ndioxi, ta köo kúndaa ini na xiꞌin ya. Saa vaxi kiti nǎꞌa táva ri tuꞌun Ndioxi nima na ya xi̱ni soꞌo na.

San Mateo 13:54

Ndi̱xaa ra ñuu mií ra, saa xa̱á ra sínaꞌa ra veꞌe ñuꞌu sinagoga. Ta ndi̱kanda ni ini na, saa xa̱á káꞌan sava na, káchi na saa: ―¿Mií kua si̱kuaꞌa ra yóꞌó xíni ni ra? ¿Ta mií ke̱e ndee íkan ra yatuꞌun xiꞌin naꞌa?

San Mateo 14:14

Tá nu̱u ra sata barco saa xi̱ni ra iin chútu ndaa naꞌa, ñaa ku̱ndaꞌvi ni ini ra xi̱ni ra na, saa si̱ndaꞌa ra ndiꞌi na kúꞌvi ndáka naꞌa kuaꞌan xiꞌin na.

San Mateo 24:14

Ta na ndíkun yeꞌe kuꞌun na ndiꞌi ni kúu ñuu ivi kaꞌan ndoso na xiꞌin ndiꞌi naꞌa xaꞌa ichí nuu xáꞌnda chiñu Ndioxi ya ná kundaa ini na xaꞌa tuꞌun vaꞌa xaꞌa i. Tá ná kuu saa, ta saa kua ndiꞌi xaꞌa ñuu ivi yóꞌó.

San Mateo 3:2

Káchi ra saa: ―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.

San Mateo 9:35

Saa xíka Jesús ñuu naꞌnu tin ñuu vali, xíniꞌni ra xíka ra sínaꞌa ra naꞌa, tá veꞌe ñuꞌu sinagoga, tá veꞌe ñuu xíka ra. Sínaꞌa ra na tuꞌun vaꞌa xaꞌa ichí ya xáꞌnda chiñu Ndioxi. Ndíkani ra nuu na, saa síndaꞌa ra na ndóꞌo ndiꞌi nuu kueꞌe.

San Marcos 1:14

Sindiꞌi tá chi̱kaa ra Herodes ra Juan veꞌe kàà, saa ke̱e Jesús kuaꞌan ra estado Galilea kaꞌan ra tuꞌun vaꞌa xaꞌa Ndioxi ndá kuꞌva kua kaꞌnda chiñu ra.

San Marcos 1:21

Saa ndi̱xaa Jesús xiꞌin nda ítaꞌan xiꞌin ra ñuu Capernaum. Ta kivi i̱í, kivi ndíkundee na, ndi̱kiꞌvi Jesús ini veꞌe ñuꞌu sinagoga sínaꞌa ra naꞌa.

San Marcos 1:39

Saa xa̱á ra xíka ra ndiꞌi kúu veꞌe ñuꞌu sinagoga ya ñúꞌu estado Galilea. Xíka ra káꞌan ndoso ra tuꞌun Ndioxi, saa táva tu ra tachi nduvaꞌa ya ndóꞌo naꞌa va.

San Marcos 3:10

Kuaꞌa ka vi naꞌa si̱ndaꞌa ra, yakan ndiꞌi na kúꞌvi ta ndakua iin chíndaꞌa taꞌan mií na ya kúni na tindaa ñaꞌa na, ta saa nduvaꞌa na ikan ra.

San Marcos 6:2

Tá ti̱ndaa kivi i̱í ndíkundee na, saa ndi̱xaa ra veꞌe ñuꞌu sinagoga xa̱á ra sínaꞌa ra. Ta kuaꞌa ka vi na xíni soꞌo káꞌan ra, iin ndíkanda ini na xíni soꞌo na káꞌan ra, saa káꞌan na xaꞌa ra: ―¿Ndachu vaꞌa xíni ni ra? Tá káꞌan iin ra ndíchi ni saa káꞌan ra. ¿Ta ndachu vaꞌa íkan ra yatuꞌun?

San Marcos 6:6

Ta ndi̱kanda ini ra xi̱ni ra na, chi tuun ni nima na, köo xíin na kandixa ñaꞌa na. Saa ndi̱xika ra ndiꞌi kúu ñuu vali ya íyo yati sínaꞌa ra tuꞌun Ndioxi.

San Lucas 10:9

Tá íyo na kúꞌvi ñuu nuu ndi̱xaa ndo, ta sindaꞌa ndo na, saa kaꞌan ndo xiꞌin na: “Xa ku̱yati ichí nuu xáꞌnda chiñu Ndioxi nuu ndo”, kachi ndo xiꞌin ndiꞌi na.

San Lucas 13:10

Iin kivi ndíkundee na ke̱e Jesús kuaꞌan ra veꞌe ñuꞌu sinagoga sínaꞌa ra naꞌa.

San Lucas 16:16

Saa ndi̱kaꞌan ka Jesús, káchi ra saa: ―Tá yachi ta ley Ndioxi xiꞌin ya ta̱a nda ndi̱kaꞌan ndoso tuꞌun yuꞌu Ndioxi kua ndi̱xiyo, iin saa nda kivi tá ki̱xi ra Juan, ra si̱kuchi naꞌa. Saa ku nuu xa̱á káꞌan ndoso nde ndá kuꞌva xáꞌnda chiñu Ndioxi. Ta kuaꞌa ni na xáa nduxa kuakiꞌvi na ichí ra.

San Lucas 20:1

Saa ku̱u iin kivi tá ndíkaa Jesús veꞌe ñuꞌu kaꞌnu ñuu Jerusalén sínaꞌa ra tuꞌun vaꞌa xaꞌa Ndioxi. Ta saa ndi̱xaa nda ínuu nuu ndiꞌi sutu xiꞌin nda sínaꞌa ya ta̱a ra Moisés tin na xikuaꞌa,

San Lucas 4:14

Ta kúu mií Jesús ndee Tachi I̱í Ndioxi, ta saa ndiko koo ra kuaꞌan ra chí Galilea, ta ndi̱xita ndiꞌi tuꞌun xaꞌa ra ndiꞌi ni kúu ñuu.

San Lucas 5:17

Iin kivi íyo Jesús sínaꞌa ra naꞌa, ta ndóo sava nda fariseo xiꞌin nda ndíchi ni, nda sínaꞌa ley Ndioxi ya ta̱a ra Moisés. Ta sava nda ke̱e ñuu ya ñúꞌu estado Galilea xiꞌin ñuu Jerusalén tin inka ka ñuu ya ñúꞌu estado Judea, ndóo ndiꞌi nda xíni soꞌo nda ya káꞌan Jesús. Ta kúu mií Jesús ndee Ndioxi ya sindaꞌa ra naꞌa.

San Lucas 6:17

Tá ndi̱ko koo Jesús xiꞌin nda ítaꞌan xiꞌin ra. Ñaa ndi̱xinu nda iin yoso, ta ikán ndi̱kitaꞌan na ndíkun sata ra ndóo na ndátun ñaꞌa na. Saa ndóo kuaꞌa ni tu na ki̱xi ñuu Jerusalén xiꞌin na ki̱xi inka ñuu ya ñúꞌu estado Judea, xiꞌin na ki̱xi ñuu ya ñúꞌu yati yuꞌu nduta ñûꞌu ñuu Tiro tin na ki̱xi ñuu Sidón. Ndóo na ndátun ñaꞌa na chi kúni na kuni soꞌo na ya káꞌan ra, sava na kúni sindaꞌa ra na xiꞌin kueꞌe ya ndóꞌo na.

San Lucas 6:6

Saa ku̱u inka kivi ndíkundee na ndi̱kiꞌvi Jesús ini veꞌe ñuꞌu sinagoga, xa̱á ra sínaꞌa ra na. Ta ikán ndíkaa iin ra ndi̱ndichi ndaꞌa kuaꞌa.

San Lucas 7:21

Ta mi hora ikán, si̱ndaꞌa Jesús kuaꞌa ni na kúꞌvi xiꞌin ndiꞌi nuu kueꞌe, saa si̱ndaꞌa ra na kúu mií tachi nduvaꞌa tin si̱ndaꞌa tu ra na kuáa̱ va.

San Lucas 7:22

Saa ndi̱kuiin ra ndi̱kaꞌan ra xiꞌin nda, káchi ra saa: ―Kuáꞌan ndo ndituꞌun ndo xiꞌin ra Juan ya xi̱ni ndo, xiꞌin ya xi̱ni soꞌo ndo. Kaꞌan ndo xiꞌin ra na kuáa̱ ta ndíkoto na íkan i, na küvi kaka ta ndíkaka na, na kúu mií kueꞌe lepra ya táꞌi ta ndúvaꞌa na íkan i, na sóꞌo ta xúna i soꞌo na, na ndíi ta sítaku i na. Saa ndítuꞌun i tuꞌun vaꞌa xaꞌa Ndioxi xiꞌin ndiꞌi na ndaꞌvi.

San Lucas 8:1

Sindiꞌi ikán ke̱e Jesús kuaꞌan ra iin iin ñuu naꞌnu tin ñuu vali, kuaꞌan ra ndítuꞌun ra xiꞌin na, káꞌan ndoso ra tuꞌun vaꞌa xaꞌa kuꞌva xáꞌnda chiñu Ndioxi. Ta kuaꞌan uxi uvi saa nda ítaꞌan xiꞌin ra.

San Lucas 9:11

Sundi tá ku̱ndaa ini naꞌa nuu kuaꞌan Jesús ta ndi̱kundikun na kuaꞌan na sata ra. Ta saa ndi̱kuiso ñaꞌa ra, ndi̱kaꞌan ra xiꞌin na xaꞌa ichí nuu xáꞌnda chiñu Ndioxi, saa si̱ndaꞌa ndiꞌi ra na kúꞌvi na xíniñuꞌu nduvaꞌa.

San Lucas 9:60

Ñaa ndi̱kuiin Jesús káꞌan ra: ―Kündiꞌi ini un sinduxin un na ndíi, ná kundiꞌi ini mií na xaꞌa taꞌan na. Sundi yóꞌo̱, ta kuaꞌan kaꞌan un xiꞌin inka naꞌa xaꞌa ichí nuu xáꞌnda chiñu Ndioxi ―káchi Jesús xiꞌin ra.

San Juan 18:20

Saa ndi̱kuiin Jesús káꞌan ra, káchi ra saa: ―Nuu ndiꞌi ni kúu naꞌa ndi̱kaꞌan i, tá si̱naꞌa i ini veꞌe ñuꞌu vali sinagoga án veꞌe ñuꞌu kaꞌnu, nuu ndíkitaꞌan ndiꞌi na judío. Ta nda iin ñaꞌa köo ndi̱kaꞌan sěꞌe i nuu na.

San Juan 6:59

Ya yóꞌó kua ndi̱kaꞌan Jesús tá si̱naꞌa ra ini veꞌe ñuꞌu sinagoga ñuu Capernaum.

San Juan 7:1

Tá ndiꞌi ndi̱yaꞌa tiempo, saa xa̱á xíka Jesús ñuu ya ñúꞌu estado Galilea, ta xïin ka ra kaka ra estado Judea chi nda naꞌnu nuu na judío ta ndúku nda kaꞌni ñaꞌa nda.

Los Hechos 10:38

Ta xi̱ni soꞌo ndo ndá kuꞌva ta̱xi Ndioxi ndee ndaꞌa Jesús ndu̱ndee ra xiꞌin Tachi I̱í Ndioxi ya xa̱a ndúvi ra chiñu nuu Ndioxi. Ta nina ya vaꞌa i̱kan Jesús saa chi Ndioxi íyo xiꞌin ra. Ta ndi̱xika ra si̱ndaꞌa ra na kúꞌvi, saa chi̱ndee ra na kúu mií tachi nduvaꞌa.

Los Hechos 18:4

Ta ndiꞌi kivi ndíkundee na judío xáꞌan ra Pablo veꞌe ñuꞌu sinagoga káꞌan ra xiꞌin na judío tin na köo kúu judío. Ndinuꞌu ini ra káꞌan ra xiꞌin na síxinu ra ini na ya ná ndikundikun na Jesús.

Los Hechos 20:25

’Ta vitin káꞌan i xiꞌin ndo chi xiꞌin ndóꞌo̱ kua ndi̱xiyo i saa ndi̱xika i ndi̱kaꞌan ndoso i xiꞌin ndo xaꞌa kuꞌva xáꞌnda chiñu Ndioxi, chi vitin ta küni ka ndo nuu i.

Los Hechos 28:31

Nda iin naꞌa köo ndi̱keꞌe ra ya ndi̱kaꞌan ndoso ra xiꞌin na xaꞌa ichí nuu xáꞌnda chiñu Ndioxi. Saa sínaꞌa ra na xaꞌa Tata yo Jesucristo ta köo ya ndi̱kan na xiꞌin ra.

ROMANOS 10:15

Ta ¿unkua ikan na kuꞌun na ndituꞌun na tuꞌun Ndioxi xiꞌin inka naꞌa, ta köo naꞌa tiꞌvi na kuꞌun na? Tá káchi tuꞌun Ndioxi ya ta̱a na xinaꞌa: “Vaꞌa ka vi kúni yo tá xa̱a naꞌa ndítuꞌun na tuꞌun vaꞌa xaꞌa Ndioxi xiꞌin yo”, káchi ya ta̱a na.