San Mateo 26:39 - Xochapa Mixteco

³⁹ Saa ke̱e ra kuaꞌan xika loꞌo ka ra, ñaa ndi̱xaa ra si̱kusiti ra ta nda nuu ñuꞌú ndi̱xinu taan ra, ta xa̱á ra káꞌan ra xiꞌin Ndioxi, káchi ra saa: ―Tata Iva mií i, tá tu kúni un ta täxi un kundoꞌo i tindoꞌo yóꞌó, sundi ïkan un ya kúni yeꞌe, vaꞌa ikan un ya kúni mií va un ―káchi Jesús xiꞌin Ndioxi.

San Mateo 26:39 Mawu Ofanana

San Mateo 20:22

Saa ndi̱kuiin Jesús káꞌan ra xiꞌin yá, káchi ra saa: ―Nana, ni köo kúndaa ini ndo unkua ndúku ndo nuu i. ¿Án kuchiñu ndo koꞌo ndo vaso nuu koꞌo i ta kuchi ndo tá kuꞌva kuchi i? ¿Án xáꞌa ndee ini ndo ndoꞌo ndo xiꞌin i? Chi yeꞌe ta yáꞌa ni vi ndee tixuꞌvi i? ―káchi ra xiꞌin nda. Saa ndi̱kuiin nda, káꞌan nda: ―Kuchiñu va nde, Tata ―káchi nda xiꞌin ra.

San Mateo 24:24

Chi kana koo kuaꞌa ni na vata kachi na saa: “Yeꞌe ku ra ku Cristo ra ti̱ꞌvi Ndioxi”, án “Yeꞌe ku profeta ra káꞌan ndoso tuꞌun yuꞌu Ndioxi”, kachi na, ta süvi na ndaa ku na. Ikan na yatuꞌun nuu sindaꞌvi na naꞌa, saa ndikanda ni ini na xiꞌin ya vata ikan na nuu naꞌa, ta nda na ndi̱kaxin Ndioxi kuni na sindaꞌvi na.

San Mateo 26:42

Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa: ―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

San Marcos 13:22

Saa chi kuaꞌa ni nda taa vata kixi, kaꞌan nda, nda ikán ku nda ti̱ꞌvi Ndioxi sikaku na ñuu ivi yoꞌo, án nda ikán ku profeta nda vaxi kaꞌan ndoso tuꞌun yuꞌu ra, kachi nda. Ta kuaꞌa ni yatuꞌun ikan nda, saa ikan nda ya ndíchi ni nuu na ya sindaꞌvi nda na, nda sava na ndi̱kaxin Ndioxi kuni nda sindaꞌvi nda.

San Lucas 17:16

Ñaa si̱kusiti ra nuu Jesús. Nda nuu ñuꞌú ndi̱kuita ndee ra táxi ra tixaꞌvi ndaꞌa ra. Ta ni süvi ra Israel ku ra, ra ñuu Samaria ku ra.

San Juan 11:41

Saa si̱kutaꞌa na yu̱ú ya ndási yuꞌu kava nuu chi̱kaa na ra. Ta ndi̱koto Jesús nuu ndivi saa ndi̱kaꞌan ra, káchi ra saa: ―Tata Iva i, táxi i tixaꞌvi ndaꞌa un chi xi̱ni soꞌo un ya ndi̱kaꞌan i xiꞌin un.

San Juan 14:31

Sundi ya ná kundaa ini na ñuu ivi, ya ndixa kua kúꞌvi ini i xíni i Iva i Ndioxi, yakan xáa súvi i chiñu ya xa̱ꞌnda chiñu ra nuu i. Ta vitin ndikuita ndo, koꞌo yo ―káchi Jesús xiꞌin nda ítaꞌan xiꞌin ra.

San Juan 18:11

Saa ndi̱kaꞌan Jesús xiꞌin ra Pedro, káchi ra saa: ―Chivaꞌa i̱chi un ini iín nuu ndíkaa ya. Saa chi xa saa chi̱tuni Ndioxi ya ndee ni uꞌvi tixuꞌvi i, ta yeꞌe xíniñuꞌu i xaa súvi i tindoꞌo ya uꞌvi ni yóꞌó ―káchi ra xiꞌin ra Pedro.

San Juan 5:19

Saa ndi̱kaꞌan Jesús xiꞌin nda káchi ra saa: ―Ya ndaa káꞌan i xiꞌin ndo, ra kúu Seꞌe Ndioxi ta nda iin ñaꞌa küvi ikan mií ra, ndisaa ya xíni ra íkan Iva ra kua íkan ra. Ndiꞌi saa kivi kándixa ra ya káꞌan Iva ra xiꞌin ra.

San Juan 5:30

Ta ndi̱kaꞌan ka ra xiꞌin nda, káchi ra saa: ―Yeꞌe ta süvi xiꞌin ichí mií i kua xáa nani i kuachi naꞌa, tá íyo ya xíni soꞌo i saa íyo ya íkan i xiꞌin na, xiꞌin ya ndaa xáa nani i kuachi na, chi süvi xiꞌin ya kúni mií i íkan i ya, xiꞌin ya kúni mií Iva i Ndioxi ra ti̱ꞌvi yeꞌe vaxi i kua xáa nani i kuachi na.

San Juan 6:38

Saa chi yeꞌe ta ke̱e i nuu ndivi vaxi i ñuu ivi yóꞌó ikan i ya kúni Ndioxi, ta växi i xaa súvi i ya kúni mií i.

Los Hechos 10:25

Tá ndi̱xaa ra Pedro veꞌe ra Cornelio, ta ke̱ta ra ikán ndi̱kiꞌin ñaꞌa ra si̱kusiti ra nuu ra ya xáa kaꞌnu ñaꞌa ra.

Filipenses 2:8

Xaꞌa ya nda̱sa ra mií ra taꞌan yo ivi yóꞌó, nda̱sa ni̱nu̱ ra mií ra. Xi̱ni soꞌo ndiꞌi ra ya ndi̱kaꞌan Ndioxi xiꞌin ra, vani ndi̱kaꞌan Ndioxi xiꞌin ra kuvi ra ndaꞌa cruzin, ta xa̱a súvi ndiꞌi ra ya.

HEBREOS 5:7

Kivi ndi̱xiyo Cristo ñuu ivi yóꞌo̱ ta ndee ni xa̱ku ndaꞌvi ra nuu Ndioxi, káꞌan ndaꞌvi ra xiꞌin Ndioxi, saa chi xíni ra iindaa mií Ndioxi ku ra kúu mií ndee ya sikaku ñaꞌa ra, ya ná ndöo ra ndikaa ra ndaꞌa ndìì ya xáꞌni naꞌa. Ta xaꞌa ya xa̱a súvi ni ra ya ndi̱kaꞌan Ndioxi xiꞌin ra, saa ndaꞌvi ni ndo̱ꞌo ra nuu Ndioxi, xaꞌa ya ikán kua xi̱ni soꞌo Ndioxi ya ndi̱kaꞌan ra xiꞌin ra.

El Apocalipsis 19:10

Saa si̱kusiti i nuu tatun ikán ya xaa toꞌo ñaꞌa i, ta ndi̱kaꞌan ya xiꞌin i, káchi ya saa: ―Ïkan un saa, küsiti un nuu i, chi tá kuꞌva íyo mií un xáa chiñu un xiꞌin na ñani un na ndíkun Tata yo Jesucristo saa íyo tu yeꞌe va. Chi yo xáa chiñu nuu Ndioxi ku ndiꞌi yo, saa kándixa yo tuꞌun ya ndaa ya ndi̱kaꞌan Tata yo Jesucristo, ta ná sïndoo yo ya kándixa yo tuꞌun ra. Yakan küsiti un nuu i, iin mií Ndioxi ná xaa kaꞌnu ni yo. Chi tuꞌun ya si̱naꞌa Tata yo Jesucristo, ta iin káchi ku ya xiꞌin tuꞌun ya ndi̱kaꞌan nda ndi̱kaꞌan ndoso tuꞌun yuꞌu Ndioxi xinaꞌa, chi mií Tachi I̱í Ndioxi ta̱xi ya ndaꞌa nda ikán ndi̱kaꞌan nda ―káchi tatun ikán xiꞌin i.