San Mateo 24:30 - Xochapa Mixteco

³⁰ Ta ndiꞌi naꞌa kuni na koo seña nuu ndivi ya ndiko koo yeꞌe, Taa ra xa̱a ñuu ivi yóꞌó, saa kuaku ni na ñuu ivi yóꞌó, kusuchi ni ini na. Ta ndiꞌi naꞌa kuni na yeꞌe kixi i xiꞌin viko, kixi i xiꞌin ndee chee ni xiꞌin ndiꞌi ya yéꞌe̱ ni.

San Mateo 24:30 Mawu Ofanana

San Mateo 24:3

Saa ke̱e nda kuaꞌan nda iku Olivo, ñaa ndi̱kunduꞌu Jesús xiki ikán, ta ku̱yati nda ítaꞌan xiꞌin ra nuu ra káꞌan sěꞌe nda xiꞌin ra, káchi nda saa: ―Tata, kúni nde kaꞌan un xiꞌin nde maa kua kuu saa. ¿Ta ndá seña kua koo tá ná ndiko koo un tin tá ná ndiꞌi xaꞌa ñuu ivi? ―káchi nda xiꞌin ra.

San Mateo 24:37

’Tá kuꞌva i̱kan naꞌa kivi xi̱taku ra Noé, saa ikan na kivi tá ná ndiko koo i ñuu ivi yóꞌó.

San Mateo 24:39

Ta köo ndi̱kundaa ini na unkua kundoꞌo na, nda kivi tá xa̱á kúun kini ni savi íꞌná, ñaa ta̱ni na ta ndi̱kaꞌan ndaa na xiꞌin tikuii ndi̱xiꞌi ndiꞌi na. Tá ndo̱ꞌo na ikán saa kundoꞌo na ndóo vitin chi köo íyo nduvi na kivi tá ná ndiko koo yeꞌe, Taa ra xa̱a ñuu ivi yóꞌó.

San Mateo 26:64

Saa ndi̱kuiin Jesús káꞌan ra: ―Tá íyo ya ndi̱kaꞌan un saa íyo ya, ikán ku i. Ta káꞌan tuku i xiꞌin ndo, vaxi kivi ta kuni ndo yeꞌe, Taa ra xa̱a ñuu ivi yóꞌó koo i nuu tai toꞌo, itun íyo ñaꞌñu kuáꞌá Ndioxi, ta ndee ni ndee kúu mií ra. Saa kuni ndo yeꞌe ndiko koo i kixi i tañu viko nuu ndivi ―káchi Jesús xiꞌin nda.

San Marcos 13:26

Tá ndiꞌi ikán, saa kuni ndiꞌi na ivi yeꞌe, ra Taa ra xa̱a ñuu ivi yóꞌó, kuni na kixi i xiꞌin viko, ta ndee ni ndee koo i kixi i, iin ndiyeꞌe ndaa ndiꞌi, chi kixi ndiꞌi ndee i xiꞌin i.

San Marcos 13:4

―Tata, kaꞌan xiꞌin nde, ¿maa kua kuu saa, ta ndá seña kua koo tá xa ku̱yati ndiꞌi xaꞌa veꞌe ñuꞌu kaꞌnu? ―káchi nda xiꞌin ra.

San Lucas 21:27

Tá sindiꞌi ikán, saa kuni ndiꞌi naꞌa yeꞌe, Taa ra xa̱a ñuu ivi yóꞌó, kuni na ndiko koo i kixi i xiꞌin viko kixi i, ta ndee ni koo ya yéꞌe̱ ná kixi i. Nda tá káa iin ra rey, ra chee, saa koo i kixi i, chi kixi ndee Ndioxi xiꞌin i.

San Lucas 22:69

Sundi vitin ta koo yeꞌe Taa ra xa̱a ñuu ivi yóꞌó xiꞌin Ndioxi ra ndee ni ndee kúu mií. Koo i xiꞌin ra nuu tai toꞌo ñaꞌñu kuaꞌá ra ―káchi Jesús xiꞌin nda.

Los Hechos 1:11

Saa xa̱á nda káꞌan nda, káchi nda saa: ―Ndóꞌo̱ na ñuu estado Galilea, ¿ndachu kua xíto ni ndo nuu ndivi ndíta ndo? Suvi Jesús, ra xi̱ni ndo nda̱a kuaꞌan nuu ndivi, suvi ra ñaa ku ra ndiko koo tuku, tá kuꞌva nda̱a ra kuaꞌan ra, saa kuu ndiko koo ra ―káchi nda ikán xiꞌin nda apóstol.

2 Tesalonicenses 1:7

Vani ndóꞌo ni ndo vitin, sundi vaxi kivi saa taxi ra ndikundee ndo nuu ndiꞌi ya ndóꞌo ndo, iin káchi taxi ra koo vaꞌa ni ndo xiꞌin nde. Ya yóꞌó ikan ra kivi ná ndiko koo Tata yo Jesucristo kixi ra nuu ndivi xiꞌin na tatun Ndioxi, na ndee ni ndee kúu mií.

El Apocalipsis 1:7

Vaxi kivi ta ndiko koo Tata yo Jesucristo ñuu ivi yóꞌó, kixi ra tañu vi̱kó. Ndiꞌi saa naꞌa kuni xiꞌin nuu na ra kixi ra. Nda naꞌa, na tu̱vi itun íyo kàà xi̱ín nuu, na xa̱a ndu̱vaꞌa ni xiꞌin ra, si̱tikueꞌe ni na ra, ta nda na ikán kuni kixi ra. Ta naꞌa, na ndóo ndiꞌi ni kúu ñaꞌñu ñuu ivi, na köo ndi̱xiin kandixa ñaꞌa, nda na ikán kusuchi ni ini, kuaku ni na tá ná kuni na ra. Saa ná koo.

El Apocalipsis 12:1

Saa xi̱ni i iin seña chee ni nuu ndivi, chi xi̱ni i iin yá ñaꞌa ndíxi níí yá ñu̱ꞌù, saa ndíkaa kiti yo̱ó tixin xaꞌa yá, ta ínuu corona xiní yá, ta kúu mií corona ikán uxi uvi kiti kimi.