San Mateo 13:23 - Xochapa Mixteco

²³ Ta ndikin ya ndikoyo nuu ñuꞌú xaꞌan ku ya káꞌan xaꞌa na xíni soꞌo tuꞌun Ndioxi, ta kúndaa ini na xiꞌin ya. Ta tá káa ñaꞌa ya vaꞌa ni kána, saa íin na yóꞌó. Nda tá íin ndikin ya kána iin ciento ndikin, án ya kána uni xiko ndikin án ya kána oko uxi ndikin, saa íin na ndinuꞌu ni kándixa tuꞌun Ndioxi ―káchi Jesús xiꞌin nda ítaꞌan xiꞌin ra.

San Mateo 13:23 Mawu Ofanana

San Mateo 12:33

Saa ndi̱kaꞌan tuku Jesús xiꞌin na, káchi ra saa: ―Tá íyo itun vaꞌa, ta kuiꞌi vaꞌa kúun ndaꞌa nu. Tá tu íyo itun väꞌa, ta kuiꞌi väꞌa kúun ndaꞌa nu. Ya kuchiñu yo kundaa ini yo án nu vaꞌa ku nu án nu väꞌa ku nu, ta vaꞌa kiꞌin yo kuenta xaꞌa kuiꞌi kúun ndaꞌa nu.

San Mateo 13:8

Sava ya ndi̱koyo nuu ñuꞌú xaꞌan ni, ta kuaꞌa ni trigo ya ka̱na. Sava ya ka̱na nda iin ciento ndikin ya, sava ya ka̱na uni xiko ndikin ya, sava tuku ya ka̱na oko uxi ndikin ya ―káchi Jesús xiꞌin na.

San Mateo 3:10

Tá íyo iin ra ndáa itun kuiꞌi, itun köo kúun kuiꞌi ndaꞌa, ta kuaꞌan ra xáꞌnda ndiꞌi ra nu xiꞌin yácha, nda tioꞌo nu táva ra kuaꞌan nu xíxi nu. Saa íyo ndóꞌo̱ nuu Ndioxi, xa íyo ndúvi ra ikan ra saa xiꞌin ndiꞌi ndo, tá tu köo ndíko koo ini ndo xaꞌa ya väꞌa íkan ndo.

San Mateo 3:8

Xiꞌna xíniñuꞌu ndo ndiko koo ini ndo xaꞌa kuachi ndo, ta saa sinaꞌa ndo mií ndo ya ndixa kua ndi̱nama ini ndo xaꞌa ya väꞌa íkan ndo.

San Marcos 10:15

Ya ndaa káꞌan i xiꞌin ndo, tá köo xíin ndo xaa ni̱nu̱ ndo mií ndo nuu Ndioxi tá kuꞌva íyo ini na vali yóꞌó, ta küchiñu ndo kiꞌvi ndo koo ndo nuu xáꞌnda chiñu Ndioxi ―káchi ra xiꞌin nda.

San Marcos 4:20

Ta íyo tuku sava na íin tá íin ñuꞌú vaꞌa ni ya kána kuaꞌa ni ñaꞌa nuu, chi ñuꞌú vaꞌa ikán kána kuaꞌa ni ñaꞌa nuu ya, sava ya táxi oko uxi ndikin trigo, tin ya táxi uni xiko, xiꞌin ya táxi nda iin ciento trigo. Tá íin ya ikán saa íin na ndinuꞌu ndíkiꞌin tuꞌun Ndioxi, ta ya ikán ku ya chíndee na kúu na ivi na vaꞌa. Soꞌva kúni kachi tuꞌun ndíchi ikán ―káchi Jesús xiꞌin na.

San Lucas 13:9

án sana kana kuiꞌi ndaꞌa nu. Tá tu köo kuiꞌi ndi̱taxi nu, ta saa kaꞌnda i nu”, káchi ra. Soꞌva káchi tuꞌun ndíchi yóꞌó ―káchi Jesús xiꞌin na.

San Lucas 8:15

Ta siꞌva ri ndi̱koyo nuu ñuꞌú vaꞌa ku na kúu mií nima vaꞌa, ndâku ni ini na chívaꞌa na tuꞌun xíni soꞌo na nima na, ta köo ndíko koo ini na ya kuaꞌan na ichí ra, tá íin kuiꞌi vaꞌa ni kána, saa íin na ikán ―káchi Jesús xiꞌin nda ítaꞌan xiꞌin ra.

San Lucas 8:8

Ta sava siꞌva ndi̱koyo nuu ñuꞌú vaꞌa. Ta xa̱ꞌnu vaꞌa ya kuaꞌa ni nuni ya ka̱na, sava ya ndi̱xiyo nda iin ciento nuni sata ―káchi Jesús xiꞌin na. Ta saa ndee ni nda̱niꞌi ra tuꞌun ra ta ndi̱kaꞌan ra xiꞌin na, káchi ra saa: ―Unku ndóꞌo̱ íyo soꞌo, ta kuni soꞌo ndo unkua káchi tuꞌun ndíchi yóꞌó ―káchi ra xiꞌin na.

San Juan 15:16

Ta süvi mií ndo ndi̱kaxin yeꞌe, mií i ndi̱kaxin ndóꞌo̱. Ta ndi̱kaxin i ndóꞌo̱ ya ná ikan ndo nina ya vaꞌa. Tá íin itun kuiꞌi kána kuaꞌa ni ñaꞌa ndaꞌa saa ná koo ndo. Ndiꞌi saa ichí koo ndo tá íin kuiꞌi vaꞌa ni kúun. Tá íkan ndo saa ta vaꞌa nduku ndo ndiꞌi ya kúmani nuu ndo nuu Iva i. Ta tixin kivi yeꞌe taxi ra ya ndúku ndo nuu ra ndaꞌa ndo.

San Juan 8:47

Ndiꞌi na kúu kuenta Ndioxi ta xíni soꞌo na tuꞌun ra, ta ndóꞌo̱ ta süvi kuenta Ndioxi ku ndo, yakan köo xíin ndo kuni soꞌo ndo ya káꞌan i ―káchi Jesús xiꞌin na.

Los Hechos 16:14

Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra.

Los Hechos 17:11

I̱í va ini na ñuu Berea ikán nuu na ñuu Tesalónica, chi vaꞌa ni ka va ndi̱kiꞌin na ikán tuꞌun Ndioxi ya káꞌan ra Pablo xiꞌin na. Ndiꞌi saa kivi síkuaꞌa na tuꞌun Ndioxi ya kundaa vaꞌa ka ini na án ya ndixa kua káꞌan ra Pablo xiꞌin na.

2 Corintios 9:10

Saa chi mií Ndioxi ku ra táxi siꞌva chíꞌi naꞌa, ta suvi mií ra ku ra táxi ñaꞌa xíxi ndiꞌi na. Ta kuꞌva saa ikan Ndioxi xiꞌin ndo, taxi ra kuaꞌa ni ñaꞌa vaꞌa ndaꞌa ndo, saa kuchiñu ndo chindee taꞌan ndo xiꞌin inka na.

Filipenses 1:11

Saa kua ikan ni ndo ya vaꞌa, ya ndaa nuu ra, ta tixin mií Tata yo Jesucristo kua ikan ndo saa, ta saa kua kaꞌan vaꞌa ni naꞌa xaꞌa Ndioxi, ta ndikunuu vaꞌa ni ya toꞌo ra.

Filipenses 4:17

Süvi ya káꞌan i ya yóꞌó xiꞌin ndo ta kúni i chindee ndo yeꞌe, chi yeꞌe ya kúni i kua ná niꞌi ni ka ndo ya vaꞌa nuu Ndioxi xaꞌa ya vaꞌa ni ini ndo, tái ni ndo.

Colosenses 1:10

Ta saa kua vaꞌa kuchiñu ndo ikan ndo tá kuꞌva kúni mií Tata yo Jesucristo, chi saa kua xaa kaꞌnu ni ndo ra xiꞌin ndiꞌi ni kúu ñaꞌa vaꞌa íkan ndo nuu ra, koo ndo tá kuꞌva íyo naꞌa, na ndíkun Tata yo Jesucristo. Ta saa kua vaꞌa kuaꞌnu ka ndo xiꞌin ya ndíchi xaꞌa mií ra.

Colosenses 1:6

Ta tuꞌun yóꞌó kua xa ndi̱xaa nuu ndo, ta xa kuaꞌa ni naꞌa kúndaa ini xaꞌa ya ndiꞌi ni kúu ñaꞌñu. Ta vaꞌa ni íkan ya xiꞌin na chi ndísama ya na, saa ndúkuaꞌa ka na kúndaa ini xaꞌa ya. Ta saa tu ndóꞌo̱ va, nda tá xi̱ni soꞌo ndo ya, saa ku̱ndaa ini ndo xaꞌa ya ndaa, ya ndee ni kúꞌvi ini Ndioxi xíni ra ndóꞌo̱.

1 Tesalonicenses 4:1

Ñani yo xiꞌin kuꞌva yo, xíkan ni nde ya mani nuu ndo, káꞌan ni nde xiꞌin ndo xaꞌa ya xa si̱naꞌa nde ndóꞌo̱ ndá kuꞌva koo ndo tá kuꞌva kúni mií Ndioxi. Saa xíkan ni nde ya mani nuu ndo tixin ichí mií Tata yo Jesucristo káꞌan nde xiꞌin ndo ya ná xaꞌa ni ka ndo ndee koo vaꞌa ni ndo.

2 Tesalonicenses 2:10

Ta saa nduku ni ra kuꞌva ya kuchiñu ra sindaꞌvi ra naꞌa, na kuaꞌan ichí nuu ndiꞌi xaꞌa na. Chi köo ndi̱xiin na ndikiꞌin na ya ndaa ya kúꞌvi ni ini Ndioxi xíni ra na, ya kuchiñu na kaku na.

HEBREOS 4:2

Saa chi tá kuꞌva xi̱ni soꞌo yoo tuꞌun Ndioxi ya síkaku ra yoo, ta saa xi̱ni soꞌo tu na xii sikua va yo tuꞌun ra. Ta xi̱ni soꞌo uun va na ya, saa chi köo ndi̱kandixa na ya ndi̱kaꞌan Ndioxi xiꞌin na.

HEBREOS 6:7

Sundi naꞌa, na ndíkun vaꞌa Ndioxi, ta tá íin ñuꞌú vaꞌa nuu chíꞌi naꞌa, saa íin na. Chi ndiꞌi kivi tá kúun savi, ta xaꞌa ya ndee ni vaꞌa ñuꞌú na, yakan vaꞌa ni kána ñaꞌa chíꞌi na, níꞌi ni na ya vaꞌa nuu ñuꞌú na íkan Ndioxi.

HEBREOS 8:10

Ta ya yóꞌó ku trato ya kindoo i ikan i xiꞌin na Israel kivi vaxi: Ta soꞌva koo ya ikan i xiꞌin na kivi ikán: Chikaa i ley i koo ya xi̱ní na, saa taa i ya nima na. Ta iindaa mituꞌun yeꞌe kuu Ndioxi ra kañuꞌu na, saa tu mií va na kundikun na yeꞌe.

2 Pedro 3:18

Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.