San Mateo 13:11 - Xochapa Mixteco

¹¹ Saa ndi̱kuiin ra káꞌan ra xiꞌin nda: ―Ndóꞌo̱, ta xa mií Ndioxi ku ra ta̱xi ichí ndaꞌa ndo ya kundaa ini ndo xaꞌa ichí nuu xáꞌnda chiñu ra, ya íyo sěꞌe. Sundi na ikán, ta köo ndítaxi ra ichí ndaꞌa na kundaa ini na.

San Mateo 13:11 Mawu Ofanana

San Mateo 13:10

Saa ku̱yati nda ítaꞌan xiꞌin ra nuu ra, ndi̱kaꞌan nda xiꞌin ra, káchi nda saa: ―Tata ¿Ndachu sínaꞌa un naꞌa xiꞌin nina tuꞌun ndíchi? ―káchi nda xiꞌin ra.

San Mateo 16:17

Saa ndi̱kaꞌan Jesús xiꞌin ra: ―Ná kusini ni un Simón, seꞌe ra Jonás, saa chi süvi naꞌa, na ñuu ivi yóꞌó ku na ndítaxi ya xínituni un. Iva i Ndioxi, ra íyo nuu ndivi ni̱nù ku ra i̱kan saa xiꞌin un ―káchi Jesús xiꞌin ra.

San Mateo 19:11

Saa ndi̱kuiin Jesús, káchi ra saa: ―Süvi ndiꞌi naꞌa kúchiñu koo saa. Ndisaa na ta̱xi Ndioxi tïndaꞌa na, na ikán ku na köo tíndaꞌa.

San Mateo 20:23

Ñaa ndi̱kaꞌan Jesús xiꞌin nda, káchi ra saa: ―Ya ndaa kua tixuꞌvi ni ndo tá kuꞌva tixuꞌvi i. Sundi ya kundoo iin ndo ñaꞌñu kuáꞌá i tin ñaꞌñu ítín i, ta küvi taxi i ya ndaꞌa ndo. Saa chi mií Iva i ku ra xíni unku na xa chi̱tuni mií ra kundoo ikán ―káchi Jesús xiꞌin nda.

San Marcos 10:40

sundi ya koo ndo xiꞌin i ñaꞌñu kuáꞌá i xiꞌin ñaꞌñu ítín i, ta süvi ndaꞌa yeꞌe íyo ichí ya taxi i ya ndaꞌa ndo, mií Iva i Ndioxi ku ra xíni unku na chi̱tuni ra koo yati xiꞌin i ―káchi ra xiꞌin nda.

San Marcos 4:11

Saa ndi̱kuiin Jesús ndi̱kaꞌan ra xiꞌin na, káchi ra saa: ―Ndioxi táxi ra kundaa ini ndo xaꞌa ya íyo sěꞌe nuu xáꞌnda chiñu ra. Sundi na íyo chí keꞌe ta köo kúndaa ini na xiꞌin ya chi ndisaa tuꞌun ndíchi va kua xíni soꞌo na káꞌan i.

San Lucas 8:10

Ñaa ndi̱kuiin Jesús ndi̱kaꞌan ra xiꞌin nda, káchi ra saa: ―Ndioxi táxi ra kundaa ini ndo ya sêꞌe ndá kuꞌva xáꞌnda chiñu ra. Ta inka na ta xiꞌin tuꞌun ndíchi káꞌan i xiꞌin na, yakan ni xíto na tin xíni soꞌo na ta ni köo xíin na kundaa ini na ―káchi Jesús xiꞌin nda.

San Juan 6:65

Saa ndi̱kaꞌan ka ra xiꞌin na, káchi ra saa: ―Xaꞌa ya yóꞌó kua ndi̱kaꞌan i xiꞌin ndo, nda iin naꞌa ta küvi kixi na kundikun na yeꞌe, tá tu süvi mií Iva i ku ra ndáka na vaxi na nuu i ―káchi ra xiꞌin na.

San Juan 7:17

Tá ndá ndo chíkaa ini xaa súvi ya kúni Ndioxi, ta vaꞌa kundaa ini ndo xaꞌa ya sínaꞌa i, án ya vaxi nuu Ndioxi kua án ya xáa xiní mií i kua káꞌan i xiꞌin ndo.

Los Hechos 16:14

Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra.

ROMANOS 11:25

Ñani yo xiꞌin kuꞌva yo, ndóꞌo̱ köo kúu judío, kúni i kaꞌan i xiꞌin ndo ya ná kundaa ini ndo xaꞌa chiñu ya íyo sěꞌe ikan Ndioxi. Yakan kua xäa xíni ni ndo mií ndo, saa chi sava mií na Israel ta ndee ni ndu̱tuun ini na, köo xíin na kandixa na Jesucristo, ta saa ikan na nda ná xinu naꞌa, na köo kúu judío, na ndi̱kaxin Ndioxi sikaku ra.

ROMANOS 16:25

Ta ná xaa toꞌo yo Ndioxi chi mií ra ku ra chíndee yoo, táxi ra ndee ndaꞌa ndo ya tuun ni ndíkun ndo tuꞌun vaꞌa xaꞌa Jesucristo, ya ndítuꞌun i xiꞌin ndo. Tuꞌun vaꞌa yóꞌó kua ndi̱xiyo sěꞌe xinaꞌa, ta vitin si̱naꞌa tuvi Ndioxi ya nuu yo.

1 Corintios 13:2

Tá tu vaꞌa ni káꞌan i tuꞌun yuꞌu Ndioxi, ni vaꞌa ni kúndaa tu ini i xiꞌin ndiꞌi ni kúu ya íyo sěꞌe, ni ndíchi ni káa i, ni kándixa ni i Ndioxi ya kuni soꞌo ra kaꞌan i xiꞌin ra ndinama ra iku kuꞌun ya inka ñaꞌñu, sundi tá tu köo ya kúꞌvi ini táxi Ndioxi íyo nima i, ya kuꞌvi ini i kuni i inka naꞌa, ta ni köo ndáa yaꞌvi mií vi i.

1 Corintios 15:51

Sundi yeꞌe, ta kúni i ná kundaa ini ndo xaꞌa ñaꞌa ya chi̱tuni mií Ndioxi íyo sěꞌe: Süvi ndiꞌi yo kuvi. Sundi kivi ikán ta iin káchi ndisama ndiꞌi ra ikin kuñu iin iin yo, ndisama ra ya nduu ya ikin kuñu xa̱á.

1 Corintios 2:14

Ta naꞌa, na köo íyo Tachi I̱í Ndioxi xiꞌin ta köo kúchiñu na kundaa ini na xaꞌa ya vaꞌa ke̱e nuu ndivi, chi tá káa tuꞌun ya kíꞌvi va saa káa ya nuu na. Köo kúchiñu na kundaa ini na xaꞌa ya, saa chi ndisaa naꞌa, na kúu mií Tachi I̱í Ndioxi ku na kúchiñu kúndaa ini xiꞌin ya.

1 Corintios 2:7

Ndeꞌe, ta sínaꞌa nde ya ndíchi kúu mií Ndioxi, ya ndi̱xiyo sěꞌe yachi nda kivi tá xi̱koo xaꞌa ñuu ivi yóꞌó. Nda saa vi chi̱tuni Ndioxi ya ndíchi yóꞌó ya kuchiñu niꞌi ni yo ya vaꞌa xiꞌin ya.

1 Corintios 4:1

Tá kivi ndíkani ini ndo xaꞌa yeꞌe xiꞌin ra Apolos, ta xíniñuꞌu ndo ndikani ini ndo ya kúu nde ndisaa moso kuiti nda xáa chiñu nuu Tata yo Jesucristo, ta ka̱na ra ndeꞌe xaꞌa ya ndáa ini ra xíni ra ndeꞌe sinaꞌa nde naꞌa xaꞌa chiñu ra ya íyo sěꞌe.

1 Corintios 4:7

Ta ¿ndachu ndíkani ini ndo, vaꞌa ni ka mií ndo nuu inka naꞌa, túvi ndo? Ndiꞌi ñaꞌa ya kúu mií ndo ta Ndioxi ku ra ta̱xi ya ndaꞌa ndo. Süvi mií ndo ndínduku ya yakan kütai ni ini ndo xiꞌin ya.

Efesios 1:18

saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

Efesios 1:9

Ta si̱naꞌa ra ñaꞌa nuu yo ya chi̱tuni mií ra ndi̱xiyo sěꞌe nuu ra. Ta ndee ni kúsini ra si̱naꞌa ra ya yóꞌó nuu yo tixin seꞌe ra Jesucristo, chi saa chi̱kaa ini ra ikan ra xiꞌin yo.

Efesios 5:32

Ta ya káꞌan tuꞌun Ndioxi ya nduu na tíndaꞌa iin kuñu xiꞌin taꞌan na, ta ndee ni ndíchi kundaa ini yo xiꞌin ya yóꞌó, ta yeꞌe káchi saa, ya yóꞌó ta xaꞌa Cristo kua káꞌan ya xiꞌin yoo na kúu veꞌe ñuꞌu.

Efesios 6:19

Saa kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i tá káꞌan ndoso i tuꞌun vaꞌa xaꞌa ra xiꞌin naꞌa, ya ná kuchiñu na kundaa ini na xaꞌa ñaꞌa ya chi̱tuni Ndioxi ndi̱xiyo sěꞌe, ya kúu tuꞌun vaꞌa xaꞌa ra.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

1 Timoteo 3:9

Xíniñuꞌu kuu nda taa nda kándixa ni tuꞌun vaꞌa xaꞌa Tata yo Jesucristo ya si̱tuvi Ndioxi nuu yo ku̱ndaa ini yo, ta saa ná koo vaꞌa ya xínituni nda, ná täxi ya kuachi xaꞌa nda.

Santiago 1:5

Tá ndá ndóꞌo̱ kúmani ya ndíchi nuu, ta vaꞌa nduku ndo ya nuu Ndioxi chi vaꞌa ni ra, ta küxinda ra ya nuu ndo taxi va ra ya ndaꞌa ndo.

1 Juan 2:20

Sundi ndóꞌo̱ ta ta̱xi Tata yo Jesucristo Tachi I̱í ra ndaꞌa ndo, ta xa xíni ndiꞌi ndo ya ndaa.

1 Juan 2:27

Sundi ndóꞌo̱ ta xa kúu mií ndo Tachi I̱í Ndioxi ya ta̱xi Tata yo Jesucristo ndaꞌa ndo. Ta köo xíniñuꞌu sinaꞌa inka naꞌa ndóꞌo̱, chi Tachi I̱í mií Ndioxi sínaꞌa ndóꞌo̱ xaꞌa ndiꞌi ni kúu ñaꞌa. Ta ya sínaꞌa Tachi ra ku ya ndaa, süvi ya vata kua káꞌan Tachi ra xiꞌin ndo. Ta ndinuꞌu ni ini ndo kundikun vaꞌa ka ndo Tata yo Jesucristo tá kuꞌva sínaꞌa Tachi I̱í Ndioxi ndóꞌo̱.