San Lucas 7:47 - Xochapa Mixteco

⁴⁷ Ta vitin kúni i kaꞌan i xiꞌin un: Ndiꞌi kúu kuachi yá yóꞌó ta xa ndo̱o ndiꞌi ya, saa chi kúꞌvi ni ini yá xíni yá yeꞌe. Sundi na loꞌo ni kuachi kúu mií túvi na, ta loꞌo ni kúꞌvi ini na xíni na yeꞌe ―káchi Jesús xiꞌin ra ikán.

San Lucas 7:47 Mawu Ofanana

San Mateo 10:37

’Ndiꞌi naꞌa, na kúni kuꞌun ichí i, xíniñuꞌu na kuꞌvi ni ka ini na kuni na yeꞌe nuu na veꞌe na. Saa tu naꞌa, na kúꞌvi ni ka ini xíni iva na, án siꞌí na, án seꞌe taa na, án seꞌe síꞌi na, ta na yóꞌó ta küvi kundikun na yeꞌe.

San Lucas 7:39

Saa tá xi̱ni ra Simón ikán, ta xa̱á ndíkani ini ra, káchi ra saa: “Tá tu ndixa ra káꞌan ndoso tuꞌun yuꞌu Ndioxi ku ra yóꞌó, ta xa kundaa va ini ra süvi ñaꞌa vaꞌa ku yá yóꞌó, ta täxi ra tiin ndaa ñaꞌa yá, ndíkuu”, káꞌán ra.

San Lucas 7:46

Ta yóꞌo̱, ni ceite köo ndi̱chikaa un xiní i, sundi yá yóꞌó ta si̱kuchi yá nduta tami xáꞌan xaꞌa i.

San Lucas 7:48

Saa ndi̱kaꞌan ra xiꞌin yá ikán, káchi ra saa: ―Nana, xa xa̱a kaꞌnu ini i xaꞌa ndiꞌi kuachi un ―káchi ra xiꞌin yá.

Los Hechos 5:31

Ta Ndioxi ta̱xi ra chiñu ndee ni ndaꞌa Jesús, ta̱xi ra ichí ndaꞌa ra ndu̱u ra iin ra chee ni ndi̱kunduꞌu ra ñaꞌñu kuáꞌá Ndioxi. Ta̱xi tu ra ichí ndaꞌa ra ya sikaku ra naꞌa ya ná kuchiñu na ndinama ini na, ta saa xaa kaꞌnu ini Ndioxi xaꞌa kuachi na.

ROMANOS 5:20

Tá ta̱xi Ndioxi ley ra ndaꞌa na, saa kua ku̱ndaa ini na ya ndee ni íyo kuachi na nuu ra. Tá ndee ni nda̱a kuachi na ta saa ndee ni ka ndaa tu ya vaꞌa i̱kan Ndioxi xiꞌin va na, xaꞌa ya kúꞌvi ni ini ra xíni ra na.

2 Corintios 5:14

Ya kúꞌvi ni ini Jesucristo xíni ra ndeꞌe kua chíndaꞌa ndeꞌe xaa súvi nde chiñu nuu ra, chi ndeꞌe ta kúndaa teꞌe ini nde, iindaa mií ra ku ra ndi̱xiꞌi xaꞌa kuachi ndiꞌi yo ñuu ivi, ta saa ndo̱ꞌo ndiꞌi yo tá íin na ndi̱xiꞌi saa ndu̱u ndiꞌi yo.

Gálatas 5:6

Chi tá kándixa yo Jesucristo ta köo ndáa yaꞌvi ka ya án kúu mií yo tuni Ndioxi án köo ya kúu mií yo, chi ya ndee ni ndáa yaꞌvi nuu ra kua ndáa ni ini yo xíni yo ra xaꞌa ya kúꞌvi ni ini ra xíni ra yoo.

Efesios 6:24

Ta mií Ndioxi ná chikaa ni ya vaꞌa ndiꞌi ndóꞌo̱ yáꞌa ni kúꞌvi ini xíni Tata yo Jesucristo. Saa ná koo.

Filipenses 1:9

Káꞌan ni i xaꞌa ndo xiꞌin Ndioxi ya ná kuꞌvi ni ka ini ndo kuni ndo Ndioxi iin iin kivi. Ta saa ná kuꞌvi ni tu ini ndo kuni ndo inka naꞌa va. Ta saa ná niꞌi ni ka ndo ya ndíchi nuu ra ya kuchiñu ndo kundaa ni ka ini ndo.

1 Timoteo 1:14

Ta yáꞌa ni vi ku̱ndaꞌvi ini ra xi̱ni ra yeꞌe, ñaa chi̱ndee ra yeꞌe ndáa ni ini i xíni i ra, saa ta̱xi ra ndee ndaꞌa i ya kuꞌvi ni ini i kuni i inka naꞌa xaꞌa mií ra.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 3:18

Ndóꞌo̱ ñani yo xiꞌin kuꞌva yo, tá íin seꞌe i saa íin ndo, ta káꞌan i xiꞌin ndo: Käꞌan ndo ndisaa tuꞌun mií xiꞌin taꞌan ndo, sundi ikan ndo ya vaꞌa xiꞌin ya ndaa nuu sínaꞌa ya ndixa kúꞌvi ini ndo xíni taꞌan ndo.

1 Juan 4:19

Kúꞌvi ini yo xíni yo Ndioxi xiꞌin na taꞌan yo, saa chi xiꞌna mií ra ku ra xa̱á kúꞌvi ni ini xi̱ni yoo.

1 Juan 5:3

Tá tu xáa súvi yo ya xáꞌnda chiñu Ndioxi nuu yo ta sínaꞌa yo mií yo ya kúꞌvi ini yo xíni yo ra. Saa chi ya xáꞌnda chiñu ra nuu yo ta süvi tá káa iin ya vee ndíso yo káa ya.