San Lucas 24:47 - Xochapa Mixteco

⁴⁷ Ta naꞌa na ndíkun sata ra tixin kivi ra taxi ra ndee ndaꞌa na kuꞌun na ndituꞌun na xiꞌin ndiꞌi kúu na ñuu ivi. Xiꞌna ñuu Jerusalén xáa na kaꞌan na xiꞌin naꞌa, ya ná ndiko koo ini na xaꞌa kuachi na, saa xaa kaꞌnu ini Ndioxi xaꞌa kuachi na”, káchi ya ta̱a na.

San Lucas 24:47 Mawu Ofanana

San Mateo 28:19

Yakan vitin ta kuáꞌan ndo ndiꞌi saa xaꞌa ñuu ivi ta sinaꞌa ndo naꞌa ndá kuꞌva kundikun na ichí i, saa sikuchi ndo na tixin kivi Iva i, xiꞌin tixin kivi Seꞌe ra, xiꞌin tixin Tachi I̱í Ndioxi.

San Mateo 3:2

Káchi ra saa: ―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.

San Mateo 9:13

Xíniñuꞌu ndo kundaa vaꞌa ini ndo unkua kúni kachi Ndioxi nuu tuꞌun ra, ya káchi saa: “Kúni i ná kundaꞌvi ni ini ndo kuni ndo inka naꞌa, chi ya ñaa ka kua ndee ni ndee nuu ñaꞌa ya sóko ndo nuu i”, káchi tuꞌun Ndioxi. Saa chi yeꞌe, ta växi i xaꞌa na vaꞌa, xaꞌa na väꞌa vaxi i, kaꞌan i xiꞌin na ya ná ndiko koo ini na kundikun na ichí Ndioxi ―káchi Jesús xiꞌin nda fariseo.

San Lucas 13:34

Saa xa̱á ra káꞌan ra: ―¡Ndóꞌo̱ na ñuu Jerusalén!, ndóꞌo̱ ku ndo xáꞌni nda káꞌan ndoso tuꞌun yuꞌu Ndioxi, ta kóꞌni ndo yu̱ú sata nda tíꞌvi Ndioxi vaxi chindee ndóꞌo̱. Kuaꞌa ni ichí ku̱ni i sikitaꞌan i ndóꞌo̱, tá íkan nduxi tiatan xiꞌin seꞌe vali ri, síkitaꞌan ri na tixin ri, ta köo ndi̱xiin ndo.

Los Hechos 10:43

Xa yachi ndi̱kaꞌan nda káꞌan ndoso tuꞌun yuꞌu Ndioxi xaꞌa Jesús, ndi̱kaꞌan nda tá ná kandixa ñaꞌa na ta xaa kaꞌnu ini ra xaꞌa kuachi na xiꞌin kivi ra ―káchi ra Pedro xiꞌin na.

Los Hechos 11:18

Tá xi̱ni soꞌo na ya ndi̱kaꞌan ra Pedro, ta ku̱taxin yuꞌu na. Ñaa xa̱á káꞌan na ya vaꞌa xaꞌa Ndioxi, káchi na saa: ―Tá tu saa ku̱u, ta kúni kachi ya, nda na köo kúu judío va ta̱xi Iva yo Ndioxi ichí ndaꞌa ya ndiko koo ini na xaꞌa kuachi na, ta saa kutaku na xiꞌin ra ―káchi na.

Los Hechos 13:46

Saa xa̱á ra Pablo xiꞌin ra Bernabé káꞌan nda, ndinuꞌu ini nda káꞌan nda, káchi nda saa: ―Xiꞌna ndóꞌo̱ ku ndo xíniñuꞌu kuni soꞌo tuꞌun Ndioxi, chi ndo judío ku ndo, sundi ndóꞌo̱ ta köo xíin ndo ndikiꞌin ndo ya, saa chi ndíkani ini ndo ni köo ndáa yaꞌvi ndo kutaku ndo ndiꞌi saa kivi xiꞌin Ndioxi, káꞌan ndo. Ta vaꞌa va chi vitin ndituꞌun nde xiꞌin na köo kúu judío.

Los Hechos 2:38

Saa ndi̱kuiin ra Pedro káꞌan ra xiꞌin nda káchi ra saa: ―Ndiko koo ini ndo xaꞌa ndiꞌi kuachi ndo. Ta saa kuchi ndo tixin kivi Jesucristo ya ná xaa kaꞌnu ini Ndioxi xaꞌa kuachi ndo. Saa kua ndikiꞌin ndo Tachi Ií ra koo ya xiꞌin ndo.

Los Hechos 20:21

Ndi̱kaꞌan ndoso i tuꞌun ra xiꞌin na kúu judío tin na köo kúu judío, ya xíniñuꞌu na ndiko koo ini na xaꞌa kuachi na nuu Ndioxi, saa xáa na kundaa ni ini na kuni na Tata yo Jesucristo.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

Los Hechos 26:20

Ndikun xa̱á i káꞌan i xiꞌin na, xiꞌna na ndóo ñuu Damasco xa̱á i káꞌan i xiꞌin, tá ndi̱ꞌi ikán ta xa̱á i káꞌan i xiꞌin na ndóo ñuu Jerusalén, saa ndi̱xaꞌan i ndiꞌi ka inka ñuu ya ñúꞌu estado Judea. Saa ke̱e tu i ndi̱xaꞌan i nda inka ñuu nuu ndóo na köo kúu judío. Ndi̱xaꞌan i ndi̱kaꞌan ndoso i xiꞌin na ya ná ndiko koo ini na nuu Ndioxi, saa ikan na ya vaꞌa xaꞌa ya ndi̱ko koo ini na nuu ra.

Los Hechos 28:28

Saa ndi̱kaꞌan ka ra Pablo xiꞌin na, káchi ra saa: ―Ta vaꞌa ná kundaa ini ndo vitin chi xaꞌa ya tuun ni nima ndo yakan kuꞌun i ndituꞌun i xiꞌin na köo kúu judío xaꞌa ya kúni Ndioxi sikaku ra na, chi na ikán ta kuni soꞌo va na ―káchi ra Pablo xiꞌin na.

Los Hechos 3:19

Saa ndi̱kaꞌan ka ra xiꞌin na káchi ra saa: ―Na taꞌan yo, ndiko koo ndo nuu Ndioxi, ta ndiko koo ini ndo xaꞌa kuachi ndo, ta saa xaa kaꞌnu ini ra xaꞌa kuachi ndo. Ikan ndo saa, ta chindee Ndioxi ndóꞌo̱ ndikiꞌin ndo ini ndo koo vaꞌa ini ndo.

Los Hechos 4:12

Iindaa mituꞌun Jesús ku ra kúu mií ndee ya sikaku ra yoo. Nda iin na ñuu ivi yóꞌó ta köo na kuchiñu sikaku yoo, nda iin ñaꞌñu nïꞌi yo na sikaku mií yo, iindaa Jesús ku ra kúu mií ndee ya ta̱xi Ndioxi ndaꞌa ra sikaku ra yoo ―káchi ra Pedro xiꞌin ndiꞌi na xikuaꞌa ikán tin na chiñu.

Los Hechos 5:31

Ta Ndioxi ta̱xi ra chiñu ndee ni ndaꞌa Jesús, ta̱xi ra ichí ndaꞌa ra ndu̱u ra iin ra chee ni ndi̱kunduꞌu ra ñaꞌñu kuáꞌá Ndioxi. Ta̱xi tu ra ichí ndaꞌa ra ya sikaku ra naꞌa ya ná kuchiñu na ndinama ini na, ta saa xaa kaꞌnu ini Ndioxi xaꞌa kuachi na.

ROMANOS 5:20

Tá ta̱xi Ndioxi ley ra ndaꞌa na, saa kua ku̱ndaa ini na ya ndee ni íyo kuachi na nuu ra. Tá ndee ni nda̱a kuachi na ta saa ndee ni ka ndaa tu ya vaꞌa i̱kan Ndioxi xiꞌin va na, xaꞌa ya kúꞌvi ni ini ra xíni ra na.

Efesios 1:6

Ta i̱kán ra saa xiꞌin yo, ya ná xaa kaꞌnu ni yo ra. Xaꞌa ya kúꞌvi ni ini ra xíni ra yoo kua ndi̱niꞌi uun yo nuu ra, ya i̱kan ra saa xiꞌin yo. Ndi̱kuiso ra yoo tixin Seꞌe ra, ra ndee ni kúꞌvi ini ra xíni ra.

Efesios 3:8

Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

1 Juan 2:12

Ndóꞌo̱, na kándixa Jesucristo ta tá íin seꞌe i saa íin ndo, ta vitin táa i tutu yóꞌó xaa ya nuu ndo ya káꞌan i xiꞌin ndo. Ndioxi ta xáa kaꞌnu ini ra xaꞌa kuachi yo, xaꞌa ya i̱kan Tata yo Jesucristo xaꞌa yo.