San Lucas 22:37 - Xochapa Mixteco

³⁷ Chi vitin kua ti̱ndaa kivi ya xaa ndúvi i ya ta̱a iin ra ndi̱kaꞌan ndoso tuꞌun yuꞌu Ndioxi, káchi ya saa: “Tá kuꞌva ndóꞌo iin ra väꞌa, ra xáꞌni ndii saa kundoꞌo i”, káchi ya ta̱a ra xaꞌa i. Saa chi ndiꞌi ya íyo xaꞌa i ta xinu ndiꞌi ya ―káchi Jesús xiꞌin nda.

San Lucas 22:37 Mawu Ofanana

San Marcos 15:27

Saa to̱so nda uvi nda kuiꞌna xiꞌin ra, iin ra tíkaa nuu cruzin ñaꞌñu kuáꞌá ra, ta inka ra tíkaa ñaꞌñu itin ra.

San Marcos 15:28

Yóꞌó ku nuu ndi̱xinu tuꞌun Ndioxi ya ta̱a nda káꞌan tuꞌun yuꞌu Ndioxi xinaꞌa, káchi ya saa: “Ndikani ini naꞌa xaꞌa ra, taꞌan naꞌa na väꞌa ku ra”, káchi ya ta̱a nda.

San Lucas 18:31

Saa ku̱u ta ka̱na Jesús ndisaa uxi uvi mií nda ítaꞌan xiꞌin ra ndi̱kaꞌan ra xiꞌin nda, káchi ra saa: ―Vitin kuaꞌan yo ñuu Jerusalén, ikán ku nuu xinu ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xaꞌa yeꞌe, Taa ra xa̱a ñuu ivi yóꞌó.

San Lucas 22:22

Vaꞌa ka vi yeꞌe Taa ra xa̱a ñuu ivi yóꞌó kuꞌun i tá kuꞌva chi̱tuni mií Ndioxi kundoꞌo va i, sundi ndaꞌvi ni va mií ra nditaxi yeꞌe ndaꞌa na sáa ini xíni yeꞌe, saa chi ndoꞌo ni ra ―káchi Jesús xiꞌin nda.

San Lucas 22:36

Saa ndi̱kaꞌan ra xiꞌin nda, káchi ra saa: ―Ta vitin síin káa ya káꞌan i xiꞌin ndo, tá ndá ndóꞌo̱ íyo bolsa án ndá ka ñaꞌa ta kuniꞌi ndo ya ná kuꞌun ya xiꞌin ndo. Tá ndá ndóꞌo̱ köo i̱chi ta xiko ndo tikachi ndo ná kana xuꞌun sata ndo i̱chi ndo.

San Lucas 22:52

Ta saa ndi̱kaꞌan ra xiꞌin nda sutu naꞌnu ikán tin nda policía ndáa veꞌe ñuꞌu xiꞌin inka na xikuaꞌa na ndi̱xaa tiin ñaꞌa, káchi ra saa: ―¿Ndachu ndíso ndo i̱chi xiꞌin itun vaxi ndo tiin ndo yeꞌe? ¿Án ra kuiꞌna ku i kua?

San Lucas 23:32

Saa ndáka tu nda lapa uvi nda íyo kuachi kuaꞌan xiꞌin nda. Iin káchi kuaꞌan nda kuvi nda nuu itun cruzin xiꞌin Jesús.

San Lucas 24:27

Saa xa̱á ra sínaꞌa ra nda, xiꞌna ya ta̱a ra Moisés kua xa̱á ra ndíkani ra nuu nda, saa sínaꞌa ndiꞌi ka ra nda unkua káchi ndiꞌi tuꞌun Ndioxi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, nuu káꞌan ndiꞌi ya xaꞌa mií ra.

San Juan 10:35

Ta xíni yo tuꞌun Ndioxi ta küvi ndikuaa yo ya káꞌan ya. Mií Ndioxi ku ra ndi̱kaꞌan xaꞌa nda ndi̱kaꞌan ndoso tuꞌun yuꞌu ra, ya kúu nda ndioxi vali.

San Juan 17:4

’Ta chi̱nuu vaꞌa ni i ya toꞌo un nuu ndiꞌi na ñuu ivi, ta vitin si̱xinu ndiꞌi i chiñu ya ta̱xi un ndaꞌa i xaa súvi i.

2 Corintios 5:21

Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.

Gálatas 3:13

Chi Cristo ku ra cha̱ꞌvi xaꞌa yo nuu chiꞌña ya ta̱xi ley ya ta̱a Moisés ndaꞌa yo, chi köo ndi̱kuchiñu yo sixinu yo ya káꞌan ley ikán. Xaꞌa ya ikán kua cha̱ꞌvi Jesucristo xaꞌa yo chi ndi̱xaꞌa ndee ini ra si̱kuiso ra chiꞌña xiꞌin mií ra, saa ku̱chiñu ra ki̱ndaa ra chiꞌña sata yo. Chi saa káꞌan mií tuꞌun Ndioxi, káchi ya saa: “Ndiꞌi naꞌa, na tíkaa ikin kuñu nuu itun cruzin, ta na ndíso chiꞌña ku na”, káchi ya.