San Lucas 19:47 - Xochapa Mixteco

⁴⁷ Ndiꞌi saa kivi ndi̱xika ra sínaꞌa ra ini veꞌe ñuꞌu ikán. Ta nda ínuu nuu ndiꞌi sutu xiꞌin na xikuaꞌa tin nda sínaꞌa ya ta̱a ra Moisés mi ñuu ikán, ndúku nda kuꞌva kaꞌni nda ra.

San Lucas 19:47 Mawu Ofanana

San Mateo 21:23

Tá ndi̱xaa Jesús yeꞌe veꞌe ñuꞌu kaꞌnu, ta saa xa̱á ra sínaꞌa ra naꞌa. Tá sínaꞌa ra na, saa ku̱yati nda naꞌnu nuu sutu xiꞌin nda xikuaꞌa nuu na judío, saa ndi̱ndakan tuꞌun ñaꞌa nda, káchi nda: ―¿Míí ke̱e ichí ya íkan un saa? ¿Unku na ta̱xi ichí ndaꞌa un ikan un saa? ―káchi nda xiꞌin ra.

San Mateo 26:55

Saa ndi̱kaꞌan Jesús xiꞌin nda ikán, káchi ra saa: ―¿Án vaxi ndo xiꞌin ñaꞌa xiín xiꞌin carroti tiin ndo yeꞌe, tá kuꞌva íkan ndo xiꞌin na kuiꞌna, saa íkan ndo xiꞌin i? Ndiꞌi saa kivi ndi̱xiyo i si̱naꞌa i naꞌa veꞌe ñuꞌu kaꞌnu, ta köo ndi̱tiin ndo yeꞌe.

San Marcos 11:18

Saa tá xi̱ni soꞌo nda naꞌnu nuu sutu xiꞌin nda sínaꞌa ley ya ta̱a ra Moisés, ta ñaa xa̱á ndíkani ini nda ndá kuꞌva koo kaꞌni nda Jesús, saa chi xa̱á nda íꞌvi nda xaꞌa ya kuaꞌa ni naꞌa xa̱á xínu ini xaꞌa ya sínaꞌa ra.

San Marcos 12:12

Saa ku̱ni nda xikuaꞌa veꞌe ñuꞌu tiin nda Jesús kuꞌun ra xiꞌin nda veꞌe kàà, saa chi ku̱ndaa ini nda xaꞌa mií nda ndi̱kaꞌan tuꞌun ndíchi ikán. Ta xaꞌa ya íꞌvi nda nuu naꞌa ta köo ya ndi̱kan nda xiꞌin ra, saa si̱ndoo nda ra ta ndi̱kiꞌin nda kuaꞌan nda.

San Marcos 14:1

Soo uvi kivi kúmani saa tindaa kivi ya ndítava na Israel viko pascua xiꞌin inka viko nuu xíxi na xita vaꞌa ya köo uxan iya xiꞌin. Saa xa̱á nda naꞌnu nuu sutu xiꞌin nda maestro nda sínaꞌa ley Ndioxi ya ta̱a ra Moisés, ndúku nda kuachi siki xaꞌa Jesús saa kuchiñu nda kaꞌni nda ra.

San Marcos 14:49

Ndiꞌi saa kivi ndi̱xika i si̱naꞌa i yeꞌe veꞌe ñuꞌu kaꞌnu, ta nda iin ichí köo ndi̱tiin ndo yeꞌe. Ta vitin íkan ndo saa xiꞌin i ya ná xinu ya káꞌan tuꞌun Ndioxi xaꞌa i ―káchi Jesús xiꞌin nda.

San Lucas 19:48

Ta ni köo kúvi niꞌi nda kuꞌva ikan nda saa, chi ndiꞌi ni kúu naꞌa xíni soꞌo ni na ya káꞌan ra.

San Lucas 20:19

Ñaa xi̱ni soꞌo nda naꞌnu nuu sutu ikán xiꞌin nda sínaꞌa ley ya ta̱a ra Moisés ya ndi̱kaꞌan Jesús, ta ndikun ku̱ni nda tiin ñaꞌa nda, chi ku̱ndaa ini nda xaꞌa mií nda kua ndi̱kaꞌan tuꞌun ndíchi ikán. Sundi köo ndi̱kuchiñu nda tiin nda ra, saa chi íꞌvi nda nuu na ñuu.

San Juan 10:39

Saa ku̱ni tuku nda tiin nda ra, ta köo ndi̱kuchiñu nda tiin nda ra, ndi̱saña ra ndaꞌa nda kuaꞌan ra.

San Juan 18:20

Saa ndi̱kuiin Jesús káꞌan ra, káchi ra saa: ―Nuu ndiꞌi ni kúu naꞌa ndi̱kaꞌan i, tá si̱naꞌa i ini veꞌe ñuꞌu vali sinagoga án veꞌe ñuꞌu kaꞌnu, nuu ndíkitaꞌan ndiꞌi na judío. Ta nda iin ñaꞌa köo ndi̱kaꞌan sěꞌe i nuu na.

San Juan 7:19

’¿Án süvi ya ndaa kua si̱ndoo ra Moisés ley Ndioxi ndaꞌa ndo?, ta nda iin ndo köo xáa súvi ya káꞌan ya. ¿Ndachu kúni ndo kaꞌni ndo yeꞌe? ―káchi Jesús xiꞌin nda.

San Juan 7:44

Ku̱ni sava na tiin na ra, ta nda iin na köo ndi̱tiin ñaꞌa.