San Lucas 18:22 - Xochapa Mixteco

²² Ñaa tá xi̱ni soꞌo Jesús ya ndi̱kaꞌan ra, saa ndi̱kaꞌan ra xiꞌin ra, káchi ra saa: ―Vani xa íkan ndiꞌi un ya ñaa, sundi kümani ka siín ya ikan un. Xiko ndiꞌi ñaꞌa kúu mií un ta chindee un na ndaꞌvi. Saa ku ndixa ya ndukuika un xiꞌin Ndioxi nuu ndivi. Ikan ya ñaa, tá sindiꞌi un i̱kan un ya, ta saa kixi un kundikun un yeꞌe ―káchi Jesús xiꞌin ra.

San Lucas 18:22 Mawu Ofanana

San Mateo 19:21

Saa ndi̱kuiin Jesús, káꞌan ra: ―Tá tu kúni un koo un iin taa ra vaꞌa ni, kuáꞌan xiko ndiꞌi ñaꞌa ya kúu mií un, saa siniꞌi un xuꞌun nuu na ndaꞌvi. Saa kua ndukuika ni un xiꞌin Ndioxi nuu ndivi. Tá ndiꞌi i̱kan un saa, ta saa kixi un kundikun un yeꞌe ―káchi Jesús xiꞌin ra.

San Lucas 10:42

Sundi íyo iindaa chiñu ya xíniñuꞌu ni un ikan un. Yá María kuꞌvi un, ta ndee ni ka vaꞌa ya ndi̱kaxin yá yóꞌó, ta nda iin naꞌa küchiñu kindaa ya ndaꞌa yá ―káchi Jesús xiꞌin yá Marta.

San Lucas 12:33

Xiko ndo ñaꞌa kúu mií ndo, saa taxi ndo xuꞌun ndaꞌa na ndaꞌvi. Kundiꞌi ini ndo chivaꞌa ndo ñaꞌa ndo ini ñaꞌa ya köo ndíꞌi xaꞌa íyo nuu ndivi ni na kuiꞌna küchiñu sikuiꞌna ya, ni tikixin küchiñu ri sindiꞌi xaꞌa ri ya.

San Lucas 16:9

Ta saa ndi̱kaꞌan ka ra káchi ra saa: ―Yeꞌe káꞌan xiꞌin ndo, vaꞌa kuniñuꞌu ndo xuꞌun ya íyo ñuu ivi väꞌa yóꞌó, ya xaa ganaa ndo na kutaꞌan xiꞌin ndo, tá xa ndi̱ꞌi ñaꞌa ndo ta koo na ndikuiso vií ndóꞌo̱ nuu koo ndo ndiꞌi saa kúu kivi nuu ndivi.

San Lucas 18:21

Saa ndi̱kuiin ra káchi ra saa: ―Tá loꞌo vi i íkan i saa, ta saa íkan i nda kivi vitin ―káchi ra.

San Lucas 18:23

Tá xi̱ni soꞌo ra tuꞌun ndi̱kaꞌan Jesús xiꞌin ra, ta ndi̱kava ni ini ra chi kuika ni ra.

San Lucas 9:23

Ta saa ndi̱kaꞌan ra xiꞌin ndiꞌi na ndóo ikán káchi ra saa: ―Tá ndá ndóꞌo̱ kúni xaa súvi ya káꞌan Ndioxi, ta ïkan ka ndo ndisaa ya kúni mií ndo, saa kuchiñu ndo ikan ndo ya kúni Ndioxi. Ta naꞌa ndo kundikun ndo yeꞌe kundiso ndo cruzin ndo, koo ndúvi ndo ndiꞌi saa kivi ya ndoꞌo ndo xaꞌa i.

Filipenses 3:13

Ñani yo xiꞌin kuꞌva yo, köo kúni i kaꞌan i xiꞌin ndo xa ku̱chiñu i ndi̱xinu i káa i tá káa mií ra, ya íkan i kua yóꞌó: Köo xíka ka ini i xaꞌa ya xa ndi̱yaꞌa, ndíndoso ini i xaꞌa ya, ta chíkaa ni i ndee ya xinu i ndikiꞌin i ya taxi ra ndaꞌa i.

2 Pedro 3:8

Ñani mani, ndïndoso ini ndo ya káꞌan i xiꞌin ndo: Chi nuu Iva yo Ndioxi ta iin kivi ra tá íyo mil kuiya saa íyo ya, án iin mil kuiya ta tá íyo iin kivi va, saa íyo ya nuu ra.