San Lucas 12:37 - Xochapa Mixteco

³⁷ Vaꞌa ni kee na moso na íkan saa, na köo kíxi, na ndátun ndakua xaa xitoꞌo na kani ndaꞌa ra yeꞌe, saa kuna na nuu ra ndiꞌvi ra. Saa tá ná kuni ra ndóo na ndátun ñaꞌa na, ta kusini ni ra xiꞌin na, nda xaa vií ra ñaꞌa kandita ra nuu mesa ra kuxi na.

San Lucas 12:37 Mawu Ofanana

San Mateo 24:42

’Saa ndóꞌo̱, koo tuꞌva ndo saa chi köo xíni ndo maa kua ndiko koo yeꞌe, ra kúu Tata ndo, ra chee nuu ndo.

San Lucas 12:36

Tá kuꞌva íyo nda moso, saa koo ndo kundoo ndo kundatun ndo yeꞌe. Chi iin moso ta íyo tuꞌva ra ndátun ra kana ñaꞌa xitoꞌo ra ya kuna ra yeꞌe nuu xitoꞌo ra ndiko koo ra kuaꞌan ra nuu viko tíndaꞌa.

San Lucas 12:43

’Ta vaꞌa ni kee ra moso ikán chi ná ndiko koo xitoꞌo ra, kuni ra xáa chiñu ni ra, ta kusini ni ra xiꞌin ra.

San Lucas 17:8

¿Án süvi xaꞌa ya xáa chiñu ra nuu ndo yakan xáꞌnda ka ndo chiñu nuu ra, káꞌan ndo xiꞌin ra, káchi ndo saa: “Xaa ndúvi un mií un ya sikuaꞌa un ñaꞌa kuxini i, nda ná ndiꞌi kuxi i saa kuxi mií un”, káchi ndo xiꞌin ra.

San Lucas 21:36

Xíniñuꞌu ndo koo nduvi ndo, ndinuni kaꞌan ndo xiꞌin Ndioxi ndiꞌi saa tiempo ya ná ndöꞌo ndo saa, ta kuchiñu ndo kaku ndo nuu ndiꞌi tindoꞌo ya vaxi ñuu ivi. Ta saa kuchiñu ndo kundita ndo ndikuiso ndo yeꞌe, Ra xa̱a ñuu ivi yóꞌó ―káchi Jesús xiꞌin na.

San Lucas 22:27

Saa ndi̱ndakan tuꞌun ra nda ítaꞌan xiꞌin ra, káchi ra saa: ―¿Unkua káchi ndóꞌo̱? ¿Unku ra chee ka, án ra índuꞌu xíxi nuu mesa, án ra chíkaa ñaꞌa xíxi ra índuꞌu nuu mesa ku ra chee ka? Xíni yo, ra índuꞌu xíxi nuu mesa ku ra chee. Ta yeꞌe vani ra chee ku i nuu ndo, sundi tá íkan iin moso saa íkan i xiꞌin ndo.

San Juan 12:26

Tá ndá ndóꞌo̱ kúni xaa chiñu nuu i, ta vaꞌa kundikun ndo yeꞌe. Chi nuu koo i ta ikán koo tu ndóꞌo̱ va xiꞌin i. Tá ndá ndo xáa chiñu nuu i, ta xaa kaꞌnu Iva i Ndioxi ndóꞌo̱ ―káchi Jesús xiꞌin na.

1 Corintios 2:9

Ta ndaꞌa yóo kua ta̱xi Ndioxi ya, tá káꞌan tuꞌun ra ya ta̱a na xinaꞌa, káchi ya saa: Nda iin naꞌa täꞌan ndikani ini xaꞌa ya si̱kuaꞌa Ndioxi xaꞌa yoo kúꞌvi ni ini ra xíni ra, ni täꞌan kuni xiꞌin nuu na ya, ta ni täꞌan kuni soꞌo na ya.

Filipenses 1:21

Chi tá tu táku i, ta xaꞌa ya xaa súvi i chiñu nuu mií Cristo kua táku i, án tá yeꞌe ndi̱xiꞌi ku i, ta vaꞌa ni ka kée va i.

Filipenses 1:23

Ni köo xíni i unkua vaꞌa ikan i, ¿án vaꞌa ka ya kuvi i, án vaꞌa ka ya kutaku i? Sundi ya ndíkani ini i kua: vaꞌa ni ka kua ná kuvi i, túvi i, chi koo i xiꞌin Cristo.

2 Pedro 1:11

Ta saa kusini ni Ndioxi xiꞌin ndo saa kuna koꞌo ra yeꞌe nuu ndo kiꞌvi ndo koo ndo xiꞌin ra ndiꞌi saa tiempo nuu ndivi nuu koo Tata yo Jesucristo ra síkaku yoo kaꞌnda chiñu ra.

2 Pedro 3:14

Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.

El Apocalipsis 14:13

Saa xi̱ni soꞌo i tuꞌun ya ke̱ta nuu ndivi, ndi̱kaꞌan ya xiꞌin i káchi ya saa: ―Taa tuꞌun káꞌan i xiꞌin un: “Kivi vitin xiꞌin ndiꞌi saa kivi ya vaxi, ndiꞌi naꞌa na ndíkun Tata yo Jesucristo, tá ná kuvi na xaꞌa ya kándixa na ra, ta taxi Ndioxi koo vaꞌa ni na xiꞌin ra, nuu kusini ni na” ―káchi tuꞌun ya xi̱ni soꞌo i. Saa ndi̱kaꞌan Tachi i̱í Ndioxi, káchi ya saa: ―Saa ndi̱xa íyo ya, tá ná xaa na nuu ndivi, ta ndixa kua ndikundee na, chi xa si̱xinu na chiñu i̱kan na ñuu ivi yóꞌó. Ni Ndioxi ta ndi̱kaꞌán ini ra xaꞌa ya vaꞌa i̱kan na, ta nuu ndivi ikán ndichaꞌvi ra na xaꞌa chiñu ya i̱kan na ñuu ivi yóꞌó ―Soꞌva káchi Tachi Ndioxi xi̱ni soꞌo i.

El Apocalipsis 16:15

Xaꞌa ya ikán kua xíniñuꞌu ndi̱kaꞌán ini ndo xaꞌa tuꞌun ya ndi̱kaꞌan Tata yo Jesucristo xiꞌin na ndíkun sata ra, káchi ra saa: ―¡Koto ndo vii! Tá íkan iin ra kuiꞌna, kivi köo ndátun ndo ra. Saa koo kivi ndiko koo i ñuu ivi. Ta naꞌa na ndíto koo tuꞌva na ndikiꞌin na yeꞌe, ta taxi Ndioxi ya ndixa kusini na ikán. Ta naꞌa na ndíto, xíniñuꞌu koo tuꞌva tikoto na ya kundixi na, ya ná kükaꞌan nuu na íyo chála na kivi ndiko koo i ―káchi Tata yo Jesucristo ndi̱kaꞌan ra.

El Apocalipsis 3:21

Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta yeꞌe taxi i koo na xiꞌin i nuu ndivi ya kaꞌnda chiñu na xiꞌin i. Saa chi yeꞌe ta xa ku̱chiñu i nuu ya väꞌa, yakan ta̱xi Iva i Ndioxi ichí ndaꞌa i ndi̱kunduꞌu i xiꞌin ra ñaꞌñu kuáꞌá ra, íyo i xáꞌnda chiñu i xiꞌin ra.

El Apocalipsis 7:17

Saa chi Levo loꞌo kiti índuꞌu maꞌñu nuu ndíchi tai toꞌo ku ri kundaa na tá kuꞌva ndáa iin ra taa levo sana ra saa kundaa ri na. Ta kundaka ri na kuꞌun na koꞌo na tikuii, chi tikuii ikán taxi rá kutaku na. Ta Ndioxi ndiyakun ra ndiꞌi tikuii nuu na xaꞌa ya xáku ni na, chi sindiꞌi ra ya kúsuchi ni ini na.