San Lucas 12:32 - Xochapa Mixteco

³² Saa ndi̱kaꞌan ka Jesús, káchi ra saa: ―Ndóꞌo̱ ndíkun sata i ta ku ïꞌvi ndo chi tá íyo iin tiꞌvi levo vali sana i saa íin ndo. Ta kúsini ni va Ndioxi taxi ra koo ndo xiꞌin ra nuu xáꞌnda chiñu ra.

San Lucas 12:32 Mawu Ofanana

San Mateo 14:27

Saa kama ni ndi̱kaꞌan Jesús xiꞌin nda, káchi ra saa: ―¡Kündiꞌi ini ndo, chi yeꞌe va ku i, ku ïꞌvi ndo! ―káchi ra xiꞌin nda.

San Mateo 20:16

Saa sindiꞌi Jesús ndi̱kaꞌan ra, káchi ra saa: ―Ta vaꞌa ná kundaa ini ndo, chi na núnu̱ú ku na nduu na sindiꞌi, ta na sindiꞌi ku na nduu na núnu̱ú. Saa chi kuaꞌa ni naꞌa ka̱na Ndioxi, ta loꞌo ni ku na ndi̱kaxin ra ―káchi Jesús xiꞌin na.

San Mateo 25:34

Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó.

San Mateo 7:15

Saa káꞌan tuku Jesús xiꞌin na, káchi ra saa: ―Kuenta ni koo ndo chi íyo nda profeta nda vata, nda káꞌan síkaꞌán Ndioxi ini nda kaꞌan nda tuꞌun yuꞌu ra. Ndíkani ini ndo xaꞌa ya luvi ni sínaꞌa nda ta vaꞌa ni nda káꞌán ndo, chi íin nda tá kuꞌva íyo kiti levo vita ni ini. Sundi kuenta ni koo ndo chi süvi ya ndaa kua íin nda saa, nda tá íyo iin kiti ndivaꞌi kueꞌe ni va saa íyo ini nda.

San Lucas 10:21

Saa chútu ndaa Tachi I̱í Ndioxi Jesús mi hora ikán. Ñaa xa̱á ra káꞌan ra xiꞌin Ndioxi, káchi ra saa: ―Tata, xáa kaꞌnu ni i yóꞌo̱, chi yóꞌo̱ ku ra ku xitoꞌo ndiꞌi ñaꞌa ya íyo nuu ndivi tin ya íyo ñuu ivi yóꞌó. Kúsini ni i xiꞌin un chi ti̱seꞌe un ya yóꞌó nuu na ndíchi ni, na xíni ni, ta si̱naꞌa un ya nuu na köo xíni, na íin tá íin na vali, saa i̱kan un Tata, chi saa ku̱ni mií un ikan un ―káchi Jesús xiꞌin Ndioxi.

San Juan 18:36

Saa ndi̱kuiin Jesús káꞌan ra: ―Nuu xáꞌnda chiñu i ta köo ndíkun ndaa ya ñuu ivi yóꞌó. Tá tu ñuu ivi yóꞌó ndíkun ndaa ya, ta ni na ndíkun sata i ta kaꞌan kuachi na xaꞌa i, täxi na tiin na ñuu i yeꞌe, ndíkuu. Sundi nuu xáꞌnda chiñu i ta köo ndíkun ndaa ya ñuu ivi yóꞌó ―káchi Jesús xiꞌin ra.

Los Hechos 20:28

Ta ndóꞌo̱ ku ndo ndi̱kaxin Tachi I̱í Ndioxi ya kundiso chiñu ndo xiꞌin na veꞌe ñuꞌu. Tá íkan nda ndáa levo sana nda, saa ikan ndo. Xaa kuenta ni ndo xiꞌin mií ndo tin xaa kuenta ni ndo xiꞌin na kuaꞌan ichí Jesús. Chi na ikán ku na sa̱ta ra xiꞌin ni̱í mií ra nduta ndi̱xita nuu cruzin.

Los Hechos 20:29

Chi xíni i, tá köo ka i íyo xiꞌin ndo ta kixi naꞌa sindaꞌvi na ndóꞌo̱. Tá íkan kiti ndivaꞌi xáa nduvaꞌa ni ri xiꞌin levo saa ikan na xiꞌin ndo, xaa nduvaꞌa ni na xiꞌin ndo.

ROMANOS 6:23

Saa chi naꞌa, na íkan kuachi ta yaꞌvi na ya cháꞌvi kuachi na nuu na kua ndiꞌi xaꞌa na, kuvi na nuu Ndioxi. Sundi yoo ta si̱niꞌi Ndioxi ya vaꞌa nuu yo ya kutaku yo xiꞌin ra ndiꞌi saa kivi, ta nda iin ichí ndïꞌi xaꞌa yo, xaꞌa ya xa iin ndu̱u yo xiꞌin Tata yo Cristo Jesús.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

Filipenses 2:13

Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

2 Tesalonicenses 1:11

Xaꞌa ya ñaa kua káꞌan ni nde xaꞌa ndo xiꞌin Ndioxi, ndiꞌi saa tiempo ya ná chindee ra ndóꞌo̱ ya kuu ndo naꞌa, na ndee ni ndáa yaꞌvi nuu ra, ya ndi̱kaxin ra ndóꞌo̱ kundikun ndo Tata yo Jesucristo koo ndo tá kuꞌva kúni mií ra. Ta saa ná ikan ra ya vaꞌa xiꞌin ndo sixinu ra ya ndíkani ini ndo ikan ndo, saa chi ndáa ni ini ndo ra xaꞌa chiñu íkan ndo.

2 Tesalonicenses 1:5

Ta xaꞌa tindoꞌo ya ndóꞌo ndo kua sínaꞌa yoo ya ndee ni ndaa ini Ndioxi, chi ndása vaꞌa ra ndóꞌo̱ ya kuchiñu ndo koo ndo xiꞌin ra nuu xáꞌnda chiñu ra, ta xaꞌa ya ñaa kua ndóꞌo ni ndo vitin.

HEBREOS 12:28

Nuu xáꞌnda chiñu Ndioxi, nuu koo yo xiꞌin ra kua ndoo koo chi küvi kanda ya ikán kutaꞌa ya. Yakan kua ná taxi ni yo tixaꞌvi ndaꞌa ra, ta saa ná xaa kaꞌnu ni yo ra tá kuꞌva kútoo mií ra, xaꞌa ya íꞌvi yo xíni yo ra.

Santiago 2:5

Ñani mani xiꞌin kuꞌva yo, ndóꞌo̱ ku ndo kúꞌvi ni ini i xíni i, ta kuni soꞌo ndo ya kaꞌan i xiꞌin ndo: Ndioxi ku ra ndi̱kaxin na ndaꞌvi ndóo ñuu ivi ya ná nduu na naꞌa, na ndinuꞌu ni ini ndáa ini xíni ra xiꞌin ndiꞌi nima na, ta saa ndikiꞌin na ya ndi̱kaꞌan ra taxi ndaꞌa na kúꞌvi ini xíni ra, saa koo na kaꞌnda chiñu na xiꞌin ra.

2 Pedro 1:11

Ta saa kusini ni Ndioxi xiꞌin ndo saa kuna koꞌo ra yeꞌe nuu ndo kiꞌvi ndo koo ndo xiꞌin ra ndiꞌi saa tiempo nuu ndivi nuu koo Tata yo Jesucristo ra síkaku yoo kaꞌnda chiñu ra.

El Apocalipsis 1:6

Ta ta̱xi Tata yo Jesucristo ichí ndaꞌa yo ndu̱u yo tá íyo nda rey nda xáꞌnda chiñu, saa chi kaꞌnda chiñu yo xiꞌin ra. Ta saa ta̱xi ra ichí ndaꞌa yo koo yo tá íyo nda sutu i̱í, saa chi tá íin nda ikán saa koo yo xaa chiñu yo nuu Iva yo Ndioxi. ¡Ta ná xaa kaꞌnu ni yo Ndioxi ndiꞌi saa kivi! ¡Ta ndiꞌi saa kivi ná kaꞌnda chiñu ra ñuu ivi yóꞌó! Saa ná koo ya.

El Apocalipsis 22:5

Ta nda iin ichí ndüu ñǔu ka ñuu i̱í ikán, ni küniñuꞌu ka na ñu̱ꞌu̱ ya sindiyeꞌe ya nuu na, ni ñu̱ꞌù sïndiyeꞌe ka ya nuu na, saa chi mií Ndioxi ku ra sindiyeꞌe nuu na, saa kaꞌnda chiñu na xiꞌin ra ndiꞌi saa ichí.