San Lucas 10:37 - Xochapa Mixteco

³⁷ Saa ndi̱kuiin ra, káchi ra saa: ―Túvi yeꞌe ra ku̱ndaꞌvi ini xi̱ni ñaꞌa, ra ikan ku ra xaa taꞌan ñaꞌa ―káchi ra ikán xiꞌin Jesús. Ta saa ndi̱kaꞌan Jesús xiꞌin ra, káchi ra saa: ―Kuáꞌan, ikan tá i̱kan ra ku̱ndaꞌvi ini xi̱ni ra ti̱kueꞌe ikán xiꞌin inka naꞌa ―káchi Jesús xiꞌin ra.

San Lucas 10:37 Mawu Ofanana

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

San Mateo 23:23

’¡Ndaꞌvi ni ndóꞌo̱ fariseo xiꞌin ndóꞌo̱ sínaꞌa ley Ndioxi! ¡Ndóꞌo̱ uvi yuꞌu ku ndo! Saa chi táxi ndo iin koꞌndo ya táva ndo tixin uxi koꞌndo iku kána chíꞌi ndo, ta táxi ndo ya ndaꞌa Ndioxi. Ta köo xáa súvi ndo ñaꞌa ya ndixa xíniñuꞌu ndo xaa súvi ndo nuu Ndioxi. Ya kúni Ndioxi ku ya ikan ndo ya ndaku xiꞌin naꞌa, saa kundaꞌvi ini ndo kuni taꞌan ndo tin kandixa ni ka ndo Ndioxi, ya yóꞌó ku ya ndáa yaꞌvi ni. Xíniñuꞌu ndo xaa súvi ndo chiñu ndee ni yóꞌó nuu ra, ta xïkuiin ndo ikan ndo inka ka chiñu vali nuu ra.

San Lucas 10:36

Ñaa ndi̱ndakan tuꞌun Jesús ra, káchi ra saa: ―¿Unku uni saa nda taa nda ndi̱yaꞌa nuu kánduꞌu ra ti̱kueꞌe ikán xaa taꞌan ñaꞌa, túvi yóꞌo̱? ―káchi ra xiꞌin ra.

San Lucas 10:38

Saa ke̱e Jesús kuaꞌan ra xiꞌin nda ítaꞌan xiꞌin ra, ndi̱xaa ra iin ñuu loꞌo. Ta ikán ke̱ta iin yá náni Marta ndi̱kiꞌin yá ra kuaꞌan ra xiꞌin yá veꞌe yá.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

1 Pedro 2:21

Xaꞌa ya ñaa kua ka̱na Ndioxi ndóꞌo̱ ya xaꞌa ndee ni ini ndo kundoꞌo ndo tá kuꞌva ndo̱ꞌo mií Cristo xaꞌa ndo, kuꞌva saa xíniñuꞌu ndo ikan ndo, chi saa íyo ya si̱naꞌa ra ndóꞌo̱ ikan ndo.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.