San Juan 20:31 - Xochapa Mixteco

³¹ Ta ndiꞌi tuꞌun ya vaxi nuu tutu yóꞌó, ta̱a i ya, ná kundaa ini ndo xaꞌa Jesús ya kúu ra Cristo Seꞌe Ndioxi. Saa tá kándixa ndo ra ta saa kuchiñu ndo kutaku ndo tixin kivi ra.

San Juan 20:31 Mawu Ofanana

San Mateo 16:16

Saa ndi̱kuiin ra Simón Pedro, káꞌan ra: ―Yóꞌo̱ ku Cristo, ra ti̱ꞌvi Ndioxi xa̱a sikaku na ñuu ivi yóꞌó, ta kúu un Seꞌe Ndioxi ra táku ―káchi ra.

San Mateo 27:54

Ta ra ndíso chiñu xiꞌin nda lapa, íyo ra xiꞌin nda ndáa nda Jesús. Tá xi̱ni nda ya ndee ni ndi̱taan tin ìyo ni ku̱u, saa ndi̱ndiꞌvi ka vi nda, ta ndi̱kaꞌan nda, káchi nda saa: ―Ya ndixa ni va kua kúu ra yóꞌó Seꞌe Ndioxi ―káchi nda xiꞌin taꞌan nda.

San Mateo 4:3

Saa ndi̱xaa kiti nǎꞌa xíto ndoso ñaꞌa ri, káchi ri saa: ―Tá tu ndixa Seꞌe Ndioxi ku yóꞌo̱, ta vaꞌa kaꞌan un xiꞌin yu̱ú yóꞌó ná nduu ya xita vaꞌa ―káchi ri xiꞌin ra.

San Marcos 16:16

Ndiꞌi na kándixa yeꞌe ta chíchi na, na ikán ku na kaku, sundi na köo xíin kandixa yeꞌe ta kuvi na niꞌi na tindoꞌo.

San Lucas 1:35

Saa ndi̱kuiin tatun Ndioxi, káchi ya saa: ―Käka ini un chi mií Tachi I̱í Ndioxi ku ya kixi sata un, tá káa vikó saa koo ndee Ndioxi ra Chee ni kixi ya ndikasi ya yóꞌo̱, ñaa kee mií seꞌe un. Yakan kua koo ra, ra i̱í, saa kunani ra Seꞌe Ndioxi.

San Lucas 1:4

ya ná kuchiñu un kundaa vaꞌa ka ini un ya ndaa ni va kua si̱naꞌa na yóꞌo̱ ―káchi ra Lucas xiꞌin ra Teófilo.

San Lucas 24:47

Ta naꞌa na ndíkun sata ra tixin kivi ra taxi ra ndee ndaꞌa na kuꞌun na ndituꞌun na xiꞌin ndiꞌi kúu na ñuu ivi. Xiꞌna ñuu Jerusalén xáa na kaꞌan na xiꞌin naꞌa, ya ná ndiko koo ini na xaꞌa kuachi na, saa xaa kaꞌnu ini Ndioxi xaꞌa kuachi na”, káchi ya ta̱a na.

San Juan 1:49

Saa ndi̱kaꞌan ra Natanael xiꞌin ra, káchi ra saa: ―Tata Rabí, ¡yóꞌo̱ ku Seꞌe Ndioxi, ta yóꞌo̱ ku Rey ra kaꞌnu nuu ndeꞌe ñuu Israel! ―káchi ra.

San Juan 10:10

’Ta na kuiꞌna ta vaxi na kúni na sikuiꞌna na ri kaꞌni na ri tin sindiꞌi xaꞌa na ri. Sundi yeꞌe ta vaxi i ya taxi i kutaku na ndíkun yeꞌe, ta yáꞌa ni vaꞌa kundoo ndiꞌi na.

San Juan 19:35

Ta ra ndítuꞌun ya yóꞌó ku iin ra xi̱ni xiꞌin nuu ya, ta ndíkuiin ra xaꞌa ya káꞌan ra ya kúu ya ndaa ni ya ná kandixa tu ndóꞌo̱ va ya káꞌan ra.

San Juan 20:28

Saa ndi̱kuiin ra Tomás, káchi ra saa: ―¡Tata, yóꞌo̱ ku Tata i tin Ndioxi mií i! ―káchi ra xiꞌin Jesús.

San Juan 3:18

’Ta ndiꞌi na kándixa Seꞌe Ndioxi ta küꞌun na nuu ndoꞌo ni na, sundi na köo xíin kandixa Seꞌe ra ta xa chi̱tuni Ndioxi ndiꞌi xaꞌa na, chi xïin na kandixa na kivi Seꞌe Ndioxi, ra iindaa mituꞌun nuu ra.

San Juan 3:36

Ta ndiꞌi na kándixa Seꞌe ra, ta táku na xiꞌin Ndioxi ndiꞌi saa kivi, sundi na köo xíin kandixa Seꞌe ra ta küchiñu na kutaku na, ndiꞌi saa kivi saá ini Ndioxi kuni ñaꞌa ra ―káchi ra Juan.

San Juan 5:24

’Ya ndaa káꞌan i xiꞌin ndo: Ndiꞌi na xíni soꞌo tuꞌun káꞌan i, ta kándixa na Ndioxi ra ti̱ꞌvi yeꞌe vaxi i ñuu ivi, ta na ikán ku na ndixa táku ndiꞌi saa kivi, ta täxi ra ndoꞌo na xaꞌa kuachi na. Saa chi tá íin na xa ndi̱xiꞌi yachi saa ndi̱xiyo na, ta vitin ndi̱taku na.

San Juan 6:40

Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

Los Hechos 10:43

Xa yachi ndi̱kaꞌan nda káꞌan ndoso tuꞌun yuꞌu Ndioxi xaꞌa Jesús, ndi̱kaꞌan nda tá ná kandixa ñaꞌa na ta xaa kaꞌnu ini ra xaꞌa kuachi na xiꞌin kivi ra ―káchi ra Pedro xiꞌin na.

Los Hechos 3:16

Xaꞌa ya kándixa nde Jesús ya ndee ni ndee kúu mií kivi ra, yakan vaꞌa ndu̱vaꞌa ra yóꞌó. Xiꞌin ndee Jesús ndu̱vaꞌa ra ta xíto xiꞌin nuu ndo ra ndíchi ra nuu ndo vitin ―káchi ra Pedro xiꞌin na.

Los Hechos 8:36

Saa yáꞌa nda kuaꞌan nda iin ñaꞌñu nuu ndíkaa tikuii. Ta saa ndi̱kaꞌan ra ikán xiꞌin ra Felipe, káchi ra saa: ―Yóꞌó ndíkaa tikuii ta ¿án ndá ka ñaꞌa kúmani nuu i saa kuchiñu kuchi i? ―káchi ra xiꞌin ra Felipe.

Los Hechos 8:37

Saa ndi̱kuiin ra káꞌan ra: ―Tá tu ndinuꞌu ini un kándixa un ya ndi̱kaꞌan i xiꞌin un ta vaꞌa kuchi va un ―káchi ra xiꞌin ra. Saa ndi̱kaꞌan ra káchi ra saa: ―Ndinuꞌu ini i kándixa i ya kúu Jesucristo Seꞌe Ndioxi ―káchi ra.

Los Hechos 9:20

Ta saa ndikun xa̱á ra káꞌan ndoso ra xaꞌa Cristo ini veꞌe ñuꞌu sinagoga mi ñuu Damasco ikán, káꞌan ndoso ra xaꞌa ra ya kúu ra Seꞌe Ndioxi ―káchi ra xiꞌin na.

1 Pedro 1:9

Saa chi kúndaa ini ndo ya sikaku Ndioxi ndóꞌo̱ xaꞌa ya ndáa ni ini ndo Tata yo Jesucristo, ta ya ikán kua ndee ni vaꞌa ikan ra xiꞌin ndo, chindee ra ndóꞌo̱.

1 Juan 4:15

Ndiꞌi na ndíkuni Jesús ta káꞌan na xaꞌa ra kúu ra Seꞌe Ndioxi, ta na ikán ku na ítaꞌan vaꞌa xiꞌin Ndioxi. Saa íyo na xiꞌin ra.

1 Juan 5:1

Ndiꞌi na kándixa ya ti̱ꞌvi Ndioxi Jesús ki̱xi ra sikaku ra yoo, ta na ikán ta seꞌe Ndioxi ndu̱u na. Ndiꞌi na kúꞌvi ini xíni Iva yo, ta kúꞌvi tu ini na xíni na ndiꞌi seꞌe va ra.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

2 Juan 1:9

Ndiꞌi na síndoo ichí ya si̱naꞌa Jesucristo ta ndíkiꞌin na inka ichí kuaꞌan na, ta köo Ndioxi íyo xiꞌin na, sundi na tuun ni ndíkun ichí ya si̱naꞌa ra ta kúu mií na Iva yo Ndioxi xiꞌin Seꞌe ra.

El Apocalipsis 2:18

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun, ya ndáa naꞌa, na kándixa yeꞌe, na ndóo ñuu Tiatira, na xáa kaꞌnu Ndioxi. Yeꞌe ku taa ra káꞌan xiꞌin ndo, yeꞌe ku Seꞌe Ndioxi, ta yéꞌe̱ ni nduchi nuu i nda tá kuva yéꞌe̱ ñu̱ꞌu̱ ya xíxi, saa yéꞌe̱ ya. Ta xaꞌa i yéꞌe̱ ya tá kuꞌva yéꞌe̱ kàà ya yáꞌa tá sikan ndíyakun na ya, ndúyeꞌe ni ya, saa yéꞌe̱ xaꞌa i. Ta káꞌan i xiꞌin ndo tuꞌun yóꞌó: