San Juan 17:24 - Xochapa Mixteco

²⁴ ’Tata Iva yo, na ta̱xi un ndaꞌa i ndíkun yeꞌe, ta kúni i ná koo na xiꞌin i nuu ndivi nuu koo i. Saa kuni na ndiꞌi ya vaꞌa, ya luvi ta̱xi un ndaꞌa i, saa chi yóꞌo̱ ta kúꞌvi ni ini un xíni un yeꞌe, nda tá täꞌan xikoo xaꞌa ñuu ivi yóꞌó vi kúꞌvi ni ini un xíni un yeꞌe.

San Juan 17:24 Mawu Ofanana

San Mateo 25:21

Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra.

San Mateo 25:23

Saa ndi̱kaꞌan ra xitoꞌo ra, káchi ra saa: “Vaꞌa ni xa̱a súvi un chiñu, vaꞌa ni moso ku mií un. Vaꞌa ni kundaa ini i kuni i yóꞌo̱. Sikuiso chiñu i yóꞌo̱ xiꞌin kuaꞌa ni ka chiñu i, chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, nuu kusini ni un xiꞌin i”, káchi xitoꞌo ra xiꞌin ra.

San Mateo 25:34

Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó.

San Mateo 26:29

Ta ndixa káꞌan i xiꞌin ndo, köꞌo ka i nduta vinu, nduta kiti uva xiꞌin ndo, nda kivi tá ná ndikitaꞌan yo nuu xáꞌnda chiñu Iva i Ndioxi. Nda saa koꞌo yo vinu xa̱á ―káchi Jesús xiꞌin nda.

San Lucas 12:37

Vaꞌa ni kee na moso na íkan saa, na köo kíxi, na ndátun ndakua xaa xitoꞌo na kani ndaꞌa ra yeꞌe, saa kuna na nuu ra ndiꞌvi ra. Saa tá ná kuni ra ndóo na ndátun ñaꞌa na, ta kusini ni ra xiꞌin na, nda xaa vií ra ñaꞌa kandita ra nuu mesa ra kuxi na.

San Lucas 23:43

Saa ndi̱kaꞌan Jesús xiꞌin ra, káchi ra saa: ―Ya ndaa káꞌan i xiꞌin un, kivi vitin koo un xiꞌin i nuu latun ni káa ―káchi Jesús xiꞌin ra.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 12:26

Tá ndá ndóꞌo̱ kúni xaa chiñu nuu i, ta vaꞌa kundikun ndo yeꞌe. Chi nuu koo i ta ikán koo tu ndóꞌo̱ va xiꞌin i. Tá ndá ndo xáa chiñu nuu i, ta xaa kaꞌnu Iva i Ndioxi ndóꞌo̱ ―káchi Jesús xiꞌin na.

San Juan 14:3

Tá tu ná kuꞌun i xa̱a vií i nuu koo ndo saa ndiko koo i ndikuiso i ndóꞌo̱, kuꞌun ndo koo ndo xiꞌin i nuu koo i.

San Juan 15:9

Ta Iva i ta kúꞌvi ni ini ra xíni ra yeꞌe, ta saa yeꞌe kúꞌvi ni ini i xíni i ndóꞌo̱, yakan kutaꞌan tuun ni ndo xiꞌin i xaꞌa ya kúꞌvi ni ini i xíni i ndóꞌo̱.

San Juan 17:2

Chi yóꞌo̱ ku ra ta̱xi ichí ndaꞌa i xaꞌa ndiꞌi na ñuu ivi na ta̱xi un ndaꞌa i yóꞌó, ya ná taxi i ichí ndaꞌa na kutaku na ndiꞌi saa kivi.

San Juan 17:22

Ya vaꞌa ni ta̱xi un un ndaꞌa i kua ta̱xi i ndaꞌa na ya ná kuu na iin yuꞌu xiꞌin yo, tá kuꞌva íyo mií yo xiꞌin taꞌan yo iin yuꞌu ku yo xiꞌin taꞌan yo.

San Juan 17:5

Tata Iva i Ndioxi, vitin xaa kaꞌnu un yeꞌe, taxi un koo i xiín un nuu luvi ni ndi̱xiyo i xiꞌin un yachi tá täꞌan xikoo ñuu ivi yóꞌó.

San Juan 6:37

Ndiꞌi na táxi Iva i Ndioxi ndaꞌa i, ta vaxi na nuu i, ta ndiꞌi na vaxi nuu i ta täva i na keꞌe.

San Juan 6:39

Ta ya yóꞌó kua chi̱tuni Iva i Ndioxi, ra ti̱ꞌvi yeꞌe vaxi i xaa súvi i: Ndiꞌi na táxi ra ndaꞌa i ta ná sändañuꞌu i nda iin na, saa tá ti̱ndaa kivi sindiꞌi, ta sitaku ndiꞌi i na ikán.

San Juan 8:58

Saa ndi̱kuiin Jesús káꞌan ra, káchi ra saa: ―Ya ndaa ni káꞌan i xiꞌin ndo, tá täꞌan ka vi koo ra Abraham, ta yeꞌe ta xa íyo va i ―káchi ra xiꞌin nda.

1 Corintios 13:12

Kuꞌva saa íyo ya ndóꞌo yo vitin, tá ndóꞌo naꞌa, na xíto nuu yu̱ú tatan, ya kuaꞌan kúxana nuu va, saa íyo ya ndóꞌo yo. Sundi vaxi kivi ta saa kua kundaa teꞌe ini yo xaꞌa ndiꞌi ya, chi saa kua kuni xiꞌin nuu yo Ndioxi. Loꞌo ni va kúndaa ini yo xaꞌa ra vitin, ta vaxi kivi saa kua kundaa teꞌe ini yo xaꞌa ndiꞌi kúu ñaꞌa. Ta saa kua kuni vaꞌa yo Ndioxi tá kuꞌva káa ra, tá kuꞌva xíni ra yoo.

2 Corintios 3:18

Yakan kua tá kúu ndiꞌi yo kándixa Tata yo Jesucristo, ta köo ndási ka nuu yo, vaꞌa xíto teꞌe yo, yakan kua tá íin yu̱ú tatan saa íin yo chi sínaꞌa teꞌe yo ya luvi ni íkan ra xiꞌin ya ndee ni luvi kúu mií ra. Ta saa kua ndúu yo tá kuꞌva káa mií Tata yo Jesucristo. Ta ya ndínama yo iin iin kivi ta mií Tata yo Jesucristo ra kúu Tachi ku ra íkan saa xiꞌin yo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

2 Corintios 5:8

Chi yoo ta xaꞌa ya ndáa ni ini yo xíni yo ra yakan kúni ni yo kana koo yo ini ikin kuñu yo ya kúu mií yo vitin, ta ndikiꞌin yo kuꞌun yo koo yo xiꞌin ra nuu íyo mií ra.

Filipenses 1:23

Ni köo xíni i unkua vaꞌa ikan i, ¿án vaꞌa ka ya kuvi i, án vaꞌa ka ya kutaku i? Sundi ya ndíkani ini i kua: vaꞌa ni ka kua ná kuvi i, túvi i, chi koo i xiꞌin Cristo.

1 Tesalonicenses 4:17

Sindiꞌi saa kuꞌun yoo ndi̱ndoo sindikuita ra yoo ndaa yo kuꞌun yo koo yo nuu viko nuu ndikitaꞌan yo xiꞌin naꞌa, na xa ndi̱taku. Ta ikán ndikitaꞌan yo ndikiꞌin yo Tata yo Jesucristo, ta saa koo yo xiꞌin ra ndiꞌi saa kivi ya vaxi.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

1 Juan 3:2

Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.

El Apocalipsis 21:22

Ta nda iin veꞌe ñuꞌu köo ndi̱xini i mi ñuu i̱í chee ikán, saa chi mií Iva yo Ndioxi ra ndee ni ndee ku ra ku veꞌe ñuꞌu xiꞌin Tata yo Jesucristo ra kúu Levo ku ra íyo xiꞌin ra.

El Apocalipsis 3:21

Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta yeꞌe taxi i koo na xiꞌin i nuu ndivi ya kaꞌnda chiñu na xiꞌin i. Saa chi yeꞌe ta xa ku̱chiñu i nuu ya väꞌa, yakan ta̱xi Iva i Ndioxi ichí ndaꞌa i ndi̱kunduꞌu i xiꞌin ra ñaꞌñu kuáꞌá ra, íyo i xáꞌnda chiñu i xiꞌin ra.