HEBREOS 12:2 - Xochapa Mixteco

² Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 12:2 Mawu Ofanana

San Mateo 16:21

Nda kivi saa xa̱á Jesús ndítuꞌun ra xiꞌin nda ítaꞌan xiꞌin ra, ya xíniñuꞌu kuꞌun ra ñuu Jerusalén. Ta ikán xaa nduvaꞌa ni na xikuaꞌa, xiꞌin nda ínuu nuu sutu tin nda maestro nda sínaꞌa ley Ndioxi, xaa nduvaꞌa ni nda xiꞌin ra. Saa kaꞌni nda ra, ta nditaku ra kivi uni.

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

San Marcos 14:36

Saa káꞌan ra káchi ra saa: ―Tata iva i, nda iin ñaꞌa köo ndíchi nuu mií un. Tá tu kúni un ta täxi un yaꞌa i nuu tindoꞌo yóꞌó, sundi ïkan un ya kúni i, vaꞌa ikan un ya kúni mií un ―káchi ra.

San Marcos 15:28

Yóꞌó ku nuu ndi̱xinu tuꞌun Ndioxi ya ta̱a nda káꞌan tuꞌun yuꞌu Ndioxi xinaꞌa, káchi ya saa: “Ndikani ini naꞌa xaꞌa ra, taꞌan naꞌa na väꞌa ku ra”, káchi ya ta̱a nda.

San Marcos 16:19

Tá sindiꞌi Tata yo Jesús ndi̱kaꞌan ra xiꞌin nda, saa ndi̱ko koo ra kuaꞌan ra nuu ndivi i̱kan Ndioxi, ta ndi̱kunduꞌu ra ñaꞌñu kuáꞌá Ndioxi.

San Marcos 9:12

Saa ndi̱kuiin ra káꞌan ra xiꞌin nda: ―Ya ndaa kua xiꞌna ra Elías ku ra ndiko koo kixi, ta ra ikán ku ra ndasa vií ndiꞌi ñaꞌa. ¿Ta ndachu kua káꞌan tu tuꞌun Ndioxi xaꞌa Taa ra xa̱a ñuu ivi yóꞌó, ya ndoꞌo ni ra ta kundasi nuu ñaꞌa na, káchi ya?

San Marcos 9:24

Saa iin ndi̱ndaꞌi koꞌo mií iva ra loꞌo ikán káꞌan ra: ―Kándixa va i, tata, ta chindee ka un yeꞌe ná kandixa ka i ―káchi ra.

San Lucas 17:5

Saa kúu ta ndi̱kaꞌan nda ítaꞌan xiꞌin Jesús xiꞌin ra, káchi nda saa: ―Tata, chindee un ndeꞌe ná kundaa ni ini nde kuni nde Ndioxi ―káchi nda xiꞌin ra.

San Lucas 23:11

Saa xa̱á ra Herodes xiꞌin nda lapa kúsiki ndaa ñaꞌa nda. Saa si̱kundixi nda ra iin tikoto ya vaꞌa ni náꞌa ya xáku ndaa nda ra. Ñaa si̱ndiko koo tuku ra Herodes Jesús kuaꞌan ra nuu ra Pilato.

San Lucas 24:26

Taa ra ti̱ꞌvi Ndioxi vaxi sikaku na ñuu ivi yóꞌó ta xíniñuꞌu ra ndoꞌo ni ra, ta saa vaxi kivi saa ndiko koo tuku ra ndikunduꞌu ra kaꞌnda chiñu ra xiꞌin Ndioxi nuu ndi̱xiyo ra ―káchi Jesús xiꞌin nda.

San Juan 1:29

Ta ndi̱tuvi inka kivi saa xi̱ni ra Juan Jesús vaxi ra nuu ra, saa ndi̱kaꞌan ra xiꞌin naꞌa, káchi ra saa: ―¡Koto ndo vii! Ra káa ku ra síniꞌi Ndioxi kuvi ra xaꞌa kuachi yo ñuu ivi. Tá íyo levo síniꞌi naꞌa nuu Ndioxi ya síndiꞌi xaꞌa ra kuachi na, ta saa íyo ra káa.

San Juan 12:24

Ya ndaa káꞌan i xiꞌin ndo iin ndikin trigo, ya köo chíꞌi na ta köo táꞌi ya, yakan köo ndúkuaꞌa ya, ndóo iindaa mií ya. Sundi tá ná chiꞌi na ya, taꞌi xeꞌe sata ya ta nduta ya, saa kua ndúkuaꞌa ni ka ya.

San Juan 12:32

Ta yeꞌe tá ná sindaa naꞌa yeꞌe ndikunuu sukun i, ta saa kua ndixita i ndiꞌi ni kúu na ñuu ivi kixi na nuu i ―káchi Jesús xiꞌin na.

San Juan 13:3

Xa xíni Jesús ya ta̱xi ndiꞌi Iva ra ñaꞌa ndaꞌa ra, ta xíni ra ke̱e ra nuu Ndioxi, ta saa ndiko koo ra kuꞌun ra.

San Juan 6:40

Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

San Juan 8:56

Ta ra Abraham ra káꞌan ndo kúu iva ndo, ta xi̱ni i ku̱sini ni ra tá ndi̱kaꞌan Ndioxi xiꞌin ra ya kixi i ñuu ivi yóꞌó ―káchi Jesús xiꞌin nda.

Los Hechos 2:36

Ta xaꞌa ya ñaa kua xíniñuꞌu kundaa ini ndiꞌi ndóꞌo̱ na taꞌan yo Israel chi suvi mií Jesús ra chi̱nuu ndo nuu cruzin ku ra kúu Cristo ra sikaku yoo ―káchi ra Pedro xiꞌin nda.

Los Hechos 3:15

Ta xa̱ꞌni ndo taa ra vaꞌa ni, chi iin mituꞌun ra ikán ku ra táxi ichí ya kutaku yo. Sundi Ndioxi ta si̱taku ñaꞌa ra. Ndeꞌe ku testigo xaꞌa ra, xi̱ni nde ndi̱taku ra.

Los Hechos 5:31

Ta Ndioxi ta̱xi ra chiñu ndee ni ndaꞌa Jesús, ta̱xi ra ichí ndaꞌa ra ndu̱u ra iin ra chee ni ndi̱kunduꞌu ra ñaꞌñu kuáꞌá Ndioxi. Ta̱xi tu ra ichí ndaꞌa ra ya sikaku ra naꞌa ya ná kuchiñu na ndinama ini na, ta saa xaa kaꞌnu ini Ndioxi xaꞌa kuachi na.

Los Hechos 5:41

Tá ka̱na koo nda kuaꞌan nda ta kúsini ni nda kuaꞌan nda, chi ta̱xi Ndioxi ichí ndo̱ꞌo nda xaꞌa ya ndítuꞌun nda xiꞌin naꞌa xaꞌa kivi Jesús.

1 Corintios 1:18

Tá ndíkani i tuꞌun xaꞌa Cristo ya ndi̱xiꞌi ra nuu cruzin, ta tá káa tuꞌun kíꞌvi saa káa ya káꞌan i nuu naꞌa, na ku̱aꞌan ichí nuu ndiꞌi xaꞌa na. Sundi mií yo síkaku Ndioxi, ta xíni yo tuꞌun yóꞌó ta ndee ni ndee kúu mií ya xaꞌa ya kúu ya tuꞌun Ndioxi.

1 Corintios 1:23

Sundi ndeꞌe, ta xaꞌa Jesucristo, ra ndi̱xiꞌi nuu cruzin xaꞌa kuachi va yo kua káꞌan ndoso nde xiꞌin na. Ta tuꞌun yóꞌó nda tá káa yu̱ú nuu káchiꞌi xaꞌa na kóyo na, saa káa ya nuu na judío. Ta na griego ndíkani ini na, tá káa ya kíꞌvi va, saa káa ya nuu na.

Efesios 2:16

Saa chi tá ndi̱xiꞌi Cristo nuu cruzin, saa kua si̱ndiꞌi xaꞌa ra ya ka̱nitaꞌan ni uvi saa yo ñuu xiꞌin taꞌan yo, ñaa ta̱xi ra ndi̱kundoo vaꞌa yo xiꞌin Ndioxi, saa nda̱sa ra uvi saa yo ñuu ikán ndu̱u yo iin nuu ikin kuñu xiꞌin mií ra.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Filipenses 1:6

Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.

Filipenses 3:20

Sundi yoo, ta nuu ndivi ku ñuu yo, chi ikán koo yo xiꞌin Ndioxi. Ta ndátun yo ndiko koo Tata yo Jesucristo kixi ra sikaku ra yoo.

2 Timoteo 4:8

Ta xíni i vaꞌa ni ini Ndioxi ta nina ya ndaa íkan ra xiꞌin naꞌa, chi mií ra ku ra xáa nani kuachi xiꞌin na. Ta saa ikan ra xiꞌin i taxi ra ya vaꞌa ndaꞌa i, tá kuꞌva íkan na xiꞌin naꞌa, na kéꞌe taꞌan níꞌi na ñaꞌa xaꞌa ya vaꞌa íkan na. Kuꞌva saa ikan Ndioxi xiꞌin i, taxi ra ya vaꞌa ndaꞌa i chi xa xa̱a súvi ndiꞌi i chiñu ya ta̱xi ra ndaꞌa i. Ta süvi ndisaa yeꞌe niꞌi ya vaꞌa ikan ra, ndiꞌi na ndíkun ichí ra ta ndátun na ndiko koo ra, na ikán ku na niꞌi ya vaꞌa.

HEBREOS 1:13

Ndioxi ta nda iin ichí köo ndi̱kaꞌan ra saa xiꞌin nda iin na tatun ra, tá kuꞌva ndi̱kaꞌan ra xiꞌin Seꞌe ra: Naꞌa yóꞌó koo un xiꞌin i ñaꞌñu kuáꞌá i kaꞌnda chiñu un xiꞌin i, ndakua ná tindaa kivi sikoyo i naꞌa, na sáa ini xíni yóꞌo̱ tixin xaꞌa un, sindiꞌi xaꞌa ndiꞌi i na, káchi Ndioxi xiꞌin ra.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

HEBREOS 10:14

Saa chi xaꞌa ya i̱kan ra saa ndi̱soko ra mií ra, ta iindaa ichí va i̱kan ra saa, nda̱sa vaꞌa ra na ndíkun sata ra, ndu̱u ndǎku na nuu ra, saa xa̱a i̱í ra na, ta saa koo na ndiꞌi saa tiempo.

HEBREOS 10:33

Sava ndóꞌo̱, ta ndee ni ti̱xuꞌvi ndo xaꞌa ya kini ni ndi̱kaꞌan naꞌa xiꞌin ndo, saa xa̱a ndu̱vaꞌa ni na xiꞌin ndo nuu ndiꞌi naꞌa. Ta saa tu ndóꞌo̱ va, ku̱ndaꞌvi ini ndo xi̱ni ndo na taꞌan ndo, na ndóꞌo̱ tá kuꞌva ndo̱ꞌo ndo, saa ndi̱xaꞌan ndo chi̱tuvi ndo na.

HEBREOS 11:36

Ta xaꞌa ya xi̱ndaa ni ini na ikán xi̱ni na Ndioxi kua ndo̱ꞌo ni na ndaꞌa naꞌa, xa̱a siki ni ñaꞌa na, xa̱a chiꞌña ni na xiꞌin na saa ka̱ni ni ñaꞌa na. Ta inka na xi̱nuꞌni xiꞌin cadena xi̱ñuꞌu na veꞌe kàà.

HEBREOS 12:3

Ta saa ndóꞌo̱, ndikani vaꞌa ini ndo ndá kuꞌva ndo̱ꞌo Jesús, chi ra ikán ta yáꞌa ni ndee ya ndo̱ꞌo ra i̱kan naꞌa, na ivi kuachi yóꞌó, ta ndi̱xaꞌa ndee ndiꞌi ini ra ndo̱ꞌo ra saa. Xaꞌa ya ñaa kua künaa ndo, ta ni ndïkava ini ndo ya ndíkun ñaꞌa ndo.

HEBREOS 13:13

Saa tu yoo va, ná kundikun yo Jesucristo, ta ná kana koo yo kuꞌun yo xiꞌin ra nuu ñuu, ná kükaꞌán nuu yo ndoꞌo yo xaꞌa ra, tá kuꞌva ndo̱ꞌo ni mií ra.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

HEBREOS 7:19

Chi ley ikán, ta köo ndi̱kuchiñu ya ndasa vaꞌa ya naꞌa nuu Ndioxi. Xaꞌa ya ikán kua ta̱xi ra inka ya ndee ni ndáa yaꞌvi ndaꞌa yo, ta tixin ya ikán kua vaꞌa kuyati yo nuu Ndioxi vitin.

HEBREOS 8:1

Ta ya káꞌan i xiꞌin ndo yóꞌó kua ndee ni ndee xíniñuꞌu ndo kundaa ini ndo: Jesucristo ku ra ku sutu chee, kaꞌnu ni ra nuu yo, ta nda̱a ra ndi̱kunduꞌu ra ñaꞌñu kuáꞌá Ndioxi nuu íyo tai kaꞌnu itun toꞌo xáꞌnda chiñu ra xiꞌin Ndioxi.

HEBREOS 9:28

Saa chi saa i̱kan Jesucristo iin ichí va ndi̱xiꞌi ra ya ndi̱soko ra mií ra nuu ndi̱kata ra kuachi kuaꞌa ni naꞌa. Ta sindiꞌi, tá ná ndiko koo tuku ra ichí uvi, ta kïxi ka ra ya kuvi ra xaꞌa kuachi yo, sundi kixi ra sikaku ra yo ndátun ñaꞌa.

Santiago 2:1

Ñani yo, ndïkaxin ndo nda iin na taꞌan yo na ndíkun Tata yo Jesucristo ra kúu mií ndee chee ya vaꞌa ni, iin kachi kuꞌvi ini ndo kuni taꞌan ndiꞌi ndo.

1 Pedro 1:11

Ta Tachi ya kúu mií Cristo, ra ndi̱kaxin Ndioxi kixi ndoꞌo ni xaꞌa yo kua ta̱xi xiní ndaꞌa nda ndi̱kaꞌan tuꞌun yuꞌu Ndioxi, ya kundaa ini nda xaꞌa ñaꞌa ya chee ni kuu mií ra kixi kivi vaxi, ta ndu̱ku ni tu nda kuꞌva kundaa ini nda xaꞌa ra ndá taa kuu ra, ta saa ndu̱ku tu nda kundaa ini nda ndá kivi kua kixi ra.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

1 Pedro 3:22

Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.

Judas 1:21

Ta sïndoo ndo ya ndíkun ndo ichí Ndioxi, ra kúꞌvi ni ini xíni ndóꞌo̱, ta saa niꞌi ndo koo ndo xiꞌin ra ndiꞌi saa ichí xaꞌa ya kúndaꞌvi ni ini ra xíni ra ndóꞌo̱.

El Apocalipsis 1:11

―Yeꞌe ku i náni “Alfa tin Omega”, chi tuꞌun yóꞌó kúni kachi ya, yeꞌe ku ra táku nda kivi núnu̱ú, ta táku i vitin ta saa kutaku i iin saa nda kivi sindiꞌi. Ta vitin xíniñuꞌu un taa un nuu tutu ya sinaꞌa i nuu un kuni un. Ta ya taa un ñaa, ta tiꞌvi un ya ná kuꞌun ya ndaꞌa uxa ñuu nuu ndóo na kándixa yeꞌe. Uxa ñuu yóꞌó kua ñúꞌu estado Asia, ya náni Éfeso xiꞌin Esmirna tin Pérgamo xiꞌin Tiatira tin Sardis xiꞌin Filadelfia tin Laodicea ―káchi tachi ra ya xi̱ni soꞌo i.

El Apocalipsis 1:17

Tá xi̱ni i ra, ta ndakua kuaꞌan nima i, iin saa ndi̱kava i kuaꞌan i xaꞌa ra. Tá káa ra ndi̱xiꞌi saa ndu̱u i. Ñaa chi̱nuu ndaꞌa ra sata i, ta ndi̱kaꞌan ra xiꞌin i, káchi ra saa: ―Ku ïꞌvi un, saa chi yeꞌe, ta táku i nda kivi núnu̱ú, iin saa kutaku i nda kivi sindiꞌi.

El Apocalipsis 1:8

Ta Tata, Iva yo Ndioxi, ra ndee ni ka chee nuu ndiꞌi ñaꞌa ya íyo ñuu ivi yóꞌó xiꞌin nuu ndivi, káchi ra saa: Yeꞌe náni i “Alfa xiꞌin Omega,” chi yeꞌe ku ra núnu̱ú ta yeꞌe ku ra si̱ndiꞌi. Ta yeꞌe ku ra táku vitin, ra xa íyo nda tá yachi ku i, ta ndiko koo tuku i kixi i ―kachi Tata yo.

El Apocalipsis 2:8

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó ya ná kuꞌun ya ndaꞌa tatun Ndioxi ya ndáa naꞌa, na kándixa yeꞌe, nuu ndíkitaꞌan na xáa kaꞌnu na Ndioxi ñuu Esmirna. Ta yeꞌe káꞌan i xiꞌin na ikán, káchi i saa: Yeꞌe, ta táku i nda kivi núnu̱ú iin saa kutaku i nda kivi sindiꞌi. Yeꞌe kúu ra ndi̱xiꞌi ta ndi̱taku i, táku i vitin.