HEBREOS 1:3 - Xochapa Mixteco

³ Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

HEBREOS 1:3 Mawu Ofanana

San Mateo 22:24

―Tata Maestro, soꞌva ndi̱kaꞌan ra Moisés xinaꞌa: “Tá ndi̱xiꞌi iin taa, ta köo seꞌe ra ndi̱kaku xiꞌin yá síꞌi ra, ta vaꞌa tindaꞌa ñani ra xiꞌin yá ya ná kaku seꞌe yá. Nda tá koo seꞌe ra ndi̱xiꞌi saa koo na yóꞌó”, káchi ya ta̱a ra Moisés.

San Marcos 16:19

Tá sindiꞌi Tata yo Jesús ndi̱kaꞌan ra xiꞌin nda, saa ndi̱ko koo ra kuaꞌan ra nuu ndivi i̱kan Ndioxi, ta ndi̱kunduꞌu ra ñaꞌñu kuáꞌá Ndioxi.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 1:29

Ta ndi̱tuvi inka kivi saa xi̱ni ra Juan Jesús vaxi ra nuu ra, saa ndi̱kaꞌan ra xiꞌin naꞌa, káchi ra saa: ―¡Koto ndo vii! Ra káa ku ra síniꞌi Ndioxi kuvi ra xaꞌa kuachi yo ñuu ivi. Tá íyo levo síniꞌi naꞌa nuu Ndioxi ya síndiꞌi xaꞌa ra kuachi na, ta saa íyo ra káa.

San Juan 1:4

Ta mií ra ikán ku ra kúu mií ndee ya taxi ra kutaku na ñuu ivi xiꞌin ra tá kuꞌva táku mií ra. Chi ya táku ra kua vaꞌa síndiyeꞌe ra nuu na ñuu ivi.

Los Hechos 2:33

Ta ndi̱kiꞌin Ndioxi ra kuaꞌan xiꞌin ra koo ra ñaꞌñu kuáꞌá ra nuu ndivi. Saa ta̱xi Ndioxi Tachi ra ndaꞌa Jesús tá íyo ya ndi̱kaꞌan ra xiꞌin Jesús yachi, saa íyo ya i̱kan ra. Ta ndiꞌi ya xíto ndo xiꞌin ya xíni ndo vitin, Tachi I̱í Ndioxi ya ti̱ꞌvi ra ndaꞌa nde kua i̱kan saa xiꞌin nde.

Los Hechos 7:56

Ñaa ndi̱kaꞌan ra: ―¡Koto ndo toon! Núna nuu ndivi, ta xíto i Jesús ra kúu Taa ra xa̱a ñuu ivi yóꞌó. Xíto i ndíchi ra ñaꞌñu kuáꞌá Ndioxi ―káchi ra Esteban xiꞌin na.

ROMANOS 1:16

Kúni i ná kundaa ini ndo, chi yeꞌe ta köo kúkaꞌan nuu i ya kándixa i tuꞌun vaꞌa xaꞌa Jesucristo, chi tuꞌun yóꞌó kúu mií ya ndee Ndioxi ya sikaku ya ndiꞌi naꞌa, na kándixa ya káꞌan ya. Xiꞌna ni ka na judío ku na xi̱ni soꞌo tuꞌun vaꞌa xaꞌa Jesucristo, saa xi̱ni soꞌo tu naꞌa, na köo kúu judío va ya.

ROMANOS 8:34

Ta ¿án ndá naꞌa káꞌan xaꞌa yo kuvi yo xaꞌa kuachi yo? Nda iin naꞌa küchiñu ikan saa xiꞌin yo, chi Jesucristo ku ra xa ndi̱xiꞌi xaꞌa kuachi yo, ta ndi̱taku ra, ta vitin íyo ra ñaꞌñu kuáꞌá Ndioxi, ta íyo ra xáku ndaꞌvi ra xaꞌa yo.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

Colosenses 3:1

Ta ndóꞌo̱, ta xa ndi̱taku ndo xiꞌin Jesucristo tá ndi̱xiꞌi ra, yakan vitin ta xíniñuꞌu ndo nduku ndo ya vaꞌa, ya ndáa yaꞌvi ni, ya íyo nuu ndivi nuu índuꞌu ra nuu tai toꞌo ñaꞌñu kuáꞌá Ndioxi.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

HEBREOS 1:13

Ndioxi ta nda iin ichí köo ndi̱kaꞌan ra saa xiꞌin nda iin na tatun ra, tá kuꞌva ndi̱kaꞌan ra xiꞌin Seꞌe ra: Naꞌa yóꞌó koo un xiꞌin i ñaꞌñu kuáꞌá i kaꞌnda chiñu un xiꞌin i, ndakua ná tindaa kivi sikoyo i naꞌa, na sáa ini xíni yóꞌo̱ tixin xaꞌa un, sindiꞌi xaꞌa ndiꞌi i na, káchi Ndioxi xiꞌin ra.

HEBREOS 10:12

Sundi Jesucristo ta iin ichí va i̱kan ra saa, iin ichí va ndi̱taxi ra mií ra xaꞌa kuachi yo, ta ya i̱kan ra saa ta köo xíniñuꞌu ra ikán tuku ra saa. Tá sindiꞌi i̱kan ra saa ta ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 4:14

Jesús, ra kúu Seꞌe Ndioxi ku iin sutu ra ndee ni chee, ra ndee ni kaꞌnu nuu yo. Ta ra ikán ku ra nda̱a nuu ndivi, yakan tuun ni ná kandixa yo ra, ta ná xïkuiin yo ya ndáa ini yo ra.

HEBREOS 7:27

Ta köo ndi̱kan ra tá íkan inka nda sutu, saa chi nda ikán, ta xiꞌna xaꞌa kuachi mií nda xáꞌni nda kiti sóko nda nuu Ndioxi, ta sindiꞌi, saa xáꞌni nda kiti xaꞌa kuachi na ñuu. Sundi Jesús ta köo ndi̱kan ra saa ya kaꞌni ra kiti nuu Ndioxi, chi iin ichí va ndi̱soko ra mií ra ndi̱xiꞌi ra xaꞌa kuachi yo nuu Ndioxi. Ta ya i̱kan ra saa ndi̱soko ra mií ra ndi̱xiꞌi ra xaꞌa yo, ta iindaa ichí va kua i̱kan ra saa, ta köo xíniñuꞌu ra ikan tuku ra saa.

HEBREOS 8:1

Ta ya káꞌan i xiꞌin ndo yóꞌó kua ndee ni ndee xíniñuꞌu ndo kundaa ini ndo: Jesucristo ku ra ku sutu chee, kaꞌnu ni ra nuu yo, ta nda̱a ra ndi̱kunduꞌu ra ñaꞌñu kuáꞌá Ndioxi nuu íyo tai kaꞌnu itun toꞌo xáꞌnda chiñu ra xiꞌin Ndioxi.

HEBREOS 9:16

Ta xíni yo, tá ndá naꞌa xíꞌi ta síkuaꞌa na tutu síndoo na xaꞌa ñaꞌa na, ta tutu ikán ta köo ndáa yaꞌvi ya kivi táku mií na si̱kuaꞌa ya, nda tá ndi̱xiꞌi vi na saa kua xáa ya ndáa yaꞌvi ya.

HEBREOS 9:26

Tá ndi̱kan Jesucristo tá kuꞌva i̱kan nda sutu ikán tá nuu kuiya, ta nda tá xa̱á xi̱koo ñuu ivi yóꞌó vi xíniñuꞌu ra kuvi ra kuaꞌa ni ichí, ndikuu. Sundi tiempo ya ku̱yati ndiꞌi xaꞌa ñuu ivi ndóo yo vitin kua ki̱xi ra, ta iindaa va ichí ndi̱taxi ra mií ra ndisoko ra mií ra xaꞌa yo, ta ya i̱kan ra saa ndi̱taxi ra mií ra ndaꞌa Ndioxi yakan si̱ndiꞌi xaꞌa ra kuachi yo.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

1 Pedro 3:22

Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.

2 Pedro 1:16

Ta xa ndi̱tuꞌun nde xiꞌin ndo, si̱naꞌa nde ndóꞌo̱ xaꞌa ndee ya kúu mií Tata yo Jesucristo xiꞌin ya ndiko koo ra kixi tuku ra ñuu ivi yóꞌó, ta ya ndaa ni kua ndi̱kaꞌan nde xiꞌin ndo, süvi kuento vata kua ndi̱tuꞌun nde xiꞌin ndo. Chi ndeꞌe ta xi̱ni xiꞌin nuu mií nde ndee chee ni kúu mií ra.

2 Pedro 1:17

Tá ndi̱kaꞌan Iva yo Ndioxi xiꞌin ra, saa kua ta̱xi ra ya chee ni xiꞌin ya toꞌo ni ndaꞌa ra, ke̱e ya nuu luvi ni káa nuu mií Iva yo Ndioxi, káchi ra saa: “Ra yóꞌó ku Seꞌe mani mií i, ra kúꞌvi ni ini i xíni i, kúsini ni i xiꞌin ra”, káchi Ndioxi.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 3:5

Ta ndóꞌo̱ xa xíni ndo ya ki̱xi Tata yo Jesucristo ñuu ivi yóꞌó ki̱ndaa ra kuachi yo. Chi mií ra ta nda iin kuachi ra köo.

Judas 1:25

Ná xaa kaꞌnu ni yo Ndioxi chi iin mituꞌun mií ra ku Ndioxi ra ndíchi ni, ra síkaku yoo, saa ná kunuu sukun ni ya toꞌo ra nuu luvi ni íyo ra, nuu ndee ni xáꞌnda chiñu ra xiꞌin ndiꞌi ndai kúu mií ra vitin tin ndiꞌi saa kúu kivi ya vaxi. Saa ná koo.

El Apocalipsis 3:21

Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta yeꞌe taxi i koo na xiꞌin i nuu ndivi ya kaꞌnda chiñu na xiꞌin i. Saa chi yeꞌe ta xa ku̱chiñu i nuu ya väꞌa, yakan ta̱xi Iva i Ndioxi ichí ndaꞌa i ndi̱kunduꞌu i xiꞌin ra ñaꞌñu kuáꞌá ra, íyo i xáꞌnda chiñu i xiꞌin ra.

El Apocalipsis 4:11

―Iva yo Ndioxi, iin mií un ku un kaꞌnu ni nuu nde, yakan iindaa yóꞌo̱ ku ra kúu mií ichí ndikiꞌin ni un tuꞌun vaꞌa ya káꞌan nde xiꞌin un, saa ná ndikunuu sukun ni ya toꞌo un, chi yóꞌo̱ ku ra ndee ni ndee kúu mií, ta iindaa yóꞌo̱ ku un si̱kuaꞌa ndiꞌi ni kúu ñaꞌa ya íyo ñuu ivi yóꞌó. Tá íyo ya chi̱tuni mií un, saa íyo ndiꞌi ya si̱kuaꞌa un, ―káchi na xikuaꞌa ikán xiꞌin Ndioxi.