Gálatas 6:1 - Xochapa Mixteco

¹ Ñani yo, ndóꞌo̱ xa xuxa ini, ndóꞌo̱ vaꞌa ni xáa súvi ya kúni mií Tachi I̱í Ndioxi, ta án sana ndá na taꞌan yo kóyo nuu kuachi, íkan na ya väꞌa. Ta vaꞌa kuyati ndo nuu na ya chindee taꞌan ndo xiꞌin na, ta vívií kaꞌan ndo xiꞌin na ya ná sindikoo na ya väꞌa íkan na. Ta saa kuenta ni koo ndo chi ìyo ni koyo tu mií va ndo nuu kuachi.

Gálatas 6:1 Mawu Ofanana

San Mateo 11:29

Xaa súvi ndo ya káꞌan i xiꞌin ndo ya káa tá káa itun yuku i. Sikuaꞌá ndo tá kuꞌva íyo i, chi yeꞌe ta köo kueꞌe ini i, ndaꞌvi ni ini i, vaꞌa ni taa ku i, ikán ndo saa, ta saa kuchiñu ndo ndikundee ndo.

San Mateo 26:69

Tá kúu saa, ta índuꞌu ra Pedro keꞌe yeꞌe veꞌe mií ra ínuu nuu ndiꞌi sutu. Ñaa ndi̱xaa iin yá xáa chiñu veꞌe ra, ta ndi̱kaꞌan yá xiꞌin ra, Pedro, káchi yá saa: ―Saa tu yóꞌo̱ va, ra ítaꞌan xiꞌin Jesús, ra ke̱e chí Galilea ku tu yóꞌó va ―káchi yá xiꞌin ra.

San Mateo 26:75

Saa ndi̱kaꞌán ini ra, ya ndi̱kaꞌan Jesús xiꞌin ra, káchi ra saa: “Täꞌan ka vi kana cheꞌle, ta xa uni ichí vi ndikuaa un ya köo xíni un yeꞌe”, káchi ra xiꞌin ra. Saa ke̱ta ra keꞌe ta xa̱á ndinuni loꞌo xáku suchi ni ini ra.

San Mateo 9:13

Xíniñuꞌu ndo kundaa vaꞌa ini ndo unkua kúni kachi Ndioxi nuu tuꞌun ra, ya káchi saa: “Kúni i ná kundaꞌvi ni ini ndo kuni ndo inka naꞌa, chi ya ñaa ka kua ndee ni ndee nuu ñaꞌa ya sóko ndo nuu i”, káchi tuꞌun Ndioxi. Saa chi yeꞌe, ta växi i xaꞌa na vaꞌa, xaꞌa na väꞌa vaxi i, kaꞌan i xiꞌin na ya ná ndiko koo ini na kundikun na ichí Ndioxi ―káchi Jesús xiꞌin nda fariseo.

ROMANOS 14:1

Na taꞌan yo, ndúku i ya mani nuu ndo ya ndikuiso vií ndo na taꞌan yo, na vita ni ini xiꞌin tuꞌun Ndioxi. Tá tu köo íyo yuꞌu ndo xiꞌin na xaꞌa ya káꞌan na, ta käni taꞌan ndo xiꞌin na.

ROMANOS 15:1

Yo köo xíka uvi ini ta xíniñuꞌu yo kiꞌin yo kuenta xiꞌin na taꞌan yo, na vita ni ini xiꞌin tuꞌun Ndioxi, na täꞌan kundaa vaꞌa ini xiꞌin tuꞌun ra. Ta ná ïkan yo ndisaa ya kúni mií yo.

ROMANOS 8:6

Ta saa naꞌa na íkan ndisaa ya kúni mií ikin kuñu na, ta tíꞌvi na mií na ku̱aꞌan na ichí nuu ndiꞌi xaꞌa na kuvi na nuu Ndioxi. Sundi naꞌa, na xáa súvi ya kúni mií Tachi I̱í Ndioxi ta kutaku na xiꞌin Ndioxi, saa koo vaꞌa ni ini na.

1 Corintios 10:12

Xaꞌa ya ñaa kua, vií ná kundikun ndo ichí Tata yo Jesucristo, ndóꞌo̱ ndíkani ini ya tuun ni ndíkun ndo ra, ta kuenta ni koo ndo ya ná köyo ndo nuu kuachi.

1 Corintios 14:37

Tá ndá na taꞌan yo ndíkani ini ya káꞌan na tuꞌun yuꞌu Ndioxi, án ndee ni vaꞌa íyo Tachi I̱í ra xiꞌin na, ta vaꞌa ná kundaa ini na xiꞌin tuꞌun yóꞌó ya kúu ya xáꞌnda chiñu mií Tata yo Jesucristo.

1 Corintios 2:15

Sundi yoo ta kúu mií yo Tachi I̱í ra, yakan vaꞌa kúndaa ini yo xaꞌa ya vaꞌa ke̱e nuu ndivi. Ta nda iin naꞌa küvi taxi kuachi xaꞌa yo.

1 Corintios 3:1

Ñani yo xiꞌin kuꞌva yo, yachi, ta yeꞌe köo ndíkuvi ndituꞌun i xiꞌin ndo tá kuꞌva ndítuꞌun i xiꞌin naꞌa, na xa xuxa tuꞌun Ndioxi ini. Yakan ndi̱kaꞌan i xiꞌin ndo tá kuꞌva káꞌan yo xiꞌin naꞌa, na ndíkani ini ndisaa xaꞌa mií, chi ndóꞌo̱ ta tá íin na lee vali va saa íin ndo, xaꞌa ya sikan ndi̱kundikun ndo ichí Tata yo Jesucristo.

1 Corintios 4:21

¿Ta unkua kúni ndo ikan i xiꞌin ndo tá ná xaa i koto i ndóꞌo̱? ¿Án kúni ndo xaa i sitixuꞌvi i ndóꞌo̱? ¿Án vaꞌa ka xaa i koto i ndóꞌo̱ xiꞌin ya mani, ya kúꞌvi ini i xíni i ndóꞌo̱ xiꞌin ya kaꞌnu ini? Koto ndo unkua vaꞌa túvi míi va ndo.

1 Corintios 7:5

Xaꞌa ya ñaa kua küxiꞌnda ndo mií ndo nuu taꞌan ndo, sundi tá tu xa ndi̱kani ini ndo ya tïndaa taꞌan ndo uvi ndaa kivi, xaꞌa ya kúni ndo kaꞌan ndo xiꞌin Ndioxi, ta vaꞌa chitaꞌan tuꞌun ndo xaꞌa ya. Tá xa ndi̱xinu ichí ndi̱kaꞌan ndo xiꞌin Ndioxi ta saa vaꞌa tindaa taꞌan tuku ndo. Saa chi tá tu ná tïndaa taꞌan tuku ndo, ta ìyo ni sindaꞌvi kiti nǎꞌa ndóꞌo̱, ta koyo ndo nuu kuachi.

2 Corintios 10:1

Ta yeꞌe Pablo, ku ra káꞌan xiꞌin ndo xáku ndaꞌvi i nuu ndo xiꞌin ya vaꞌa, ya mani ta̱xi Cristo ndaꞌa i. Saa chi sava ndo káꞌan xaꞌa i ya ndee ni vita ini i tá íyo i xiꞌin ndo, sundi tá íyo xíka i nuu ndo ta ndee ni ndaku ini i, káchi ndo xaꞌa i.

2 Corintios 2:7

Ta vitin xíniñuꞌu ndo xaa kaꞌnu ini ndo xaꞌa ra ya ná chindee taꞌan ndo xiꞌin ra nduvaꞌa ini ra, ya ná küsuchi ni ka ini ra.

2 Corintios 2:8

Ta xíkan ni i ya mani nuu ndo ya xaa vií ndo xiꞌin ra ná kuni ra ya ndee ni kúꞌvi ini ndo xíni ndo ra.

Gálatas 5:23

saa táxi tu ya ndúu yo na vita ini, ta táxi tu ya ndúu yo na xáꞌnu ini nuu ya väꞌa. Ta köo ley ya ndíkasi nuu yo ya ikan yo taꞌan ya yóꞌó.

Gálatas 6:18

Ñani yo, mií Tata yo Jesucristo ná chikaa ni ya vaꞌa ndóꞌo̱. Saa ná koo.

1 Tesalonicenses 4:1

Ñani yo xiꞌin kuꞌva yo, xíkan ni nde ya mani nuu ndo, káꞌan ni nde xiꞌin ndo xaꞌa ya xa si̱naꞌa nde ndóꞌo̱ ndá kuꞌva koo ndo tá kuꞌva kúni mií Ndioxi. Saa xíkan ni nde ya mani nuu ndo tixin ichí mií Tata yo Jesucristo káꞌan nde xiꞌin ndo ya ná xaꞌa ni ka ndo ndee koo vaꞌa ni ndo.

2 Tesalonicenses 3:15

Ta säa ini ndo kuni ndo na, vaꞌa ndikani ndo nuu na ná xaa chiñu na, chi ñani yo ku na.

2 Timoteo 2:25

Ta vaꞌa vií ndikani un nuu naꞌa, na köo xíin kandixa tuꞌun Ndioxi, án sana niꞌi na ya vaꞌa nuu Ndioxi ta ndisama nima na, ya ná kundaa ini na xaꞌa ya ndaa.

HEBREOS 12:13

Kuenta koo ndo, vívií kaka ndo kuꞌun ndo, täxi ndo nduvita ini ndo ta koyo ndo, kuenta ni koo ndo ya ná kaku ndo.

HEBREOS 13:3

Ta ndikaꞌán ini ndo xaꞌa na ñúꞌu veꞌe kàà, nda tá íin mií vi ndo, saa íin ndo ñúꞌu veꞌe kàà xiꞌin na, kukaꞌán ndo. Ta saa kuñuꞌu ini ndo xaꞌa na ndóꞌo ni ini íkan inka naꞌa, nda tá xiꞌin mií vi ndo kua íkan na saa, kukaꞌán ndo.

Santiago 3:13

Ñani yo, tá íyo sava ndo ndíchi ni, saa íyo ni ya vaꞌa ndo, xínituni ni ndo xaꞌa ichí Iva yo Ndioxi, ta vaꞌa sinaꞌa ndo ya xiꞌin chiñu vaꞌa, ya toꞌo, saa kua sinaꞌa ndo mií ndo ya kúu ndo naꞌa, na ndee ni táku ini, na ndaꞌvi ni ini.

Santiago 3:2

Chi ndiꞌi yo ta yo yáꞌa yuꞌú ku ndiꞌi va yo, ta naꞌa, na köo yáꞌa tuꞌun káꞌan, na ñaa ku na xa ndi̱xinu íyo vaꞌa ni nima na xiꞌin ra, yakan kuchiñu na kaꞌnda chiñu na nuu ndiꞌi ikin kuñu na.

1 Pedro 3:15

Ya ndee ni xíniñuꞌu ndo ikan ndo kua yóꞌó, ná kuñuꞌu ni ini ndo ya xaa kaꞌnu ni ndo Tata yo Jesucristo. Ta ndiꞌi saa ichí koo ndúvi ndo ya ndikani ndo nuu naꞌa, na ndákan tuꞌun ndóꞌo̱ xaꞌa ya kándixa ndo ra.

1 Juan 5:16

Tá ndá ndóꞌo̱ xíto ndo íkan na taꞌan yo na ndíkun Jesús ya väꞌa, ta saa ná kaꞌan ndo xaꞌa na xiꞌin Ndioxi, ta xaa kaꞌnu ini ra xaꞌa na. Tá tu süvi kuachi ya káꞌan kuvi na nuu Ndioxi kua, ta taxi ra kutaku na. Saa chi íyo kuachi ya väꞌa ya káꞌan ndiꞌi xaꞌa na nuu ra. Tá tu taꞌan kuachi ñaa kua i̱kan na ta käꞌan ndo xaꞌa na. Sundi tá tu inka kuachi kua, ta kaꞌan ndo xaꞌa na xiꞌin Ndioxi ta kutaku na xiꞌin ra.