Gálatas 5:13 - Xochapa Mixteco

¹³ Ñani yo, Ndioxi ta ka̱na ra ndóꞌo̱ ya koo ndo tá íin naꞌa, na íyo ndika, sundi täxi ndo xaa súvi ikin kuñu ndo ndá ka ñaꞌa väꞌa, ya kúni mií ndo. Vaꞌa ka ndiꞌi saa ichí chindee taꞌan ni ndo xiꞌin taꞌan ndo, xaꞌa ya kúꞌvi ni ini ndo xíni taꞌan ndo.

Gálatas 5:13 Mawu Ofanana

San Lucas 4:18

Íyo Tachi I̱í Ndioxi xiꞌin i, saa ndi̱kaxin ya yeꞌe vaxi i ndituꞌun i tuꞌun vaꞌa xiꞌin na ndaꞌvi. Saa ti̱ꞌvi ya yeꞌe vaxi i sindaꞌa i na ndee ni taꞌvi nima. Ta ti̱ꞌvi ya yeꞌe vaxi i saña i na núꞌni xaꞌa kuachi na. Saa vaxi i kuna i nuu na kuáa̱, ta vaxi i chindee i na tíxuꞌvi.

Los Hechos 20:35

Taꞌan ya xi̱ni ndo i̱kan i kua xíniñuꞌu ndo ikan ndo, ya kuchiñu ndo chindee ndo inka na köo kúndee ini xaa chiñu. Ndi̱kaꞌán ndo ya ndi̱kaꞌan Tata yo Jesús, káchi ra saa: “Vaꞌa ni ka kée na táxi ñaꞌa ndaꞌa inka na, süvi ka vi na ndíkiꞌin ya”, káchi Tata yo ―káchi ra Pablo xiꞌin na.

1 Corintios 8:9

Ta ndóꞌo̱ ta xa íyo va ichí ndo kuxi ndo ndiꞌi kúu ñaꞌa, sundi kuenta ni koo ndo, chi íyo na ñani yo, na vita ni ini, ta ìyo ni koyo na nuu kuachi xaꞌa ñaꞌa ya xíxi ndo.

1 Corintios 9:19

Vani xa kúu mií i ichí ikan i ndiꞌi ñaꞌa ya kúni mií i, sundi tá káa ra sa̱ta na xáa chiñu nuu ndiꞌi na, saa nda̱sa i mií i, xaꞌa ya kúni i ná kuchiñu i chindee taꞌan i xiꞌin kuaꞌa ni ka naꞌa ya ná kandixa na Tata yo Jesucristo.

2 Corintios 12:15

Vaꞌa ni kúni i ya tíin ndiꞌi i xuꞌun ya kúu mií i xiꞌin ndo, ta nda mií i ta taxi i mií i xaꞌa ya chindee i ndóꞌo̱. Ndee ni va kúꞌvi ka ini i xíni i ndóꞌo̱, sundi ndóꞌo̱ ta loꞌo ni va kúꞌvi ini ndo xíni ndo yeꞌe.

2 Corintios 2:8

Ta xíkan ni i ya mani nuu ndo ya xaa vií ndo xiꞌin ra ná kuni ra ya ndee ni kúꞌvi ini ndo xíni ndo ra.

2 Corintios 3:17

Ta ya yóꞌó kua káꞌan xaꞌa Tata yo Jesucristo ya kúu ra Tachi, ta nuu íyo Tachi ra kua sáña ndíka naꞌa, köo núꞌni ka na.

2 Corintios 4:5

Tá káꞌan ndoso nde tuꞌun vaꞌa xaꞌa Jesucristo xiꞌin naꞌa, ta süvi xaꞌa mií nde kua káꞌan nde xiꞌin na, chi xaꞌa mií Jesucristo kua káꞌan nde xiꞌin na, ya kúu ra Tata yo. Ta ndeꞌe, tá íin moso ndo, na xáa chiñu nuu ndo, saa íin nde. Ta xaꞌa Tata yo Jesucristo kua íkan nde saa.

Gálatas 2:4

Ndi̱kitaꞌan nde ndi̱tuꞌun nde xiꞌin taꞌan nde, chi sava nda káꞌan kúu nda ñani yo, ta nda vata va ku nda. Tá kua ndi̱kiꞌvi nda veꞌe ñuꞌu ya xínani nda ya íkan yo, chi nda ikán ta köo kúni nda ya koo ndíka yo tá kuꞌva káꞌan Jesucristo, sundi kúni nda ná nduu tuku yo tá íin yo xáa súvi ley Ndioxi xiꞌin ya nduxa.

Gálatas 4:22

Chi tuꞌun Ndioxi, káꞌan ya xaꞌa ra Abraham, káchi ya saa: Ka̱ku uvi seꞌe taa ra, iin seꞌe ra ka̱ku xiꞌin ñaꞌa yá xáa chiñu nuu ra xiꞌin ya nduxa, ta inka seꞌe ra ka̱ku xiꞌin yá síꞌi ra, yá íyo ndíka.

Gálatas 5:1

Na taꞌan yo, xaꞌa ya sa̱ña Jesucristo yoo yakan vaꞌa íyo ndíka yo. Kuenta ni koo ndo, tuun ni kundikun ndo ichí nuu íyo ndíka ndo, ta täxi ndo nduu tuku ndo naꞌa, na íin tá íin naꞌa, na sa̱ta na xáa chiñu nuu na xiꞌin ya nduxa.

Gálatas 5:14

Chi ley Ndioxi ya ta̱a ra Moisés, ta xiꞌin iin tuꞌun yóꞌó kua xáa súvi ndo ndiꞌi ya káꞌan ya, káchi ya saa: “Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo mií ndo”, káchi ya.

Gálatas 5:22

Ta süvi saa íkan Tachi I̱í Ndioxi xiꞌin yo, chi ya chíndee taꞌan ka va kua xiꞌin yo kuꞌvi ini yo kuni yo na taꞌan yo, saa táxi ya kusini ni yo, ta táxi ya íyo vaꞌa ini yo xiꞌin taꞌan yo, saa táxi ya ndúu yo na kaꞌnu ini, ta táxi ya ndúu yo na toꞌo ni ini, saa táxi tu ya ndúu yo naꞌa, na tái ni ini, ta táxi tu ya ndúu yo naꞌa na ndáa ni ini naꞌa xíni na án Ndioxi ta ndáa ini ra xíni ra yoo,

Gálatas 6:2

Ta chindee taꞌan ndo xiꞌin taꞌan ndo xaꞌa ndá ka tindoꞌo ya ndóꞌo̱ ndo, chi tá íkan ndo saa xiꞌin taꞌan ndo, ta saa kua xáa súvi ndo ley mií Cristo.

Efesios 5:21

Xíniñuꞌu ndo xaa ni̱nu̱ ndo mií ndo ya chindee taꞌan ndo xiꞌin taꞌan ndo xaꞌa ya xáa toꞌo ndo Jesucristo.

1 Tesalonicenses 1:3

Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

1 Pedro 2:16

Chi ndóꞌo̱ ta ndo xa xíka ndíka ku ndo, köo núꞌni ka ndo ndaꞌa ya väꞌa ya ikan ndo ya väꞌa, yakan ndóꞌo̱ ta täa nuu ndo ya ñaa ya ikan ndo ndá ka chiñu väꞌa. Ya vaꞌa ni kua koo ndo tá kuꞌva íin naꞌa, na xáa chiñu nuu Ndioxi.

2 Pedro 2:19

Ta káꞌan nda xiꞌin na tá ná kundikun na nda, ta taxi nda koo ndíka na, káchi nda xiꞌin na, ni mií nda ta köo íyo ndíka nda nuu ya väꞌa, xaꞌa ya íkan nda ya kúni mií nda. Ta ya ndaa ku ndixa va ya chi naꞌa, na táxi xáꞌnda chiñu ya väꞌa nuu na, ta núꞌni va na ndaꞌa ya väꞌa.

Judas 1:4

Saa chi íyo sava nda xa ndi̱kee sěꞌe tañu ndo, ta xaꞌa nda ñaa kua káꞌan tuꞌun Ndioxi ya ta̱a na xinaꞌa, nda ñaa ta kuꞌun nda nuu ndiꞌi xaꞌa nda, chi süvi nda vaꞌa ku nda, yakan káꞌan nda xiꞌin ndo: “Vaꞌa ni ikan ndo tá kuꞌva kúni mií va ndo chi köo kuachi xaꞌa ya nuu Ndioxi”, káchi nda xiꞌin ndo. Chi ndíkuaa nda Tata yo Jesucristo, ra xáꞌnda chiñu nuu yo.