Gálatas 4:9 - Xochapa Mixteco

⁹ Ta vitin xa xíni ndo Ndioxi ra ndaa. Án xa xíni vaꞌa mií ra ndóꞌo̱, ná kachi yo. Ta saa, ta ¿ndachu kúni ndo ndiko koo tuku ndo ndinaꞌa ndo taꞌan ya ndi̱naꞌa ndo yachi, ya ndínaꞌa na ñuu ivi yóꞌó, ta ni köo ndáa yaꞌvi ya íkan na? ¿Án kúni tuku ndo nduu ndo tá íin naꞌa, na xáa chiñu xiꞌin ya nduxa?

Gálatas 4:9 Mawu Ofanana

San Mateo 11:27

Saa ndi̱kaꞌan ka Jesús xiꞌin na, káchi ra saa: ―Iva i Ndioxi ta̱xi ndiꞌi ra ya vaꞌa ndaꞌa i. Ta nda iin naꞌa köo xíni yeꞌe, ra kúu seꞌe Ndioxi, iindaa mií Ndioxi ku ra xíni vaꞌa yeꞌe. Ta nda iin naꞌa köo xíni Iva i tá kuꞌva xíni yeꞌe ra, saa tu na ndi̱kaxin i taxi i kuni vaꞌa na ini ra.

San Lucas 5:38

Yakan kua táan na rá xa̱á ini ñií xa̱á, ta ni rá xa̱á ta küita ra ni ñií nuu ñúꞌu ra ta täꞌnda ya.

San Juan 10:14

’Sundi yeꞌe ta ra paxto vaꞌa ni ku i. Xíni vaꞌa i levo sana i, ta saa tu mií va ri xíni vaꞌa ri yeꞌe.

San Juan 10:27

Chi levo sana i ta ndíkuni ri tachi i, yakan vaꞌa ndíkundikun ri yeꞌe, ta saa tu yeꞌe va xíni ndiꞌi i ri ikán.

San Juan 17:3

Ta ya kutaku na ndiꞌi saa ichí kua kúni kachi ya ná kuni vaꞌa na ini un, chi iin yóꞌo̱ ku Ndioxi ra ndaa ni xiꞌin Jesucristo, ra ti̱ꞌvi un vaxi ñuu ivi yóꞌó.

ROMANOS 8:29

Ta tá täꞌan ka kuaꞌa ñuu ivi yóꞌó, ta xa xíni mií ra unku na ndi̱kaxin ra ya kundikun na ra. Xa saa chi̱tuni mií ra ya nduu na seꞌe ra tá kuꞌva káa Jesucristo Seꞌe ra. I̱kan ra saa ya ná nduu Jesucristo, ra núnu̱ú nuu ndiꞌi ñani ra xiꞌin kuꞌva ra.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

1 Corintios 13:12

Kuꞌva saa íyo ya ndóꞌo yo vitin, tá ndóꞌo naꞌa, na xíto nuu yu̱ú tatan, ya kuaꞌan kúxana nuu va, saa íyo ya ndóꞌo yo. Sundi vaxi kivi ta saa kua kundaa teꞌe ini yo xaꞌa ndiꞌi ya, chi saa kua kuni xiꞌin nuu yo Ndioxi. Loꞌo ni va kúndaa ini yo xaꞌa ra vitin, ta vaxi kivi saa kua kundaa teꞌe ini yo xaꞌa ndiꞌi kúu ñaꞌa. Ta saa kua kuni vaꞌa yo Ndioxi tá kuꞌva káa ra, tá kuꞌva xíni ra yoo.

1 Corintios 15:34

Ndikani vaꞌa ini ndo xaꞌa ñaꞌa íkan ndo, ta ndiko koo ini ndo xaꞌa ya väꞌa íkan ndo, saa ndikundikun ndo ichí vaꞌa. Saa chi sava ndo, vani xa ndíkun va ndo ichí Ndioxi, sundi täꞌan kuni taꞌan ndo xiꞌin ra. Xaꞌa ya ñaa kua káꞌan i xiꞌin ndo ya ná kukaꞌan nuu ndo. Ndá kuꞌva kua koo ikin kuñu yo tá ná nditaku yo

1 Corintios 8:3

Sundi ndá naꞌa kúꞌvi ni ini xíni Ndioxi, ta saa tu mií va ra xíni vaꞌa ra ini na.

2 Corintios 11:20

Chi ndóꞌo̱ ta xáꞌa ndee ni ini ndo xiꞌin naꞌa, na xáa nduxa xiꞌin ndo xáa chiñu ndo, ta táva na xuꞌun ndaꞌa ndo. Ta saa vaꞌa ni kúni ndo xíni ndo na ya xáꞌnda na chiñu nuu ndo. Vaꞌa ni kúni ndo xíni ndo naꞌa, na vaꞌa ni ka náꞌa nuu mií ndo, nda káni na xaꞌnda nuu ndo, ta köo káꞌan ndo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Gálatas 3:3

Ta ya ikán kua nda̱sa xa̱á ndóꞌo̱ tá ndi̱kundikun ndo Jesucristo, sundi vitin ta kúni ndo sindoo ndaꞌa ndo Tachi I̱í Ndioxi. Saa kúni ndo ndikundikun ndo ley Ndioxi ya ta̱a ra Moisés. ¡Ndachu yáꞌa ni ini ndo saa!

Gálatas 4:3

Ta kuꞌva saa ndo̱ꞌo yoo kándixa Jesucristo, tá ndo̱ꞌo ra loꞌo ikán saa ndi̱xiyo yo yachi tá ndi̱xiyo vali yo, chi köo ndi̱kuvi ikan yo ya vaꞌa, ta nina taꞌan ñaꞌa ya ndínaꞌa na ñuu ivi yóꞌó va kua xa̱ꞌnda chiñu nuu yo, ta ya ikán kua xa̱a súvi yo.

Efesios 1:17

Xáku ndaꞌvi i nuu Ndioxi ra chee ni, ra kúu Iva Tata yo Jesucristo ya ná taxi ra ya xínituni ndaꞌa ndo, ta saa ná xinu ndo kundaa vaꞌa ini ndo xaꞌa ra ta nda kuni taꞌan vaꞌa ka ndo xiꞌin ra,

2 Timoteo 2:19

Sundi mií Iva yo Ndioxi ta xa ndee ni tuun chi̱nduꞌu ra tuꞌun ra, ya ndaa, ya káa tá káa yu̱ú ya tuun ni ñúꞌu xaꞌa veꞌe, ta nuu ya ikán kua ta̱a ra, káchi ra saa: “Xíni vaꞌa va mií Tata yo Jesucristo unku na kuu seꞌe ra”, káchi ya. Ta saa káꞌan tuku ya, káchi ya saa: “Ta ndiꞌi na kándixa Tata yo Jesucristo ta xíniñuꞌu na sindikoo na ya väꞌa íkan na”.

HEBREOS 7:18

Xaꞌa ya ikán kua ki̱ndaa Ndioxi ley ra ya ta̱a ra Moisés, saa chi köo ndi̱kuchiñu ya chindee ya naꞌa, vita ni ya, köo ndee kúu mií ya.

2 Pedro 2:20

Ta naꞌa, na ndíkani ini kundikun na nda sínaꞌa ya vata ikán ta xa ndi̱saña na nuu ya väꞌa íyo ñuu ivi yóꞌó tá ku̱ndaa ini na xaꞌa tuꞌun vaꞌa xaꞌa Tata yo Jesucristo ra síkaku yoo. Sundi tá ndi̱koyo tuku na íkan na ya väꞌa taꞌan ya xa i̱kan na yachi, ta ndee ni ka kini xáꞌnda chiñu ya väꞌa ikán nuu na vitin, süvi ka vi tá kuꞌva ndi̱xiyo na tá núnu̱ú.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.