Gálatas 4:8 - Xochapa Mixteco

⁸ Yachi tá täꞌan kuni taꞌan ndo xiꞌin Ndioxi, ta ndi̱xiyo ndo tá íin naꞌa, na xáa chiñu xiꞌin ya nduxa, saa ndi̱xiyo ndo xi̱ndoꞌni ndo ndaꞌa ndioxi ya siki xa̱a chiñu ndo nuu.

Gálatas 4:8 Mawu Ofanana

San Juan 1:10

Ra kúu tuꞌun Ndioxi ku ra, ta xa̱a ra íyo ra ñuu ivi, ta tixin ra ikán si̱kuaꞌa Ndioxi ñuu ivi. Sundi na ñuu ivi, ta köo ndi̱xiin na ndikuni ñaꞌa na.

Los Hechos 14:12

Saa káꞌan na xaꞌa ra Bernabé kúu ra ndioxi náni Jupiter. Ta ra Pablo ku inka ndioxi ra náni Mercurio, káchi na, chi ra ikán ku ra káꞌan ndoso tuꞌun xiꞌin na.

Los Hechos 17:23

Tá ndi̱xika i xíto ndeꞌe i ñuu ndo, ta xi̱ni i kuaꞌa ni ndioxi si̱kuaꞌa ndo xáa toꞌo ndo. Ta xi̱ni i nuu káñuꞌu ndo ndioxi ndo ndóso tuꞌun káchi ya saa: “YÓꞌÓ XÁA TOꞌO YO NDIOXI RA KÖO XÍNI YO”, káchi ya. Ta xaꞌa Ndioxi ra káñuꞌu ndo, ra köo xíni ndo ñaa kua káꞌan i xiꞌin ndo vitin.

ROMANOS 1:23

Saa ndo̱ꞌo na chi köo ndi̱xiin na xaa toꞌo na Ndioxi ra ndaa, ra chee ni, ra ndee ni ndee kúu mií. Ta ndee ni ka kúsini na xáa toꞌo na naꞌna naꞌa, na köo táku ka ñuu ivi yóꞌó, án naꞌna kiti ndachi, án naꞌna kiti xíka xiꞌin kumi xaꞌa, án naꞌna kiti ñúu tixin nuu ñuꞌú.

ROMANOS 1:28

Xaꞌa ya ndi̱ndoso ini na xaꞌa Ndioxi, ta ni köo ndi̱xiin na kundaa ini na xaꞌa ra, yakan sa̱ña ndaꞌa ra na, xa̱á na íkan na ya väꞌa, ya ndíkani xiní mií na.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

1 Corintios 12:2

Ta xa kúndaa ini ndo ndá kuꞌva ndi̱xiyo ndo yachi tá täꞌan kandixa ndo Tata yo Jesucristo, ta̱xi ndo xa̱ꞌnda chiñu naꞌna ndioxi ya ndíi, ya meꞌme nuu ndo.

1 Corintios 8:4

Ta soꞌva káꞌan i xiꞌin ndo, xaꞌa ñaꞌa ya ndákan tuꞌun ndo yeꞌe án vaꞌa kuxi yo ñaꞌa ya sóko naꞌa nuu naꞌna ndioxi ya ndíi, án väꞌa kuxi yo ya. Chi ni köo táku naꞌna ndioxi na, ta ni köo ndee kúu mií ya, ta xa xíni va yo ndioxi na yóꞌó ta ni köo ndáa yaꞌvi ya, saa chi iindaa mituꞌun va ku mií Ndioxi ra ndaa ni.

Gálatas 4:3

Ta kuꞌva saa ndo̱ꞌo yoo kándixa Jesucristo, tá ndo̱ꞌo ra loꞌo ikán saa ndi̱xiyo yo yachi tá ndi̱xiyo vali yo, chi köo ndi̱kuvi ikan yo ya vaꞌa, ta nina taꞌan ñaꞌa ya ndínaꞌa na ñuu ivi yóꞌó va kua xa̱ꞌnda chiñu nuu yo, ta ya ikán kua xa̱a súvi yo.

Efesios 4:18

Chi na köo xíni Ndioxi ta íyo xíka ni va na nuu ra, nda ya xínituni na ta tá íin ya íyo nuu naá va saa íyo ya, tuun ni nima na, ta soꞌo ni na.

1 Tesalonicenses 1:9

Ndiꞌi ni kúu ñaꞌñu káꞌan vaꞌa ni na xaꞌa ndo ya ndi̱kuiso vaꞌa ni ndo ndeꞌe tá ndi̱xaa nde nuu ndo. Saa káꞌan na xaꞌa ndo ya si̱ndoo ndo ya káñuꞌu ndo ndioxi ndíi, ta chi̱kaa ini ndo kundikun ndo Ndioxi ra ndaa ni, ra táku.

1 Tesalonicenses 4:5

Ta xäa kini ni ndo xiꞌin ikin kuñu ndo, ndixita ndo mií ndo nuu kuachi ivi yóꞌó. Ïkan ndo tá íkan naꞌa, na köo xíni Ndioxi.

2 Tesalonicenses 1:8

Ta ndiko koo ra tañu ñu̱ꞌu̱, ya ndee ni xíxi, saa xaa nduvaꞌa ni ra xiꞌin naꞌa, na köo ndi̱xiin ndikuni Ndioxi, ni köo ndi̱xíin na kuni soꞌo na tuꞌun vaꞌa xaꞌa Tata yo Jesucristo.

1 Pedro 4:3

Ta ndóꞌo̱ xa kuaꞌa ni tiempo ndi̱xika ndo tá kuꞌva xíka naꞌa, na köo kándixa Ndioxi ndóo ñuu ivi yóꞌó, ndi̱xika sií ndo xiꞌin ná síꞌi ta süvi ná síꞌi ndo ku ná, saa ná síꞌi ndi̱xika sií ná xiꞌin taa, ta süvi ií ná ku nda. Ndiꞌi nuu ya väꞌa kúni mií ndo i̱kan ndo. Ndee ni xi̱ꞌi ndo, ndakua ndi̱xini mií ndo ndi̱xika ndo, ta i̱kan ndo ya kaꞌa̱n ni nuu, ndi̱xika ndo nuu viko xa̱a kaꞌnu ndo ndioxi ya ndíi, ya köo kúu Ndioxi ndinuꞌu.

1 Juan 3:1

¡Koto ndo vii! Iva yo Ndioxi ta yáꞌa ni kúꞌvi ini ra xíni ra yoo, yakan táxi ra kunani yo seꞌe ra ta ya ndaa kua kúu yo seꞌe ra. Xaꞌa ya kúu yo seꞌe ra yakan köo kúni na ñuu ivi yóꞌó kuni na mií yo. Saa chi ni mií ra ta köo ndi̱xiin na kuni ñaꞌa na.