Gálatas 4:4 - Xochapa Mixteco

⁴ Sundi tá ndi̱xinu kivi ya chi̱tuni mií Ndioxi ti̱ꞌvi ra Seꞌe ra ki̱xi ra ñuu ivi yóꞌó, saa ka̱ku ra tixin iin ñaꞌa, ta xa̱a súvi ndiꞌi ra ya káꞌan ley ya ta̱a ra Moisés.

Gálatas 4:4 Mawu Ofanana

San Mateo 1:23

“Kee seꞌe iin yá kuâán loꞌo, taa loꞌo koo seꞌe yá kaku. Ta ra loꞌo seꞌe yá ta kunani ra Emanuel”. Chi kivi ra yóꞌó ta kúni kachi ya: “Ndioxi íyo xiꞌin yo” ―káchi ra ndi̱kaꞌan ndoso tuꞌun Ndioxi xinaꞌa.

San Mateo 3:15

Saa ndi̱kuiin Jesús, káchi ra saa: ―Käsi un nuu i, vaꞌa ka sikuchi un yeꞌe vitin, saa chi soꞌva xíniñuꞌu yo xaa súvi yo ya xáꞌnda chiñu Ndioxi ―káchi Jesús xiꞌin ra. Saa ndi̱xinu ini ra Juan si̱kuchi ñaꞌa ra.

San Mateo 5:17

Saa ndi̱kaꞌan tuku Jesús, káchi ra saa: ―Ndïkani ini ndo ya vaxi i sindiꞌi xaꞌa i ley Ndioxi, án tuꞌun ra ya ta̱a nda ndi̱kaꞌan ndoso tuꞌun yuꞌu Ndioxi xinaꞌa. Växi i sindiꞌi xaꞌa i ya, chi ya vaxi i sixinu ka va i ku tuꞌun ya ndi̱kaꞌan Ndioxi.

San Marcos 1:15

Ta ya káꞌan ra xiꞌin na kua yóꞌó: ―Vitin kua ti̱ndaa tiempo, ta xa ku̱yati ni ya xa̱á Ndioxi kaꞌnda chiñu ra nuu na ñuu ivi yóꞌó. Yakan kuni soꞌo ndo ya káꞌan i xiꞌin ndo, ta xinu ini ndo ndiko koo ndo nuu Ndioxi, ta kandixa ndo ya vaꞌa yóꞌó ―káchi Jesús xiꞌin na.

San Lucas 1:31

Ta vitin kee seꞌe un, kaku iin seꞌe un, taa loꞌo koo ra kaku. Ta chinuu un kivi ra kunani ra Jesús.

San Lucas 1:35

Saa ndi̱kuiin tatun Ndioxi, káchi ya saa: ―Käka ini un chi mií Tachi I̱í Ndioxi ku ya kixi sata un, tá káa vikó saa koo ndee Ndioxi ra Chee ni kixi ya ndikasi ya yóꞌo̱, ñaa kee mií seꞌe un. Yakan kua koo ra, ra i̱í, saa kunani ra Seꞌe Ndioxi.

San Lucas 2:7

Ta köo ndi̱niꞌi na veꞌe nuu kundoo na, saa chi xa chútu ni veꞌe nuu kíxi na xíka ichí, yakan ndá nuu kíxi kiti ndi̱xaꞌan na ndi̱kixi na, ta ikán ka̱ku ya loꞌo seꞌe yá ra núnu̱ú, taa loꞌo ku ra ka̱ku, saa su̱vi yá ra xiꞌin iin tikoto ta chi̱nduꞌu yá ra kíxi ra nuu ñúꞌu ñaꞌa xíxi kiti.

San Lucas 20:44

Xiꞌin tuꞌun yóꞌó káꞌan ra David Cristo ku ra Kaꞌnu nuu ra. Ta ndachu kúu Cristo seꞌe sikua ra David? ―káchi Jesús xiꞌin na.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 10:36

Ta mií ra ku ra nda̱sa i̱í yeꞌe ta ti̱ꞌvi ra yeꞌe vaxi i ñuu ivi yóꞌó. Ta ¿ndachu káꞌan ndo xaꞌa i ya kánaꞌa i xaꞌa Ndioxi chi ndi̱kaꞌan i kúu i Seꞌe Ndioxi?

San Juan 3:16

’Saa chi yáꞌa ni kúꞌvi ini Ndioxi xíni ra na ñuu ivi, xaꞌa ya ikán kua ta̱xi ra Seꞌe ra, ra iindaa mituꞌun nuu ra, yakan ndiꞌi na kándixa ra ta ndïꞌi xaꞌa na, sundi taxi ra kutaku na xiꞌin ra ndiꞌi saa kivi.

San Juan 6:38

Saa chi yeꞌe ta ke̱e i nuu ndivi vaxi i ñuu ivi yóꞌó ikan i ya kúni Ndioxi, ta växi i xaa súvi i ya kúni mií i.

San Juan 8:42

―Tá tu ndixa Ndioxi ku Iva ndo ta kuꞌvi ini ndo kuni ndo yeꞌe, ndikuu. Saa chi yeꞌe ta nuu Ndioxi ke̱e i xa̱a i ñuu ivi yóꞌó, süvi xaꞌa ya kúni mií i kua xa̱a i, chi Ndioxi ku ra ti̱ꞌvi yeꞌe vaxi i.

Los Hechos 1:7

Saa ndi̱kuiin ra káchi ra saa: ―Ndóꞌo̱ ta köo xíniñuꞌu ndo kundaa ini ndo maa án ndá kivi kua xaa súvi Iva i Ndioxi ya chi̱tuni ra ikan ra, iindaa mií ra xíni unkua íkan ra.

ROMANOS 1:3

Ta xaꞌa Tata yo Jesucristo ra kúu Seꞌe Ndioxi, ra chee nuu yo kua ndíkani tuꞌun vaꞌa ikán. Ta kúu Jesucristo Seꞌe sikua ra rey David, xaꞌa ya ka̱ku ra tá kuꞌva káku ndiꞌi yo ñuu ivi yóꞌó.

ROMANOS 15:8

Na taꞌan yo, ndítuꞌun i xiꞌin ndo xaꞌa Jesucristo, ya ki̱xi ra ñuu ivi yóꞌó xa̱a chiñu ra nuu na judío, saa xi̱ni na ya si̱xinu Ndioxi ya ki̱ndoo ra xiꞌin xii sikua na xinaꞌa, saa chi Ndioxi ta ya ndaa kua xáa súvi ra ya káꞌan ra.

ROMANOS 5:6

Kivi tá xi̱ndoꞌni yo ndaꞌa kuachi ta köo ndíkuchiñu yo saña yo mií yo ndaꞌa ya. Ni köo ndi̱kuchiñu yo sikaku yo mií yo, nda kivi tá chi̱tuni mií Ndioxi, saa kua ki̱xi Jesucristo ndi̱xiꞌi ra xaꞌa kuachi yo.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

ROMANOS 9:5

Ra Abraham xiꞌin ra Isaac tin ra Jacob, nda yóꞌó ku xii sikua ndiꞌi nde ñuu Israel, ta xii sikua tu Jesucristo va ku nda. Xaꞌa ya ki̱xi Jesucristo ñuu ivi yóꞌó ta ndi̱xiyo ikin kuñu ra tá kuꞌva íyo mií yo, yakan kúu ra Ndioxi ra Chee ni nuu ndiꞌi ñaꞌa. Vaꞌa ná kunuu vaꞌa ni ya toꞌo ra ndiꞌi saa kivi ya vaxi. Saa ná koo.

Efesios 1:10

Ta ya ndi̱xiyo sěꞌe ikán kua kuu tá ná tindaa kivi ya sikitaꞌan ndiꞌi Ndioxi ñaꞌa ya chi̱tuni ra xaa súvi ra, ta saa kua nditaxi ndiꞌi ra ndivi xiꞌin ñuu ivi yóꞌó ndaꞌa Cristo, ya kaꞌnda chiñu ra nuu ya.

Colosenses 2:14

Ta si̱ndiꞌi xaꞌa ra tutu nuu íyo ya káꞌan xaꞌa yo ya xíniñuꞌu yo kuvi yo xaꞌa kuachi yo chi köo ndi̱xaa súvi yo ley ra. Ñaa chi̱nuu ra tutu ikán nuu cruzin ta ka̱ni ra clavo sata ya nuu si̱ndiꞌi xaꞌa ndiꞌi ra ya.

1 Timoteo 2:6

Saa ta̱xi ra mií ra ndi̱xiꞌi ra xaꞌa kuachi ndiꞌi yo. Ta xaꞌa ya i̱kan ra saa kua cha̱ꞌvi ra xaꞌa yo, ya vaꞌa ku̱chiñu yo ndi̱saña ndika yo nuu kuachi yo. Ta ya yóꞌó ku tuꞌun vaꞌa ya ta̱xi Iva yo Ndioxi ndaꞌa na ñuu ivi yóꞌó, tá kivi chi̱tuni mií ra.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

HEBREOS 2:14

Tá kúu seꞌe na iva siꞌí, iin nuu ku ikin kuñu ndiꞌi na ta iin nuu kuu tu nií va na. Ta saa xi̱niñuꞌu Tata yo Jesús ndu̱u ra, ra ivi taꞌan mií yo, ndi̱xiyo ikin kuñu ra ta ku̱u mií ra nií taꞌan yoo, saa ndi̱xiꞌi ra xaꞌa ya ikán kua ku̱chiñu ra si̱ndiꞌi xaꞌa ra ndee kiti nǎꞌa ya xáꞌni ndìì.

HEBREOS 9:10

Saa chi ndiꞌi ya táxi na ndaꞌa Ndioxi ta káꞌan ya xaꞌa ñaꞌa ya xíxi na xiꞌin nduta xíꞌi na, ta saa tu ndá kuꞌva ndikata na ikin kuñu na ya nduyaa na nuu Ndioxi. Ndiꞌi ya yóꞌó ta köo ndi̱kuchiñu ya ndisama ya nima na. Ta ya yóꞌó kua i̱kan na iin saa nda kivi tá ndisama Ndioxi ya yóꞌó, ta nda saa kua ndi̱niꞌi na inka ya vaꞌa ni ka nuu Ndioxi.

1 Juan 4:14

Ta ndeꞌe xi̱ni xiꞌin nuu nde Jesús, ra kúu Jesucristo ra ti̱ꞌvi Iva yo Ndioxi ki̱xi ñuu ivi yóꞌó. Ta ndíkuiin nde xaꞌa ra ya ki̱xi ra sikaku ra ndiꞌi na ñuu ivi yóꞌó.

1 Juan 4:2

Ta xiꞌin ya yóꞌó ndíkuni ndo na, tá tu ndixa Tachi Ndioxi síkaꞌán ini na kaꞌan na: tá ndíkuni na Tata yo Jesucristo ya ki̱xi ra ñuu ivi yóꞌó ta ndu̱u ra ra ivi tá íin mií yo na ivi yóꞌó, káchi na, ta na ñaa ku na kúu mií Tachi Ndioxi.