Gálatas 3:22 - Xochapa Mixteco

²² Chi tuꞌun Ndioxi ta káꞌan ya xaꞌa yo ya íin yo tá íin naꞌa, na núꞌni ndaꞌa kuachi na, saa íin ndiꞌi ni kúu yo ndaꞌa kuachi ya xáꞌnda chiñu nuu yo. Ta ndisaa naꞌa, na kándixa Jesucristo ku na kúchiñu ndíkiꞌin ya vaꞌa, ya ndi̱kaꞌan Ndioxi niꞌi yo nuu ra.

Gálatas 3:22 Mawu Ofanana

San Marcos 16:16

Ndiꞌi na kándixa yeꞌe ta chíchi na, na ikán ku na kaku, sundi na köo xíin kandixa yeꞌe ta kuvi na niꞌi na tindoꞌo.

San Juan 12:46

Yeꞌe ku ñu̱ꞌu̱ ya xa̱a i ñuu ivi yóꞌó, ta ndiꞌi na kándixa yeꞌe, ta ndöo na koo na nuu naá.

San Juan 20:31

Ta ndiꞌi tuꞌun ya vaxi nuu tutu yóꞌó, ta̱a i ya, ná kundaa ini ndo xaꞌa Jesús ya kúu ra Cristo Seꞌe Ndioxi. Saa tá kándixa ndo ra ta saa kuchiñu ndo kutaku ndo tixin kivi ra.

San Juan 3:36

Ta ndiꞌi na kándixa Seꞌe ra, ta táku na xiꞌin Ndioxi ndiꞌi saa kivi, sundi na köo xíin kandixa Seꞌe ra ta küchiñu na kutaku na, ndiꞌi saa kivi saá ini Ndioxi kuni ñaꞌa ra ―káchi ra Juan.

San Juan 5:24

’Ya ndaa káꞌan i xiꞌin ndo: Ndiꞌi na xíni soꞌo tuꞌun káꞌan i, ta kándixa na Ndioxi ra ti̱ꞌvi yeꞌe vaxi i ñuu ivi, ta na ikán ku na ndixa táku ndiꞌi saa kivi, ta täxi ra ndoꞌo na xaꞌa kuachi na. Saa chi tá íin na xa ndi̱xiꞌi yachi saa ndi̱xiyo na, ta vitin ndi̱taku na.

San Juan 6:40

Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

Los Hechos 16:31

Saa ndi̱kuiin ra Pablo káꞌan ra: ―Xíniñuꞌu un kandixa un Tata yo Jesucristo, saa kuchiñu un kaku un, ta saa tu na veꞌe va un ―káchi ra xiꞌin ra.

ROMANOS 10:9

Tá ná kaꞌan un xaꞌa Jesucristo nuu ndiꞌi naꞌa ya kúu ra, Tata Yo Ra Chee ra xáꞌnda chiñu nuu un, ta kandixa un ra xiꞌin ndinuꞌu nima un ya si̱taku Ndioxi ra tañu na ndíi, ta saa sikaku Ndioxi yóꞌo̱.

ROMANOS 11:32

Xaꞌa ya köo ndi̱xini soꞌo na ñuu ivi ya ndi̱kaꞌan Ndioxi xiꞌin na, yakan ndu̱u na tá íin naꞌa na ñúꞌu veꞌe kàà. I̱kan Ndioxi saa ya kuchiñu kundaꞌvi ini ra kuni ra ndiꞌi ni kúu yo.

ROMANOS 3:22

Ta ya yóꞌó kua sínaꞌa Ndioxi nuu yo vitin: xaꞌa ya kándixa yo Jesucristo kua, ndúu yo naꞌa, na vaꞌa na köo ka kuachi kúu mií nuu ra, án yo judío ku yo, án süvi yo judío ku yo.

ROMANOS 3:23

Kuꞌva saa kua xi̱niñuꞌu Ndioxi i̱kan ra xiꞌin yo chi ndiꞌi ni kúu yo ndíso kuachi xaꞌa ya väꞌa íkan yo nuu ra. Ta xaꞌa ya ikán kua ku̱xika yo nuu ra, küvi kuyati yo koo yo xiꞌin ra nuu íyo ndiꞌi ya luvi ni yéꞌe̱.

ROMANOS 5:12

Ta vaꞌa ná ndituꞌun i xiꞌin ndo vitin chi tá xi̱koo kuachi ñuu ivi yóꞌó ta xaꞌa ya köo ndíkandixa iin taa ra xi̱nani Adán Ndioxi kua xi̱koo ya. Ta xaꞌa kuachi ya i̱kan ra ikán ku nuu ndi̱kunduꞌu ndìì ya xáꞌni naꞌa. Ta xa xíni yo na íyo kuachi ku ndiꞌi ni kúu naꞌa, ta xaꞌa ya ikán kua xíniñuꞌu na kuvi na.

Gálatas 3:14

Xaꞌa ya i̱kan Cristo saa kua vaꞌa ndi̱niꞌi ndiꞌi ni kúu naꞌa, na köo kúu judío ya vaꞌa taꞌan ya ndi̱niꞌi ra Abraham nuu Ndioxi. Ta tixin Jesucristo kua níꞌi yo ya vaꞌa xaꞌa ya ndáa ni ini yo xíni yo ra, ta saa kua ndíkiꞌin yo Tachi I̱í Ndioxi ya ndi̱kaꞌan ra taxi ra ndaꞌa yo.

Gálatas 3:17

Ta ya káꞌan i xaꞌa xiꞌin ndo ta xa yachi ka vi ki̱ndoo Ndioxi xiꞌin ra Abraham, täꞌan ka vi xikoo ley ya ta̱a ra Moisés tá ndi̱kaꞌan Ndioxi saa xiꞌin ra. Nda sindiꞌi tá ndi̱yaꞌa kumi ciento oko uxi kuiya, saa vi kua ta̱xi Ndioxi ley ndaꞌa ra Moisés. Xaꞌa ya ikán kua köo ndi̱kuchiñu ley ikán ndinama ya tuꞌun ya xa ki̱ndoo Ndioxi xiꞌin ra Abraham.

Gálatas 3:23

Yachi tá täꞌan kixi Jesucristo, tá ndi̱xiyo yo ndaꞌa ley, ta tá íin na ñúꞌu veꞌe kàà saa ndi̱xiyo yo ndaꞌa ya, chi köo ndi̱kuvi saña yo nda kivi tá ka̱ndixa yo Jesucristo, saa kua ndi̱saña ndika yo ndaꞌa ley ikán.

Gálatas 3:29

Ta xaꞌa ya xa i̱in ndu̱u yo xiꞌin Cristo yakan kua vaꞌa kúu yo seꞌe ñani sikua ra Abraham, ta kúu mií yo ichí ndikiꞌin yo ñaꞌa, ya ki̱ndoo Ndioxi taxi ra ndaꞌa ra Abraham.

2 Timoteo 1:1

Yeꞌe Pablo, ra ndi̱kaxin Ndioxi xáa chiñu nuu Tata yo Jesucristo ku i, saa chi saa chi̱tuni mií ra ta̱xi ra chiñu yóꞌó ndaꞌa i ya káꞌan ndoso i xiꞌin naꞌa xaꞌa ya ki̱ndoo ra xiꞌin na taxi ra kutaku na tixin Tata yo Jesucristo.

HEBREOS 9:15

Xaꞌa ya yóꞌó kua ndi̱xiꞌi Jesucristo xaꞌa yo, ta si̱kitaꞌan mani ra yoo ivi yóꞌó xiꞌin Ndioxi, nuu ki̱ndoo ra iin trato ya vaꞌa ni, ya xa̱á xiꞌin yo, ta ikán ku nuu ndo̱o kuachi yo ya i̱kan yo tixin trato ya yata ki̱ndoo Ndioxi xiꞌin yo tá núnu̱ú. Ta vitin kuchiñu niꞌi ndiꞌi yo ya vaꞌa ki̱ndoo Ndioxi taxi ra ndaꞌa yo ka̱na ra kundikun ñaꞌa.

2 Pedro 1:4

Tixin ya yóꞌó kua ndi̱niꞌi yo ya luvi ni, ya yáꞌa ni chee ndi̱kaꞌan ra taxi ra ndaꞌa yo, nuu xinu yo koo yo tá kuꞌva káa mií ra, i̱í ni ra. Saa kua kuchiñu yo kunu yo nuu kaku yo nuu ndiꞌi ya väꞌa íyo ñuu ivi yóꞌó, chi ndisaa ya väꞌa kútoo ni mií ikin kuñu na kua íkan na.

2 Pedro 3:13

Sundi yoo ta ndátun yo koo yo nuu ndivi xa̱á tin ñuꞌú xa̱á, ya ndi̱kaꞌan Ndioxi taxi ra ndaꞌa yo, ta nina chiñu vaꞌa ya kúni mií Ndioxi ku ya kuu ikán.

1 Juan 2:25

Saa chi Tata yo Jesucristo ki̱ndoo ra taxi ra ya ndi̱kaꞌan ra taxi ra ndaꞌa yo, ta ya ikán kua yóꞌó: taxi ra koo yo xiꞌin ra ndiꞌi saa tiempo.