Gálatas 3:21 - Xochapa Mixteco

²¹ Ta ya ndítuꞌun i xaꞌa xiꞌin ndo, ta ¿án köo ndi̱xiyo yuꞌu ya xiꞌin ley ya ta̱a ra Moisés xaꞌa ya ki̱ndoo Ndioxi xiꞌin ra Abraham, túvi ndo? ¡Ta süvi saa íyo ya! Chi tá tu ya ndi̱kuchiñu ku ley ikán taxi ya kutaku yo ndiꞌi saa tiempo xiꞌin Ndioxi, xaꞌa ya xáa súvi ni yo ya, ta ndikuiso vaꞌa va ra yoo nduu yo naꞌa, na köo ka kuachi kúu mií nuu ra, ndikuu.

Gálatas 3:21 Mawu Ofanana

San Lucas 20:16

Ná kaꞌan i xiꞌin ndo unkua ikan ra xiꞌin na. Tá ná xaa ra, ta iin sindiꞌi xaꞌa ndiꞌi ra na ta̱xi too ra ñuꞌú ndaꞌa, kaꞌni ra na. Ñaa nduku ra inka na kundaa ñuꞌú ra ―káchi Jesús xiꞌin na. Tá xi̱ni soꞌo na ya ndi̱kaꞌan ra. Ñaa xa̱á na káꞌan na, káchi na saa: ―Ná täxi Ndioxi kundoꞌo yo tá ndo̱ꞌo na ndu̱ku too ñuꞌú ra ikán ―káchi na.

ROMANOS 3:31

Tá kándixa yo Jesucristo ta ¿án xaꞌa ya ikán kua síndiꞌi xaꞌa yo ya káꞌan ley Ndioxi ya ta̱a ra Moisés? Uꞌun, süvi saa íyo ya, köo káꞌan i saa xiꞌin ndo. Chi tá kándixa yo Jesucristo, ta ya ikán kua ndixa xáa súvi ka yo ley Ndioxi ya ta̱a na xinaꞌa.

ROMANOS 3:4

¡Köo íkan Ndioxi saa! Süvi tá íin na ñuu ivi yóꞌó saa káa ra. Vani na ñuu ivi yóꞌó köo síxinu na ya káꞌan na, sundi Ndioxi ta nina síxinu ra tuꞌun ya káꞌan ra. Saa chi tuꞌun Ndioxi ya ta̱a na xinaꞌa, ta soꞌva káꞌan ya xaꞌa ra: Ndiꞌi naꞌa kundaa ini ya ndaa ni ini un, chi ndiꞌi tuꞌun ya káꞌan un, ta ndaa ni káꞌan un. Ni naꞌa ta nïꞌi na kuachi un, ta köo na taxi kuachi xaꞌa un. káchi tuꞌun Ndioxi xaꞌa ra, ya ta̱a na xinaꞌa.

ROMANOS 3:6

Ta süvi saa íyo ya, saa chi Ndioxi ku ra ndaa ni ini, ta ndiꞌi saa kivi íkan ra ya vaꞌa. Tá tu süvi ra ndaa ku ra, ta küchiñu ra xaa nani ra kuachi na, ndíkuu.

ROMANOS 9:31

Sundi mií na Israel, vani chi̱kaa ni ini na xaa súvi na ley Ndioxi xaꞌa ya kúni na ndikuiso vaꞌa ra na, nduu na naꞌa na köo ka kuachi ku mií nuu ra, ta köo ndi̱kuchiñu na.

2 Corintios 3:7

Saa chi ley Ndioxi ya ta̱a ra nuu yu̱ú ikán ta̱xi ra ndaꞌa ra Moisés, ta ndi̱kaꞌan Ndioxi nuu ley ikán xaꞌa naꞌa, na köo xáa súvi ndiꞌi ya káꞌan ya ta xíniñuꞌu na kuvi na, káchi ya xaꞌa na. Yakan tá ndi̱kiꞌin ra Moisés ley ikán ta luvi ka vi ndi̱yeꞌe nuu ra ni köo ndi̱kuchiñu na Israel koto na nuu ra xaꞌa ya ndee ni ndi̱yeꞌe nuu ra. Ni saa va ta köo ndi̱kuchiñu ley ikán koo ya ndiꞌi saa tiempo.

Gálatas 2:17

Saa tu yoo va, xaꞌa ya kúni yo ndikuiso vaꞌa Ndioxi yoo kua kándixa yo Jesucristo, ta ya ñaa kua kúni kachi ya, yo íyo kuachi ku tu mií va yo nuu Ndioxi. Ta xaꞌa ya ndíkuni yo ya íyo kuachi yo nuu ra, ta köo kúni kachi ya mií Jesucristo ku ra tíꞌvi yoo ya ikan yo ya väꞌa. ¡Chi süvi saa íyo ya!

Gálatas 2:19

Saa chi yeꞌe, ta tá káa ra xa ndi̱xiꞌi va saa káa i nuu ley ya ta̱a ra Moisés. Suvi mií ley ikán kua xa̱ꞌni yeꞌe tá kivi ndi̱xiꞌi i nuu ya, ta saa kua ndi̱taku i ya xaa súvi i ya kúni mií Ndioxi.

Gálatas 2:21

Xaꞌa ya ikán kua küvi kundasi nuu i ya vaꞌa ndi̱niꞌi uun i nuu Ndioxi, ya kúꞌvi ni ini ra xíni ra yeꞌe. Chi tá tu ya ndi̱kuchiñu ku ley ndasa vaꞌa ya naꞌa, nduu na tá íin naꞌa, na köo ka kuachi kúu mií nuu Ndioxi, ta ni köo ndáa yaꞌvi vi ya ndi̱xiꞌi Tata yo Jesucristo, ndíkuu.

Gálatas 6:14

Sundi yeꞌe, ta köo kúni i kutai ini i xaꞌa ndá ka ñaꞌa. Ndisaa xaꞌa ya ndi̱xiꞌi Tata yo Jesucristo nuu cruzin xaꞌa kuachi yo kua kúni i kutai ini i xaꞌa. Chi xaꞌa ya i̱kan Jesucristo nuu cruzin kua ndu̱u i tá káa iin ra xa ndi̱xiꞌi nuu ya väꞌa íyo ñuu ivi yóꞌó, ta köo ka ndee ya kaꞌnda chiñu ya nuu i, chi yeꞌe tá káa ra xa ndi̱xiꞌi va saa káa i nuu ya.

HEBREOS 11:7

Xaꞌa ya xi̱ndaa ni ini ra Noé xi̱ni ra Ndioxi kua si̱kuaꞌa ra itun barco tá ndi̱kaꞌan Ndioxi xiꞌin ra kixi tindoꞌo sata na ñuu ivi yóꞌó, ta nda iin ichí täꞌan kuun kini ni saví tá kuꞌva ku̱un rá kivi ikán. Xaꞌa ya xi̱ndaa ni ini ra xi̱ni ra Ndioxi yakan kua xa̱a súvi ra ya ndi̱kaꞌan Ndioxi xiꞌin ra, ya kuchiñu kaku na veꞌe ra. Ta xaꞌa ya i̱kan ra saa kua ta̱xi ra kuachi xaꞌa na ñuu ivi yóꞌó. Ta saa ndi̱niꞌi ra ya vaꞌa nuu Ndioxi, ndu̱u ra tá káa iin naꞌa, na köo ka kuachi kúu mií nuu Ndioxi, xaꞌa ya xi̱ndaa ni ini ra xi̱ni ra Ndioxi.

HEBREOS 7:18

Xaꞌa ya ikán kua ki̱ndaa Ndioxi ley ra ya ta̱a ra Moisés, saa chi köo ndi̱kuchiñu ya chindee ya naꞌa, vita ni ya, köo ndee kúu mií ya.

HEBREOS 7:19

Chi ley ikán, ta köo ndi̱kuchiñu ya ndasa vaꞌa ya naꞌa nuu Ndioxi. Xaꞌa ya ikán kua ta̱xi ra inka ya ndee ni ndáa yaꞌvi ndaꞌa yo, ta tixin ya ikán kua vaꞌa kuyati yo nuu Ndioxi vitin.