Gálatas 2:20 - Xochapa Mixteco

²⁰ Ta yeꞌe, nda tá káa ra ínuu nuu cruzin xiꞌin Tata yo Jesucristo saa káa i, ta köo táku ka i xaꞌa mií i, chi ndisaa xaꞌa mií ra kua táku i. Kivi táku i ini ikin kuñu i ya kúu mií i, ta ndisaa xaꞌa ya ndáa ni ini i xíni i Tata yo Jesucristo ra kúu Seꞌe Ndioxi kua táku i, chi mií ra ku ra kúꞌvi ni ini xíni yeꞌe, saa ta̱xi ra mií ra ndi̱xiꞌi ra xaꞌa i.

Gálatas 2:20 Mawu Ofanana

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

San Mateo 4:3

Saa ndi̱xaa kiti nǎꞌa xíto ndoso ñaꞌa ri, káchi ri saa: ―Tá tu ndixa Seꞌe Ndioxi ku yóꞌo̱, ta vaꞌa kaꞌan un xiꞌin yu̱ú yóꞌó ná nduu ya xita vaꞌa ―káchi ri xiꞌin ra.

San Juan 1:49

Saa ndi̱kaꞌan ra Natanael xiꞌin ra, káchi ra saa: ―Tata Rabí, ¡yóꞌo̱ ku Seꞌe Ndioxi, ta yóꞌo̱ ku Rey ra kaꞌnu nuu ndeꞌe ñuu Israel! ―káchi ra.

San Juan 10:11

Ta yeꞌe ku paxto ra vaꞌa ni. Chi paxto ra vaꞌa ni ta nda ndítaxi ra mií ra xaꞌa kiti levo sana ra.

San Juan 15:13

Iin ra xíꞌi xaꞌa ra ítaꞌan xiꞌin ra ra ikán ku ra yáꞌa ni kúꞌvi ini xíni ra ta köo ka ya ikan ra ya sinaꞌa ra mií ra ya kúꞌvi ni ini ra xíni ñaꞌa ra.

San Juan 17:21

ya ná kutaꞌan vaꞌa na xiꞌin taꞌan na, tá kuꞌva íyo mií yo xiꞌin taꞌan yo Iva mani. Ta saa iin yuꞌu ná koo na xiꞌin yo, saa kundaa ini na ñuu ivi ya ti̱ꞌvi un yeꞌe vaxi i.

San Juan 3:16

’Saa chi yáꞌa ni kúꞌvi ini Ndioxi xíni ra na ñuu ivi, xaꞌa ya ikán kua ta̱xi ra Seꞌe ra, ra iindaa mituꞌun nuu ra, yakan ndiꞌi na kándixa ra ta ndïꞌi xaꞌa na, sundi taxi ra kutaku na xiꞌin ra ndiꞌi saa kivi.

San Juan 3:35

Iva yo Ndioxi ta kúꞌvi ni ini ra xíni ra Seꞌe ra, yakan kua ta̱xi ndiꞌi ra ñaꞌa ndaꞌa Seꞌe ra.

San Juan 6:57

Iva i Ndioxi ra ti̱ꞌvi yeꞌe vaxi i, ta táku ra. Xaꞌa ya táku ra ikán kua táku tu yeꞌe va. Ta saa tu ndiꞌi na xíxi kuñu i kutaku na, chi táku yeꞌe ini na.

San Juan 6:69

Ta ndeꞌe kándixa nde yóꞌo̱, saa xíni nde yóꞌo̱ ku Cristo, Seꞌe Ndioxi ra táku ―káchi ra Pedro xiꞌin Jesús.

Los Hechos 8:36

Saa yáꞌa nda kuaꞌan nda iin ñaꞌñu nuu ndíkaa tikuii. Ta saa ndi̱kaꞌan ra ikán xiꞌin ra Felipe, káchi ra saa: ―Yóꞌó ndíkaa tikuii ta ¿án ndá ka ñaꞌa kúmani nuu i saa kuchiñu kuchi i? ―káchi ra xiꞌin ra Felipe.

Los Hechos 9:20

Ta saa ndikun xa̱á ra káꞌan ndoso ra xaꞌa Cristo ini veꞌe ñuꞌu sinagoga mi ñuu Damasco ikán, káꞌan ndoso ra xaꞌa ra ya kúu ra Seꞌe Ndioxi ―káchi ra xiꞌin na.

ROMANOS 1:17

Ta tuꞌun vaꞌa xaꞌa Jesucristo kua sínaꞌa yoo ndá kuꞌva kua ndíkuiso vaꞌa Ndioxi naꞌa nuu ra. Saa ndása ra na ivi na vaꞌa, na köo ka kuachi kúu mií nuu ra. Tá kuꞌva káꞌan mií tuꞌun Ndioxi ya ta̱a na xinaꞌa, káchi ya saa: “Naꞌa na ndíkuiso vaꞌa Ndioxi, na ndúu tá íin naꞌa, na köo ka kuachi ku mií nuu ra, na kándixa ni ñaꞌa, na ikán ku na kuchiñu kutaku xiꞌin Ndioxi”, káchi tuꞌun ra.

ROMANOS 14:7

Tá táku yo ta süvi ka ya ikan yo ya kúni mií yo kua táku yo, saa tu tá ná kuvi va yo.

ROMANOS 3:22

Ta ya yóꞌó kua sínaꞌa Ndioxi nuu yo vitin: xaꞌa ya kándixa yo Jesucristo kua, ndúu yo naꞌa, na vaꞌa na köo ka kuachi kúu mií nuu ra, án yo judío ku yo, án süvi yo judío ku yo.

ROMANOS 4:25

Saa chi mií ra ku ra ta̱xi Jesucristo ya ndi̱xiꞌi ra xaꞌa kuachi yo, ta xaꞌa ya ndi̱taku ra yakan ku̱chiñu ra si̱kitaꞌan ra yoo xiꞌin Ndioxi, saa ku̱chiñu yo ndu̱u yo tá íin naꞌa na vaꞌa, na köo ka kuachi kúu mií nuu ra.

ROMANOS 5:2

Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

ROMANOS 5:6

Kivi tá xi̱ndoꞌni yo ndaꞌa kuachi ta köo ndíkuchiñu yo saña yo mií yo ndaꞌa ya. Ni köo ndi̱kuchiñu yo sikaku yo mií yo, nda kivi tá chi̱tuni mií Ndioxi, saa kua ki̱xi Jesucristo ndi̱xiꞌi ra xaꞌa kuachi yo.

ROMANOS 5:8

Ta süvi saa ndi̱kan Ndioxi, chi si̱naꞌa ra mií ra ya kúꞌvi ni ini ra xíni ra yoo, vani ndee ni káa kuachi yo, ta xaꞌa ya kúꞌvi ni ini ra xíni ra yoo, yakan ti̱ꞌvi ra Jesucristo ki̱xi ra ndi̱xiꞌi ra xaꞌa yo, ni yo ivi kuachi ndi̱xiyo yo.

ROMANOS 6:13

Nda iin ñaꞌñu ikin kuñu ndo täxi ndo ikan ya ndá ka ñaꞌa ya väꞌa. Ndinuꞌu ni ka ini ndo nditaxi ndo mií ndo ndaꞌa Ndioxi xaꞌa ya ikan ndo ya vaꞌa, ya ndaa nuu ra. Chi vitin kúu ndo naꞌa, na táku nuu ra, ta yachi tá iin na ndíi saa ndi̱xiyo ndo nuu ra. Yakan nditaxi ndiꞌi ndo mií ndo ndaꞌa ra, tá káa iin ndaꞌa chiñu ya xáa chiñu ndaku nuu Ndioxi, saa ná koo ndo xiꞌin ra.

ROMANOS 6:8

Xaꞌa ya ndi̱xiꞌi yo xiꞌin Jesucristo, ta saa kándixa tu yo ya koo yo xiꞌin ra ndiꞌi saa kivi ya vaxi va.

ROMANOS 8:10

Sundi tá íyo Cristo xiꞌin ndo, ta taxi Tachi I̱í Ndioxi kutaku ndo, chi ndúu ndo naꞌa, na köo ka kuachi kúu mií nuu ra. Saa íkan ra xiꞌin ndo, va ni ya xa ndi̱xiꞌi ku ikin kuñu ndo xaꞌa kuachi.

ROMANOS 8:37

Vani uꞌvi ni tíxuꞌvi yo, ta saa ni kúchiñu yo xáa taa yo nuu tindoꞌo. Chi Jesucristo ku ra kúꞌvi ni ini xíni yoo, ta táxi ra ndee ra ndaꞌa yo ya kuchiñu yo yaꞌa yo nuu tindoꞌo, ya uꞌvi ni vaxi nuu yo.

1 Corintios 6:17

Ta saa ndiꞌi yo ndíkitaꞌan xiꞌin Tata yo Jesucristo, ta iin nuu ndúu yo xiꞌin ra tixin tachi ra.

2 Corintios 1:24

Ta ya ñaa ta köo kúni kachi ya, xáꞌnda ni nde nuu ndo xaꞌa kuꞌva ya ndáa ini ndo xíni ndo Ndioxi, chi ndóꞌo̱ ta xa ndee ni va ndáa ini ndo xíni ndo ra, ta ndisaa ya kúni ndeꞌe kua, iin káchi xaa chiñu nde xiꞌin ndo nuu chindee taꞌan nde xiꞌin va ndo ya ná kusini ni ndo.

2 Corintios 10:3

Ta ya ndixa kua íyo nde xiꞌin ikin kuñu nde ñuu ivi yóꞌó, sundi köo íyo nde tá kuꞌva íyo na ñuu ivi yóꞌó, chi köo kánitaꞌan nde tá kuꞌva kánitaꞌan na ñuu ivi yóꞌó.

2 Corintios 11:10

Ta kúndaa teꞌe ini i ya íyo ya ndaa xaꞌa Cristo xiꞌin i, saa kúndaa teꞌe ini i ya nda iin naꞌa küchiñu kindaa ya kúsini ni i, ya kïꞌin i xuꞌun ndaꞌa nda iin ndóꞌo̱ ndóo ñuu Corinto ya ndóꞌni estado Acaya ñaa.

2 Corintios 13:3

Saa ikan i xiꞌin ndo xaa nani i kuachi ndo xiꞌin ndo chi kúni ndo kundaa ini ndo án ya ndixa kua ta̱xi Jesucristo ichí ndaꞌi i ya ndituꞌun i tuꞌun ra xiꞌin ndo. Chi ni mií Cristo ta köo íkan ra xiꞌin ndo tá kuꞌva íkan iin taa ra köo ndee kúu mií, yáꞌa ni va ndee kúu mií ra.

2 Corintios 13:5

Yakan vaꞌa koto ndoso ndo mií ndo ndá kuꞌva íyo ndo, ta saa kua vaꞌa kundaa ini ndo án ndinuꞌu ini ndo kándixa ndo Jesucristo. Tá vaꞌa ka̱na ndo ya xi̱to ndoso ndo mií ndo, ta saa kua kúndaa ini ndo ya ndixa kua kándixa ndo ra, ta íyo ra xiꞌin ndo. Tá tu köo vaꞌa ndíkana ndo, ta kúni kachi ya köo kándixa ndo ra, ta köo íyo ra xiꞌin ndo.

2 Corintios 5:14

Ya kúꞌvi ni ini Jesucristo xíni ra ndeꞌe kua chíndaꞌa ndeꞌe xaa súvi nde chiñu nuu ra, chi ndeꞌe ta kúndaa teꞌe ini nde, iindaa mií ra ku ra ndi̱xiꞌi xaꞌa kuachi ndiꞌi yo ñuu ivi, ta saa ndo̱ꞌo ndiꞌi yo tá íin na ndi̱xiꞌi saa ndu̱u ndiꞌi yo.

2 Corintios 5:15

Sundi mií Jesucristo ku ra ndi̱xiꞌi xaꞌa ndiꞌi yo ya ná kuchiñu yo ikan yo tá kuꞌva kúni mií ra, ta ná ïkan yo tá kuꞌva kúni mií yo, saa chi mií ra ku ra ndi̱xiꞌi xaꞌa yo, ta ndi̱taku ra.

2 Corintios 5:7

Ta vitin táku yo ta ndáa ni ini yo xíni yo ra, ta süvi xaꞌa ya xa xi̱ni xiꞌin nuu yo ra kua ndáa ini yo xíni yo ra.

Gálatas 1:4

Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

Gálatas 2:16

Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

Gálatas 3:11

Xiꞌin tuꞌun yóꞌó kúndaa ini yo nda iin naꞌa küchiñu nduu na naꞌa, na köo ka kuachi kúu mií nuu Ndioxi xaꞌa ya xáa súvi na ley ya ta̱a ra Moisés. Tá kuꞌva káꞌan mií tuꞌun Ndioxi, káchi ya saa: “Naꞌa, na ndáa ni ini xíni Ndioxi, na ikán ku na ndúvaꞌa nuu ra, ta na ikán ku na kuchiñu kutaku xiꞌin ra”, káchi tuꞌun ra ya ta̱a na xinaꞌa.

Gálatas 5:24

Ta saa ndiꞌi yo íyo xiꞌin Jesucristo xaꞌa ya ndi̱xiꞌi ra nuu cruzin xaꞌa yo, ta saa iin káchi ndi̱xiꞌi tu ikin kuñu yoo va xiꞌin ndiꞌi ñaꞌa väꞌa ya ndee ni ku̱too ikin kuñu yo xaa súvi ya yachi.

Gálatas 6:14

Sundi yeꞌe, ta köo kúni i kutai ini i xaꞌa ndá ka ñaꞌa. Ndisaa xaꞌa ya ndi̱xiꞌi Tata yo Jesucristo nuu cruzin xaꞌa kuachi yo kua kúni i kutai ini i xaꞌa. Chi xaꞌa ya i̱kan Jesucristo nuu cruzin kua ndu̱u i tá káa iin ra xa ndi̱xiꞌi nuu ya väꞌa íyo ñuu ivi yóꞌó, ta köo ka ndee ya kaꞌnda chiñu ya nuu i, chi yeꞌe tá káa ra xa ndi̱xiꞌi va saa káa i nuu ya.

Efesios 3:17

Saa xíkan ni tu i ya vaꞌa nuu Iva yo Ndioxi ya ná kandixa ni ka ndo Cristo, saa ná kuꞌvi ni ini ndo kuni ñaꞌa ndo, ta nda tá káa iin tioꞌo itun kúnu ni ndíkaa, án veꞌe ya tuun ni ndi̱kuaꞌa xaꞌa, kuꞌva saa ná kuaꞌnu ni ka tuꞌun ra nima ndo.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Efesios 5:25

Saa ndóꞌo̱ taa, nda íyo yá síꞌi, vaꞌa kuꞌvi ni ini ndo kuni ndo yá síꞌi ndo, tá kuꞌva kúꞌvi ni ini Cristo xíni ra yoo veꞌe ñuꞌu, ta nda ndi̱taxi ra mií ra ya ndi̱xiꞌi ra xaꞌa yo.

Filipenses 1:21

Chi tá tu táku i, ta xaꞌa ya xaa súvi i chiñu nuu mií Cristo kua táku i, án tá yeꞌe ndi̱xiꞌi ku i, ta vaꞌa ni ka kée va i.

Filipenses 4:13

Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

1 Tesalonicenses 1:10

Ta káꞌan na xaꞌa ndo ya ndátun ndo Jesús, ra kúu seꞌe Ndioxi ra ke̱e nuu ndivi, ta ndiko koo tuku ra kixi ra ñuu ivi yóꞌó. Chi Ndioxi ku ra si̱taku ñaꞌa tañu na ndíi, ta ra ikán ku ra sikaku yoo nuu tindoꞌo ya ndee ni vaxi sata na ñuu ivi yóꞌó.

1 Tesalonicenses 5:10

Ta saa koo yo xiꞌin ra chi mií ra ku ra ndi̱xiꞌi xaꞌa yo yakan kua án yo táku ku yo án yo ndi̱xiꞌi ku yo, ta kuchiñu yo koo yo xiꞌin ra tá ná ndiko koo ra.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

HEBREOS 8:3

Chi ndiꞌi nda sutu naꞌnu ta kúu mií nda ichí soko nda ñaꞌa nuu Ndioxi, án kaꞌni nda kiti nuu ra. Ta kuꞌva saa xíniñuꞌu tu Tata yo Jesucristo va kuu mií ra ñaꞌa soko ra nuu Ndioxi xaꞌa ya kúu ra sutu chee.

1 Pedro 1:8

Vani täꞌan kuni xiꞌin nuu ndo Tata yo Jesucristo, ta kúꞌvi ni ini ndo xíni ndo ra. Saa kándixa ni ndo ra ta täꞌan kuni ndo ra. Ta ndee ni kúsini ndo, ni köo níꞌi ndo kuꞌva ndikani ndo ya ndóꞌo ndo kúsini ni ndo xiꞌin ra.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 4:14

Ta ndeꞌe xi̱ni xiꞌin nuu nde Jesús, ra kúu Jesucristo ra ti̱ꞌvi Iva yo Ndioxi ki̱xi ñuu ivi yóꞌó. Ta ndíkuiin nde xaꞌa ra ya ki̱xi ra sikaku ra ndiꞌi na ñuu ivi yóꞌó.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.

El Apocalipsis 3:20

¡Koto ndo! Yeꞌe ku ra ndíchi yeꞌe ndo, ta kána i ndóꞌo̱. Tá ndá ndóꞌo̱ xíni soꞌo tachi i, ta xúna ndo yeꞌe ndo nuu i, saa káꞌan ndo xiꞌin i kiꞌvi i veꞌe ndo kuxíni i xiꞌin ndo, ta kuxíni ndo xiꞌin i.