Gálatas 2:16 - Xochapa Mixteco

¹⁶ Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

Gálatas 2:16 Mawu Ofanana

San Juan 20:31

Ta ndiꞌi tuꞌun ya vaxi nuu tutu yóꞌó, ta̱a i ya, ná kundaa ini ndo xaꞌa Jesús ya kúu ra Cristo Seꞌe Ndioxi. Saa tá kándixa ndo ra ta saa kuchiñu ndo kutaku ndo tixin kivi ra.

Los Hechos 4:12

Iindaa mituꞌun Jesús ku ra kúu mií ndee ya sikaku ra yoo. Nda iin na ñuu ivi yóꞌó ta köo na kuchiñu sikaku yoo, nda iin ñaꞌñu nïꞌi yo na sikaku mií yo, iindaa Jesús ku ra kúu mií ndee ya ta̱xi Ndioxi ndaꞌa ra sikaku ra yoo ―káchi ra Pedro xiꞌin ndiꞌi na xikuaꞌa ikán tin na chiñu.

ROMANOS 1:17

Ta tuꞌun vaꞌa xaꞌa Jesucristo kua sínaꞌa yoo ndá kuꞌva kua ndíkuiso vaꞌa Ndioxi naꞌa nuu ra. Saa ndása ra na ivi na vaꞌa, na köo ka kuachi kúu mií nuu ra. Tá kuꞌva káꞌan mií tuꞌun Ndioxi ya ta̱a na xinaꞌa, káchi ya saa: “Naꞌa na ndíkuiso vaꞌa Ndioxi, na ndúu tá íin naꞌa, na köo ka kuachi ku mií nuu ra, na kándixa ni ñaꞌa, na ikán ku na kuchiñu kutaku xiꞌin Ndioxi”, káchi tuꞌun ra.

ROMANOS 3:30

Iin mituꞌun ku Ndioxi mií ra ndaa ni, ta iin káchi íkan ra xiꞌin naꞌa, na ndúu vaꞌa nuu ra, na köo kuachi kúu mií nuu ra, án na judío ku na, án süvi na judío ku na. Xaꞌa ya kándixa na Jesucristo kua ndúu na, naꞌa na vaꞌa nuu ra.

ROMANOS 4:2

Süvi xaꞌa ya vaꞌa i̱kan ra nuu Ndioxi kua ndu̱u ra, ra vaꞌa, ra köo ka kuachi ku mií nuu Ndioxi. Saa chi tá tu xaꞌa ya ikán kua ta kuu mií ra ichí kaꞌan tái ni ra nuu yo, sundi küvi kaꞌan tái ra nuu Ndioxi.

ROMANOS 4:24

Chi káꞌan tu ya xaꞌa yoo va, yo kándixa Ndioxi, ra si̱taku Tata yo Jesús, ra chee nuu yo. Xaꞌa ya kándixa yo ra, ta nduu yo tá íin naꞌa, na köo ka kuachi kúu mií nuu Ndioxi.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

ROMANOS 9:30

Ta vaꞌa ná koto yo ndá kuꞌva íyo ya káꞌan yo xaꞌa, chi naꞌa, na köo kúu judío ta ni köo ndíchikaa na ndee ya nduku na Ndioxi, ta xa nda̱sa vaꞌa ra na, ndu̱u na naꞌa na köo ka kuachi kúu mií nuu ra, xaꞌa ya ka̱ndixa na Jesucristo.

1 Corintios 6:11

Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

Gálatas 4:5

Saa i̱kan Ndioxi ti̱ꞌvi ñaꞌa ra ki̱xi ra ya chindee ra yoo saña yo ndaꞌa ley ya ta̱a ra Moisés, ta ndi̱kuiso ra yoo ndu̱u yo seꞌe ra.

Gálatas 5:4

Tá tu kúni ndo kindoo vaꞌa ndo xiꞌin Ndioxi tixin ley ra, ta kúni kachi ya xa ku̱xika va ndo nuu Cristo, ta saa ku̱xika tu ndo nuu ya ndi̱niꞌi uun ndo nuu ra kúꞌvi ini ra xíni ra ndóꞌo̱ va.

Filipenses 3:9

Chi ndi̱kiꞌin vaꞌa Ndioxi yeꞌe, ta süvi xaꞌa ya xáa súvi i ley ra ya si̱ndoo ra Moisés kua ndi̱kiꞌin vaꞌa ra yeꞌe, xaꞌa ya ndáa ni ini i xíni i Jesucristo kua ndi̱kiꞌin vaꞌa ra yeꞌe, saa nda̱sa ra yeꞌe tá káa iin naꞌa, na köo ka kuachi kúu mií nuu Ndioxi.

1 Pedro 1:2

Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Pedro 2:24

Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

2 Pedro 1:1

Yeꞌe, Simón Pedro ra xáa chiñu nuu Tata yo Jesucristo ku i táa tutu ya tíꞌvi i xaa ndaꞌa ndóꞌo̱ ñani yo, na xa iin káchi luvi ni kándixa ra tá kuꞌva kándixa mií nde ra. Saa chi mií Tata yo Jesucristo ra síkaku yoo, ra kúu Iva yo Ndioxi ku iin taa ra ndee ni ndaa ini.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

El Apocalipsis 7:14

Saa ndi̱kuiin i ndi̱kaꞌan i xiꞌin ra, káchi i saa: ―Köo xíni i, Tata. Mií un xíni unku na, káchi i xiꞌin ra. Saa ndi̱kuiin ra, káchi ra saa: ―Ndiꞌi na yóꞌó ku na ka̱na koo nuu yáꞌa ni vi ndi̱xuꞌvi na, ndo̱ꞌo ka vi na, ta ndi̱kata na tikoto na xiꞌin nií kiti Levo loꞌo, yakan ndu̱u yaa ni ya.

El Apocalipsis 7:9

Sindiꞌi ikán saa ndi̱koto i, ta xi̱ni i íyo kuaꞌa ni naꞌa, yáꞌa ni kuaꞌa ku na, nda iin naꞌa küchiñu kaꞌvi na ikán. Na ikán ta ndiꞌi ni kúu xaꞌa ñuu ivi yóꞌó ka̱na koo na, na ke̱e ñuu naꞌnu tin ñuu vali, kuaꞌa ni nuu tuꞌun káꞌan ndiꞌi na. Ndíta ndiꞌi na ikán yati nuu ndíchi tai toꞌo nuu índuꞌu ra kaꞌnu xiꞌin Levo loꞌo. Yaa ka vi tikoto ndíxi ndiꞌi na, saa ndíso na ñu̱ú síkuiko na ya nuu ra xiꞌin kiti Levo loꞌo.