Filipenses 2:3 - Xochapa Mixteco

³ Ndiꞌi ya íkan ndo, ta nda iin ya chïnuu vaꞌa ndo tuꞌun ndo xiꞌin, kütai ni ini ndo xaꞌa ya íkan ndo. Ni̱nu̱ xaa ndo mií ndo. Chinuu vaꞌa ni ndo tuꞌun na taꞌan ndo, tá íin naꞌa, na ndee ni ka ndáa yaꞌvi nuu ndo, saa ikan ndo xiꞌin na.

Filipenses 2:3 Mawu Ofanana

San Lucas 18:14

Ta ra ikán ku ra ki̱ndoo vaꞌa ka nuu Ndioxi. Süvi ka vi ra fariseo ndi̱kindoo vaꞌa nuu Ndioxi, saa chi ndiꞌi na chínuu vaꞌa tuꞌun ta síndikava ndaa Ndioxi na ni̱nu̱, ta ndiꞌi na síndikava ndaa xiꞌin mií na ikán ku na ndíkunuu sukun ni tuꞌun ikán Ndioxi ―káchi Jesús.

ROMANOS 12:10

Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo ñani ndo án kuꞌva ndo na ka̱ku xiꞌin ndo. Chinuu vaꞌa ndo tuꞌun na taꞌan ndo, saa xaa toꞌo taꞌan ndo.

ROMANOS 13:13

Vívií ná koo yo, tá kuꞌva íin naꞌa, na xíka nduvi teꞌe, saa ná koo yo. Ta ná küꞌun yo nuu viko nuu xíxi náꞌna naꞌa, ta xíꞌi ni na, ni nuu kini ni káa, nuu ñúꞌu taa xiꞌin ná síꞌi. Nda iin ñaꞌñu yóꞌó köo xíniñuꞌu yo kuꞌun yo. Ná käni taꞌan yo xiꞌin nda iin naꞌa, ni ná küu uni ini yo kuni yo inka naꞌa.

ROMANOS 2:8

Sundi sava naꞌa, na ikú ni ini, na köo xíin ikan ya vaꞌa, ndisaa ya väꞌa kúni na ikán na, na ikán ta kundoꞌo ni na ikan Ndioxi chi sáa ni ini ra xíni ra na, yakan yáꞌa ni xaa nduvaꞌa ra xiꞌin na.

1 Corintios 15:9

Chi yeꞌe, ta ra ni̱nu̱ ni kuu i nuu ndiꞌi nda taꞌan i, ni köo ichí i kaꞌan naꞌa xiꞌin i apóstol, saa chi ra xa̱a ndu̱vaꞌa ni xiꞌin naꞌa, na kúu veꞌe ñuꞌu Ndioxi, ndi̱xiyo i.

1 Corintios 3:3

Saa chi nina ya kúni mií ndo íkan ndo. Yakan kua kǔní ini ndo xíni taꞌan ndo, ta káni taꞌan ndo xiꞌin taꞌan ndo, saa nda taꞌvi taꞌan ndo xiꞌin taꞌan ndo. Ya yóꞌó ku ya káꞌan xaꞌa ndo ya täꞌan kuaꞌnu ndo xiꞌin tuꞌun Ndioxi, chi íkan ndo tá íkan naꞌa, na ñuu ivi na köo xíni tuꞌun Ndioxi.

2 Corintios 12:20

Ta yeꞌe, ta ndíꞌi ni va ini i tá ná xaa i koto i ndóꞌo̱, chi sana ndïtaꞌan i ndóꞌo̱ tá kuꞌva ndíkani ini i nditaꞌan i ndóꞌo̱, án sana ndïtaꞌan tu ndóꞌo̱ va yeꞌe tá kuꞌva ndíkani ini ndo nditaꞌan ndo yeꞌe. Saa ndíꞌi ni ini i xiꞌin ndo chi sava ndo ta án sana kánitaꞌan va ndo, ta sava tu ndo án sana kûní tu ini ndo xíni taꞌan va ndo, ta sava tu ndo án sana sáa ini ndo xíni taꞌan va ndo, ta sava tu ndo án sana ta̱ꞌvi taꞌan va ndo, saa tu sava ndo án káꞌan kini ndo xiꞌin taꞌan va ndo, sava tu ndo án sana kánaꞌa ndo xaꞌa taꞌan va ndo, ta sava tu ndo án ndee ni kútai ini ndo nuu taꞌan va ndo, saa tu sava ndo án sana ndu̱u iku ni ini va ndo xiꞌin taꞌan ndo.

Gálatas 5:15

Sundi tá kánitaꞌan ndo xiꞌin taꞌan ndo, xáa nduvaꞌa ndo xiꞌin taꞌan ndo, ta ndóꞌo̱ síndiꞌi xaꞌa taꞌan mií va ku ndo.

Gálatas 5:26

Ta saa ná küu yo naꞌa, na ndee ni kútai ini, ni ná sïsaa yo ini taꞌan yo ya kani taꞌan na xiꞌin taꞌan na, saa ná chïkaa yo ya uni xiꞌin taꞌan yo.

Efesios 4:2

Ta ndiꞌi saa kivi koo ndo naꞌa, na ni̱nu̱ ini, na vaꞌa ini, na kaꞌnu ni ini, na xáꞌa ndee ini xiꞌin taꞌan xaꞌa ya kúꞌvi ni ini ndo xíni taꞌan ndo.

Efesios 5:21

Xíniñuꞌu ndo xaa ni̱nu̱ ndo mií ndo ya chindee taꞌan ndo xiꞌin taꞌan ndo xaꞌa ya xáa toꞌo ndo Jesucristo.

Filipenses 2:14

Ndá ka mií chiñu íkan ndo ta vívií ikan ndo ya, käꞌan kuachi ndo, ta ni käni taꞌan ndo xiꞌin taꞌan ndo xaꞌa ya íkan ndo.

Colosenses 3:12

Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

Colosenses 3:8

Ta vitin sindoo ndo ndiꞌi ya sáa ni ini íyo nima ndo, xiꞌin ya ndee ni kueꞌe ndo, saa tu ya ndíkani väꞌa ini ndo xaꞌa naꞌa, án ya ndee ni kini ndáꞌi ndo, xiꞌin ndiꞌi tuꞌun kini ni kána koo yuꞌu ndo káꞌan ndo.

1 Timoteo 6:4

Chi nda maestro ikán ta ndee ni kútai ini nda xiꞌin mií nda. Ta nda loꞌo köo xíni nda. Xaꞌa ya nina kútoo nda kaꞌan kuachi nda xiꞌin naꞌa unkua káꞌan iin iin nuu tuꞌun xaꞌa ya ikán kua xáa nda táva nda kuachi xiꞌin na veꞌe ñuꞌu, xáa na kûní ini na xíni taꞌan na, síkani taꞌan nda na, káꞌan kini na xiꞌin taꞌan na, ndíkani väꞌa ini na xíni taꞌan na,

1 Pedro 3:8

Vitin káꞌan i xiꞌin ndo, vívií koo ndo xiꞌin taꞌan ndo, iin yuꞌu koo ndo. Vívií kutaꞌan ndo. Kuꞌvi ini ndo kuni taꞌan ndo, kundaꞌvi ini ndo kuni taꞌan ndo, xaa ni̱nu̱ ndo mií ndo.

1 Pedro 5:5

Ta saa íyo tu ya káꞌan i xiꞌin ndóꞌo̱ kuâán va, ya ná kuni soꞌo ndo ya káꞌan na xikuaꞌa veꞌe ñuꞌu xiꞌin ndo, ta xaa ni̱nu̱ ndo mií ndo, saa xaa súvi ndo chiñu nuu taꞌan ndo. Chi saa káꞌan tuꞌun Ndioxi ya ta̱a na xinaꞌa, káchi ya saa: Kúndasi nuu va Ndioxi xíni ra naꞌa, na xáa kaꞌnu ni xiꞌin mií, ta chíndee ni va ra naꞌa, na ni̱nu̱ kúni.