Filipenses 2:1 - Xochapa Mixteco

¹ Na taꞌan yo, xa ta̱xi Cristo ndee ndaꞌa yo ya xaꞌa yo tindee ini xiꞌin taꞌan yo, saa ta̱xi ra ndee ndaꞌa yo sindiko yo ini taꞌan yo, ta íyo Tachi Ndioxi xiꞌin yo táku ya ini yo, saa kúꞌvi ni ini yo xíni taꞌan yo xaꞌa ra, ta xaꞌa ra kua kúndaꞌvi ini yo xíni taꞌan yo.

Filipenses 2:1 Mawu Ofanana

San Lucas 2:25

Ta tiempo ikán íyo iin ra náni Simeón ñuu Jerusalén, ta vaꞌa ni taa kúu mií ra, káñuꞌu ni ra Ndioxi, ta íyo Tachi I̱í Ndioxi xiꞌin ra. Saa ndátun ra taa, ra tiꞌvi Ndioxi kixi sindiko ini na Israel.

San Juan 14:18

Sïndoo ndaꞌi i ndóꞌo̱ chi ndiko koo tuku i koo i xiꞌin ndo.

San Juan 14:27

’Táxi i tuꞌun vaꞌa ndaꞌa ndo ya koo vaꞌa ni ini ndo, ta köo táxi i ya tá kuꞌva táxi na ñuu ivi yoꞌo ya, síndoo i tuꞌun vaꞌa yóꞌó ya koo ya xiꞌin ndo. Ta ya táxi i koo vaꞌa ini ndo, ta süvi taꞌan ya táxi na ñuu ivi yóꞌó kua. Ta ku ïꞌvi ndo, ni kündiꞌi ini ndo.

San Juan 17:13

’Sundi vitin ta ndiko koo i xaa i nuu un, tá íyo ka i ñuu ivi yóꞌó xiꞌin na, ta ndítuꞌun i tuꞌun yóꞌó xiꞌin na ya ná kuni soꞌo na, ta kusini ni na tá kuꞌva kúsini ni yo.

Los Hechos 2:46

Vitin taan ndíkitaꞌan ndiꞌi na veꞌe ñuꞌu kaꞌnu, saa ndíkitaꞌan tu na veꞌe va na. Ndinuu ka vi ini na xíxi na xiꞌin taꞌan na, kúsini ka vi na xiꞌin taꞌan na.

Los Hechos 4:32

Ndiꞌi kúu na kándixa Jesús vaꞌa ni ndi̱xiyo na xiꞌin taꞌan na. Iin yuꞌu ndi̱xiyo ndiꞌi na xiꞌin taꞌan na, nda tá káa ñaꞌa ndiꞌi na saa ndi̱xiyo ya, iin ndi̱xiyo ndikaꞌnu ndiꞌi ñaꞌa na.

ROMANOS 5:5

Ta ni süvi ya mani uun ku ya ndáa ini yo ya sixinu Ndioxi ya ndi̱kaꞌan ra xiꞌin yo, chi ndee ni si̱niꞌi ra Tachi I̱í ra nuu yo, nda tá kuꞌva chútu ndaa tikuii ini iin vaso, ndakua xíta ndaa rá yuꞌu ya, kuꞌva saa íkan Tachi I̱í Ndioxi xiꞌin yo, iin síkutu ndaa ya mií yo xiꞌin ya kúꞌvi ni ini ra xíni ra yoo.

ROMANOS 8:26

Iin kuꞌva saa chíndee taꞌan Tachi I̱í Ndioxi xiꞌin yo, chi vita ni ini yo, ta ni köo xíni yo ndá kuꞌva kaꞌan yo xiꞌin Ndioxi. Ta mií Tachi I̱í ra xáku ndaꞌvi ya xaꞌa yo, nda tána ya xaꞌa yo, nda iin naꞌa ta köo na káꞌan tá kuꞌva vaꞌa ni káꞌan Tachi I̱í Ndioxi xiꞌin mií ra.

1 Corintios 12:13

Saa chi tixin iin mií Tachi I̱í ra kua chi̱chi ndiꞌi yo yakan iin ndu̱u ndiꞌi yo xiꞌin ra. Án yo judío ku yo, án süvi yo judío ku yo, án yo sa̱ta na xáa chiñu xiꞌin ya nduxa ku yo, án yo íyo ndika ku yo, ta iin káchi ndi̱kuiso ra ndiꞌi yo. Ta tá íin nduta xíꞌi yo saa káa Tachi ra ya ndi̱niꞌi yo nuu ra, íyo ya xiꞌin yo.

1 Corintios 15:31

Ta ya ndixa kua káꞌan i xiꞌin ndo ñani yo, kuꞌva yo, iin iin kivi táku i xíka i, ta ìyo ka vi kuvi i xíka i. Ta ya ndaa ni va ku ya káꞌan i xiꞌin ndo, saa kútai ni ini i xíni i ndóꞌo̱ xaꞌa ya kándixa ndo Tata yo Jesucristo.

1 Corintios 3:16

Ta saa ndóꞌo̱, ¿án köo kúndaa ini ndo ya íin ndo tá káa veꞌe ñuꞌu Ndioxi, ta íyo tu Tachi I̱í ra xiꞌin va ndo?

2 Corintios 13:14

Ta saa ná niꞌi ni ndo ya vaꞌa nuu Tata yo Jesucristo xiꞌin ya kúꞌvi ni ini Iva yo Ndioxi xíni ra ndóꞌo̱. Saa ná koo Tachi I̱í Ndioxi xiꞌin ndiꞌi ndo ndiꞌi saa ichí. Saa ná koo.

2 Corintios 2:14

Ta táxi ni i tixaꞌvi ndaꞌa Ndioxi xaꞌa Jesucristo chi ndiꞌi saa ichí chíndee taꞌan ra xiꞌin nde kúchiñu nde xáa kanaa nde nuu na sáa ini xíni ndeꞌe. Ta tixin ndeꞌe kua xíta niꞌnu ndiꞌi tuꞌun xaꞌa ra iníi kúu. Chi tá káa nduta támi ka vi xáꞌan, saa káa tuꞌun vaꞌa xaꞌa ra nuu naꞌa, na xíni soꞌo ya.

Gálatas 4:6

Ta xaꞌa ya ndu̱u yo seꞌe Ndioxi, yakan vaꞌa ta̱xi ra Tachi I̱í Seꞌe ra ndaꞌa yo íyo ya nima yo. Ta mií ya ku ya síkaꞌán ini yo ya vaꞌa kaꞌan yo xiꞌin ra, kachi yo soꞌva: “Iva mani mií i”, kachi yo xiꞌin ra.

Gálatas 5:22

Ta süvi saa íkan Tachi I̱í Ndioxi xiꞌin yo, chi ya chíndee taꞌan ka va kua xiꞌin yo kuꞌvi ini yo kuni yo na taꞌan yo, saa táxi ya kusini ni yo, ta táxi ya íyo vaꞌa ini yo xiꞌin taꞌan yo, saa táxi ya ndúu yo na kaꞌnu ini, ta táxi ya ndúu yo na toꞌo ni ini, saa táxi tu ya ndúu yo naꞌa, na tái ni ini, ta táxi tu ya ndúu yo naꞌa na ndáa ni ini naꞌa xíni na án Ndioxi ta ndáa ini ra xíni ra yoo,

Efesios 4:4

Chi tá kuꞌva káa ikin kuñu mií ra saa íin ndiꞌi yo. Ta iindaa ku Tachi I̱í Ndioxi ya íyo xiꞌin yo, saa ka̱na ra yoo ya kandixa yo iindaa mituꞌun mií seꞌe ra.

Filipenses 1:8

Ta mií Ndioxi ku ra ndíkuiin xaꞌa ya káꞌan i saa xiꞌin ndo ya kúꞌvi ni ini i xíni i ndóꞌo̱, chi mií Jesucristo ku ra ta̱xi ya kuꞌvi ini i kuni i ndóꞌo̱, tá kuꞌva kúꞌvi ni ini mií ra xíni ra ndóꞌo̱.

Filipenses 3:3

Ta na ndixa kúu mií tuni Ndioxi ku yoo na káñuꞌu ni Ndioxi xiꞌin ndiꞌi nima yo, chi kúu mií yo Tachi Ndioxi. Ta kúsini ni yo xiꞌin ya i̱kan Tata yo Jesucristo xaꞌa yo. Ta köo kándixa yo ya sikaku ra yoo xaꞌa kuꞌva íin yo án xaꞌa ndá ka ñaꞌa ya íkan yo.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

Colosenses 3:12

Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

HEBREOS 6:18

Uvi nuu ku ñaꞌa ya ki̱ndoo Ndioxi xaa súvi ra: iin ku ya ki̱ndoo ra xiꞌin naꞌa xaa súvi ra ya ndi̱kaꞌan ra xiꞌin na, ta inka kua chi̱naꞌa ra tixin mií ra ya sixinu ra ya ki̱ndoo ra xiꞌin na. Xaꞌa ya ikán kua vaꞌa ná kandixa ni yo ra, ta ná kuyati yo nuu ra ya chindee ra yoo, saa ná kundaa teꞌe ini yo ya ndikiꞌin yo ya ndi̱kaꞌan ra xiꞌin yo taxi ra ndaꞌa yo.

1 Pedro 1:2

Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Juan 3:24

Ta ndiꞌi na xáa súvi ya xáꞌnda chiñu ra, ta ítaꞌan na xiꞌin ra, saa ítaꞌan ra xiꞌin na. Xíni yo íyo ra xiꞌin yo chi ta̱xi ra Tachi ra íyo ya xiꞌin yo.

1 Juan 4:12

Nda iin naꞌa köo ndi̱xini xiꞌin nuu Ndioxi. Sundi tá tu kúꞌvi ini yo xíni taꞌan yo, ta kúni kachi ya ítaꞌan vaꞌa Ndioxi xiꞌin yo. Ta saa kuchiñu yo kuꞌvi ini yo tá kuꞌva kúꞌvi ini mií ra xíni ra yoo.

1 Juan 4:16

Xíni yo ndá kuꞌva íyo ini Ndioxi, ta kúndaa ini yo ya kúꞌvi ni ini ra xíni ra yoo. Saa chi Ndioxi ta mani ni yoo nuu ra. Ndiꞌi na kúꞌvi ini xíni taꞌan, ta ítaꞌan vaꞌa na xiꞌin Ndioxi, saa Ndioxi ítaꞌan vaꞌa ra xiꞌin na.