El Apocalipsis 20:2 - Xochapa Mixteco

² Saa ti̱in tatun ikán kiti ko̱ó nǎꞌa, ri kúu ko̱ó yata. Ri ikán ku kiti nǎꞌa ri ínuu nuu ndiꞌi tachi nduvaꞌa, ta Satanás ku kivi ri ikán. Saa ka̱tun tatun ri xiꞌin cadena níꞌi ya, ya kunuꞌni ri iin mil kuiya.

El Apocalipsis 20:2 Mawu Ofanana

2 Pedro 2:4

Saa chi nda na tatun Ndioxi ta köo ndi̱xaa kaꞌnu ini ra xaꞌa na tá ndi̱yaꞌa na nuu ra i̱kan na ya väꞌa ta ti̱ꞌvi ra na kuaꞌan na ndaya, ta̱an ra na ini yavi nuu naá ni, ta ikán kuñuꞌu na nda kivi ná xaa nani ra kuachi xiꞌin na ñuu ivi.

El Apocalipsis 12:9

Ta tatun ya íyo xiꞌin Ndioxi ta̱va ya kiti koó nǎꞌa xiꞌin ndiꞌi tachi nduvaꞌa ya íyo xiꞌin ri. Ta̱va ya ri ki̱ꞌin ñaꞌa ya si̱koyo ya nda nuu ñuꞌú. Ta kiti ko̱ó nǎꞌa ikán ku ko̱ó yata ni, ta inka kivi ri kua Satanás án kiti Timiaꞌan. Ta suvi mií ri ku ri síndaꞌvi ndiꞌi ni kúu na ñuu ivi.

Judas 1:6

Ta ndikaꞌán tu ini ndo ya kundo̱ꞌo na tatun Ndioxi, na köo ndi̱xaa súvi chiñu ya xa̱ꞌnda chiñu Ndioxi nuu na, si̱ndoo ndaꞌa na chiñu vaꞌa ni ta̱xi ra ndaꞌa na xaa súvi na. Ta xaꞌa ya ikán kua ta̱an ra na veꞌe kàà nuu naá ni, núꞌni na, ta ikán kuñuꞌu na ndiꞌi saa kúu tiempo ya vaxi, ta kundátun na nda ná tindaa kivi nuu yáꞌa ni ndee kuu ya xaa nani Ndioxi kuachi xiꞌin ndiꞌi na ñuu ivi.

San Juan 12:31

Vitin kua ti̱ndaa kivi ya taxi Ndioxi kuachi xaꞌa na ñuu ivi. Ta kindaa ra ichí ndaꞌa kiti nǎꞌa, ri xáꞌnda chiñu ñuu ivi yóꞌó, keta ri kuꞌun ri.

1 Pedro 5:8

Ta káxin teꞌe koo ini ndo, küsun ndo, kundito ndo, saa chi kiti nǎꞌa, ri kánitaꞌan xiꞌin ndo ta ndá yokan ndíkun ri xíka ri sata ndo. Tá kuꞌva íkan kiti lion, ri ndee ni ndíkun xíka ndúku tiin kiti kaxi ri, kuꞌva saa íkan kiti nǎꞌa xiꞌin ndo.

HEBREOS 2:14

Tá kúu seꞌe na iva siꞌí, iin nuu ku ikin kuñu ndiꞌi na ta iin nuu kuu tu nií va na. Ta saa xi̱niñuꞌu Tata yo Jesús ndu̱u ra, ra ivi taꞌan mií yo, ndi̱xiyo ikin kuñu ra ta ku̱u mií ra nií taꞌan yoo, saa ndi̱xiꞌi ra xaꞌa ya ikán kua ku̱chiñu ra si̱ndiꞌi xaꞌa ra ndee kiti nǎꞌa ya xáꞌni ndìì.

ROMANOS 16:20

Ta Iva yo Ndioxi, ra táxi íyo ya vaꞌa ini yo, kama ni sindiꞌi xaꞌa ra kiti nǎꞌa náni Satanás, kuaxin xaꞌa ra ri, saa chi̱nduꞌu ra ri tixin xaꞌa ndo. Ta ná chikaa ni Tata yo Jesucristo ya vaꞌa ndóꞌo̱.

San Juan 16:11

Ta suvi mií ya chindee na kundaa ini na saa chi xa ndi̱taꞌnda xaꞌa kiti nǎꞌa, kiti ínuu nuu ndiꞌi tachi nduvaꞌa, ri xáꞌnda nuu na ñuu ivi yóꞌó, ndi̱taꞌnda xaꞌa ri ya ndiꞌi xaꞌa ri.

El Apocalipsis 13:2

Tá káa kiti ndikaꞌa leopardo saa káa ri xi̱ni i, ta xaꞌa ri tá káa xaꞌa kiti oso saa káa ya, ta yuꞌu ri tá káa yuꞌu kiti lión saa káa yuꞌu ri. Saa ta̱xi kiti ko̱ó nǎꞌa ikán ndee kúu mií ri ndaꞌa kiti kini ni káa ikán ya ndikunduꞌu ri nuu tai ri kaꞌnda chiñu ri.

El Apocalipsis 12:17

Saa ndi̱saa ni ini kiti ko̱ó nǎꞌa ikán xiꞌin yá, ta ndi̱kiꞌin ri kuaꞌan ri kani taꞌan ri xiꞌin tá kúu ndiꞌi seꞌe yá. Ta na seꞌe yá ikán ku na xáa súvi ya xáꞌnda chiñu Ndioxi, ta ndee ni ndíkuiin na, köo síndoo na ya ndítuꞌun na tuꞌun ya ndaa xaꞌa Tata yo Jesucristo, kándixa ni na ra.

El Apocalipsis 12:15

Saa xa̱á kiti ko̱ó nǎꞌa ikán táva ri tikuii yuꞌu ri, tá káa nduta tañuꞌu saa káa rá xáta ri sata yá. Íkan ri saa xiꞌin yá ya kúni ri tani yá xiꞌin nduta tañuꞌu ikán.

El Apocalipsis 12:13

Saa tá xi̱ni kiti ko̱ó nǎꞌa ikán, ya si̱kana na ri nuu ñuꞌú, ta xa̱á ri ndi̱kundikun ri xíka ri sata yá ñaꞌa si̱kaku ra taa loꞌo ikán ya kúni ri xaa nduvaꞌa ri xiꞌin yá.

San Marcos 5:7

Iin ndáꞌi koꞌo mií ra, káchi ra saa: ―Tata, ¿unkua kúni un ikan un xiꞌin i? Chi yóꞌo̱ ku Jesús Seꞌe Ndioxi ra kaꞌnu. Xáku ndaꞌvi i nuu un, xäa nduvaꞌa un xiꞌin i ―káchi ra xiꞌin Jesús.

San Mateo 8:29

Ñaa iin ndi̱ndaꞌi koꞌo uvi saa nda, káchi nda saa: ―¿Unkua kúni un ikan un xiꞌin nde, Jesús? Kïꞌvi un xiꞌin nde saa chi Seꞌe Ndioxi ku yóꞌo̱. ¿Án xa̱a un ya xaa nduvaꞌa un xiꞌin nde, yachi ka tá täꞌan tindaa tiempo? ―káchi nda xiꞌin Jesús.

El Apocalipsis 13:4

Saa xa̱á na síkusiti na nuu kiti ko̱ó nǎꞌa ikán, kiti ta̱xi ndee ndaꞌa kiti chee ìyo ni káa ikán, ñaa xa̱á na xáa kaꞌnu na ri, saa káꞌan xiꞌin taꞌan na, káchi na saa: ―Nda iin naꞌa köo ndee kúu mií tá kuꞌva ndee ni ndee kúu mií kiti yóꞌó, ta ni köo naꞌa kuchiñu kani taꞌan xiꞌin ri ―káchi na xiꞌin taꞌan na.

El Apocalipsis 9:11

Ta ya chee ni xáꞌnda chiñu nuu tika ikán ku iin tachi nduvaꞌa ya ndíso chiñu xiꞌin yavi nǎꞌa ya kunu ni ikán. Ta kivi tachi nduvaꞌa ikán kua náni Abadón tuꞌun hebreo, ta tuꞌun griego náni ya Apolión. Ta iin nuu káꞌan uvi saa tuꞌun, káchi ya saa: “Ya síndiꞌi xaꞌa ndiꞌi ñaꞌa”, káchi ya.

San Mateo 19:29

Ta ndiꞌi na síndikoo veꞌe na, án ñani na, án kuꞌva na, án iva siꞌí na, án yá síꞌi na, án seꞌe na, án ñuꞌú na, xaꞌa ya ndíkun na yeꞌe. Ta na yóꞌó ta kuaꞌa ni ya vaꞌa niꞌi na nuu Ndioxi. Nda iin ciento ka ya vaꞌa niꞌi na sata iin iin ñaꞌa ya si̱ndoo na. Ta saa niꞌi na koo na xiꞌin Ndioxi ndiꞌi saa kivi ya vaxi.

San Marcos 4:15

Sava naꞌa tá íin ñuꞌú nuu ndi̱koyo ndikin trigo yuꞌu ichí saa íin na, saa chi xíni soꞌo ni na tuꞌun yóꞌó, tá vaxi kiti nǎꞌa táva ri tuꞌun nima na, ta ndíndoso ini na xaꞌa tuꞌun ya xi̱ni soꞌo na.

El Apocalipsis 12:3

Saa xi̱ni i inka seña chee ni nuu ndivi: Xi̱ni i kiti náni dragón. Tá káa kiti ko̱ó, saa káa ri. Kiti kuǎꞌa̱ ku ri ta ìyo ni káa ri, íyo uxa xiní ri, ta íyo uxi ndikin ri, saa íyo tu uxa corona iin iin ya ñúꞌu xiní iin iin ri.

El Apocalipsis 12:4

Ta xiꞌin ndoꞌma ri si̱koyo ri uni taꞌvi kiti kimi, kiti íyo nuu ndivi, si̱koyo ñaꞌa ri nuu ñuꞌú. Ta kiti ko̱ó kini ni káa ikán, ndi̱xaa ri ndi̱kundichi ri nuu mií yá ñaꞌa ikán, ya kúni ri kaxi ri seꞌe yá tá sikan ka̱ku soꞌva ya.

El Apocalipsis 20:7

Tá ndi̱ꞌi ndi̱yaꞌa mil kuiya ikán, saa tiꞌvi Ndioxi tatun ra ya tava ya kiti nǎꞌa, keta ri ini veꞌe kàà nuu ndíkaa ri.

El Apocalipsis 20:10

Saa tiin na tatun Ndioxi kiti nǎꞌa, kiti si̱ndaꞌvi ni naꞌa, ta kiꞌin na ri sikana táku na nuu xitun nuu ndee ni xíxi ñu̱ꞌu̱ xiꞌin ñu̱ꞌú káꞌndi ya náni azufre. Ta nuu xíxi ni ñu̱ꞌu̱ ikán xa si̱kana tu na kiti ìyo ni káa xiꞌin ra profeta vata ra xa̱a chiñu nuu ri. Ikán ku nuu tíxuꞌvi ni na nduvi niuun saa tixuꞌvi na ndiꞌi saa kivi ya vaxi.