El Apocalipsis 2:9 - Xochapa Mixteco

⁹ Xíni ndiꞌi i ya ndee ni ndóꞌo ini ndo, ta saa xíni i ya kúndaꞌvi ni ndo. Vani saa va, sundi ndóꞌo̱ ta tá íin ndo kuika ni va saa íin ndo. Saa ni xíni i ya káꞌan kini ni naꞌa xaꞌa ndo. Na ikán káꞌan na kúu na judío, ta süvi ya ndaa ku ya káꞌan na, chi na ikán ta na xáa kaꞌnu kiti nǎꞌa, kiti náni Satanás va ku na.

El Apocalipsis 2:9 Mawu Ofanana

San Mateo 4:10

Saa ndi̱kuiin Jesús, ndi̱kaꞌan ra xiꞌin ri, káchi ra saa: ―¡Kuataꞌa, keta kuáꞌan, kiti nǎꞌa! saa chi tuꞌun Ndioxi káchi ya saa: “Ndisaa Ndioxi xaa toꞌo naꞌa, ta ndisaa mií ra kandixa na”, káchi tuꞌun ra ―káchi Jesús xiꞌin kiti nǎꞌa.

San Lucas 12:21

Ñaa ndi̱kaꞌan ka ra xiꞌin na káchi ra saa: ―Tá ndo̱ꞌo ra kuika ikán, saa kundoꞌo ndiꞌi na chívaꞌa ni ya kuika kúu mií na, chi nuu Ndioxi ta ndaꞌvi ni va na ―káchi Jesús.

San Lucas 22:65

Ta kuaꞌa ni nuu tuꞌun väꞌa káꞌan nda xiꞌin ra.

San Lucas 4:18

Íyo Tachi I̱í Ndioxi xiꞌin i, saa ndi̱kaxin ya yeꞌe vaxi i ndituꞌun i tuꞌun vaꞌa xiꞌin na ndaꞌvi. Saa ti̱ꞌvi ya yeꞌe vaxi i sindaꞌa i na ndee ni taꞌvi nima. Ta ti̱ꞌvi ya yeꞌe vaxi i saña i na núꞌni xaꞌa kuachi na. Saa vaxi i kuna i nuu na kuáa̱, ta vaxi i chindee i na tíxuꞌvi.

San Lucas 6:20

Saa ndi̱koto Jesús nuu nda ítaꞌan xiꞌin ra, ta ndi̱kaꞌan ra xiꞌin nda, káchi ra saa: ―Vaꞌa ni kée ndóꞌo̱ ndaꞌvi, kusini ni ndo saa chi ndóꞌo̱ ku ndo ndíkun ichí nuu xáꞌnda chiñu Ndioxi.

San Juan 16:33

Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

Los Hechos 14:22

Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa: ―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

Los Hechos 26:11

Kuaꞌa ni ichí ndi̱xika i iin iin veꞌe ñuꞌu sinagoga xa̱a nduvaꞌa ni i xiꞌin na ndíkun Jesús ya kúni i ná ndiko koo ini na xaꞌa ya kándixa na ra. Ndi̱saa ni ini i xi̱ni i na, nda inka ñuu ya ñúꞌu xika ni xi̱ndikun i ndi̱xika i sata na ya kúni i sindiꞌi xaꞌa i na.

ROMANOS 12:12

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

ROMANOS 2:17

Sava ndóꞌo̱ xaꞌa ya kúu ndo na judío, ta saa íyo ley ra Moisés ndaꞌa ndo, ta ndee ni kándixa ndo ya, túvi ndo. Ta xaꞌa ya ñaa kua ndee ni kútai ini ndo, chi vaꞌa ni ndíkun ndo Ndioxi, túvi ndo.

ROMANOS 5:3

Ta süvi ndisaa xaꞌa ya vaꞌa yóꞌó ku ya kúsini yo, chi kúsini tu yo tá vaxi tindoꞌo nuu va yo. Saa chi xíni yo ndiꞌi tindoꞌo ndóꞌo yo ta xáa ndee ka ya ini yo xiꞌin ya uꞌvi vaxi nuu yo, ta ndee ka ndíkundikun yo ichí Ndioxi.

ROMANOS 8:35

Ta ¿án ndá ñaꞌa kuchiñu xaa xíka yo nuu ya ndee ni ndee kúꞌvi ini Jesucristo xíni ra yoo? ¡Nda iin ñaꞌa küchiñu ikan saa xiꞌin yo! Ni tindoꞌo ya ndóꞌo ni yo, ni ya kuaꞌa ni tindoꞌo ya ndíꞌi ni ini yo, ni ya sítixuꞌvi na yoo xaꞌa ya kándixa yo Jesucristo, ni tamá ya kaꞌni soko yoo, ni tá köo toto kundixi yo, ni ya ìyo ni kuvi yo, ni ya kaꞌni na yoo, nda iin ya yóꞌó küchiñu xaa xika yoo nuu ya ndee ni kúꞌvi ini Jesucristo xíni ra yoo.

ROMANOS 9:6

Ta yeꞌe, ta köo ndi̱kaꞌan i xiꞌin ndo ya köo ndi̱sixinu Ndioxi ya ndi̱kaꞌan ra xiꞌin na ñuu ra na Israel. Saa chi süvi ndiꞌi na seꞌe ñani sikua ra Israel ku na kúu ndinuꞌu seꞌe Ndioxi.

2 Corintios 6:10

Tá íin nde kúsuchi ni ini saa íin nde túvi na, ta süvi ya ndaa kua chi ndiꞌi saa va ichí kúsini ni nde. Tá íin ndeꞌe ndáꞌvi ni saa íin nde túvi na, ta süvi ya ndaa kua, chi ndiꞌi saa va ichí táxi nde ya kuika, ya vaꞌa vaxi nuu ndivi ndaꞌa kuaꞌa ni naꞌa. Tá íin ndeꞌe köo nda loꞌo ñaꞌa nuu, saa íin nde túvi na, ta süvi saa íyo ya chi íyo ndiꞌi va ñaꞌa táxi Ndioxi ndaꞌa nde.

2 Corintios 8:2

Ta kuaꞌa ni nuu tindoꞌo ya uꞌvi ni ndi̱yaꞌa na nuu, ta saa ni kúsini ni na. Vani ndaꞌvi ni na, ta köo xíꞌnda na, ndee ni vaꞌa chi̱ndee na xiꞌin xuꞌun ya kuaꞌan ndaꞌa na ndaꞌvi, ndíkun Jesucristo ndóo ñuu Jerusalén.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

1 Tesalonicenses 3:4

Chi tá kivi ndi̱xiyo nde xiꞌin ndo ta ndi̱kaꞌan ni nde xiꞌin ndo ya ndoꞌo ni ndo kivi vaxi, ka̱chi nde xiꞌin ndo, ta saa ndixa ndóꞌo ndo vitin.

1 Timoteo 1:13

Chi yachi ta ndi̱kaꞌan ndikuu ni va i xaꞌa Tata yo Jesucristo, saa xa̱a ndu̱vaꞌa ni i xiꞌin na ndíkun sata ra, ta ndi̱kaꞌan kini ni i xaꞌa ra. Vani saa i̱kan i ta ku̱ndaꞌvi ni ini ra xi̱ni ra yeꞌe, saa chi yeꞌe köo ndi̱kundaa ini va ku i, yeꞌe naá nuu va ndi̱xiyo i, yakan i̱kan i saa.

1 Timoteo 6:18

Vaꞌa kaꞌan un xiꞌin nda ñani yo, nda ndúkuika ni, ya xíniñuꞌu nda ikan ni nda ya vaꞌa. Ta ná küxiꞌnda nda, ná kusini ni nda nditaꞌvi nda ñaꞌa nda xiꞌin inka naꞌa.

El Apocalipsis 1:9

Yeꞌe Juan ñani ndo ku i, saa chi iin káchi kándixa yo Tata yo Jesucristo, ta ndóꞌo̱ xiꞌin yeꞌe ndíkun yo ichí nuu xáꞌnda chiñu Ndioxi. Xaꞌa ya iin ku yo xiꞌin taꞌan yo, ta iin káchi tíxuꞌvi ndiꞌi yo xiꞌin taꞌan yo, saa táxi Ndioxi ndee ra ndaꞌa yo, ya kúndee ini yo xiꞌin ya tíxuꞌvi yo. Xaꞌa ya ndi̱kaꞌan ndoso i tuꞌun Ndioxi ya si̱naꞌa Tata yo Jesucristo yeꞌe, yakan ti̱in na chiñu yeꞌe ndi̱xaꞌan na ndi̱ndaka na yeꞌe iku loꞌo ya Patmos, ya ndíkaa maꞌñu nduta ñûꞌu xaꞌa ya síndoꞌo ni na ini i.

El Apocalipsis 2:13

Ta xíni ndiꞌi i ya íkan ndo, saa xíni i ya ndóo ndo ñuu nuu xáꞌnda chiñu kiti nǎꞌa náni Satanás. Ni saa va, sundi ndóꞌo̱, ta nda iin kivi köo síndoo ndo ichí i. Kándixa ni ndo yeꞌe. Ni tá xa̱ꞌni na ra Antipas taꞌan ndo, ra ndee ni xi̱ndikun yeꞌe, xaꞌa ya ikán kua xa̱ꞌni na ra. Chi ñuu nuu ndóo ndo ñaa, ta kiti nǎꞌa, kiti Satanás va ku ri xáꞌnda chiñu nuu ya.

El Apocalipsis 2:2

Xa xíni i xaꞌa ndiꞌi ya vaꞌa íkan ndo, saa xíni i ndee ni ndee xáa chiñu ndo nuu i, saa xíni i ya xáꞌa ndee ni ini ndo xiꞌin ya tíxuꞌvi ndo. Ta xíni i ya kúndasi ni nuu ndo xíni ndo naꞌa, na íkan ya väꞌa. Saa xíni i ya xi̱to ndoso ndo nda káꞌan xáa chiñu nda nuu Iva yo Ndioxi, ta süvi ya ndaa ku ya xáa chiñu nda nuu ra.

El Apocalipsis 2:24

Saa íyo inka tuꞌun káꞌan i xiꞌin sava ndóꞌo̱ ndóo ñuu Tiatira, ndóꞌo̱ köo kándixa ya vata sínaꞌa yá ñaa, ta ni köo xíin ndo sikuaꞌa ndo ñaꞌa káꞌan na xaꞌa ya ndee ni ndíchi íyo sěꞌe síkuaꞌa na, káchi na. Chi ya ñaa ta ya káku nima kiti nǎꞌa, kiti Satanás va ku ya. Ta köo ka ñaꞌa nduku i nuu ndo.

El Apocalipsis 3:9

Kúni i kundaa ini ndo unkua ikan i xiꞌin naꞌa, na vata na xáa súvi ya sínaꞌa kiti nǎꞌa, ti Satanás. Na vata ku na chi káꞌan na kúu na judío na ndíkun ichí Ndioxi, ta süvi ya ndaa kua káꞌan na. Ta vaxi kivi kuꞌun na sikusiti na nuu ndo, ta saa kundaa ini na ya kúꞌvi ni ini i xíni i ndóꞌo̱.

El Apocalipsis 7:14

Saa ndi̱kuiin i ndi̱kaꞌan i xiꞌin ra, káchi i saa: ―Köo xíni i, Tata. Mií un xíni unku na, káchi i xiꞌin ra. Saa ndi̱kuiin ra, káchi ra saa: ―Ndiꞌi na yóꞌó ku na ka̱na koo nuu yáꞌa ni vi ndi̱xuꞌvi na, ndo̱ꞌo ka vi na, ta ndi̱kata na tikoto na xiꞌin nií kiti Levo loꞌo, yakan ndu̱u yaa ni ya.