El Apocalipsis 2:3 - Xochapa Mixteco

³ Ta xáꞌa ndee ndiꞌi ini ndo xaꞌa ndiꞌi ya ndóꞌo ndo, ta ndee ni ndee xáa chiñu ndo nuu i xaꞌa ya kúꞌvi ni ini ndo xíni ndo yeꞌe. Vani ndóꞌo ni ndo, ta köo ndíko koo ini ndo xaꞌa ya ndíkun ndo yeꞌe.

El Apocalipsis 2:3 Mawu Ofanana

San Marcos 15:21

Tá kuaꞌan nda xiꞌin ra, saa yáꞌa iin taa ndi̱xaꞌan ra iku, ta ra ke̱e ñuu Cirene ku ra, ta náni ra Simón. Ta iva ra Alejandro xiꞌin ra Rufo ku ra ikán. Ta yáꞌa ra kuanuꞌu ra veꞌe ra ñuu Jerusalén, saa xa̱a nduxa nda lapa xiꞌin ra ndi̱kundiso ra cruzin Jesús.

San Lucas 14:27

Tá tu kúni ndo kundikun ndo yeꞌe ta vaꞌa kundiso ndo cruzin ndo ta saa kundikun ndo yeꞌe.

San Lucas 18:1

Sindiꞌi saa xa̱á Jesús ndítuꞌun ra xiꞌin nda ítaꞌan xiꞌin ra, ndíkani ra nuu nda ya ná kaꞌan ni nda xiꞌin Ndioxi, ta ná ndïko koo ini nda.

San Lucas 21:19

Yakan ndóꞌo̱ ta xaꞌa ndee ni ini ndo saa kuchiñu ndo sikaku ndo ya vaꞌa ndo.

San Lucas 5:5

Saa ndi̱kuiin ra, káchi ra saa: ―Tata Maestro, iniun ñǔu xa̱a chiñu nde, ta nda iin ri köo ndi̱tiin nde. Ta vaꞌa chikaa tuku va nde ya saa chi yóꞌo̱ káꞌan ―káchi ra.

San Lucas 8:15

Ta siꞌva ri ndi̱koyo nuu ñuꞌú vaꞌa ku na kúu mií nima vaꞌa, ndâku ni ini na chívaꞌa na tuꞌun xíni soꞌo na nima na, ta köo ndíko koo ini na ya kuaꞌan na ichí ra, tá íin kuiꞌi vaꞌa ni kána, saa íin na ikán ―káchi Jesús xiꞌin nda ítaꞌan xiꞌin ra.

San Juan 15:21

Ndiꞌi ya yóꞌó kundoꞌo ndo xaꞌa ya ndíkun ndo yeꞌe. Chi na ñuu ivi yóꞌó ta köo xíni na Iva i ra ti̱ꞌvi yeꞌe vaxi i.

ROMANOS 12:12

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

ROMANOS 16:12

Saa kaꞌan ndioxi tu ndo xiꞌin yá kuꞌva yo yá Trifena xiꞌin yá Trifosa, ndee ni ndee xa̱a chiñu ná ñaa nuu Tata yo Jesús. Saa kaꞌan ndioxi ni tu ndo xiꞌin yá kuꞌva yo yá Pérsida, yá kúꞌvi ni ini i xíni i, saa chi ndee ni ndee xa̱a chiñu tu yá ñaa va xiꞌin nde nuu Tata yo Jesús.

ROMANOS 2:7

Ndiꞌi naꞌa, na i̱kan ya vaꞌa, ta saa ikan Ndioxi xiꞌin na. Na ikán ku naꞌa, na köo ndi̱xikuiin ikan ya vaꞌa. Saa chi ku̱ni na xaa kaꞌnu na ra, saa taxi na ya toꞌo chee ni ndaꞌa ra. Ta na ikán ku na niꞌi ichí koo na xiꞌin ra ndiꞌi saa kivi.

ROMANOS 8:25

Ta yoo, ta ndátun yo ndikiꞌin yo ya ndi̱kaꞌan Ndioxi taxi ra ndaꞌa yo, vani täꞌan kuni xiꞌin nuu yo ya, ta saa ni xáꞌa ndee ni ini yo ndátun yo.

1 Corintios 13:7

Naꞌa, na íyo ni ya kúꞌvi ini táxi Ndioxi ndaꞌa na, ta xáꞌa ndee ndiꞌi ini na xiꞌin ndá ka ñaꞌa ndóꞌo na, ta ndee ni kándixa na ya sixinu Ndioxi ya ndi̱kaꞌan ra, saa ndee ni ndátun na ya ndikuiin Ndioxi yuꞌu na. Saa xáꞌa ndee ndiꞌi ini na xiꞌin ya väꞌa ndóꞌo na.

1 Corintios 16:16

Yakan xíkan ni i ya mani nuu ndo ya xaa súvi ni ndo ya káꞌan naꞌa, na íin tá íin na ñaa. Ta saa ikan ndo xiꞌin ndiꞌi naꞌa, na ndee ni ndee xáa chiñu nuu Tata yo.

2 Corintios 10:15

Chi ndeꞌe, ta nda loꞌo köo xíka ini nde xaa kaꞌnu nde mií nde xiꞌin chiñu ya xáa súvi inka naꞌa. Sundi ya kúni ni ndeꞌe kua ná kuaꞌnu ni ka ndo xiꞌin tuꞌun Ndioxi ta saa ná kundàà ni ini ndo kuni ndo ra, chi tá íkan ndo saa, ta saa kua xáꞌnu ka chiñu ya íkan ndeꞌe xiꞌin ndo.

2 Corintios 11:23

Tá tu kútai ni ini nda chi nda xáa chiñu ni nuu Cristo ku nda túvi nda, ta yeꞌe, ta ndee vaꞌa ka va xáa chiñu i nuu ra. Nda tá káa iin ra kíꞌvi va saa káa i ya káꞌan i saa. Chi yeꞌe ta ndee ni ka chíkaa i ndee nuu nda ñaa, kuaꞌa ni ichí ku̱nduvaꞌa na xiꞌin i, ta kuaꞌa ni ichí chi̱kaa na yeꞌe veꞌe kàà nuu nda ñaa, ta ndi̱xaꞌa ndee ndiꞌi ini i ndo̱ꞌo i saa, ta kuaꞌa ni ichí ku̱ni kaꞌni na yeꞌe.

2 Corintios 4:1

Ta ndeꞌe ta köo ndíko koo ini nde xiꞌin chiñu ya ta̱xi Ndioxi ndaꞌa nde íkan nde, chi xaꞌa ya kúndaꞌvi ni ini ra xíni ra ndeꞌe va kua ta̱xi ra chiñu yóꞌó ndaꞌa nde.

2 Corintios 4:16

Xaꞌa ya ñaa kua ni köo ndíkava ini nde ya xáa chiñu nde. Ya ndaa kua ikin kuñu nde ta iin iin kivi kuaꞌan ndíꞌi xaꞌa ya chi kúyata ya. Sundi ya vaꞌa nde, ta ndúu xa̱á ya iin iin kivi, ta saa ndúu ndee ka ini nde.

2 Corintios 5:9

Ta iindaa ya ndee ni kúni yo kua xaa súvi yo ndisaa ya kúni mií ra, án táku yo ñuu ivi yóꞌó vitin án kivi ná koo yo xiꞌin ra nuu ndivi.

2 Corintios 6:5

Ta sava ichí káni ni naꞌa ndeꞌe, táan na ndeꞌe veꞌe kàà xaꞌa tuꞌun ra. Sava naꞌa síkitaꞌan na naꞌa ya kani taꞌan na xiꞌin nde. Ndee ni ndee xáa chiñu nde, sava ichí ta ni köo kíxi nde, ni köo xíxi nde.

Gálatas 6:2

Ta chindee taꞌan ndo xiꞌin taꞌan ndo xaꞌa ndá ka tindoꞌo ya ndóꞌo̱ ndo, chi tá íkan ndo saa xiꞌin taꞌan ndo, ta saa kua xáa súvi ndo ley mií Cristo.

Gálatas 6:9

Ta ná künaa yo ya chíꞌi yo ya vaꞌa, ná xaꞌa ni yo ndee ikan yo saa ndiꞌi kivi, saa tá ti̱ndaa tiempo ta niꞌi ni yo ya vaꞌa xaꞌa ya íkan yo saa.

Filipenses 2:16

Chi tuun ni ndíkun ndo tuꞌun ra ya táxi táku ndo xiꞌin Ndioxi. Tá íkan ndo ya yóꞌó, ni yeꞌe, ta vaꞌa ni kúni i xiꞌin ndo. Chi kivi tá ná ndiko koo Cristo ñuu ivi yóꞌó ta kuni ra ya ndixa kua xa̱a chiñu i xiꞌin ndo, ta köo ndi̱xaa chiñu uun i xiꞌin ndo.

Filipenses 4:3

Ta yóꞌo̱, ñani yo, yóꞌo̱ vaꞌa ni xáa chiñu xiꞌin i ku un, ta xíkan ni i ya mani nuu un chindee taꞌan un xiꞌin ná kuꞌva yo ñaa ya ná ndikitaꞌan vaꞌa ná xiꞌin taꞌan ná. Saa chi ná ñaa ku ná chi̱ndee ni yeꞌe xiꞌin ra ñani yo ra Clemente tin inka ka na ya ndi̱xita ka tuꞌun vaꞌa xaꞌa Tata yo Jesucristo kuaꞌan ya. Chi na ñaa ta xa ndi̱kundoso kivi na nuu tutu Ndioxi, nuu ndíkundoso kivi na kutaku ikan Ndioxi.

Colosenses 1:11

Ta ná taxi ni ra ndee chee ni ya kúu mií ra ndaꞌa ndo ya ná kuchiñu ndo xaꞌa ndee ni ini ndo xiꞌin ndiꞌi ya uꞌvi ni vaxi nuu ndo.

1 Tesalonicenses 1:3

Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

1 Tesalonicenses 2:9

Xa ñúꞌu vaꞌa ini mií ndo ndá kuꞌva xa̱a chiñu ni nde tá ndi̱xiyo nde xiꞌin ndo, nduvi niuu xa̱a chiñu ni nde ya ka̱na xuꞌun kuniñuꞌu nde sata nde ñaꞌa kuxi nde. Ta köo ndi̱sindiꞌi nde ini nda iin ndo ya chindee ndo ndeꞌe xaꞌa ya káꞌan ndoso nde tuꞌun vaꞌa xaꞌa Iva yo Ndioxi xiꞌin ndo.

1 Tesalonicenses 5:12

Ñani yo xiꞌin kuꞌva yo, xíkan ni nde ya mani nuu ndo ya kañuꞌu ni ndo na taꞌan yo, na chee nuu ndo, saa chi na ñaa ku na sínaꞌa ndóꞌo̱ ta ndíkani na tuꞌun Tata yo nuu ndo.

2 Tesalonicenses 3:13

Ta saa ndóꞌo̱, ñani yo xiꞌin kuꞌva yo, káꞌan nde xiꞌin ndo ya ná künaa ndo íkan ndo ya vaꞌa ndiꞌi saa kivi.

2 Tesalonicenses 3:5

Mií Tata yo ná chindee ndóꞌo̱ kundaa ini ndo ya kuꞌvi ni ini ndo kuni taꞌan ndo. Ta saa ná chindee ra ndóꞌo̱ ya ndee ni ná koo ini ndo xiꞌin tindoꞌo ya vaxi nuu ndo tá kuꞌva ndixaꞌa ndee ni ini mií ra xiꞌin ndiꞌi tindoꞌo.

2 Tesalonicenses 3:8

Ni köo ñaꞌa nda iin ndo ndi̱xixi uun nde, ndiꞌi saa ichí xa̱a chiñu ni nde. Nduvi niuun xa̱a chiñu ni nde saa xi̱taku nde, ta nda loꞌo köo ndi̱sindiꞌi nde ini ndo ya nduku nde ñaꞌa nuu ndo kuxi nde án ya xíniñuꞌu nde.

1 Timoteo 4:10

Xaꞌa ya yóꞌó kua ndíkundee ni yo xáa chiñu yo, saa tíxuꞌvi ni yo ta kánaꞌa ni na xaꞌa yo. Chi saa íkan yo kándixa ni yo Ndioxi ra táku, chi mií ra ku ra síkaku ndiꞌi na ñuu ivi yóꞌó, sundi ndisaa na kándixa ni ñaꞌa ku na káku íkan ra.

1 Timoteo 5:17

Ta ndee ni xíniñuꞌu na veꞌe ñuꞌu xaa toꞌo na ndiꞌi nda ñani yo nda xikuaꞌa nda ndee ni vaꞌa xáa súvi chiñu kúu mií nda veꞌe ñuꞌu. Ná xaa toꞌo ni na nda xaꞌa chiñu íkan nda, káꞌan ndoso nda tuꞌun Ndioxi xiꞌin na saa sínaꞌa nda na.

HEBREOS 10:36

Ta xaꞌa ndee ni ini ndo tá ñúꞌu ndo nuu tindoꞌo, saa chi saa kua xáa súvi ndo ya kúni Ndioxi, ta saa niꞌi ndo ya ki̱ndoo ra taxi ra ndaꞌa ndo.

HEBREOS 12:1

Ta xa xíni yo yáꞌa ni kuaꞌa ku naꞌa, na xi̱ndaa ni ini xi̱ni Ndioxi. Ta saa ná ikan yoo tá kuꞌva i̱kan na ikán. Ta ná xaꞌa ni ka yo ndee xiꞌin mií yo, ndinuꞌu ni ini yo ná kaka yo ichí Iva yo Ndioxi, ta saa ná sindoo ndiꞌi yo ya sási nuu yo, xiꞌin ya väꞌa ya síkoyo yoo nuu kuachi.

HEBREOS 13:13

Saa tu yoo va, ná kundikun yo Jesucristo, ta ná kana koo yo kuꞌun yo xiꞌin ra nuu ñuu, ná kükaꞌán nuu yo ndoꞌo yo xaꞌa ra, tá kuꞌva ndo̱ꞌo ni mií ra.

HEBREOS 6:10

Saa chi Ndioxi, ta vaꞌa ni ra, ndaa ni ini ra yakan ndïndoso ini ra xaꞌa chiñu ya íkan ndo, saa ndikaꞌán ini ra xaꞌa ndiꞌi ka ñaꞌa ya i̱kan ndo. Chi sínaꞌa ndo mií ndo ya kúꞌvi ni ini ndo xíni ndo ra, xaꞌa ya chíndee ndo naꞌa, na kándixa ñaꞌa. Ta nda vitin ta chíndee ka ndo na.

HEBREOS 6:12

Chi köo kúni nde nduu ndo na xuxan, sundi kúni nde ná ikan ndo tá i̱kan naꞌa, na ndee ni xi̱ndaa ini xi̱ni Ndioxi, ta ndixaꞌa ndee ni ini na xi̱ndatun na niꞌi na ya ki̱ndoo Ndioxi xiꞌin na taxi ra ndaꞌa na.

HEBREOS 6:15

Ta xaꞌa ya ndi̱xaꞌa ndee ni ini ra Abraham xi̱ndatun ra ya ki̱ndoo Ndioxi xiꞌin ra taxi ra ndaꞌa ra, xaꞌa ya ikán kua ndi̱niꞌi ra ya ndi̱kaꞌan Ndioxi taxi ra ndaꞌa ra.

2 Pedro 1:6

Tá kúndaa vaꞌa ini ndo xaꞌa ra, ta ndixita ndo mií ndo nuu ya väꞌa, ta xaꞌa ndee ni ini ndo xiꞌin ndiꞌi ñaꞌa, saa xaa toꞌo ni ndo Ndioxi.

El Apocalipsis 1:9

Yeꞌe Juan ñani ndo ku i, saa chi iin káchi kándixa yo Tata yo Jesucristo, ta ndóꞌo̱ xiꞌin yeꞌe ndíkun yo ichí nuu xáꞌnda chiñu Ndioxi. Xaꞌa ya iin ku yo xiꞌin taꞌan yo, ta iin káchi tíxuꞌvi ndiꞌi yo xiꞌin taꞌan yo, saa táxi Ndioxi ndee ra ndaꞌa yo, ya kúndee ini yo xiꞌin ya tíxuꞌvi yo. Xaꞌa ya ndi̱kaꞌan ndoso i tuꞌun Ndioxi ya si̱naꞌa Tata yo Jesucristo yeꞌe, yakan ti̱in na chiñu yeꞌe ndi̱xaꞌan na ndi̱ndaka na yeꞌe iku loꞌo ya Patmos, ya ndíkaa maꞌñu nduta ñûꞌu xaꞌa ya síndoꞌo ni na ini i.

El Apocalipsis 3:10

Xaꞌa ya ndee ni vaꞌa ndi̱xaꞌa ndee ini ndo xa̱a súvi ndo tuꞌun i, ta saa tu yeꞌe va, kundaa ni i ndóꞌo̱ tá kivi ná kixi tindoꞌo ya ndee ni ndee koto ndoso ya ndiꞌi na ndóo ñuu ivi yóꞌó.