Efesios 5:8 - Xochapa Mixteco

⁸ Saa chi yachi ta nuu naá va ndi̱xiyo ndo, sundi vitin ta xaꞌa ya ndíkun ndo Tata yo Cristo kua xíka ndo nuu yéꞌe̱. Xaꞌa ya ñaa kua xíniñuꞌu ndo koo ndo tá íin naꞌa, na xíka nuu ñu̱ꞌu̱ yéꞌe̱, nuu túvi.

Efesios 5:8 Mawu Ofanana

San Mateo 3:8

Xiꞌna xíniñuꞌu ndo ndiko koo ini ndo xaꞌa kuachi ndo, ta saa sinaꞌa ndo mií ndo ya ndixa kua ndi̱nama ini ndo xaꞌa ya väꞌa íkan ndo.

San Mateo 4:16

Nda tá íin na ndóo nuu naá ni, saa íin na, tá káa ñuu ndíi saa káa nuu ndóo na. Sundi vitin ta ndee ni ndi̱yeꞌe nuu na xiꞌin nima na, káchi tuꞌun Ndioxi, ya ta̱a ra Isaías.

San Lucas 1:79

Chi kixi ra sindiyeꞌe ra nuu na ndóo nuu naá, na köo xíni xaꞌa ra, chi na ikán tá íin na xa ndátun kuvi va saa íin na. 2 Saa sinaꞌa ra ichí nuu yo kuꞌun yo nuu luvi ni káa ―káchi ra Zacarías xiꞌin ya lee loꞌo seꞌe ra.

San Lucas 16:8

Saa tá ku̱ndaa ini ra kuika ikán ta ndi̱kaꞌan vaꞌa ra, xaꞌa ya i̱kan moso ra. Yakan káꞌan i xiꞌin ndo na kuäꞌan ichí Ndioxi ta xíni ni na ndá kuꞌva ikan na ya ndikitaꞌan vií na xiꞌin naꞌa, listo ni ka na ikán nuu na xíni Ndioxi ―káchi Jesús.

San Juan 1:9

Ta ra kúu ñu̱ꞌu̱ ya ndixa sítuun nuu na ñuu ivi, ta xa vaxi va ra ñuu ivi yóꞌó.

San Juan 12:35

Saa ndi̱kuiin Jesús káꞌan ra xiꞌin na, káchi ra saa: ―Siloꞌo ni kivi íyo yeꞌe kúu ñu̱ꞌu̱ xiꞌin ndo. Yakan xíniñuꞌu ndo ndikundikun ndo ichí nuu yéꞌe̱, süvi ka vi ya iin kama soꞌva ku̱u ta xaa ya naá tiin ya ndóꞌo̱. Chi ndiꞌi na xíka nuu naá, ta ni köo xíni na nuu kuꞌun na.

San Juan 12:36

Tá íyo ñu̱ꞌu̱ yóꞌó tañu ndo ta xíniñuꞌu ndo kandixa ndo ya, ta saa kuchiñu ndo nduu ndo na xíka nuu túun ñu̱ꞌu̱ ―káchi Jesús xiꞌin na. Tá sindiꞌi ndi̱kaꞌan ra tuꞌun ikán ta saa ke̱ta ra kuaꞌan ra tiseꞌe ra.

San Juan 12:46

Yeꞌe ku ñu̱ꞌu̱ ya xa̱a i ñuu ivi yóꞌó, ta ndiꞌi na kándixa yeꞌe, ta ndöo na koo na nuu naá.

San Juan 8:12

Saa xa̱á tuku ra káꞌan ra xiꞌin naꞌa, káchi ra saa: ―Yeꞌe ku ñu̱ꞌu̱ ya síndiyeꞌe nuu na ñuu ivi yóꞌó. Ta ndiꞌi na ndíkun yeꞌe ta käka na ichí ya naá, chi kúu mií na ñu̱ꞌu̱ ya táxi kutaku na ―káchi ra xiꞌin na.

Los Hechos 17:30

Xinaꞌa ta köo ndi̱xaa ndikuu Ndioxi xiꞌin yo köo ndi̱kundaa ini xaꞌa ra. Sundi vitin ta xáꞌnda chiñu ra nuu ndiꞌi kuu yo ñuu ivi ya ná ndiko koo ini yo, sindoo yo ichí väꞌa kuaꞌan yo.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

ROMANOS 1:21

Vani xa xíni naꞌa ya íyo Ndioxi, ta ni köo ndi̱xiin na xaa toꞌo na ra, ni köo ndi̱taxi na tixaꞌvi ndaꞌa ra. Ta saa ndu̱ndee ka ya ndíkani ini mií na xaꞌa ndisaa chiñu kiꞌvi. Ñaa ndu̱tuun vaꞌa ka nima na.

ROMANOS 13:12

Xa ñǔu ni va ku ya, ta xa kama ni va kúni tuvi. Xaꞌa ya ñaa kua ná ïkan ka yo ya väꞌa taꞌan ya íkan naꞌa, na xíka nuu naá. Ná ikan yo ya vaꞌa, ya íin tá íin naꞌa, na xíka nuu yéꞌe̱. Tá kuꞌva íyo nda lapa ndiꞌi saa kivi íyo tuꞌva nda xiꞌin ndaꞌa chiñu nda. Tá íyo nda ikán, saa xíniñuꞌu yo koo ndúvi ni yo ndiꞌi saa kivi, ya kaka ni yo nuu yéꞌe̱.

ROMANOS 2:19

Yakan vaꞌa ni kúndaa ini ndo ya xíniñuꞌu ndo kunuu ndo ichí nuu na kuáa̱, chi tá káa ñu̱ꞌu̱ ya yéꞌe̱ nuu naá, saa íin ndo, túvi ndo.

1 Corintios 1:30

Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

2 Corintios 3:18

Yakan kua tá kúu ndiꞌi yo kándixa Tata yo Jesucristo, ta köo ndási ka nuu yo, vaꞌa xíto teꞌe yo, yakan kua tá íin yu̱ú tatan saa íin yo chi sínaꞌa teꞌe yo ya luvi ni íkan ra xiꞌin ya ndee ni luvi kúu mií ra. Ta saa kua ndúu yo tá kuꞌva káa mií Tata yo Jesucristo. Ta ya ndínama yo iin iin kivi ta mií Tata yo Jesucristo ra kúu Tachi ku ra íkan saa xiꞌin yo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

2 Corintios 6:14

Ndóꞌo̱, na veꞌe ñuꞌu, ta kätun ndo mií ndo xiꞌin naꞌa, na köo kándixa Ndioxi, chi tá ná ikan ndo saa, ta tá káa iin sindiki kiti táꞌvi xiꞌin inka kiti va saa ndúu ndo. Chi xa xíni mií ndo chiñu vaꞌa ta köo ítaꞌan ya xiꞌin chiñu kíꞌvi ya väꞌa, ni ñu̱ꞌu̱ yéꞌe̱ ta köo ítaꞌan ya xiꞌin ya naá.

Gálatas 5:25

Tá tu íyo Tachi I̱í Ndioxi xiꞌin yo, ta saa ná taxi yo kaꞌnda chiñu Tachi I̱í ra nuu yo.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Efesios 4:18

Chi na köo xíni Ndioxi ta íyo xíka ni va na nuu ra, nda ya xínituni na ta tá íin ya íyo nuu naá va saa íyo ya, tuun ni nima na, ta soꞌo ni na.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Efesios 6:12

Ta süvi xiꞌin na taꞌan mií yo kua kánitaꞌan yo, chi xiꞌin tachi nduvaꞌa ya ndee ni naꞌnu tin ndiꞌi ni kúu ya kúu mií chiñu xáꞌnda chiñu ndiꞌi ñaꞌñu xiꞌin ka inka nuu ndiꞌi ndee kiti nǎꞌa ya íyo nuu naá ñuu ivi yóꞌó tin xiꞌin ya íyo nìnu nuu sukun ni ñuu ivi yóꞌó kua kánitaꞌan yo.

Colosenses 1:12

Saa taxi ndo tixaꞌvi ndaꞌa Iva yo Ndioxi xiꞌin ya kúsini ni ndo, chi táxi ra ndiꞌi ñaꞌa ya xíniñuꞌu yo ndaꞌa yo ya kuchiñu yo ndikiꞌin yo ñaꞌa ya ndi̱kaꞌan ra nditaꞌvi ra xiꞌin ndiꞌi yo ñuu ra, yo i̱í, yo xíka nuu yéꞌe̱.

Colosenses 1:13

Ndioxi ku ra sa̱ña ndika yoo nuu ndee ya xáꞌnda chiñu nuu naá. Ta si̱yaꞌa ra yoo ndi̱kiꞌvi yo ndikundoo yo xiꞌin ra nuu xáꞌnda chiñu Seꞌe ra, ra kúꞌvi ni ini ra xíni ra.

Tito 3:3

Chi saa ndi̱xiyo yo yachi tá täꞌan ndikundikun yo ichí Tata yo Jesucristo: kíꞌvi ni ndi̱xiyo ini yo, ikú ni ndi̱xiyo yo, tá íin yo nda̱ñuꞌu saa ndi̱xiyo yo nuu Ndioxi, ta xi̱nuꞌni yo ndaꞌa ndiꞌi kuachi ya ku̱too ni ikin kuñu yo ikan ya, kuaꞌa ni nuu ya väꞌa i̱kan yo, saa kûni ni ini yo xi̱ni yo naꞌa. Ta ndiꞌi naꞌa ndi̱saa ini xi̱ni yoo, ta saa tu yoo va, ndi̱saa ni ini yo xi̱ni yo na.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.