Efesios 5:3 - Xochapa Mixteco

³ Chi ndóꞌo̱, ta na ñuu Ndioxi na i̱í ku ndo, xaꞌa ya ñaa kua nda loꞌo ïkan ndo ñaꞌa ya kini ni káa, tá kúu nda taa, nda kuakiꞌvi xiꞌin ñaꞌa ta süvi yá síꞌi nda ku ná, án ñaꞌa ná kuakiꞌvi xiꞌin taa, ta süvi ií ná ku nda. Nda loꞌo ndïkani ini ndo xaꞌa nda iin taꞌan ñaꞌa ya kini ni káa yóꞌó, ni ya koo náꞌna ni ñaꞌa nuu ndo, ndïkani ini ndo xaꞌa.

Efesios 5:3 Mawu Ofanana

San Mateo 15:19

Saa chi ya väꞌa ndíkani ini na ta chí nima na kána koo ya. Ta ya ikán kua chíndaꞌa na kaꞌni na ndìì, án ya kaka sii na xiꞌin taꞌan na, saa tu ya kuakiꞌvi na kuâán xiꞌin taꞌan na, xiꞌin ndiꞌi ka ya kini íkan na, saa tu ya síkuiꞌna na tin ya káꞌan vata na xiꞌin ya kánaꞌa na xaꞌa inka naꞌa.

San Lucas 12:15

Ta saa ndi̱kaꞌan ra xiꞌin na ndóo ikán, káchi ra saa: ―Kuenta ni koo ndo, kütoo ndo koo kuaꞌa ni ñaꞌa ndo, saa chi süvi xaꞌa ya íyo kuaꞌa ni ñaꞌa nuu naꞌa kua kuchiñu na kutaku na ―káchi ra xiꞌin na.

San Lucas 16:14

Saa tá xi̱ni soꞌo nda fariseo ya ndi̱kaꞌan ra, ta ndi̱xaku ndaa ñaꞌa nda. Chi kútoo ni nda ya kuika.

Los Hechos 15:20

Vaꞌa ná taa yo iin tutu kuꞌun ndaꞌa na nuu kaꞌan yo xiꞌin na ya küvi kuxi na ñaꞌa ya táxi naꞌa ndaꞌa naꞌna ya káꞌan na kúu ndioxi. Ta ni iin taa ta küvi kiꞌvi ra xiꞌin inka ñaꞌa tá tu süvi yá síꞌi ra ku yá, saa tu ná ñaꞌa va tá tu süvi ií ná ku iin taa, ni kiti ndíxita na sukun küvi kuxi na, ni nií ri küvi kuxi na, kachi yo xiꞌin tutu tiꞌvi yo kuꞌun ndaꞌa na köo kúu judío.

Los Hechos 20:33

Tá ndi̱xiyo i xiꞌin ndo ta köo xuꞌun ni toto köo ndi̱nduku i nuu, nda iin ñaꞌa ndo köo ndi̱kutoo i.

ROMANOS 1:29

Ta íyo ni ndiꞌi nuu ya väꞌa ini na. Nda taa kuakiꞌvi nda xiꞌin ná ñaꞌa, ta süvi ná síꞌi nda ku ná, saa ná ñaꞌa kuakiꞌvi ná xiꞌin taa, ta süvi ií ná ku nda. Kini ni íkan na xiꞌin mií na. Ni köo xáa ini na xiꞌin ya kuika kúu mií na, nina ya väꞌa kútoo na ikan na, uní ni ini na, na xáꞌni ndìì ku na. Kútoo ni na kani taꞌan na xiꞌin taꞌan na, síndaꞌvi na naꞌa, ikú ni na.

ROMANOS 16:2

Ndikiꞌin vaꞌa ni ndo yá, ikan ndo ya xaꞌa Tata yo. Tá kuꞌva vívií ndíkiꞌin ndo ndiꞌi naꞌa, na xáa chiñu nuu Tata yo, saa ndikiꞌin vií ndo yá. Chindee taꞌan ni ndo xiꞌin yá, saa chi kuaꞌa ni naꞌa chíndee taꞌan yá xiꞌin, nda ni mií i ta chi̱ndee taꞌan ni yá xiꞌin i.

ROMANOS 6:13

Nda iin ñaꞌñu ikin kuñu ndo täxi ndo ikan ya ndá ka ñaꞌa ya väꞌa. Ndinuꞌu ni ka ini ndo nditaxi ndo mií ndo ndaꞌa Ndioxi xaꞌa ya ikan ndo ya vaꞌa, ya ndaa nuu ra. Chi vitin kúu ndo naꞌa, na táku nuu ra, ta yachi tá iin na ndíi saa ndi̱xiyo ndo nuu ra. Yakan nditaxi ndiꞌi ndo mií ndo ndaꞌa ra, tá káa iin ndaꞌa chiñu ya xáa chiñu ndaku nuu Ndioxi, saa ná koo ndo xiꞌin ra.

1 Corintios 10:8

Xaꞌa ya ikán kua ná kïꞌvi yo xiꞌin inka ná síꞌi án inka nda taa ya kukueꞌe yo xiꞌin taꞌan yo. Süvi ka vi ya kundoꞌo yo tá ndo̱ꞌo sava na xinaꞌa, xaꞌa ya i̱kan na saa, ta iin kivi ndi̱xiꞌi oko uni mil naꞌa.

1 Corintios 5:1

Xa ndiꞌi naꞌa xíni xaꞌa ya íkan iin ra ndíkaa xiꞌin ndo veꞌe ñuꞌu. Xíni na ya kini ni íkan ra, chi ndi̱kiꞌin ra siꞌí ndáꞌvi ra ndu̱u yá síꞌi ra. Nda naꞌa, na köo xíni tuꞌun Ndioxi ta köo na íkan saa.

1 Corintios 6:13

Ta saa káꞌan tuku sava ndo: “Ñaꞌa xíxi yo ta tixin yo kuaꞌan ya, ta suvi ni mií Ndioxi ku ra si̱kuaꞌa tixin yo nuu kuaꞌan ñaꞌa xíxi yo”, káchi ndo. Ni saa va ta ya ndíꞌi xaꞌa ku uvi saa va ya. Sundi ikin kuñu yo, ta köo ndi̱sikuaꞌa ra ya, ya ikan yo ndisaa chiñu kíꞌvi xiꞌin ya. Xaꞌa ya xaa kaꞌnu yo Tata yo Jesucristo va kua si̱kuaꞌa ra ya, ta suvi ni mií ra ku ra xáꞌnda chiñu nuu ikin kuñu yo.

1 Corintios 6:18

Xaꞌa ya ñaa kua käka sií ndo xiꞌin ikin kuñu ndo. Chi kuachi yóꞌó ka ku mií ya ndee ni xáa yakua ikin kuñu ndo nuu tá kúu ndiꞌi ka kuachi ya väꞌa íkan ndo, chi ndá ka ya väꞌa íkan ndo ta köo iin káchi íyo ya xiꞌin kuachi yóꞌó, chi ya yóꞌó ta síndiꞌi xaꞌa ya ikin kuñu ndo. Yakan vaꞌa ka kunu ndo nuu taꞌan kuachi yóꞌó.

2 Corintios 12:21

Yakan ndíꞌi ka vi ini i tá ná xaa i koto i ndóꞌo̱, chi ndee ni ìyo si̱kaꞌán Ndioxi nuu i chi sana täꞌan ndiko koo ini ndo xaꞌa kuachi ndo ya íkan ndo yachi. Ta xaꞌa ya íkan ndo saa, ta án sana nda kuaku suchi ni ini i xaꞌa sava ndo, chi täꞌan sindoo ndo ñaꞌa väꞌa íkan ndo, xíka sií yaa va ndo xiꞌin taꞌan ndo, ta saa íkan ndo ñaꞌa ya kaꞌa̱n ni nuu.

Efesios 5:12

Chi nda kúkakaꞌan nuu yo kaꞌan yo xaꞌa ñaꞌa, ya väꞌa íkan sěꞌe na ñaa.

Efesios 5:5

Chi xa xíni mií ndo ndiꞌi naꞌa, na kuakiꞌvi xiꞌin taꞌan ta küchiñu na koo na xiꞌin Ndioxi nuu xáꞌnda chiñu Tata yo Cristo. Ni naꞌa, na íkan ndá ka ñaꞌa ya kini ni káa, ya yakua án na kútoo ni koo kuaꞌa ñaꞌa. Ndiꞌi na íkan saa ta tá íin na káñuꞌu ndioxi siki va saa íin na.

Filipenses 1:27

Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

Colosenses 3:5

Ta vitin köo ka ndo tá kuꞌva ndi̱xiyo ndo yachi. Vaꞌa sindiꞌi xaꞌa ndo ya chíndaꞌa ndóꞌo̱ ikan ndo ya väꞌa, tá kúu nda taa ta küvi kiꞌvi nda xiꞌin inka ñaꞌa tá tu süvi yá síꞌi nda ku yá, ni ná síꞌi ta ná kïꞌvi ná xiꞌin inka taa tá tu süvi i̱í ná ku nda, ta saa küni ndo ikan ndo ndá ka ñaꞌa ya väꞌa, kütoo ni ndo ndikani ini ndo xaꞌa ya väꞌa, ta ni kütoo ni ndo koo kuaꞌa ni ñaꞌa ndo, chi tá íkan ndo saa, ta tá íin naꞌa, na xáa kaꞌnu ndioxi ndíi, saa íin ndo.

1 Tesalonicenses 4:3

Chi Ndioxi ta kúni ra ya ná nduu ndo naꞌa, na i̱í nuu ra iin iin kivi, ta ná kuxika ndo nuu ndiꞌi kuachi kini íyo ñuu ivi yóꞌó.

1 Tesalonicenses 4:7

Saa chi Ndioxi ta ka̱na ra yoo ya kuu yo naꞌa, na i̱í nuu ra, ta köo ndi̱kana ra yoo kundikun yo ra ya ikan yo ya väꞌa nuu ra.

1 Timoteo 2:10

Ta ya ndee ni xíniñuꞌu ná ikan ná ku ñaꞌa ya vaꞌa ni, xaꞌa ya xáa toꞌo ni ná Ndioxi.

1 Timoteo 3:3

Ta ná kuu nda taa, nda köo kútoo kaka koꞌo ndixi, ni küvi sa̱á kama ni nda án kanitaꞌan nda xiꞌin naꞌa, xíniñuꞌu nda kaꞌnu ni koo ini nda, ná sïkuaꞌa nda kuachi xiꞌin naꞌa, saa ná kütoo ni nda xuꞌun.

1 Timoteo 6:10

Ta väꞌa kutoo naꞌa ndukuika ni na, chi kuaꞌa ni nuu tindoꞌo káku xiꞌin ya kuika. Xaꞌa ya kútoo ni sava na ndukuika na kua ku̱xika na ichí Tata yo Jesucristo, köo ndáa ka ini na xíni na ra saa xa̱á na ndi̱kiꞌvi na kuaꞌa ni nuu tindoꞌo.

2 Timoteo 3:2

Chi kivi ikán ta sava naꞌa kundiꞌi ni ini na ndisaa xaꞌa mií na, saa kuni tu na ya koo kuaꞌa ni xuꞌun na, saa kutoo ni na ndikunuu vaꞌa ni tuꞌun xaꞌa na, ta ndee ni kutai ini na xiꞌin ñaꞌa na. Saa kaꞌan kini na xaꞌa Ndioxi tin xaꞌa naꞌa, ta küaꞌa na kañuꞌu na iva siꞌí na, ta ni küaꞌa na taxi na tixaꞌvi ndaꞌa naꞌa, ni xäa toꞌo na Ndioxi.

Tito 1:11

Ta nda íkan saa ta síndiꞌi xaꞌa nda naꞌa, ínii veꞌe síndiꞌi xaꞌa nda xiꞌin tuꞌun ya sínaꞌa nda na, ta saa ndátun nda chaꞌvi naꞌa nda xaꞌa ya väꞌa sínaꞌa nda na. Ta ndiꞌi nda íkan saa, ta vaꞌa ndikasi un yuꞌu nda, täxi un sinaꞌa ka nda naꞌa xaꞌa ya íkan nda saa.

Tito 1:7

Saa chi nda kúu xi̱ní xiꞌin na veꞌe ñuꞌu, ta xíniñuꞌu nda ndǎku ni koo ini nda xaꞌa ya ndíso chiñu nda xiꞌin chiñu Ndioxi. Ná chïnuu vaꞌa ni nda tuꞌun nda, ná säa kama ni nda, ná käka nda koꞌo nda, saa ná täva nda kuachi xiꞌin naꞌa, ta ná ïkan nda ndá ka ñaꞌa väꞌa ya kuu mií nda xuꞌun.

Tito 2:3

Ta kuꞌva saa sinaꞌa tu un ná kuꞌva yo ná nána chee xikuaꞌa, vií ná koo ná, ná koo ná xiꞌin ya toꞌo nuu Ndioxi. Kaꞌan xiꞌin ná, ná käꞌan vata ná xaꞌa naꞌa, ni ná küu ná ñaꞌa ndee ni kútoo koꞌo ndixi, xíniñuꞌu ná sinaꞌa ná ya vaꞌa.

HEBREOS 12:16

Ta nda iin ndóꞌo̱, käka sií xiꞌin ñaꞌa án xiꞌin taa, ta ni kündasi nuu ndo kuni ndo Ndioxi tá kuꞌva i̱kan ra Esaú xinaꞌa. Chi xaꞌa ya kúu ra seꞌe núnu̱ú iva siꞌí ra kua ku̱u mií ra ichí ya ndikiꞌin ra ya vaꞌa ndaꞌa na, sundi ra ikán, ta ndi̱xiko ra ya xaꞌa iin koꞌo loꞌo ñaꞌa xíxi.

1 Pedro 5:2

Ta yeꞌe xíkan ni i ya mani nuu ndo, kundaa ni ndo na ñani yo, na si̱kuiso chiñu Tata yo ndóꞌo̱. Tá kuꞌva ndáa iin taa levo sana ra, kuꞌva saa vívií kundaa ndo na, ta ïkan ndo ya xaꞌa ya nduxa án xaꞌa xuꞌun. Vaꞌa ikan ndo tá kuꞌva kúni mií Ndioxi, kusini ni ndo ya íkan ndo saa.

2 Pedro 2:10

Ta xaa nduvaꞌa ni va Ndioxi xiꞌin ndiꞌi naꞌa, na íkan ya väꞌa, ya kúni ni mií ikin kuñu na, ta ni köo xáa súvi mií na chiñu ya xáꞌnda chiñu Ndioxi nuu na. Ta na vata ikán ta ndee ni tuun ini na, ni köo íꞌvi na kaꞌan ndivaꞌa na xaꞌa na kúu mií ndee naꞌnu ka nuu na.

2 Pedro 2:14

Ni küvi kuni nda iin ná síꞌi, chi tá xíto nda nuu ná ta tá káa nda xa kuakiꞌvi xiꞌin va ná saa káa nda, túvi nda. Nina ya kútoo ni ikin kuñu nda kua íkan nda, nduvi niuun ndíkani ini nda xaꞌa ya väꞌa, ni köo xáa ini nda xiꞌin ñaꞌa kúu mií nda. Xaꞌa ya íkan nda saa ta nda xa ndi̱tavi chiꞌña ndu̱u nda.

2 Pedro 2:3

Chi nda ikán ta ya ndee ni kúni nda ku xuꞌun ndo xaꞌa ya sínaꞌa nda ndóꞌo̱ tuꞌun vata. Ta vaꞌa ná kundatun naꞌa nda chi xa ta̱xi Ndioxi kuachi xaꞌa nda, xa xinaꞌa vi íyo ya xaꞌa nda ta kama ni kuu saa xiꞌin nda, ni käku ka vi nda ndakua ndiꞌi xaꞌa nda ikan Ndioxi.

El Apocalipsis 2:14

Vani kuaꞌa ni va ya vaꞌa íkan ndo, ta saa ni íyo uvi ndaa kuachi ndo nuu i. Saa chi íyo naꞌa, na ndíkitaꞌan xiꞌin ndo nuu ndíkitaꞌan ndo xáa kaꞌnu ndo Ndioxi, ta na ñaa ta xáa súvi ka va na ya si̱naꞌa ra Balaam xinaꞌa. Chi ra íkan ku ra ndi̱kaꞌan xiꞌin ra Balac ndá kuꞌva kuchiñu sikoyo ra na ñuu Israel. Ta si̱ndikava ra na nuu kuachi, chi xi̱xi na ñaꞌa ya síniꞌi naꞌa nuu kuaꞌa ni ndioxi ndíi án naꞌna ya káꞌan na kúu ndioxi na. Ta ta̱a sií ra nda taa ya koo tani nda. Ta saa i̱kan tu ra xiꞌin ná síꞌi va.

El Apocalipsis 2:21

Ta xa kuaꞌa ni kivi ta̱xi i ndaꞌa yá nuu ndátun i ya ndiko koo ini yá xaꞌa kuachi yá, ta köo xíin yá sindikoo yá ya väꞌa íkan yá.

El Apocalipsis 21:8

Ta na síndikoo ichí i xaꞌa ya íꞌvi na tixuꞌvi na xaꞌa i, ta kuꞌun na yavi nuu xíxi ni ñu̱ꞌu̱ xiꞌin ñuꞌú káꞌndi ya náni azufre, saa kundoꞌo na köo xíin kandixa yeꞌe, na íkan ndiꞌi saa nuu ya väꞌa, ya kini, xiꞌin na xáꞌni ndìì, xiꞌin nda taa nda kuakiꞌvi xiꞌin inka ñaꞌa, án ndiꞌi ná ñaꞌa ná kuakiꞌvi xiꞌin inka taa, saa tu na tási xiꞌin na káñuꞌu yu̱ú savi án na káñuꞌu inka naꞌna ya köo kúu ndioxi ra ndaa, xiꞌin ndiꞌi na ndítuꞌun vata. Ta ya ndoꞌo ni na yóꞌó ku nuu “kuvi na ichí uvi” ―káchi Ndioxi ndi̱kaꞌan ra xiꞌin i.

El Apocalipsis 22:15

Ta na väꞌa ndoo na kundoo na chí keꞌe, chi na ikán ku na i̱kan ya väꞌa, ya kini ni. Saa tu na tuꞌva, na tási, saa tu nda taa nda ndi̱xika xiꞌin ná síꞌi, ta saa tu ná síꞌi ná ndi̱kiꞌvi xiꞌin taa, ta saa tu na xa̱ꞌni ndìì, saa tu na xa̱a kaꞌnu inka ndioxi án inka naꞌna ndioxi ra köo kúu Ndioxi ndaa, saa tu na kútoo ni kaka xiꞌin ya síki, ta síndaꞌvi na naꞌa. Ndiꞌi na ikán küchiñu na koo na ñuu i̱í xiꞌin Ndioxi.

El Apocalipsis 9:21

Na ndi̱ndoo ikán ta ni köo ndi̱xikuiin na xáꞌni na ndìì, ni ya xáa tási na xiꞌin taꞌan na köo ndi̱xiin na sindoo na, ni ya kuiꞌna, ni ya kuakiꞌvi na xiꞌin inka ñaꞌa án inka taa köo ndïxiin na sindoo na ya.