Efesios 5:26 - Xochapa Mixteco

²⁶ I̱kan ra saa xiꞌin yo ya kuchiñu ra ndasa i̱í ra yoo. Ta xaꞌa ya xi̱ni soꞌo yo tuꞌun vaꞌa xaꞌa ra kua ndu̱u yo naꞌa, na i̱í nuu ra, saa chi̱chi yo xiꞌin tikuii xaꞌa ya kándixa yo ra.

Efesios 5:26 Mawu Ofanana

San Juan 13:10

Saa ndi̱kaꞌan Jesús xiꞌin ra, káchi ra saa: ―Ndiꞌi na xa chi̱chi, ta köo xíniñuꞌu na ndoo ndiꞌi iín na, nani kua tá tu ndo̱o xaꞌa na, ta ya ñaa kua xáa yaa ndiꞌi iín na. Ta ndóꞌo̱ ta xa ndo yaa ndu̱u ndo, vani süvi ndiꞌi ndo yaa ―káchi ra xiꞌin ra.

San Juan 15:3

Ta ndóꞌo̱ xa ndu̱yaa ndo xiꞌin tuꞌun ya ndi̱kaꞌan i xiꞌin ndo.

San Juan 15:8

Tá xáa toꞌo ni ndo Iva i tá íkan ni ndo ya vaꞌa, ta saa kua ndúu ndo na ítaꞌan xiꞌin i.

San Juan 17:7

Ta vitin xa kúndaa ini na ndiꞌi ñaꞌa ta̱xi un ndaꞌa i ta nuu mií un ke̱e ndiꞌi ya.

San Juan 3:5

Saa ndi̱kuiin Jesús káꞌan ra, káchi ra saa: ―Ya ndaa ni káꞌan i xiꞌin un, ndiꞌi na täꞌan kaku xiꞌin tikuii ni xiꞌin Tachi I̱í Ndioxi ta küchiñu na kiꞌvi na koo na nuu xáꞌnda chiñu Ndioxi.

Los Hechos 22:16

Ta kündatun ka un vitin. Kuandikoo kuchi un tixin kivi Jesús. Ta kaꞌan un xiꞌin ra ná xaa kaꞌnu ini ra xaꞌa kuachi un”, káchi ra Ananías ikán xiꞌin i ―káchi ra Pablo xiꞌin na.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

ROMANOS 10:8

Saa chi tuꞌun Ndioxi káchi ya saa: “Yati ni íyo tuꞌun Ndioxi xiꞌin un. Yati ka vi íyo ya yuꞌu un xiꞌin nima un”, káchi tuꞌun Ndioxi ya ta̱a na xinaꞌa. Ta ya ikán ku ya káꞌan ndoso nde xaꞌa xiꞌin un vitin, ndá kuꞌva kandixa un Jesucristo ta ndikundikun un ichí ra.

1 Corintios 6:11

Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

2 Corintios 11:2

Chi yeꞌe, ta ndee ni ndíꞌi ini i xaꞌa ndo, tá kuꞌva ndíꞌi ini Ndioxi xíni ra ndóꞌo̱, saa ndíꞌi ni ini i xíni i ndóꞌo̱. Chi ki̱ndoo i taxi i ndóꞌo̱ ndaꞌa ra, tá kuꞌva íkan taa, táxi ra seꞌe síꞌi ra tíndaꞌa yá xiꞌin iin taa. Ta kuꞌva saa íyo yeꞌe nditaxi i ndóꞌo̱ ndaꞌa Jesucristo tindaꞌa ndo xiꞌin ra. Tá kuꞌva íin ná kuâán taki vali ná täꞌan tindaa nda iin taa, kuꞌva saa kúni i koo ndo nditaxi i ndóꞌo̱ ndaꞌa Jesucristo.

Efesios 6:17

Saa tu tá kuꞌva íkan nda lapa ñúꞌu ñaꞌa xi̱ní nda ya ndási ya xi̱ní nda, kuꞌva saa xíniñuꞌu ndo kundaa ni ini ndo ya íyo ndee Jesucristo xiꞌin ndo ya sikaku ya ndóꞌo̱ nuu ya väꞌa. Saa tu tá kuꞌva íkan nda lapa xa íyo ndúvi nda xiꞌin i̱chi nda, kuꞌva saa xíniñuꞌu ndo koo ndúvi ndo xiꞌin tuꞌun Ndioxi ya táxi Tachi I̱í ra ndaꞌa ndo.

Colosenses 3:16

Ta taxi ndo ndee ni ná koo mií tuꞌun Tata yo Jesucristo nima ndo. Saa sinaꞌa taꞌan ndo ta ndikani ndo nuu taꞌan ndo sixinu ndo ini taꞌan ndo ya ná ikan ndo ya vaꞌa kúni Ndioxi. Saa ná kusini ndo ta kata ndo salmo xiꞌin yaa i̱í nuu Ndioxi ya táxi ndo tixaꞌvi ndaꞌa ra xaꞌa ya íyo vaꞌa ni ini ndo xiꞌin ra.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

HEBREOS 10:10

Xaꞌa ya i̱kan Jesucristo ndi̱taxi ra mií ra ndi̱xiꞌi ra xaꞌa yo, ta xaꞌa ya ikán kua ndu̱u yo na ií, na vaꞌa nuu Ndioxi, saa chi Jesucristo ta xa̱a súvi ra ya kúni mií Ndioxi. Ta nda iin ichí köo xíniñuꞌu tuku ra ikan ra saa.

HEBREOS 10:14

Saa chi xaꞌa ya i̱kan ra saa ndi̱soko ra mií ra, ta iindaa ichí va i̱kan ra saa, nda̱sa vaꞌa ra na ndíkun sata ra, ndu̱u ndǎku na nuu ra, saa xa̱a i̱í ra na, ta saa koo na ndiꞌi saa tiempo.

HEBREOS 10:22

Xaꞌa ya ikán kua ná kuyati yo nuu Ndioxi xiꞌin ndinuꞌu nima yo, ta saa ndinuꞌu ni ini yo ná kundaa ni ini yo kuni yo ra, saa chi xa ndi̱kata ra nima yo xaꞌa ndiꞌi ya väꞌa, ta saa ndi̱kata ra ikin kuñu yo xiꞌin tikuii nduta vaꞌa ni.

HEBREOS 10:29

Ta ndisaa ka vi ndee ni ndee kundoꞌo naꞌa, na kóso kava Tata yo Jesucristo, ra kúu Seꞌe Ndioxi, chi köo kíꞌin na kuenta xaꞌa nií ra, nda tá káa rá väꞌa saa káa ra nuu na, saa íkan naꞌa, na kúndasi nuu xíni Tachi I̱í Ndioxi, ra kúꞌvi ni ini xíni ñaꞌa, chi suvi xiꞌin nií Tata yo Jesucristo kua ki̱ndoo ra trato ya ikan ra ya vaꞌa xiꞌin yo.

HEBREOS 13:12

Ta saa ndo̱ꞌo tu Jesús va, ta̱va na ra nda nuu ñuu Jerusalén ta ikán xa̱ꞌni na ra xaꞌa yo, ta xiꞌin nií mií ra ku rá nda̱sa i̱í ra yoo, nda̱sa vaꞌa ra yo, si̱ndiꞌi xaꞌa ra kuachi yo nuu Ndioxi.

HEBREOS 4:12

Saa chi tuꞌun Ndioxi, ta ya táku ku ya ta ndee ni kúnu kuakiꞌvi ya xáꞌnda ya. Ndee ni ka ndee tuꞌun ra nuu iin i̱chi̱ ya xi̱ín ni uvi saa yuꞌu. Chi tuꞌun ra, ta kuakiꞌvi ya xáꞌnda ya nima naꞌa, iin saa nda nuu vaꞌa na, xiꞌin tivavi na, xiꞌin mbeke ya ñúꞌu ini leke na, ta vaꞌa xíto ndoso ya ndiꞌi ya xínituni na xiꞌin ya ndíkani ini na, ya íyo nima na.

HEBREOS 9:14

Tá tu ku̱chiñu nií ikán xiꞌin yaá nda̱sa vaꞌa ya sata ikin kuñu na, ta ¡ndisaa ka vi nií Jesucristo, ndee ni ka ndee kúu mií rá ikán chi nda loꞌo kuachi ra köo, yakan vaꞌa ndasa vaꞌa rá yoo xaꞌa Tachi ra ya táku ndiꞌi saa ichí! Saa chi nií mií ra ku rá ndása vaꞌa nima yo, ndúvaꞌa yo nuu kuachi ya xáꞌni yoo, ta saa kua kuchiñu yo xaa chiñu yo nuu Ndioxi, ra táku.

Santiago 1:18

Ta saa chi̱tuni ra nda̱sa xa̱á ra nima yo xiꞌin tuꞌun ra ya ndaa, ya ná kuchiñu yo nduu yo naꞌa, na vaꞌa, ta xiꞌna ka yoo ku yo núnu̱ú nda̱sa xa̱á ra nuu tá kúu ndiꞌi ñaꞌa ya si̱kuaꞌa ra íyo ñuu ivi yóꞌó.

1 Pedro 1:2

Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Pedro 3:21

Taꞌan tikuií ikán ku tikuií rá síkuchi naꞌa ndóꞌo̱ vitin, rá síkaku ndóꞌo̱. Ta tikuií ikán ta köo ndíkata rá ya väꞌa íyo ikin kuñu yo, sundi ndása vaꞌa rá ya xínituni yo, saa síkaku rá yoo xaꞌa ya ndi̱taku Tata yo Jesucristo tañu na ndíi.

2 Pedro 1:9

Tá ndá naꞌa köo íkan taꞌan ya yóꞌó, ta tá íin na kuáa̱ va saa íin na, küvi koto xíka ni va na, loꞌo ni va xíto na, ta xa ndi̱ndoso ini na ya xa̱a kaꞌnu ini Ndioxi xaꞌa kuachi na.

1 Juan 5:6

Ya si̱naꞌa Tata yo Jesucristo nuu yo ya ke̱e ra nuu Ndioxi kua yóꞌó: tikuii nduta chi̱chi ra tin nií ra nduta ndi̱xita nuu cruzin tá ndi̱xiꞌi ra. Nduta ikán ku rá sínaꞌa yoo ya kúu ra Seꞌe Ndioxi. Ta süvi ndisaa tikuii ndíkuiin xaꞌa ra, ndíkuiin tu nií va ra xaꞌa ra. Ta saa ndíkuiin tu Tachi Ndioxi va xaꞌa ra, saa chi ya ikán ku ya ndaa.

Judas 1:1

Yeꞌe, Judas, ñani ra Jacobo, ra xáa chiñu nuu Tata yo Jesucristo ku i táa tutu yóꞌó xaa ya ndaꞌa ndóꞌo̱ ka̱na ra, saa nda̱sa i̱í Iva yo Ndioxi ndóꞌo̱, ta ndáa ni Tata yo Jesucristo ndóꞌo̱.