Efesios 5:2 - Xochapa Mixteco

² Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Efesios 5:2 Mawu Ofanana

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

San Juan 13:34

Ta ya yóꞌó ku iin chiñu xa̱á sindoo i ndaꞌa ndo: Kuꞌvi ni ini ndo kuni taꞌan ndo, tá kuꞌva kúꞌvi ini i xíni i ndóꞌo̱, ta kuꞌva saa kuꞌvi ni tu ini ndóꞌo̱ va kuni taꞌan ndo.

San Juan 6:51

Mií yeꞌe ku xita vaꞌa ya táku ya nùù nuu ndivi, ndiꞌi na xíxi xita vaꞌa yóꞌó ta nda iin ichí ndïꞌi xaꞌa na. Ta xita vaꞌa ya táxi i ndaꞌa na ku ikin kuñu i, ya soko i xaꞌa ndiꞌi na ñuu ivi yóꞌó ya kutaku na ―káchi Jesús xiꞌin na.

ROMANOS 15:16

Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

ROMANOS 4:25

Saa chi mií ra ku ra ta̱xi Jesucristo ya ndi̱xiꞌi ra xaꞌa kuachi yo, ta xaꞌa ya ndi̱taku ra yakan ku̱chiñu ra si̱kitaꞌan ra yoo xiꞌin Ndioxi, saa ku̱chiñu yo ndu̱u yo tá íin naꞌa na vaꞌa, na köo ka kuachi kúu mií nuu ra.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

ROMANOS 8:37

Vani uꞌvi ni tíxuꞌvi yo, ta saa ni kúchiñu yo xáa taa yo nuu tindoꞌo. Chi Jesucristo ku ra kúꞌvi ni ini xíni yoo, ta táxi ra ndee ra ndaꞌa yo ya kuchiñu yo yaꞌa yo nuu tindoꞌo, ya uꞌvi ni vaxi nuu yo.

1 Corintios 16:14

Ndiꞌi chiñu íkan ndo, ta ndinuꞌu ni ini ndo ikan ndo ya xiꞌin taꞌan ndo, xaꞌa ya kúꞌvi ni ini ndo xíni taꞌan ndo.

1 Corintios 5:7

Xaꞌa ya ñaa kua vaꞌa ka ná tava ndo uxan iya yata ya sítivi ndóꞌo̱. Ta vaꞌa nduu ndo tá káa uxan xita vaꞌa ya xa̱á. Saa chi ndóꞌo̱ ta tá íin xita vaꞌa ya xíniñuꞌu na viko pascua saa íin ndo, chi ya ikán ta köo uxan iya kúu mií ya. Chi Jesucristo ku ra káa tá káa levo kiti sóko na xaꞌa kuachi na viko pascua, chi xa ndi̱soko ra mií ra ndi̱xiꞌi ra xaꞌa kuachi yo.

2 Corintios 2:14

Ta táxi ni i tixaꞌvi ndaꞌa Ndioxi xaꞌa Jesucristo chi ndiꞌi saa ichí chíndee taꞌan ra xiꞌin nde kúchiñu nde xáa kanaa nde nuu na sáa ini xíni ndeꞌe. Ta tixin ndeꞌe kua xíta niꞌnu ndiꞌi tuꞌun xaꞌa ra iníi kúu. Chi tá káa nduta támi ka vi xáꞌan, saa káa tuꞌun vaꞌa xaꞌa ra nuu naꞌa, na xíni soꞌo ya.

2 Corintios 2:15

Ta ndeꞌe, tá íin xiko ya támi ni xáꞌan sóko mií Cristo kuandaa kuaꞌan nuu Ndioxi, saa íin nde. Ta xiko támi ni xáꞌan xíta ya kuaꞌan ya nuu ndiꞌi naꞌa, na síkaku Ndioxi, ta saa kuaꞌan tu ya nuu naꞌa, na kuaꞌan ichí nuu ndiꞌi xaꞌa va na.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

Gálatas 1:4

Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

Gálatas 2:20

Ta yeꞌe, nda tá káa ra ínuu nuu cruzin xiꞌin Tata yo Jesucristo saa káa i, ta köo táku ka i xaꞌa mií i, chi ndisaa xaꞌa mií ra kua táku i. Kivi táku i ini ikin kuñu i ya kúu mií i, ta ndisaa xaꞌa ya ndáa ni ini i xíni i Tata yo Jesucristo ra kúu Seꞌe Ndioxi kua táku i, chi mií ra ku ra kúꞌvi ni ini xíni yeꞌe, saa ta̱xi ra mií ra ndi̱xiꞌi ra xaꞌa i.

Efesios 1:4

Nda yachi ka tá täꞌan xikoo xaꞌa ñuu ivi vi kua ndi̱kaxin ra yoo tixin Jesucristo ya ná nduu yo naꞌa, na i̱í, na köo nda iin kuachi ku mií nuu ra.

Efesios 3:17

Saa xíkan ni tu i ya vaꞌa nuu Iva yo Ndioxi ya ná kandixa ni ka ndo Cristo, saa ná kuꞌvi ni ini ndo kuni ñaꞌa ndo, ta nda tá káa iin tioꞌo itun kúnu ni ndíkaa, án veꞌe ya tuun ni ndi̱kuaꞌa xaꞌa, kuꞌva saa ná kuaꞌnu ni ka tuꞌun ra nima ndo.

Efesios 3:19

Saa káꞌan ni i xiꞌin Ndioxi ya ná taxi ra ya xínituni ndo ndaꞌa ndo ya ná kuchiñu ndo kundaa ini ndo chi ya kúꞌvi ni ini ra xíni ra ndóꞌo̱ ta yáꞌa ni ka ndee ya ikán nuu ndá ka ya xínituni ndo. Káꞌan ni i xiꞌin ra xaꞌa ndo ya ná xinu ndo kuni taꞌan ni ndo xiꞌin ra, saa ná sikutu ni ra ya vaꞌa ini ndo.

Efesios 4:15

Vaꞌa ka ná kuxuxa ini yo xaꞌa ndiꞌi ni kúu kuꞌva ya ndíkani ini yo, ta saa nduu yo tá káa mií Cristo, ná sinaꞌa taꞌan yo xiꞌin ya ndaa xaꞌa ya kúꞌvi ini yo xínitaꞌan yo. Chi mií Tata yo Cristo ku ra ku xi̱ní, ra xáꞌnda chiñu nuu yo veꞌe ñuꞌu.

Efesios 4:2

Ta ndiꞌi saa kivi koo ndo naꞌa, na ni̱nu̱ ini, na vaꞌa ini, na kaꞌnu ni ini, na xáꞌa ndee ini xiꞌin taꞌan xaꞌa ya kúꞌvi ni ini ndo xíni taꞌan ndo.

Efesios 5:15

Yakan kiꞌin ni ndo kuenta ndá kuꞌva íyo ndo, ta köo ndo tá kuꞌva íyo naꞌa, na kíꞌvi, ta vaꞌa koo ndo tá kuꞌva íyo naꞌa, na ndíchi ni.

Efesios 5:25

Saa ndóꞌo̱ taa, nda íyo yá síꞌi, vaꞌa kuꞌvi ni ini ndo kuni ndo yá síꞌi ndo, tá kuꞌva kúꞌvi ni ini Cristo xíni ra yoo veꞌe ñuꞌu, ta nda ndi̱taxi ra mií ra ya ndi̱xiꞌi ra xaꞌa yo.

Filipenses 4:18

Ndixaꞌvi ni ndo xaꞌa ya ti̱ꞌvi ndo ndaꞌa i chi̱ndee ni ndo yeꞌe chi vitin ta xa íyo ndiꞌi ya xíniñuꞌu i, köo ka ya kúmani nuu i, nda ndóo ndoso ka ya nuu i, saa chi xa ndi̱kiꞌin i ya ti̱ꞌvi ndo vaxi xiꞌin ra Epafrodito, ñani yo. Ta tá káa ya luvi xáꞌan sóko ndo nuu Ndioxi saa káa ya, ta Ndioxi kúsini ni ra xiꞌin ndo.

Colosenses 3:14

Chi ya ndee ni xíniñuꞌu ndo ikan ndo xiꞌin taꞌan ndo kua yóꞌó: kuꞌvi ni ini ndo kuni taꞌan ndo, chi tá íkan ndo saa xiꞌin taꞌan ndo, ta saa kua ndíkundoo mani ndo xiꞌin taꞌan ndo.

1 Tesalonicenses 4:9

Ta köo xíniñuꞌu ka i kaꞌan i xiꞌin ndo ya kuꞌvi ini ndo kuni taꞌan ndo, saa chi xa mií Ndioxi ku ra si̱naꞌa ndóꞌo̱ kuꞌvi ni ini ndo kuni taꞌan ndo.

1 Timoteo 2:6

Saa ta̱xi ra mií ra ndi̱xiꞌi ra xaꞌa kuachi ndiꞌi yo. Ta xaꞌa ya i̱kan ra saa kua cha̱ꞌvi ra xaꞌa yo, ya vaꞌa ku̱chiñu yo ndi̱saña ndika yo nuu kuachi yo. Ta ya yóꞌó ku tuꞌun vaꞌa ya ta̱xi Iva yo Ndioxi ndaꞌa na ñuu ivi yóꞌó, tá kivi chi̱tuni mií ra.

1 Timoteo 4:12

Täxi un xaa ni̱nu̱ na yóꞌo̱, xaꞌa ya loꞌo un, kuâán un. Vivií koo un nuu na ya ná kuni na ikan na taꞌan ya vaꞌa íkan un, xaꞌa kuꞌva ndituꞌun un xiꞌin na, xiꞌin kuꞌva xíka un nuu na, xiꞌin kuꞌva kúꞌvi ini un xíni un na, saa kundaa ni ini un kuni un Tata yo Jesucristo, kundaa ni un mií un, xäa yakua xiꞌin mií un.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

HEBREOS 8:3

Chi ndiꞌi nda sutu naꞌnu ta kúu mií nda ichí soko nda ñaꞌa nuu Ndioxi, án kaꞌni nda kiti nuu ra. Ta kuꞌva saa xíniñuꞌu tu Tata yo Jesucristo va kuu mií ra ñaꞌa soko ra nuu Ndioxi xaꞌa ya kúu ra sutu chee.

HEBREOS 9:14

Tá tu ku̱chiñu nií ikán xiꞌin yaá nda̱sa vaꞌa ya sata ikin kuñu na, ta ¡ndisaa ka vi nií Jesucristo, ndee ni ka ndee kúu mií rá ikán chi nda loꞌo kuachi ra köo, yakan vaꞌa ndasa vaꞌa rá yoo xaꞌa Tachi ra ya táku ndiꞌi saa ichí! Saa chi nií mií ra ku rá ndása vaꞌa nima yo, ndúvaꞌa yo nuu kuachi ya xáꞌni yoo, ta saa kua kuchiñu yo xaa chiñu yo nuu Ndioxi, ra táku.

HEBREOS 9:23

I̱kan nda sutu ikán saa, xaꞌa ya xíniñuꞌu nduu vaꞌa ñaꞌa íyo veꞌe ñuꞌu manta, ya íin tá íin copia ya íyo nuu ndivi. Xaꞌa ya ikán kua xa̱ꞌni nda kiti nuu ndu̱u vaꞌa ndiꞌi ya xiꞌin nií ri, sundi mií veꞌe ñuꞌu ya ndee ni ndixa íyo nuu ndivi ku ya ndee ni ndinuꞌu, ta ndiꞌi ya íyo nuu ndivi xíniñuꞌu ya nduvaꞌa ya xiꞌin ñaꞌa ya vaꞌa ni ka nuu nií kiti.

HEBREOS 9:26

Tá ndi̱kan Jesucristo tá kuꞌva i̱kan nda sutu ikán tá nuu kuiya, ta nda tá xa̱á xi̱koo ñuu ivi yóꞌó vi xíniñuꞌu ra kuvi ra kuaꞌa ni ichí, ndikuu. Sundi tiempo ya ku̱yati ndiꞌi xaꞌa ñuu ivi ndóo yo vitin kua ki̱xi ra, ta iindaa va ichí ndi̱taxi ra mií ra ndisoko ra mií ra xaꞌa yo, ta ya i̱kan ra saa ndi̱taxi ra mií ra ndaꞌa Ndioxi yakan si̱ndiꞌi xaꞌa ra kuachi yo.

1 Pedro 4:8

Chi ya ndee ni ndee nuu ndiꞌi ya kua kuꞌvi ni ini ndo kuni taꞌan ndo, chi saa kua kuchiñu ndo xaa kaꞌnu ini ndo xaꞌa kuachi na taꞌan ndo, ta xaꞌa ya kúꞌvi ni ini ndo xíni ndo na kua kuchiñu ndo xaa kaꞌnu ini ndo xaꞌa kuachi na, ni ndee ni ndee káa ya.

1 Juan 3:16

Jesucristo si̱naꞌa ra yoo ndá kuꞌva kúꞌvi ini ra xíni ra yoo chi ta̱xi ra mií ra xaꞌa yo, ndi̱xiꞌi ra xaꞌa yo. Ta saa tu yoo va xíniñuꞌu yo taxi yo mií yo xaꞌa na ñani taꞌan yo.

1 Juan 3:23

Ta ya yóꞌó kua xáꞌnda chiñu Ndioxi nuu yo: Ná kandixa yo Seꞌe ra, ra kúu Jesucristo, ta ná kuꞌvi ini yo kuni taꞌan yo, tá kuꞌva xáꞌnda chiñu ra nuu yo.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.

El Apocalipsis 5:9

Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.