Efesios 5:15 - Xochapa Mixteco

¹⁵ Yakan kiꞌin ni ndo kuenta ndá kuꞌva íyo ndo, ta köo ndo tá kuꞌva íyo naꞌa, na kíꞌvi, ta vaꞌa koo ndo tá kuꞌva íyo naꞌa, na ndíchi ni.

Efesios 5:15 Mawu Ofanana

San Mateo 10:16

Tiꞌvi i ndóꞌo̱ kuꞌun ndo ndikani ndo tuꞌun Ndioxi nuu naꞌa, ta ìyo ni kuꞌun ndo, nda tá ìyo kuaꞌan levo ñaꞌñu nuu íyo ni kiti ndivaꞌi, saa ìyo kuꞌun ndo tañu naꞌa. Tá kuꞌva íkan kiti ko̱ó, saa koo ndo, ndíchi vaꞌa koo ndo, saa tu tá kuꞌva íin kiti paloma köo kueꞌe ri, kuꞌva saa koo ndo.

San Mateo 25:2

Ta uꞌun ná ikán ta xa íyo ndúvi ná, ta inka uꞌun ná ikán ta ni köo íyo ndúvi ná.

San Mateo 27:24

Saa xi̱ni ra Pilato ya köo xíni soꞌo na ya káꞌan ra, ñaa xa̱á ndi̱siso vaꞌa ka na. Ñaa xa̱ꞌnda ra chiñu taxi na tikuii ndaꞌa ra. Saa ndi̱kata ra ndaꞌa ra nuu ndiꞌi na, káchi ra saa: ―Köo ndíso i kuachi xaꞌa ra yóꞌó, ra vaꞌa ku ra, ta koto ka mií ndo xiꞌin ra ―káchi ra xiꞌin na.

San Mateo 27:4

Saa ndi̱kaꞌan ra xiꞌin nda, káchi ra saa: ―Ndee ni ndee kuachi i̱kan i chi ndi̱taxi i taa ra vaꞌa, ra köo kuachi kúu mií ndaꞌa ndo, ya kaꞌni ndo ra ―káchi ra xiꞌin nda. Saa ndi̱kuiin nda, káꞌan nda: ―¡Unkua ndóꞌo vi ndeꞌe! ¡Köo xáꞌni ka nde mií nde! ¡Kuachi mií va un kua! ―káchi nda xiꞌin ra.

San Mateo 8:4

Saa ndi̱kaꞌan Jesús xiꞌin ra, káchi ra saa: ―Kuáꞌan, ta koto un käꞌan un xiꞌin nda iin naꞌa. Kuáꞌan nuu sutu ta kuniꞌi un ndiꞌi ñaꞌa ya káꞌan ley Ndioxi ta̱a ra Moisés, taxi un ya ndaꞌa sutu ya ná kundaa ini ndiꞌi naꞌa ya ndu̱vaꞌa un ―káchi Jesús xiꞌin ra.

San Lucas 24:25

Saa ndi̱kaꞌan ra xiꞌin nda, káchi ra saa: ―¿Ndachu kíꞌvi ni ndo, ta uꞌvi ni kúndaa ini ndo xiꞌin ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa!

1 Corintios 14:20

Ñani yo, vaꞌa ndikani ini ndo tá kuꞌva ndíkani ini naꞌa, na xa xuxa ini, ta ndïkani ini ndo tá kuꞌva ndíkani ini na vali xaꞌa ñaꞌa ya káꞌan i xiꞌin ndo. Ndisaa nuu ya väꞌa ná koo naá ni ini ndo tá kuꞌva naá ni nuu na vali nuu ya väꞌa, saa ná koo ndo.

Gálatas 3:1

¿Ndachu kíꞌvi ni íkan ndo, ñani yo, na ñuu Galacia? ¿Ta unku na sa̱ka ini ndo ya köo xíin ka ndo kandixa ndo ya ndaa si̱naꞌa nde ndóꞌo̱ xaꞌa Jesucristo? Chi tá si̱naꞌa i ndóꞌo̱ ta ndee ni va teꞌe si̱naꞌa i ndóꞌo̱ xaꞌa ya ndi̱xiꞌi ra nuu cruzin xaꞌa kuachi ndiꞌi yo.

Gálatas 3:3

Ta ya ikán kua nda̱sa xa̱á ndóꞌo̱ tá ndi̱kundikun ndo Jesucristo, sundi vitin ta kúni ndo sindoo ndaꞌa ndo Tachi I̱í Ndioxi. Saa kúni ndo ndikundikun ndo ley Ndioxi ya ta̱a ra Moisés. ¡Ndachu yáꞌa ni ini ndo saa!

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Efesios 5:33

Xaꞌa ya ñaa kua ndiꞌi ndóꞌo̱ taa, ta xíniñuꞌu ndo kuꞌvi ni ini ndo kuni ndo yá síꞌi ndo, tá kuꞌva kúꞌvi ini ndo xíni ndo mií ndo, ta saa yá síꞌi ndo, xíniñuꞌu yá xaa toꞌo yá ndóꞌo̱.

Filipenses 1:27

Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

Colosenses 1:9

Nda tá ku̱ndaa ini nde xaꞌa ndo, ta nda saa kua xa̱á nde káꞌan ni nde xaꞌa ndo xiꞌin Ndioxi. Ndúku nde ya mani nuu ra ya ná taxi ra kundaa vaꞌa ini ndo xaꞌa ya xa chi̱tuni mií ra, ya ná taxi ra ya ndíchi ni ndaꞌa ndo kundaa ini ndo xiꞌin ya xínituni vaxi nuu mií ra.

Colosenses 4:5

Ta ndóꞌo̱, vívií koo ndo nuu naꞌa, na köo kándixa Ndioxi. Ná niꞌi ndo tuꞌun vaꞌa táxi Ndioxi ndaꞌa ndo ndituꞌun ndo xiꞌin na, ta kuniñuꞌu vaꞌa ni ndo tiempo ya kaꞌan ndo xiꞌin na.

1 Tesalonicenses 5:15

Kuenta koo ndo, sïndiko koo ndo ya väꞌa nuu taꞌan ndo. Ndisaa ya vaꞌa ikan ndo xiꞌin taꞌan ndo, saa ikan ndo xiꞌin ndiꞌi naꞌa.

1 Timoteo 6:9

Chi naꞌa, na kúni ndukuika ni ñuu ivi yóꞌó, ta ìyo ni sindaꞌvi ya väꞌa na, saa koyo na nuu kuachi, chi kuaꞌa ni ya väꞌa ndíkani ini na xaꞌa ta ni süvi ya ndáa yáꞌvi kua, takua sítivi na mií na xiꞌin ya, ta xáa na kuaꞌan na ichí nuu ndiꞌi xaꞌa na.

HEBREOS 12:25

Yakan kua xíniñuꞌu ni yo kuni soꞌo yo ya káꞌan Ndioxi xiꞌin yo, süvi ka vi ya kundoꞌo yo tá ndo̱ꞌo xií sikua yo kivi köo ndi̱xiin na kuni soꞌo na ya ndi̱kaꞌan ra xiꞌin na iku Sinaí ñuu ivi yóꞌó. Tá tu köo ndi̱kuchiñu na ikán kaku na kivi ndi̱kaꞌan ra xiꞌin na ñuu ivi yóꞌó, ta ndisaa ka vi yoo, unkua ikan yo kaku yo tá tu köo xíin yo kuni soꞌo yo ya káꞌan ra xiꞌin yo kivi vitin. Saa chi kivi káꞌan ra xiꞌin yo ta nda nuu ndivi vaxi ya káꞌan ra xiꞌin yo.

Santiago 3:13

Ñani yo, tá íyo sava ndo ndíchi ni, saa íyo ni ya vaꞌa ndo, xínituni ni ndo xaꞌa ichí Iva yo Ndioxi, ta vaꞌa sinaꞌa ndo ya xiꞌin chiñu vaꞌa, ya toꞌo, saa kua sinaꞌa ndo mií ndo ya kúu ndo naꞌa, na ndee ni táku ini, na ndaꞌvi ni ini.

1 Pedro 1:22

Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

El Apocalipsis 19:10

Saa si̱kusiti i nuu tatun ikán ya xaa toꞌo ñaꞌa i, ta ndi̱kaꞌan ya xiꞌin i, káchi ya saa: ―Ïkan un saa, küsiti un nuu i, chi tá kuꞌva íyo mií un xáa chiñu un xiꞌin na ñani un na ndíkun Tata yo Jesucristo saa íyo tu yeꞌe va. Chi yo xáa chiñu nuu Ndioxi ku ndiꞌi yo, saa kándixa yo tuꞌun ya ndaa ya ndi̱kaꞌan Tata yo Jesucristo, ta ná sïndoo yo ya kándixa yo tuꞌun ra. Yakan küsiti un nuu i, iin mií Ndioxi ná xaa kaꞌnu ni yo. Chi tuꞌun ya si̱naꞌa Tata yo Jesucristo, ta iin káchi ku ya xiꞌin tuꞌun ya ndi̱kaꞌan nda ndi̱kaꞌan ndoso tuꞌun yuꞌu Ndioxi xinaꞌa, chi mií Tachi I̱í Ndioxi ta̱xi ya ndaꞌa nda ikán ndi̱kaꞌan nda ―káchi tatun ikán xiꞌin i.